Teʼ kaʼanoʼ Jesúseʼ tu kanaj múul meyaj yéetel u maasil. Le ka taal way Luʼumeʼ tu yáantaj u discípuloʼob utiaʼal u múul meyajoʼob. ¿Baʼax ku kaʼansiktoʼon u ejemplo Jesús? Koʼoneʼex ilik óoxpʼéel baʼax ku yaʼalik le Biblia jach jeʼel u yáantkoʼon utiaʼal k-bisikba maʼalob yéetel u maasileʼ bey xan utiaʼal k-múul meyaj tu yéeteloʼob.

Le máax u yojel múul meyaj yéetel u maasileʼ kabal u yóol, nojoch baʼal u yilik le meyaj ku beetik u maasiloʼ yéetel maʼatech u creerkuba. Jesúseʼ tu yileʼ u Taataeʼ jach kabal u yóol, kex letiʼ beet tuláakal baʼaleʼ tu yeʼeseʼ jach importante u yilik le meyaj tu beetaj u Hijooʼ. Lelaʼ bey u yeʼesik le baʼax tu yaʼalaj Jéeoba teʼ Génesis 1:26, teʼeloʼ ku yaʼalik: «Koʼox beetik le máak jeʼex toʼoneʼ». Le ka tu yaʼalaj Jéeoba le tʼaanoʼobaʼ Jesúseʼ tu tsʼáaj cuentaeʼ u Taataeʼ jach kabal u yóol (Sal. 18:35).

Le ka taal Jesús way Luʼumeʼ tu yeʼesaj jach kabal u yóol. Le ka alabartaʼab tumen le máakoʼoboʼ tu yaʼaleʼ chéen Jéeoba unaj u alabartaʼal (Mar. 10:17, 18; Juan 7:15, 16). Letiʼeʼ jach maʼalob úuchik u biskuba yéetel u discípuloʼob, tu tratartoʼob bey u amigoʼobeʼ maʼ bey u esclavoʼobeʼ (Juan 15:15). Jesúseʼ utiaʼal u yeʼesik tiʼ u discípuloʼob kʼaʼabéet u yeʼeskoʼob kabal óolaleʼ tu pʼoʼaj u yookoʼob (Juan 13:5, 12-14). Toʼon xaneʼ kʼaʼabéet k-yaabiltik u maasil yéetel k-kaxtik táanil u yutsiloʼob. Wa k-respetartik u maasil yéetel maʼ t-kaxtik ka alabartaʼakoʼoneʼ  yaʼab baʼaloʼob kun páajtal k-beetik (Rom. 12:10).

Le máax kabal u yóoloʼ u yojleʼ «le baʼax ku chʼaʼtuklaʼal tumen yaʼab máakoʼobeʼ ku jóokʼol utsil» (Pro. 15:22). Unaj u kʼaʼajaltoʼoneʼ kex yaʼab baʼal u yojel u beet máakeʼ, mix máak u yojel u beet tuláakal baʼal. Tak Jesúseʼ tu yaʼaleʼ yaan baʼaloʼob maʼ u yojel kaʼachiʼ (Mat. 24:36). Letiʼeʼ tu chʼaʼaj en cuenta baʼax ku tuklik u discípuloʼob kex kʼebanoʼob (Mat. 16:13-16). Le oʼolal letiʼobeʼ jach uts tu tʼaan u yantaloʼob tu yéetel. Toʼon xaneʼ wa k-eʼesik kabal óolal, k-chʼaʼik en cuenta yaan baʼaloʼob maʼ k-ojel beetiʼ yéetel k-chʼaʼik en cuenta baʼax ku tuklik u maasileʼ yaan u yantal jeetsʼelil ichiloʼon yéetel yaan u jóokʼol maʼalobil le baʼaxoʼob k-chʼaʼtuklik k-beetkoʼ.

Le ancianoʼoboʼ kʼaʼabéet u yeʼeskoʼob kabal óolal jeʼex Jesúseʼ. Kʼaʼabéet u kʼaʼajskoʼobeʼ le espíritu santooʼ jeʼel u yáantik le múuchʼ ancianoʼob utiaʼal u chʼaʼtuklikoʼob maʼalob baʼax ken u beetoʼobeʼ. Wa le kéen u muchʼubaʼob ku yeʼeskoʼob kabal óolal yéetel ku yilkoʼob ka yanak jeetsʼelil ichiloʼobeʼ le baʼax ken u chʼaʼtukloʼoboʼ jach yaan u taasik utsil tiʼ le múuchʼuliloʼ.

Juntúul máak uts u puksiʼikʼaleʼ ku chʼaʼik en cuenta u maasil yéetel maʼatech u xachkuba u yaʼal ka beetaʼak junpʼéel baʼal chéen jeʼex u kʼáat letiʼeʼ. Jesúseʼ yaʼab u téenel tu yilaj u yeʼesik u yutsil Jéeoba. Por ejemploeʼ, túuxtaʼab u salvart le máakoʼob kex ku náajmatik u kíimloʼoboʼ (Juan 3:16).

Jesúseʼ tu chʼaʼaj en cuenta u maasil. Por ejemploeʼ, le ka kʼáataʼab áantajtiʼ tumen juntúul koʼolel feniciaileʼ tu yáantaj (Mat. 15:22-28). Tsʼoʼoleʼ tu chʼaʼaj en cuenta u discípuloʼobeʼ kʼeban máakoʼob le oʼolal yaan kʼiineʼ ku beetkoʼob baʼaloʼob maʼ maʼalobtakiʼ. Juntéenjeakeʼ le ka tu yaʼalaj Pedro maʼ u kʼaj óol Jesúseʼ letiʼeʼ tu perdonartaj, ka tsʼoʼokeʼ tu tsʼáaj nukuch meyajoʼob u beete (Luc. 22:32; Juan 21:17; Hech. 2:14; 8:14-17; 10:44, 45). Le baʼax tu beetaj Jesúsoʼ ku kaʼansiktoʼoneʼ kʼaʼabéet k-chʼaʼik en cuenta u maasil, beyoʼ tuláakal máak ken u yileʼ uts k-puksiʼikʼal (Fili. 4:5).

Wa uts k-puksiʼikʼal yéetel k-chʼaʼik en cuenta u maasileʼ yaan u páajtal k-múul meyaj yéetel jeʼel máaxakeʼ. Jesúseʼ jach maʼalob tu  bisiluba yéetel u maasil. Le oʼolal pʼektaʼab tumen jujuntúul máakoʼobeʼ ka tiaʼaloʼobeʼ letiʼeʼ ku biskuba yéetel le máaxoʼob cobrartik impuestoʼoboʼ bey xan yéetel le j-kʼeban máakoʼoboʼ (Mat. 11:19). ¿Jeʼel wa u páajtal k-beetik jeʼex Jesúseʼ? ¿Jeʼel wa u páajtal k-múul meyaj yéetel uláakʼ máakoʼob jelaʼanoʼob tiʼ toʼoneʼ? Louis, juntúul sukuʼun meyajnaj Betel, tu beetaj u circuitoil yéetel múul meyajnaj yéetel sukuʼunoʼob jejeláas bix líiʼsaʼaniloʼobeʼ, ku yaʼalik: «Cada grupo sukuʼunoʼob kin kʼaj óoltikeʼ kin wilkoʼob bey junpʼéel pakʼ beetaʼan yéetel tuunichoʼob jejeláas u nuuktakiloʼob yéetel jejeláas u formailoʼobeʼ. Le tuunichoʼoboʼ wa ku colocartaʼaloʼob tubeeleʼ ku béeytal u beetaʼal junpʼéel pakʼ tu yéeteloʼob. Tsʼoʼoleʼ tsʼoʼok xan in wilik in maas jatsʼutskíintik in modos utiaʼal in meyaj ich jeetsʼelil yéetel utiaʼal u jóokʼol maʼalobil le meyaj ku tsʼaʼabalten in beetoʼ». ¿Máasaʼ jatsʼuts bix u tuukul le sukuʼunoʼ?

¿Bix jeʼel k-eʼesik k-chʼaʼik en cuenta le sukuʼunoʼob teʼ múuchʼuliloʼ? Maʼ xaaneʼ teʼ grupo tuʼux yanoʼonoʼ yaan sukuʼunoʼob jejeláas u jaʼabiloʼob yéetel jejeláas meyaj ku beetkoʼob. Le kéen kʼaʼaytajnakoʼon tu yéeteloʼobeʼ unaj k-chʼaʼik en cuenta bix suukil u beetkoʼob. Beyoʼ yaan u kiʼimaktal u yóoloʼob u kʼaʼaytajoʼob t-éetel.

Le máaxoʼob u yojloʼob múul meyaj yéetel u maasiloʼ ku síijil tu puksiʼikʼaloʼob u síikoʼob baʼaloʼob tiʼ u maasil wa u compartirkoʼob wa baʼax tu yéeteloʼob (1 Tim. 6:18). Jesúseʼ le ka meyajnaj yéetel u Taataeʼ tu yileʼ maʼatech u taʼakaʼal mix baʼal tiʼ. «Le ka tu beetaj [Jéeoba] le kaʼanoʼ» Jesúseʼ tiaʼaniʼ yéetel béeychaj u kaanbal tiʼ letiʼ (Pro. 8:27). Le ka taal Jesús way Luʼumeʼ tu tsikbaltaj xan tiʼ u discípuloʼob le baʼax tu kanaj tiʼ u Taataoʼ (Juan 15:15). Jeʼex Jéeobaeʼ toʼon xaneʼ unaj k-kaʼansik tiʼ u maasil le baʼax k-ojel k-beetoʼ. Juntúul máax u yojel múul meyajeʼ maʼatech u taʼakik mix baʼal tiʼ u maasil chéen utiaʼal u controlarkoʼob, baʼaxeʼ yéetel kiʼimak óolal ku kaʼansiktiʼob le baʼaxoʼob u yojel u beetoʼ.

Uláakʼ baʼax jeʼel k-síik tiʼ u maasileʼ letiʼe baʼaxoʼob k-aʼalik utiaʼal k-líiʼsik u yóoloʼoboʼ. ¿Máasaʼ jach ku kiʼimaktal k-óol kéen ilaʼak tumen u maasil le meyaj k-beetik yéetel le kéen tsʼaʼabaktoʼon u graciasiloʼ? Jesúseʼ tu jóoʼsaj tiempo utiaʼal u yaʼalik tiʼ u discípuloʼob jach maʼalob le meyaj ku beetkoʼoboʼ (ket yéetel Mateo 25:19-23; Luc. 10:17-20). Hasta tu yaʼaleʼ u discípuloʼobeʼ yaan u beetkoʼob meyajoʼob maas nuuktak ke le tu beetaj letiʼoʼ (Juan 14:12). Tsʼoʼoleʼ le áakʼab táanil tiʼ u kíimiloʼ utiaʼal u felicitartik u apóstoloʼobeʼ tu yaʼalajtiʼob: «Teʼexeʼ tsʼoʼok a pʼáatleʼex tin wiknal tak teʼ súutukiloʼob táan in probartaʼaloʼ» (Luc. 22:28). ¡Le baʼax aʼalaʼabtiʼoboʼ tu beetaj wal u jach kiʼimaktal u yóoloʼob yéetel u chúukpajal u yóoloʼobeʼ! Wa toʼon xan k-líiʼsik u yóol u maasileʼ yaan u kiʼimaktal u yóoloʼob yéetel yaan u maas meyajtikoʼob Jéeoba.

Juntúul sukuʼun ku kʼaabaʼtik Kayodeeʼ, ku yaʼalik: «Utiaʼal a múul meyaj yéetel u maasileʼ maʼ kʼaʼabéet perfectoechiʼ, chéen kʼaʼabéet a wáantkoʼob utiaʼal u kiʼimaktal u yóoloʼob yéetel le meyaj ku beetkoʼoboʼ». Techeʼ, ¿bix a wilaʼal tumen u maasil? Maʼ xaaneʼ jeʼel u páajtal a kʼáatik tiʼ le sukuʼunoʼob bix u yilkechoʼoboʼ. ¿Kiʼimak wa u yóoloʼob jeʼex le discípuloʼob múul meyajnajoʼob yéetel Jesúsoʼ? Wa beyoʼ jeʼel u páajtal a waʼalik le baʼax tu yaʼalaj apóstol Pabloaʼ: «Táan k-áantkeʼex utiaʼal ka kiʼimakchajak a wóoleʼex» (2 Cor. 1:24).