U TUʼUSUL máak tumen u núupeʼ jach táaj yaj. Yaan máaxeʼ ku chʼaʼtuklik u perdonartik le baʼax beetaʼabtiʼoʼ. a Chéen baʼaleʼ, kex jeʼel baʼaxak ka u chʼaʼtukleʼ, láayliʼ yaan u jach yaatal u yóoleʼ. ¿Yaan wa baʼax jeʼel u yáantik máak kéen úuchuk tiʼ lelaʼ?

Kex jach ku yaatal u yóol le máaxoʼob ku tuʼusloʼoboʼ, le baʼax ku yaʼalik le Bibliaoʼ jeʼel u líiʼsik u yóoloʼobeʼ. Kéen a xok le Bibliaoʼ yaan a tsʼáaik cuentaeʼ Dioseʼ ku yilik yéetel ku naʼatik bukaʼaj yajil le baʼax ku yúuchultechoʼ (Malaquías 2:13-16).

«Le ka jach chiʼichnakchajeneʼ ta líiʼsaj in wóol, ta tranquilizarten» (Salmo 94:19).

Billeʼ ku yaʼalik: «Le ka tin xokaj le tekstoaʼ tin wuʼuyaj bix tu yáantilen Jéeoba, letiʼeʼ bey jeʼex juntúul taatatsil jach ku chʼaʼik óotsilileʼ».

«Techeʼ yaan u chúukpajal a wóol a weʼes yaabilaj tiʼ máax chúukaʼan xan u yóol u yeʼes yaabilaj» (Salmo 18:25).

Carmeneʼ xáanchaj táan u tuʼusul tumen u yíicham, letiʼeʼ ku yaʼalik: «In wíichameʼ maʼ tu béeykuntaj le baʼax tu yaʼalaj le ka tsʼoʼok u beel tin wéeteloʼ, chéen baʼaleʼ Jéeobaeʼ mantatsʼ ku béeykuntik baʼax ku yaʼalik yéetel in wojel mix bikʼin ken u pʼaten kʼaasil».

«Maʼ a sen chiʼichnaktaleʼex tu yoʼolal mix baʼal, baʼaxeʼ aʼaleʼex tiʼ Dios ich oración tuláakal baʼax a kʼáateʼex. Kʼáat óolneneʼex tiʼ letiʼ yéetel tsʼáaʼex gracias tiʼ, beeteʼex yéetel tuláakal a puksiʼikʼaleʼex. Bey túunoʼ le jeetsʼelil maʼ tu páajtal u naʼataʼal tumen wíinik ku tsʼáaik Diosoʼ, yaan u kanáantik a puksiʼikʼaleʼex yéetel a tuukuleʼex tu yoʼolal Cristo Jesús» (Filipenses 4:6, 7).

Sashaeʼ ku yaʼalik: «Yaʼab u téenel tin xokaj le tekstoaʼ. Tin wileʼ wa maas kin orar tiʼ Dioseʼ, maas ku yantalten le jeetsʼelil ku taal tiʼ letiʼoʼ».

Tuláakal le máaxoʼob tsʼoʼok k-aʼalikaʼ tu tukloʼob kaʼach minaʼan u biilal u kuxtaloʼob, chéen baʼaleʼ tu kʼubaj u yóoloʼob tiʼ Dios le oʼolal béeychaj u aktáantkoʼob le baʼax úuchtiʼoboʼ, letiʼobeʼ jach áantaʼaboʼob tumen le Bibliaoʼ. Billeʼ ku yaʼalik: «Teʼ kʼiinoʼob jach kʼaas u bintenoʼ, chéen le Biblia tu kaʼa tsʼáa u biilal in kuxtaloʼ. Dioseʼ jach tu yáanten teʼ kʼiinoʼob talam yanilenoʼ, letiʼeʼ mix juntéen tu pʼaten» (Salmo 23:4).