U tsʼáaikuba máak tu lugar u maasileʼ ku yáantaj utiaʼal u naʼatik baʼax ku muʼyajtik uláakʼ máakoʼob. Le doctor Rick Hanson, ku xokik bix u meyaj u tsʼoʼomel máakeʼ ku yaʼalikeʼ tuláakal máak «tsʼaʼan tu tuukul u chʼaʼik óotsilil».

TUKULT LELAʼ: ¿Baʼaxten le baʼalcheʼoboʼ maʼ tu chʼaʼikoʼob óotsilil jeʼex u beetik wíinikeʼ? Le Bibliaoʼ ku yaʼalikeʼ Dioseʼ tu beetaj máak jeʼel bix letiʼeʼ (Génesis 1:26). Leloʼ u kʼáat u yaʼaleʼ jeʼel u páajtal k-eʼesik u jatsʼuts modos Dioseʼ. Kéen u tsʼáauba máak tu lugar u maasileʼ, u jaajileʼ táan u beetik jeʼex Jéeoba, le Dios jach ku chʼaʼik óotsililoʼ (Proverbios 14:31).

Dioseʼ ku naʼatik baʼaxoʼob k-muʼyajtik yéetel maʼ uts tu tʼaan u yilik baʼax ku yúuchultoʼoniʼ. Le Bibliaoʼ ku yaʼalik bix tu yuʼubiluba le ka tu yilaj bix u muʼyaj le israelitaʼob tu luʼumil Egiptooʼ. Lelaʼ bey xan úuchik ichil le 40 años táan u máanoʼob teʼ desiertooʼ, Dioseʼ jach muʼyajnaj yoʼolal «u yaj óolaloʼob» (Isaías 63:9). Jeʼex k-ilkoʼ Dioseʼ maʼ chéen u yojel táan u muʼyaj u kaajaliʼ, baʼaxeʼ tak letiʼ yaachaj tu yóol ka tu yilaj bix u muʼyajoʼob. Letiʼeʼ ku yaʼalik: «Jach maʼalob in wojelil baʼax ku muʼyajtikoʼob» (Éxodo 3:7). Ku yaʼalik xan: «Jeʼel máax ka u tsʼáa u kʼab tu yóokʼol in kaajaleʼ, tiʼ u neekʼ in wich ku beetik loob» (Zacarías 2:8). Lelaʼ ku yeʼesiktoʼoneʼ kéen beetaʼaktoʼon baʼax kʼaaseʼ, Dioseʼ ku yuʼubik bey tiʼ letiʼ ku beetaʼaleʼ.

Le Bibliaoʼ ku kaʼansiktoʼoneʼ kex ka k-uʼuy maʼ k-náajaltmaj u chʼaʼiktoʼon óotsilil Dioseʼ, letiʼeʼ «maas nojoch tiʼ k-puksiʼikʼal yéetel u kʼaj óol tuláakal le baʼaloʼoboʼ» (1 Juan 3:19, 20). Mix máak maas u kʼaj óoloʼon jeʼex Dioseʼ. Jach u yojel baʼax ku yúuchul tiʼ toʼon, baʼaxoʼob k-tuklik, baʼaxoʼob k-muʼyajtik yéetel ku tsʼáaikuba t-lugar.

 Le Bibliaoʼ ku kaʼansik:

• «Bey túunoʼ; wa ka tʼanikeneʼ, bíin in núuke; wa ka wawat utiaʼal a kʼáatik áantajeʼ, bíin in waʼal tiʼ teech: Jeʼel yanen wayaʼ.» (ISAÍAS 58:9.)

• «Baʼaxoʼob in tukultmaj teʼexeʼ, baʼaxoʼob utstak a tiaʼaleʼex, maʼ utiaʼal a kʼaasileʼexiʼ, utiaʼal in tsʼáaik tiʼ teʼex u kʼiiniloʼob [kiʼimak óolal]. Teen Yuumtsil, teen aʼalik. Teʼex túuneʼ bíin a chʼaʼchiʼiteneʼex, bíin payalchiʼinakeʼex tiʼ teen, teen xaneʼ bíin in wuʼuy a kʼáat óolaleʼex.» (JEREMÍAS 29:11, 12.)

• ‹Teech kʼamik u jaʼiloʼob in wich. ¿Maʼ wa a tsʼíibtmajoʼob tiʼ a libroiʼ?› (SALMO 56:8).

K-ojéeltik ku chʼaʼiktoʼon óotsilil Dioseʼ, ¿jeʼel wa u yáantkoʼon kéen muʼyajnakoʼoneʼ? Tuukulnen tiʼ baʼax úuch tiʼ María:

«Jach yaachaj tin wóol in wilik bix u muʼyaj in hijo yoʼolal le canceroʼ, tsʼoʼoleʼ kíim le yaan 18 años tiʼoʼ. Hasta kʼuchen in tukult: ¿baʼaxten úuchtoʼon leloʼ? Jach kʼuuxilnajen tu contra Jéeoba tumen tu chaʼaj u kíimil in hijo.

Tin wuʼuyaj maʼ u yaabiltmen Jéeobaiʼ. Ka máan seis añoseʼ tin tsikbaltaj tin juntúul in amiga bix in wuʼuyikinba. Letiʼeʼ jach yaan u yaabilaj yéetel tu naʼaten. Le ka tsʼoʼok u yuʼubik jach bix in wuʼuyikinbaoʼ tu líiʼsaj in wóol yéetel baʼax ku yaʼalik 1 Juan 3:19 yéetel 20, tuʼux ku yaʼalik: «Dioseʼ maas nojoch tiʼ k-puksiʼikʼal yéetel u kʼaj óol tuláakal le baʼaloʼoboʼ». Letiʼeʼ tu tsolajten chéen Jéeoba ku naʼatik le baʼaxoʼob ku yúuchultenoʼ.

Kex beyoʼ láayliʼ lubaʼan in wóoleʼ. Ka túun tin xokaj Salmo 94:19, tuʼux ku yaʼalik: «Chúumuk tiʼ le sen tuukulil baʼaloʼob ku muchʼikubaʼob tin paacheʼ, techeʼ ka tsʼáaikten jeʼelel yéetel kiʼimak óolal». Jach tin wuʼuyaj le tʼaanoʼobaʼ tiʼ teen aʼalaʼabi. Bey túunoʼ béeychaj in waʼalik tiʼ jach bix in wuʼuyikinba tumen in wojel ku yuʼubiken yéetel ku naʼatik baʼax ku yúuchulten. Leloʼ tu beetaj in wuʼuyikinba maʼalobil.»

Ku kiʼimakkúuntik k-óol k-ojéeltik Dioseʼ ku naʼatik baʼax ku yúuchultoʼon yéetel ku tsʼáaikuba t-lugar. Baʼaleʼ ¿baʼaxten yaʼab u muʼyaj máak? ¿Táan wa u castigartikoʼon Dios? ¿Yaan wa u kʼuchul u kʼiinil u xuʼulul le muʼyajiloʼ? Lelaʼ yaan k-ojéeltik u núukil teʼ xookoʼob ku segueroʼoboʼ.