«[Tin wilaj] junpʼéel trono teʼ kaʼan etsʼkúuntaʼan tu kúuchiloʼ [...]. Le máax kulukbal tu yóokʼoloʼ, bey jeʼex junpʼéel u jatsʼuts tuunichil jaspe yéetel junpʼéel u chak tuunichil sardioeʼ, yéetel tu baʼpach le tronooʼ yaan junpʼéel chéel bey jeʼex junpʼéel esmeraldaeʼ.» (Apocalipsis 4:2, 3.)

«Tu súutpacheʼ yaan kaʼach junpʼéel léembal bey le chéel ku chíikpajal ich múuyal tu kʼiinil táan u kʼáaxal jaʼeʼ. Bey úuchik in wilik u nojbeʼenil Yuumtsiloʼ.» (Ezequiel 1:27, 28.)

Le náayoʼobaʼ tiʼ apóstol Juan yéetel profeta Ezequiel tsʼaʼab ilbil utiaʼal u yeʼesaʼal tiʼob bukaʼaj kiʼichkelmil Jéeoba, le Dios Sen Kaʼanaloʼ. Chíikbesaʼabtiʼob yéetel baʼaloʼob jeʼex jatsʼuts tuunichoʼob ku léetsʼbaloʼob, junpʼéel chéel (arco iris) yéetel junpʼéel kiʼichkelem trono. Letiʼobeʼ tu yaʼaloʼobeʼ u yantal máak tu táan Jéeobaeʼ jach táaj jatsʼuts, ku taasik kiʼimak óolal bey xan jeetsʼelil.

Le baʼax tu yaʼaloʼoboʼ chíikaʼan tiʼ baʼax tu tsʼíibtaj le salmistaaʼ: «Yuumtsileʼ nojoch, jach ku náajmatik utsil tʼaanoʼob; ¡[maas] tsikbeʼen ichil tuláakal [diosoʼob]! U [diosoʼob] le uláakʼ kaajoʼoboʼ mix baʼaloʼob, baʼaleʼ [Dioseʼ] tu beetaj le kaʼanoʼoboʼ. ¡Yaan nojoch ayikʼalil yéetel nojbeʼenil tu táan! ¡Yaan páajtalil yéetel jatsʼutsil tu kiliʼich naj!» (Salmo 96:4-6).

Kex Jéeoba letiʼe Dios Sen Kaʼanaloʼ ku invitartikoʼon náatsʼal tu yiknal ich oración yéetel ku yaʼaliktoʼoneʼ jach jeʼel u yuʼubik baʼax k-kʼáat k-aʼaltiʼeʼ (Salmo 65:2). Dioseʼ u yaabiltmoʼon yéetel ku kanáantkoʼon. Apóstol Juaneʼ jach u yojel, le oʼolal tu tsʼíibtaj: «Dioseʼ yaabilaj» (1 Juan 4:8).

«Estebaneʼ chuup yéetel kiliʼich muukʼeʼ, chʼíik u paakat kaʼaneʼ ka kʼuch u yil u nojbeʼenil Dios, yéetel tu yilaj xan Jesús waʼalakbal tu x-noʼoj kʼab Dios, ka tu yaʼalaj: ‹¡Ileʼex! Táan in wilik jeʼekʼab le kaʼanoʼ, yéetel táan in wilik u Paal máak, waʼalakbal tu x-noʼoj kʼab Dios›.» (Baʼaxoʼob [Hechos] 7:55, 56.)

Maʼ úuch kíimsaʼak Jesús ka tsʼaʼab le náay tiʼ Estebanoʼ. Le máaxoʼob yéetel tʼaanaj Estebanoʼ láayliʼ letiʼe judíoʼob kíims Jesusoʼ. Teʼ náayoʼ chíikpajeʼ  tsʼoʼok u kaʼa kuxkíintaʼal Jesús yéetel tsʼoʼok u tsʼaʼabal junpʼéel nojoch meyaj tiʼ. Tak apóstol Pablo tu yaʼaleʼ Jéeobaeʼ «tu líiʼsaj Cristo ichil le kimenoʼoboʼ» yéetel «tu kukíintaj tu x-noʼoj kʼab teʼ kaʼanilbeʼen kúuchiloʼoboʼ». Tu yaʼalaj xan: «Dioseʼ tu tsʼáaj maas kaʼanal tiʼ tuláakal gobierno, autoridad, páajtalil yéetel jalaʼachil bey xan tiʼ jeʼel baʼalak jalaʼach kʼaabaʼ jeʼel u páajtal u chʼaʼchiʼitaʼaleʼ, maʼ chéen teʼ yóokʼol kaabaʼ, baʼaxeʼ tak teʼ yóokʼol kaab ku taaloʼ» (Efesoiloʼob 1:20, 21).

Yaan uláakʼ baʼax ku yaʼalik le Biblia yoʼolal Jesusoʼ: jeʼex Jéeobaeʼ letiʼeʼ jach u yaabiltmaj wíinik. Ka taal way Luʼumeʼ tu yáantaj óotsiloʼob, tu tsʼakaj kʼojaʼanoʼob yéetel tu líiʼsaj kimenoʼob. Úuchik u kʼubik u kuxtaleʼ tu yeʼesaj bukaʼaj nojchil u yaabilaj (Efesoiloʼob 2:4, 5). Beoraaʼ Jesuseʼ tiaʼan tu x-noʼoj kʼab Dioseʼ yéetel maʼ tun xáantal ken u taas yaʼab utsiloʼob tiʼ tuláakal wíinik.

«Tin wilaj u tsʼaʼabal wa jaypʼéel jalaʼach kʼáancheʼob, juntúul nuxib kulajiʼ. [...] Mil kaʼa tak mil meyajtik, yéetel millonoʼob kaʼa tak millonoʼob waʼalakbaloʼob tu táan.» (Daniel 7:9, 10.)

Teʼ náayaʼ Danieleʼ maʼ chéen juntúul ángel tu yiliʼ, baʼaxeʼ u millonesil. ¡Jaʼakʼ wal u yóoleʼ! Le angeloʼoboʼ espirituʼob jach kiʼichkelmoʼob, yaan u naʼatoʼob yéetel jach yaan u muukʼoʼob. Ichiloʼobeʼ yaan serafinoʼob yéetel querubinoʼobiʼ. Maas tiʼ 250 u téenel ku tʼaan le Biblia tu yoʼolaloʼoboʼ.

Le angeloʼoboʼ maʼ yáax kuxlajoʼob way Luʼum bey wíinikoʼobeʼ. Dios beetoʼob táanil tiʼ u yantal wíinik. Tiaʼanoʼob teʼ kaʼan ka beetaʼab le Luʼumaʼ, ka joʼopʼ u papaxkʼaboʼob bey xan u yawatoʼob yéetel kiʼimak óolal (Job 38:4-7).

Le utsul angeloʼoboʼ ku meyajtikoʼob Dios ken táakpajkoʼob teʼ meyaj maas nojoch táan u beetaʼal way Luʼumoʼ: u tsikbaltaʼal u maʼalob péektsilil u Reino Dios (Mateo 24:14). Bey tu yilil apóstol Juan ichil u náayoʼ: «Tin wilaj uláakʼ juntúul ángel táan u xikʼnal chúumuk tiʼ le kaʼanoʼ; tiʼ letiʼeʼ kʼubéentaʼan maʼalob péektsil minaʼan u xuul utiaʼal u kʼaʼayt tiʼ u kajnáaliloʼob Luʼum, tiʼ tuláakal luʼumoʼob, chʼiʼibaloʼob, tʼaanoʼob yéetel kaajoʼob» (Apocalipsis 14:6). Bejlaʼeʼ le angeloʼoboʼ  maʼatech u tsikbaloʼob yéetel wíinik, pero ku yáantkoʼob máaxoʼob ku kʼaʼaytajoʼob utiaʼal u kaxtikoʼob máaxoʼob uts u puksiʼikʼaloʼob.

«Yanchaj junpʼéel baʼateltáambal teʼ kaʼanoʼ: Miguel [Jesucristo] yéetel u angeloʼobeʼ baʼatelnajoʼob tu contra le nojoch kaanoʼ, [...] baʼaleʼ le nojoch kaanoʼ maʼ tsaʼay tu yéeteloʼobiʼ, yéetel mix tuʼux chaʼab u pʼáatloʼob teʼ kaʼanoʼ. Bey túunoʼ puʼul way yóokʼol kaab le nojoch kaanoʼ, le úuchben kaanoʼ, le ku yaʼalaʼal Kʼaasilbaʼal wa Satanás tiʼoʼ, le máax táan u tusik tuláakal yóokʼol kaaboʼ; puʼul way Luʼum paʼteʼ yéetel u angeloʼobeʼ.» (Apocalipsis 12:7-9.)

Teʼ kaʼanoʼ maʼ mantatsʼ anchaj jeetsʼeliliʼ. Tu kʼiinil le yáax wíinikoʼ juntúul angeleʼ joʼopʼ u tsʼíiboltik ka adorartaʼak, ka tu tsʼáajuba tu contra Jéeoba. Bey úuchik u suut Kʼaasilbaʼaliloʼ wa Satanás, u kʼáat u yaʼal «máax ku tsʼáaikuba tu contra uláakʼ». Ka máan kʼiineʼ uláakʼ angeloʼobeʼ tu tsʼáajubaʼob tu tséel. Yoʼolal u kʼasaʼaniloʼobeʼ tu chʼaʼpʼektoʼob Jéeoba, ka tu beetoʼob u tsʼáaikuba wíinik tu contra.

Satanás yéetel le demonioʼoboʼ jach kʼasaʼanoʼob. Letiʼobeʼ u enemigoʼob wíinik, yéetel tsʼoʼok u taaskoʼob yaʼab muʼyajil way Luʼumeʼ. Juntéenjeakileʼ Satanaseʼ tu kíimsaj u yalakʼ baʼalcheʼob Job, bey xan u j-meyajoʼob. Tsʼoʼoleʼ tu beetaj u «taal junpʼéel u moson iikʼil x-tokoy luʼumeʼ» ka júut le naj yóokʼol u diezil u paalal Joboʼ. Láaj kíimoʼobiʼ. Tu tsʼookeʼ «tu beetaj u búukbesaʼal u wíinklil Job yéetel junpʼéel yaayaj kʼojaʼanil» (Job 1:7-19; 2:7).

K-ojel maʼ tun xáantal ken xuʼulsaʼak tiʼ le Kʼaasilbaʼaloʼ. Desde ka puʼul way Luʼumeʼ u yojel «chéen junpʼíit kʼiin pʼaataltiʼ» (Apocalipsis 12:12). Satanaseʼ aʼalaʼan bix kun tsʼoʼokol tiʼ. K-ojéeltik lelaʼ ku taasiktoʼon kiʼimak óolal.

«[Techeʼ, Jesús,] ta manaj máakoʼob tiʼ tuláakal chʼiʼibal, kaajil, tʼaanil yéetel luʼumil, utiaʼal a kʼubkoʼob tiʼ Dios, ka túun ta beetoʼob reyil yéetel sacerdoteil utiaʼal Dios; letiʼobeʼ yaan u reinaroʼob tu yóokʼol le Luʼumoʼ.» (Apocalipsis 5:9, 10.)

Jeʼex úuchik u kaʼa kuxkíintaʼal Jesús ka tsʼoʼok u kíimil way Luʼumoʼ bey kun beetbil yéetel uláakʼ máakoʼoboʼ. Jesuseʼ tu yaʼalaj tiʼ u apostoloʼob: «Táan in bin in preparart junpʼéel kúuchil utiaʼal a wantaleʼexiʼ [...;] yaan in suut, yéetel teen ken in kʼameʼex teʼ najoʼ, beyoʼ le tuʼux kin antaloʼ tiʼ xan kan antaleʼexiʼ» (Juan 14:2, 3).

Yaan junpʼéel meyaj kʼubéentaʼan tiʼ le máaxoʼob ku binoʼob kaʼanoʼ. Yéetel Jesucristoeʼ yaan u múul  gobernartikoʼob tuláakal wíinik yaan way Luʼumeʼ yéetel yaan u taaskoʼob yaʼab utsiloʼob. Le gobiernoaʼ letiʼe Reino tu yaʼalaj Jesús tiʼ u disipuloʼob ka u kʼáatoʼob ich oracionoʼ: «K-Taata yanech teʼ kaʼanoʼ, kiliʼichkúuntaʼak a kʼaabaʼ. Taalak a Reino, beetaʼak baʼax a kʼáat teʼ kaʼanoʼ bey xan way Luʼumeʼ» (Mateo 6:9, 10).

«[Teen apóstol Juaneʼ] tin wuʼuyaj junpʼéel kʼaʼamkach tʼaan jóokʼ teʼ trono táan u yaʼalik: ‹¡Ile! U pasel Dioseʼ tiʼ yaan yiknal le máakoʼoboʼ. Dioseʼ [...] yaan xan u choʼik tuláakal u jaʼil u yichoʼob, maʼ tun yantal kíimil, mix okʼol, mix yaj óolal, mix kʼiʼinamil. Le baʼaxoʼob yanoʼob kaʼachoʼ tsʼoʼok u máanoʼob›.» (Apocalipsis 21:3, 4.)

Le náayaʼ ku yeʼesik baʼax kʼiin ken xuʼulsaʼak u gobierno Satanás tumen Dios utiaʼal u sutik Paraísoil le Luʼumaʼ. Lelaʼ yaan u beetik yéetel le gobierno u tsʼaamaj tiʼ Jesús yéetel tiʼ le wíinikoʼob kaʼa kuxkíintaʼaboʼob teʼ kaʼanoʼ. Tuláakal le baʼax tsʼoʼok u beetik u muʼyaj wíinikoʼ yaan u máan. Yaan u xuʼulsaʼal tiʼ le kíimiloʼ.

¿Kux túun le u millonesil máakoʼob kimenoʼob maʼ tun kuxkíintbiloʼob teʼ kaʼanoʼ? ¿Baʼax kun úuchul tu yéeteloʼob? Maʼ tun xáantaleʼ yaan u líiʼsaʼaloʼob utiaʼal u kuxtaloʼob minaʼan u xuul way Luʼumeʼ (Lucas 23:43).