Chéen baʼaleʼ le ka maas chan nojochchajeneʼ pʼáat maʼ tin jach biskinba yéetel Jéeoba. Kin tuklikeʼ in wéet xookoʼobeʼ ku páajtal u beetkoʼob jeʼel baʼaxak u kʼáatoʼobeʼ baʼaleʼ teneʼ maʼ. Le baʼaxoʼob ku yaʼalikten in taataʼob yéetel le baʼax ku yaʼalik le Bibliaoʼ kin wuʼuyik maʼ tu chaʼik in beetik mix baʼal. Pʼáat bey junpʼéel kuuch in meyajtik Jéeobaeʼ. Kex kin creertik yaan Jéeobaeʼ maʼ tin wilik kaʼach bey juntúul in amigoeʼ.

Teneʼ maʼ xuʼul in jóokʼol kʼaʼaytajiʼ baʼaleʼ chéen kin jóokʼol kaʼach utiaʼal ka ilaʼak. Le kéen jóokʼken kʼaʼaytajeʼ maʼatech in prepararkinba, le oʼolal ku difíciltal in tsikbal yéetel le máakoʼoboʼ. Pʼáat maʼatech in beetik revisitaʼob, maʼatech in tsʼáaik xook yéetel maʼ kiʼimak in wóol teʼ kʼaʼaytajoʼ. Hasta joʼopʼ in tuklik: «¿Bix u páajtal u jóokʼol kʼaʼaytaj máak cada semana yéetel cada mes?».

Le ka tu tsʼáajten 17 añoseʼ jach taak in jóokʼol tin wotoch. Le oʼolal tin chʼaʼaj in nuʼukuloʼobeʼ ka binen Australia. In taataʼobeʼ jach tu preocupartubaʼob tin woʼolal, baʼaleʼ ku tuklikoʼob kaʼacheʼ teneʼ yaan u seguer in meyajtik Jéeoba teʼeloʼ.

 Teʼ Australiaoʼ joʼopʼ in maas náachtal tiʼ Jéeoba. Pʼáat maʼ tin bin tiʼ yaʼab muchʼtáambaloʼob yéetel kin muchʼkinba yéetel uláakʼ táankelmoʼob. Letiʼobeʼ kex ku binoʼob muchʼtáambaleʼ ku jóokʼloʼob xan káaltal yéetel óokʼot jejeláas tuʼuxoʼob. Beoraaʼ kin tsʼáaik cuentaeʼ kex tiaʼanen kaʼach ichil u kaajal Jéeobaeʼ táan bakáan in kuxtal jeʼex u máakiloʼob le yóokʼol kaaboʼ. Chéen baʼaleʼ kex beyoʼ mix tuʼux kaʼach kiʼimak in wóol.

Le ka máan dos añoseʼ tin kʼaj óoltaj juntúul kiik tu beetaj in jach tuklik baʼax táan in beetik yéetel in kuxtal. Teʼ naj tuʼux yanen kaʼachoʼ tiʼ kajaʼan xan uláakʼ cinco kiikoʼobiʼ. Juntéenjeak le ka kʼuch le superintendente yéetel u yatanoʼ, toʼoneʼ t-aʼalajtiʼ ka pʼáatak teʼ tuʼux kajaʼanoʼonoʼ. Mientras letiʼ táan u beetik jujunpʼéel meyajoʼob teʼ múuchʼuliloʼ, Tamara, u yataneʼ, ku máansik tiempo t-éetel yéetel jach ku kiʼital le tsikbaloʼ. Jatsʼuts tin wilil kex u tsʼaamaj u yóol u meyajt Jéeobaeʼ uts tu tʼaan u máansik tiempo t-éetel.

Tamaraeʼ jach u yaabiltmaj le baʼax ku yaʼalik le Bibliaoʼ yéetel uts tu tʼaan u jóokʼol kʼaʼaytaj. Tin wileʼ letiʼeʼ kiʼimak u yóol u meyajtik Jéeoba, mientras teneʼ maʼ kiʼimak in wóol yéetel le baʼax kin beetkoʼ. Le bix u tuukul yéetel le baʼax ku beetkoʼ jach tu yáanten. Tu kʼaʼajsajteneʼ Jéeobaeʼ u kʼáat ka k-meyajt «yéetel kiʼimak óolal» (Sal. 100:2).

Teen kaʼacheʼ taak xan u kiʼimaktal in wóol jeʼex Tamaraeʼ, pero tin tsʼáaj cuenta yaan jujunpʼéel baʼaloʼob kʼaʼabéet in kʼexik tin kuxtal. Tu bisajten tiempo baʼaleʼ tin beetaj jujunpʼíitil. Yáaxeʼ káaj in prepararkinba utiaʼal in jóokʼol kʼaʼaytaj yéetel kin beetik in precursora auxiliaril cada wa baʼax kʼiin. Leloʼ jach tu yáanten utiaʼal u xuʼulul in jach nerviosatal le kéen tsikbalnaken yéetel le máakoʼoboʼ. Kiʼimak in wóol u meyajten kaʼach le Biblia mantatsʼoʼ. Jach maʼ xáanchajeʼ ka tin chʼaʼtuklaj maʼ u xuʼulul in beetik in precursora auxiliaril.

Káaj in biskinba yéetel sukuʼunoʼob jejeláas u jaʼabiloʼob yéetel u tsʼaamaj u yóol u meyajtoʼob Jéeoba. Letiʼobeʼ tu yáantenoʼob utiaʼal in wilik baʼax in tsʼaamaj táanil ichil in kuxtal yéetel  tu yáantenoʼob in jóoʼs tiempo utiaʼal in xakʼalxook. Jeʼex u máan le kʼiinoʼoboʼ maas kiʼimakchaj in wóol in jóokʼol kʼaʼaytaj yéetel ka tsʼoʼokeʼ tin beetaj tak in precursora regularil. Pʼáat jach kiʼimak in wóol ichil u kaajal Jéeoba.

Le ka máan junpʼéel añoeʼ tin kʼaj óoltaj Alex, juntúul sukuʼun uts, jach u yaabiltmaj Jéeoba yéetel uts tu tʼaan u jóokʼol kʼaʼaytaj. Letiʼeʼ siervo ministerial kaʼachi yéetel tsʼoʼok seis años joʼopʼok u beetik u precursoril. Tsʼokaʼaniliʼ u bin áantaj wa jaypʼéel meses tu luʼumil Malauieʼ, teʼeloʼ tu máansaj tiempo yéetel jujuntúul misioneroʼob. Letiʼobeʼ tu yáantoʼob Alex utiaʼal u tsʼáaik táanil u Reino Dios.

Tu añoil 2003, tsʼoʼok in beel yéetel Alex. Toʼoneʼ maʼ xuʼuluk k-beetik k-precursoril tak bejlaʼeʼ. Yaʼab baʼaloʼob tsʼoʼok k-kanik, yéetel Jéeobaeʼ jach tsʼoʼok u bendecirkoʼon.

Tu añoil 2009, invitartaʼaboʼon utiaʼal k-beetik k-misioneroil tu luʼumil Timor Oriental, lelaʼ tiaʼan naatsʼ tiʼ u luʼumil Indonesiaeʼ. Jach kiʼimak k-óol kaʼachi, baʼaleʼ chan saajkoʼon xan. Le ka máan cinco meseseʼ kʼuchoʼon Dili, u noj kaajil.

Yanchaj k-kanik yaʼab baʼaloʼob, jeʼex le bix u kuxtal le máakoʼoboʼ, le idioma ku tʼankoʼoboʼ yéetel le janal suuk u jaantikoʼoboʼ. Teʼ kʼaʼaytajoʼ u suukileʼ k-ilik máakoʼob jach óotsiloʼob, máakoʼob maʼ u yojloʼob xookiʼ wa táan u muʼyajtikoʼob uláakʼ baʼaloʼob. T-kʼaj óoltaj xan yaʼab máakoʼob uchaʼan loob tiʼob tu yoʼolal le guerraoʼ wa yoʼolal le máaxoʼob kʼasaʼanoʼob yanoʼob teʼeloʼ. *

Jach jatsʼuts u kʼaʼaytaj máak teʼeloʼ. Juntéenjeak jokʼaʼanen kʼaʼaytajeʼ tin wilaj juntúul chan x-chʼúupal ku kʼaabaʼtik María, 13 años  yaantiʼ yéetel jach lubaʼan u yóol. * Letiʼeʼ tu yaʼalajteneʼ tsʼoʼok u máan wa jaypʼéel años kíimik u maama yéetel óoliʼ maʼatech u yilik u papá. Jeʼex yaʼab mejen paalaloʼob teʼeloʼ, Maríaeʼ ku yuʼubik minaʼan u biilal u kuxtal. Kʼajaʼanten juntéenjeakeʼ táan u yokʼol le táan u tsikbaltikten le baʼax ku yúuchultiʼoʼ, baʼaleʼ como maʼatech in tʼanik u idiomaeʼ maʼ tin naʼataj baʼax ku yaʼalikiʼ. Le oʼolal tin beetaj junpʼéel oracióneʼ ka tin kʼáataj tiʼ Jéeoba ka u yáanten in líiʼs u yóol, ka túun káaj in xokik jujunpʼéel tekstoʼob tiʼ. Le ka máan le añosoʼ tin wilaj bix kʼexpajik u tuukul yéetel u kuxtal María. Letiʼeʼ okjaʼanaji yéetel bejlaʼeʼ ku tsʼáaik xook tiʼ le máakoʼoboʼ. Bejlaʼa tiaʼan ichil le múuchʼuliloʼ ku yuʼubik tiaʼan ichil junpʼéel nojoch familiaeʼ yéetel ku yuʼubik yaabiltaʼan.

Jéeobaeʼ jach tsʼoʼok u bendecirtik le kʼaʼaytaj ku beetaʼal tu luʼumil Timor Orientaloʼ. U maas yaʼabil le j-kʼaʼaytajoʼoboʼ tsʼoʼok u yokjaʼob teʼ tu tsʼook 10 añosaʼ, kex beyoʼ yaʼab tiʼ letiʼobeʼ precursoroʼob, siervo ministerialoʼob wa ancianoʼob. Yaan tiʼ letiʼobeʼ ku meyajoʼob teʼ oficinaʼob tuʼux ku yúuchul traduciroʼ. Teneʼ jach kiʼimak in wóol kaʼach in wuʼuyik u kʼaayoʼob teʼ muchʼtáambaloʼoboʼ, in wilik bix u cheʼejoʼob bey xan bix u tsʼáaik u yóol u meyajtoʼob Jéeoba.

Le bix u kuxtal máak Timor Orientaloʼ jach jelaʼan tiʼ bix u kuxtal máak Australia. Kex beyoʼ jach kiʼimak in wóol yanchajiken Timor Oriental. Yaʼab u téeneleʼ teʼ camión tuʼux k-viajaroʼ tiʼ ku bin kaʼach máakoʼob u manmajoʼob kay bey xan yaʼab verduraʼob. Yaan kʼiin xaneʼ teʼ najoʼob tuʼux k-bin tsʼaa xookoʼ jach ku beetik ooxol, u pisoileʼ de luʼum yéetel tiʼ ku máan u yáalkab le x-kaaxoʼob teʼ tuʼux yanoʼonoʼ. Kex beyoʼ yaʼab u téenel tin tuklaj: «¡Jach jatsʼuts u yantal máak wayeʼ!».

Teneʼ jach kin tsʼáaik u graciasil tiʼ in taataʼob úuchik u kaʼanskoʼobten u jaajil desde tin chichnil. Bey xan úuchik u yáantkenoʼob le táan in chan nojochtaloʼ. Le baʼax ku yaʼalik Proverbios 22:6, tsʼoʼok u béeytal ichil in kuxtal. In maama yéetel in papáeʼ jach kiʼimak u yóoloʼob u yilkoʼob bix k-meyajtik Jéeoba bejlaʼeʼ. Desde tu añoil 2016, in wíichameʼ tsʼaʼab u beet u superintendente tiʼ circuitoil teʼ territorio ku nuʼuktaʼal tumen u Betelil Australasiaoʼ.

¡Bejlaʼeʼ jach kiʼimak in wóol in kʼaʼaytaj! ¡Kensa bix úuchik in wilik bey junpʼéel kuuch in meyajtik Jéeobaeʼ! Tsʼoʼok in wilkeʼ le u meyajtik máak Jéeoba yéetel tuláakal u puksiʼikʼaloʼ letiʼe baʼax taasik kiʼimak óolal tiʼ máakoʼ. Le 18 años tsʼoʼok k-múul meyajtik Jéeoba yéetel Alexoʼ letiʼe baʼax maas tsʼoʼok u taasikten kiʼimak óolaloʼ. Tsʼoʼok in wilik jach jaaj le baʼax tu yaʼalaj David tiʼ Jéeobaaʼ: «Tuláakal le máaxoʼob ku natsʼkubaʼob tiʼ techoʼ yaan u kiʼimaktal u yóoloʼob. Mantatsʼ kun awatoʼob tumen kiʼimak u yóoloʼob. [...] Le máaxoʼob yaabiltmil a kʼaabaʼoʼ yaan u kiʼimaktal u yóoloʼob» (Sal. 5:11).