1, 2. 1) ¿Baʼaxten yaʼab máakoʼobeʼ maʼ chéen chʼaʼabil u confiaroʼob tiʼ le máaxoʼob yaan autoridad tiʼoboʼ? 2) ¿Baʼax ken k-il teʼ xookaʼ?

 BEJLAʼEʼ yaʼab máakoʼobeʼ maʼ chéen chʼaʼabil u yilik u confiaroʼob tiʼ juntúul máak yaan autoridad tiʼiʼ. ¿Baʼaxten? Tumen le leyoʼoboʼ maases tiaʼan tu favor le máaxoʼob ayikʼaloʼoboʼ yéetel maʼatech u beetaʼal justicia tiʼ le óotsiloʼoboʼ. Le oʼolal le Bibliaoʼ ku yaʼalik: «Máakeʼ mantatsʼ ku pechʼ óoltik u yéet máakil utiaʼal u beetik kʼaas tiʼ» (Ecl. 8:9). Tsʼoʼoleʼ jujuntúul u nuuktakil le religiónoʼoboʼ maʼatech u kuxtaloʼob jeʼex u kaʼanskoʼoboʼ, lelaʼ tsʼoʼok u beetik u xuʼulul u confiar jujuntúul máakoʼob tiʼ Dios. Le oʼolaleʼ jach unaj k-áantik le j-xoknáaloʼob utiaʼal ka confiarnakoʼob tiʼ Diosoʼ bey xan tiʼ le máaxoʼob u tsʼaamaj utiaʼal nuʼuktikoʼonoʼ.

² Chéen baʼaleʼ u jaajileʼ maʼ chéen le j-xoknáaloʼob kʼaʼabéet u kankoʼob confiar tiʼ Dios yéetel tiʼ u kaajaloʼ baʼaxeʼ tak toʼon. Tumen kex wa úuch joʼopʼok k-meyajtik Jéeobaeʼ yaan baʼaxoʼob jeʼel u tsʼáaik a pruebail le fe yaantoʼonoʼ. Teʼ xookaʼ yaan k-ilik óoxpʼéeliʼ. Yáaxeʼ le kéen k-xok wa baʼax teʼ Bibliaoʼ. U kaʼapʼéeleʼ le kéen u yaʼaltoʼon u kaajal Jéeoba bix unaj k-beetik jujunpʼéel baʼaloʼob. Yéetel u yóoxpʼéeleʼ le kéen kʼuchuk u kʼiinil k-aktáantik junpʼéel problema.

3. ¿Baʼaxten jujunpʼéel baʼaxoʼob ku yaʼalik le Bibliaoʼ jeʼel u tsʼáaik a pruebail le confianza yaantoʼon tiʼ Jéeobaoʼ?

 ³ Le kéen k-xok le Bibliaoʼ maʼ xaaneʼ jeʼel k-tuklikeʼ: «¿Baʼaxten Jéeobaeʼ maʼ igual bix tu tratartil le máakoʼoboʼ? ¿Baʼaxten tu chʼaʼtuklaj u beetik jujunpʼéel baʼaloʼob?». Por ejemploeʼ u libroil Númeroseʼ ku yaʼalikeʼ Jéeobaeʼ tu yaʼalaj ka kíimsaʼak juntúul máak úuchik u jóokʼol  u mol siʼ tu kʼiinil sábado. Chéen baʼaleʼ u Kaʼapʼéel libroil Samueleʼ ku yaʼalikeʼ Jéeobaeʼ tu perdonartaj David le ka lúub tiʼ núupkʼebanoʼ yéetel le ka tu beetaj u kíimsaʼal u yéet máakiloʼ (Núm. 15:32, 35; 2 Sam. 12:9, 13). Maʼ xaaneʼ jeʼel k-tuklikeʼ: «¿Baʼaxten Jéeobaeʼ tu perdonartaj David, chéen baʼaleʼ maʼ tu perdonartaj le máax jóokʼ u mol siʼoʼ?». Koʼoneʼex ilik óoxpʼéel baʼax unaj k-chʼaʼik en cuenta le kéen k-xok le Bibliaoʼ.

4. ¿Bix u yáantkoʼon Génesis 18:20, 21 yéetel Deuteronomio 10:17 utiaʼal k-confiar tiʼ Jéeoba?

⁴ Yaan kʼiineʼ le Bibliaoʼ maʼatech u yaʼaliktoʼon tuláakal le baʼax úuchoʼ. Tu caso Davideʼ toʼoneʼ k-ojleʼ letiʼeʼ arrepentirnaj tiʼ tuláakal le baʼax tu beetoʼ (Sal. 51:2-4). Chéen baʼaleʼ, ¿kux túun le máax maʼ tu respetartaj u leyil le sábadooʼ?, ¿arrepentirnaj wa tiʼ le baʼax tu beetoʼ?, ¿yáax wa u desobedecertik Jéeobaoʼ?, ¿tsʼoʼok wa u yáax aʼalaʼaltiʼ maʼ u beetik, pero kex beyoʼ tu beetaj? Le Bibliaoʼ maʼatech u yaʼalik, chéen baʼaleʼ unaj k-confiar de ke Jéeobaeʼ «mix juntéen ken u beet baʼax kʼaas» (Deu. 32:4). U suukileʼ le máakoʼoboʼ maʼatech u juzgaroʼob maʼalob tumen ku chaʼik u túulchʼintaʼaloʼob chéen yoʼolal le baʼax ku yaʼalik u maasiloʼ wa yoʼolal uláakʼ baʼaloʼob. Chéen baʼaleʼ Jéeobaeʼ maʼ bey u beetkoʼ, letiʼeʼ ku chʼaʼik en cuenta tuláakal baʼal (xok Génesis 18:20, 21; Deuteronomio 10:17). Wa k-maas kʼaj óoltik Jéeoba bey xan le baʼax ku yaʼalik le Bibliaoʼ maas yaan k-confiar de ke maʼalob le baʼaxoʼob ku chʼaʼtuklik u beetkoʼ. Le oʼolaleʼ wa le kéen k-xok le Biblia yaan baʼaloʼob maʼ t-jach naʼatik baʼaxten bey úuchikoʼ unaj u kʼaʼajaltoʼoneʼ «Jéeobaeʼ mantatsʼ ku beetik baʼax toj» (Sal. 145:17).

5. Tumen j-kʼebanoʼoneʼ, ¿baʼax ku yúuchul kéen juzgarnakoʼon? (Ilawil le cuadro « Tumen j-kʼebanoʼoneʼ yaan kʼiineʼ maʼ t-juzgar maʼalob»).

⁵ Tumen j-kʼebanoʼoneʼ yaan kʼiineʼ maʼ t-juzgar maʼalob. Dioseʼ tu beetoʼon jeʼex letiʼeʼ le oʼolal k-pʼekmaj xan le injusticiaoʼ (Gén. 1:26). Chéen baʼaleʼ yaan kʼiineʼ kex k-tuklik k-ojel tuláakal le baʼax úuchoʼ maʼ tu páajtal k-juzgar maʼalob. Por ejemploeʼ Jonáseʼ tsʼíikilnaj le ka tu yilaj tsʼoʼok u chʼaʼabal óotsilil tiʼ le ninivitaʼob tumen  Jéeobaoʼ (Jon. 3:10–4:1). Pero yoʼolal le baʼax tu chʼaʼtuklaj u beetik Jéeobaoʼ tu salvartuba 120,000 ninivitaʼob. Lelaʼ ku yeʼesikeʼ chéen Jéeoba maʼatech u fallar kéen juzgarnak.

6. ¿Baʼaxten maʼ kʼaʼabéet u tsoliktoʼon Jéeoba baʼax oʼolal ku beetik wa baʼaxiʼ?

⁶ Jéeobaeʼ maʼ kʼaʼabéet u tsolik tiʼ wíinik baʼax oʼolal ku beetik wa baʼaxiʼ. Úuchjeakileʼ Jéeobaeʼ antes u beetik wa baʼaxeʼ tu chʼaʼaj en cuenta baʼax ku tuklik jujuntúul tiʼ le máaxoʼob meyajtikoʼ. Yaan kʼiin xaneʼ kex tsʼoʼok u chʼaʼtuklik u beetik wa baʼaxeʼ tu yuʼubajtiʼob baʼax ku tuklikoʼob (Gén. 18:25; Jon. 4:2, 3). Tsʼoʼoleʼ yaan horaeʼ tu tsolajtiʼob baʼaxten tu chʼaʼtuklaj u beetik (Jon. 4:10, 11). Chéen baʼaleʼ u jaajileʼ Jéeobaeʼ maʼ kʼaʼabéet u tsoliktoʼon mix baʼaliʼ. Tumen letiʼ beetmiloʼoneʼ maʼ kʼaʼabéet u kʼáatiktoʼon permiso utiaʼal u beetik wa baʼaxiʼ, mix kʼaʼabéet u tsoliktoʼon baʼaxten tu beetiʼ (Isa. 40:13, 14; 55:9).

7. ¿Yaan kʼiineʼ tiʼ máaxoʼob maʼ chéen chʼaʼabil k-confiariʼ, yéetel baʼaxten?

⁷ Tuláakloʼon k-ojel jach maʼalob baʼax ku beetik Jéeoba. Chéen baʼaleʼ yaan kʼiineʼ maʼ chéen chʼaʼabil k-ilik k-confiar tiʼ le máaxoʼob u tsʼaamaj utiaʼal nuʼuktikoʼonoʼ. Maʼ xaaneʼ jeʼel tak k-tuklikeʼ maʼ táan u beetkoʼob wa baʼax jeʼex u kʼáat Jéeobaeʼ baʼaxeʼ chéen jeʼex u tuklikoʼobeʼ. Lelaʼ bey wal úuchik tiʼ jujuntúul tiʼ le máaxoʼob meyajt úuchjeakiloʼ. Koʼoneʼex tʼaan tiʼ le ejemploʼob t-chʼaʼchiʼitaj teʼ  párrafo 3. Maʼ xaaneʼ juntúul tiʼ u láakʼtsiloʼob le máax maʼ tu respetartaj u leyil le sábadooʼ joʼopʼ u tuklik wa Moiséseʼ tu kʼáataj u yáantaj Jéeoba táanil tiʼ u yaʼalik baʼax kun úuchul. Maʼ xaan xaneʼ juntúul tiʼ u amigoʼob Uríaseʼ tu tukleʼ Davideʼ tu aprovechartaj le puesto yaantiʼ utiaʼal maʼ u castigartaʼal le ka tsʼoʼok u núupkʼebantal yéetel u yatan Uríasoʼ. Chéen baʼaleʼ maʼ u tuʼubultoʼoneʼ Jéeobaeʼ ku confiar tiʼ le máaxoʼob u tsʼaamaj utiaʼal nuʼuktik u kaajaloʼ. Le oʼolaleʼ wa toʼon maʼ t-confiar tiʼ letiʼobeʼ maʼ tu páajtal k-aʼalik wa k-confiar tiʼ Jéeoba.

8. Jeʼex u yaʼalik Hechos 16:4, 5, ¿bix u meyaj kaʼach u kaajal Jéeoba, yéetel bix u meyaj teʼ kʼiinoʼobaʼ?

⁸ Teʼ kʼiinoʼobaʼ utiaʼal u nuʼuktik u kaajaleʼ Jéeobaeʼ u tsʼaamaj le «esclavo chúukaʼan u yóol yéetel yaan u naʼat[oʼ]» (Mat. 24:45). Jeʼex le cuerpo gobernante teʼ yáax siglooʼ, teʼ kʼiinoʼobaʼ le esclavo chúukaʼan u yóoloʼ ku nuʼuktik le meyaj ku beetaʼal tiʼ tuláakal yóokʼol kaaboʼ yéetel ku yaʼalik tiʼ le ancianoʼob baʼax unaj u beetkoʼoboʼ (xok Hechos 16:4, 5). Le ancianoʼob túunoʼ ku yilkoʼob ka beetaʼak le baʼax ku yaʼalik le esclavo chúukaʼan u yóol yéetel yaan u naʼatoʼ. Wa k-beetik le baʼax ku yaʼaliktoʼon u kaajal Jéeoba yéetel le baʼax ku yaʼalik le ancianoʼoboʼ k-eʼesik k-confiar tiʼ Jéeoba.

9. ¿Tiʼ baʼaxoʼob yaan kʼiin maʼ chéen chʼaʼabil k-beetik le baʼax ku yaʼaliktoʼon le ancianoʼoboʼ, yéetel baʼaxten?

⁹ Yaan kʼiineʼ maʼ xaaneʼ maʼ chéen chʼaʼabil k-ilik k-beetik le baʼax ku yaʼalik le ancianoʼoboʼ. Maʼ sen úucheʼ yaʼab múuchʼuliloʼobeʼ fusionartaʼaboʼob yéetel yanoʼobeʼ máansaʼaboʼob yaanal circuito. Yaan tuʼuxoʼobeʼ utiaʼal u aprovechartaʼal le salónoʼoboʼ le ancianoʼoboʼ tsʼoʼok u yaʼalikoʼob tiʼ jujuntúul sukuʼunoʼob ka máankoʼob tiʼ uláakʼ múuchʼulil. Wa tiʼ toʼon ka aʼalaʼak lelaʼ maʼ xaaneʼ maʼ chéen chʼaʼabil ken k-ilil k-beetkiʼ tumen yaan u yantal k-pʼatik k-amigoʼob yéetel k-láakʼtsiloʼob.  ¿Jéeoba wa aʼalik tiʼ le ancianoʼob tuʼux unaj u bin cada juntúul sukuʼunoʼ? U jaajileʼ maʼ. Maʼ xaaneʼ le oʼolal maʼ chéen chʼaʼabil k-ilik k-beetik le baʼax ku yaʼalikoʼobtoʼonoʼ. Chéen baʼaleʼ unaj u kʼaʼajaltoʼoneʼ Jéeobaeʼ ku confiar tiʼ letiʼob, le oʼolal toʼon xaneʼ bey unaj k-beetkoʼ. *

10. Jeʼex u yaʼalik Hebreos 13:17, ¿baʼaxten unaj k-beetik le baʼax ku yaʼalik le ancianoʼoboʼ?

¹⁰ ¿Baʼaxten kex maʼ uts t-tʼaaneʼ unaj k-beetik le baʼax ku yaʼaliktoʼon le ancianoʼoboʼ? Tumen le kéen k-beeteʼ k-áantaj utiaʼal ka múuchʼ meyajnak u kaajal Dios (Efe. 4:2, 3). Tsʼoʼoleʼ wa k-eʼesik kabal óolal yéetel k-beetik le baʼax ku yaʼalik le ancianoʼoboʼ tuláakal le múuchʼulil ken u jóoʼs u yutsiloʼ (xok Hebreos 13:17). Chéen baʼaleʼ maases unaj k-beetik le baʼax ku yaʼalikoʼoboʼ tumen Jéeoba tsʼaamiloʼob. Bey túunoʼ le kéen k-uʼuy u tʼaanoʼobeʼ k-eʼesik k-confiar tiʼ Jéeoba (Hech. 20:28).

11. ¿Baʼax jeʼel u yáantkoʼon utiaʼal ka confiarnakoʼon tiʼ le ancianoʼoboʼ?

¹¹ ¿Baʼax jeʼel u yáantkoʼon utiaʼal ka confiarnakoʼon tiʼ le ancianoʼoboʼ? Unaj k-kʼaʼajsikeʼ letiʼobeʼ ku kʼáatkoʼob u yáantaj u espíritu santo Jéeoba táanil tiʼ u chʼaʼtuklikoʼob u beetkoʼob wa baʼax teʼ múuchʼuliloʼ. Ku chʼaʼikoʼob en cuenta baʼax ku yaʼalik le Bibliaoʼ bey xan le baʼax ku yaʼalik u kaajal Jéeobaoʼ. Tsʼoʼoleʼ u kʼáatoʼob lúubul utsil tiʼ Jéeoba yéetel ku yilik u beetkoʼob le baʼax maas maʼalob utiaʼal le sukuʼunoʼoboʼ. Letiʼobeʼ u yojloʼobeʼ yaan u kʼubkoʼob cuenta tiʼ Jéeoba yoʼolal le baʼax ku chʼaʼtuklik u beetkoʼoboʼ (1 Ped. 5:2, 3). Tuukulnakoʼon tiʼ lelaʼ: kex le yóokʼol kaab u jatsmuba yoʼolal u raza, u religión wa yoʼolal le políticaoʼ toʼoneʼ junmúuchʼ k-meyajtik le u jaajil Diosoʼ. Lelaʼ ku yeʼesikeʼ Jéeobaeʼ táan u bendecirtik u kaajal.

12. ¿Baʼax jeʼel u yáantik le ancianoʼob utiaʼal u yilkoʼob wa arrepentido wa máaxoʼ?

¹² Jéeobaeʼ u kʼubéentmaj tiʼ le ancianoʼob ka u kanáantoʼob le múuchʼulil utiaʼal u pʼáatal limpioiloʼ. Le oʼolaleʼ wa juntúul máax ku meyajtik Dios ku lúubul tiʼ junpʼéel nojoch kʼebaneʼ, le ancianoʼoboʼ unaj u yilkoʼob baʼax ken u beetoʼob tu yéetel. Kʼaʼabéet u yilkoʼob wa jach tu jaajil arrepentido, utiaʼal lelaʼ jeʼel u páajtal u tuukuloʼob tiʼ le kʼáatchiʼobaʼ: ¿Jach wa tu jaajil u pʼekmaj le baʼax kʼaas tu beetoʼ? ¿Tsʼoʼok wa u chʼaʼtuklik maʼ u kaʼa lúubul tiʼ le kʼebanoʼ? Wa u amigoʼob túulchʼint u beet le baʼax kʼaasoʼ, ¿tsʼoʼok wa u chʼaʼtuklik maʼ u kaʼa biskuba tu yéeteloʼob? Le ancianoʼoboʼ ku oraroʼob tiʼ Jéeoba, ku chʼaʼikoʼob en cuenta le baʼax ku yaʼalik le Bibliaoʼ bey xan le bix u yilik le máak le baʼax kʼaas tu beetoʼ. Le kéen tsʼoʼokkeʼ ku yilkoʼob wa jeʼel u páajtal u pʼáatal teʼ múuchʼuliloʼ wa kʼaʼabéet u expulsartaʼal (1 Cor. 5:11-13).

13. Maʼ xaaneʼ, ¿baʼax jeʼel k-tuklik wa ku expulsartaʼal juntúul k-láakʼtsil wa k-amigoeʼ?

¹³ Le kéen expulsartaʼak juntúul máax maʼ k-amigo wa maʼ k-láakʼtsileʼ maʼ xaaneʼ maʼatech k-aʼalik mix baʼal. Chéen baʼaleʼ, ¿kux túun wa ku expulsartaʼal juntúul máax k-yaabiltmaj? Le kéen úuchuk beyoʼ yaan u yantal k-eʼesik wa jach tu jaajil k-confiar tiʼ le ancianoʼoboʼ. Tumen maʼ xaaneʼ jeʼel k-tuklikeʼ yaan baʼaxoʼob maʼ tu chʼaʼajoʼob en cuentaiʼ wa maʼ juzgarnajoʼob jeʼex u kʼáat Jéeobaoʼ. ¿Baʼax jeʼel u yáantkoʼon utiaʼal k-apoyartik le baʼax tu chʼaʼtuklaj u beetik le ancianoʼoboʼ?

14. ¿Baʼax unaj k-kʼaʼajsik wa ku expulsartaʼal juntúul k-láakʼtsil wa juntúul k-amigo?

 ¹⁴ Unaj k-kʼaʼajsikeʼ Jéeobaeʼ ku yaʼalik ka expulsartaʼak le máax ku kʼebantaloʼ tumen u yojel jeʼel u taasik utsil tiʼ le múuchʼuliloʼ bey xan tiʼ le máakoʼ. Wa ka chaʼabak u pʼáatal ichil le múuchʼulil juntúul máax maʼ tu arrepentireʼ jeʼel u beetik kʼaas tiʼ le múuchʼuliloʼ (Gál. 5:9). Tsʼoʼoleʼ maʼ ken u tsʼáa cuenta wa kʼaas le baʼax tu beetoʼ, yéetel utiaʼal u biskuba yéetel Jéeobaeʼ kʼaʼabéet u kʼexik u tuukul bey xan baʼax ku beetik (Ecl. 8:11). Unaj k-confiar de ke le ancianoʼoboʼ yaʼab baʼaxoʼob ku chʼaʼikoʼob en cuenta utiaʼal u yilkoʼob wa juntúul máakeʼ yaan u expulsartaʼal wa yaan u chaʼabal u pʼáatal teʼ múuchʼuliloʼ. Jeʼex le juezoʼob yanoʼob kaʼach tu úuchben kaajil Israeloʼ, le ancianoʼob xanoʼ u yojloʼobeʼ táan u juzgaroʼob tu kʼaabaʼ Jéeoba, maʼ tu kʼaabaʼ wíinikiʼ (2 Cró. 19:6, 7).

15. ¿Baʼaxten maas unaj k-ilik k-confiar tiʼ Jéeoba teʼ kʼiinoʼobaʼ?

¹⁵ Jach taʼaytak u xuʼulsaʼal tiʼ le kʼasaʼan yóokʼol kaabaʼ le oʼolaleʼ maas unaj k-ilik k-confiar tiʼ Jéeoba desde beoraaʼ, tumen tu kʼiinil le nojoch muʼyajiloʼ maʼ xaaneʼ yaan u yaʼalaʼaltoʼon ka k-beet baʼaloʼob jelaʼan k-ilik. U jaajileʼ Jéeobaeʼ maʼ ken u tʼanoʼon desde teʼ kaʼanoʼ, le máaxoʼob ken u yaʼaloʼobtoʼon baʼax ken k-beetoʼ letiʼe máaxoʼob u tsʼaamaj utiaʼal nuʼuktikoʼonoʼ. Teʼ kʼiinoʼob jeʼeloʼ maʼ u súutukil utiaʼal k-tuklik wa le baʼaxoʼob ku yaʼalaʼaltoʼon ka k-beetoʼ tiʼ Jéeoba u taal bey xan wa le sukuʼunoʼob nuʼuktikoʼonoʼ táan u beetkoʼob le baʼax uts tu tʼaan Jéeobaoʼ. ¿Yaan wa k-confiar tiʼ Jéeoba yéetel tiʼ u kaajal teʼ kʼiinoʼoboʼ? Junpʼéel baʼax kun áantkoʼoneʼ letiʼe ka k-il baʼax táan k-beetik bejlaʼa le kéen aʼalaʼaktoʼon ka k-beet wa baʼaxoʼ. Wa bejlaʼa k-ilik k-beetik tu séebaʼanil le baʼax ku yaʼaliktoʼon u kaajal Jéeobaoʼ maʼ xaaneʼ bey ken k-beetil xan tu kʼiiniloʼob le nojoch muʼyajiloʼ (Luc. 16:10).

16. Maʼ kun xáantaleʼ, ¿bix kun antal k-eʼesik wa jach tu jaajil k-confiar tiʼ Jéeoba?

¹⁶ Maʼalob ka tuukulnakoʼon tiʼ baʼax jeʼel k-beetik le kéen kʼuchuk u kʼiinil u juzgartaʼal le máakoʼob tumen Jéeobaoʼ. Beoraaʼ le máaxoʼob maʼatech u meyajtikoʼob Jéeoba jeʼex k-láakʼtsiloʼoboʼ yaantiʼob esperanza, chéen baʼaleʼ tu kʼiinil Armagedóneʼ Jéeobaeʼ yaan u pʼatik tu kʼab Jesús utiaʼal u yilik baʼax kun úuchul tu yéeteloʼob (Mat. 25:31-33; 2 Tes. 1:7-9).  Maʼ toʼon ken k-aʼal tiʼ máax unaj u chʼaʼabal óotsililiʼ (Mat. 25:34, 41, 46). ¿Yaan wa k-confiar tiʼ Jéeoba wa yaan u xuʼulul k-meyajtik tumen maʼ de acuerdoʼon yéetel le baʼax tu beetoʼ? Lelaʼ ku yeʼesiktoʼoneʼ utiaʼal k-confiar tiʼ Jéeoba teʼ kʼiinoʼob ku taaloʼoboʼ unaj k-ilik k-maas confiar tiʼ letiʼ desde beoraaʼ.

17. ¿Baʼax utsil ken u taas le baʼax ken u chʼaʼtukult u beetik Jéeoba teʼ kʼiinoʼob ku taaloʼ?

¹⁷ ¡Chéen tukult bix ken k-uʼuyilba teʼ túumben luʼum le kéen k-il le utsiloʼob ken u taas le baʼaxoʼob tu chʼaʼtuklaj u beetik Jéeobaoʼ! Maʼ kun antal le religiónoʼob maʼatech u kaʼanskoʼob u jaajiloʼ, mix le gobiernoʼob yéetel uláakʼ baʼaloʼob beetik u muʼyaj máakoʼ. Le máaxoʼob k-yaabiltmoʼoboʼ maʼ kun kʼojaʼantaloʼob, maʼ kun chʼíijloʼob, mix kun kíimloʼob. Satanás yéetel u demonioʼobeʼ yaan u kʼaʼaloʼob ich 1,000 años. Tuláakal le kʼaas tu beetoʼoboʼ yaan u yutskíintaʼal tumen Dios (Apo. 20:2, 3). ¡Jach yaan u kiʼimaktal k-óol úuchik k-apoyartik tuláakal le baʼaxoʼob tu chʼaʼtuklaj u beetik Jéeobaoʼ!

18. ¿Baʼax ku kaʼansiktoʼon le baʼax úuch tiʼ le israelitaʼob ku chʼaʼchiʼitaʼal teʼ Números 11:4-6 yéetel 21:5?

¹⁸ Teʼ túumben luʼumoʼ, ¿yaan wa baʼax jeʼel u tsʼáaik a pruebail le confianza yaantoʼon tiʼ Jéeobaoʼ? Koʼox tuukul tiʼ le baʼax úuch tiʼ le israelitaʼob le maʼ úuch jóoʼsaʼakoʼob Egipto tumen Jéeobaoʼ. Yanoʼobeʼ úuchik u kʼaʼajsikoʼob le baʼaxoʼob ku jaantikoʼob Egiptooʼ joʼopʼ u quejarkubaʼob tumen chéen maná bin ku jaantikoʼob teʼ desiertooʼ (xok Números 11:4-6; 21:5). Le kéen tsʼoʼokok le nojoch muʼyajiloʼ, ¿jeʼel wa xan u yúuchultoʼon junpʼéel baʼal beyoʼ? Toʼoneʼ maʼ k-ojel bukaʼaj tiempo ken u bistoʼon k-limpiartik le Luʼum utiaʼal k-sutik junpʼéel paraísoiloʼ. Maʼ xaaneʼ tu káajbaleʼ maʼ chéen chʼaʼabil ken u yilil u kuxtal máakiʼ tumen yaʼab baʼal yaan beetbil. ¿Yaan wa túun u joʼopʼol k-quejartikba? Wa k-ilik k-apreciartik le baʼaxoʼob ku tsʼáaiktoʼon Jéeoba bejlaʼeʼ maʼ xaaneʼ bey xan ken k-beetil teʼ kʼiinoʼob ku taaloʼ.

19. ¿Baʼax tsʼoʼok k-kanik teʼ xookaʼ?

¹⁹ Teʼ xookaʼ tsʼoʼok k-kanikeʼ unaj k-confiar de ke Jéeobaeʼ mantatsʼ ku chʼaʼtuklik u beetik baʼax maʼalob. Tsʼoʼoleʼ unaj k-confiar tiʼ le máaxoʼob u tsʼaamaj utiaʼal nuʼuktikoʼonoʼ. Mantatsʼ unaj k-kʼaʼajsik le baʼax tu yaʼalaj Jéeoba tiʼ le profeta Isaíasaʼ: «Wa ka pʼáatleʼex tranquiloil yéetel ka weʼeskeʼex a kʼubmaj a wóoleʼex tiʼ teneʼ yaan u yantal a muukʼeʼex» (Isa. 30:15).