Dioseʼ tu yaʼalaj tiʼ Adán yaan u kíimil wa ku jaantik u yich le cheʼoʼ (Génesis 2:17). Wa deporsi yaan u chʼíijil yéetel u kíimileʼ, chéen kunel u beetik le baʼax aʼalaʼabtiʼoʼ. Adaneʼ u yojel kaʼach baʼaxten maʼ unaj u jaantik u yich le cheʼoʼ.

Adán yéetel Evaeʼ minaʼan baʼax oʼolal u jaantkoʼob u yich le cheʼoʼ tumen teʼ jardinoʼ jach yaan baʼal jaantbiliʼ (Génesis 2:9). Wa maʼ u jaantkoʼob kaʼach u yich le cheʼoʼ bejlaʼa tsʼoʼok u yeʼeskoʼob u kʼáat u yuʼuboʼob u tʼaan Dios, le Máax tsʼaamil u kuxtaloʼoboʼ. Tsʼoʼoleʼ yaan xan u yeʼeskoʼob kaʼach chéen tiʼ Dios yaan u derechoil u yaʼaliktiʼob baʼax unaj u beetkoʼob.

Utiaʼal k-naʼatik baʼaxten kíim Adán yéetel Evaeʼ unaj k-tʼaan tiʼ junpʼéel baʼax úuch teʼ jardinoʼ yéetel tak bejlaʼa táan u beetik k-muʼyajeʼ. Tiʼ Satanaseʼ meyajnajtiʼ juntúul kaan utiaʼal u tuus. Le Bibliaoʼ ku yaʼalik: ‹Le kaanoʼ maas yaan kaʼach u naʼat tiʼ tuláakal u baʼalcheʼiloʼob kʼáax beetaʼanoʼob tumen Diosoʼ. Le kaanoʼ tu kʼáataj tiʼ le x-koʼoleloʼ: ¿Jaaj wa Dioseʼ tu yaʼalajteʼex maʼ a jaantkeʼex u yich mix junkúul cheʼ yaan teʼ jardinaʼ?› (Génesis 3:1).

Evaeʼ tu núukajtiʼ: ‹Jeʼel u páajtal k-jaantik u yich jeʼel baʼalak cheʼileʼ, baʼaleʼ maʼ unaj k-jaantik u yich le cheʼ yaan tu chúumuk le jardinaʼ. Dioseʼ u yaʼalmaj tiʼ toʼoneʼ maʼ unaj k-jaantikiʼ, mix k-machik u yich le cheʼoʼ, tumen wa k-beetkeʼ, k-kíimil›. Chéen baʼaleʼ le kaanoʼ tu núukaj: ‹Maʼ jaajiʼ. Maʼ ta kíimleʼex. Dioseʼ u sen ojel, le kʼiin bíin a jaanteʼex u yich le cheʼoʼ yaan u kʼuchul a wojéelteʼex baʼax uts yéetel baʼax kʼaas; bey túunoʼ bíin pʼáatkeʼex beyeʼex Dioseʼ›. Yéetel le tʼaanoʼobaʼ Satanaseʼ tu yaʼalaj chéen táan u tuus Jéeoba yéetel yaan baʼax maʼ tu tsʼáaiktiʼob (Génesis 3:2-5).

Evaeʼ jach séeb lúubik tu kʼab Satanás. Joʼopʼ u chaʼantik u yich le cheʼoʼ ka káaj u tsʼíiboltik. Tu tsʼookeʼ tu tʼokaj ka joʼopʼ u jaantik. Le Bibliaoʼ ku yaʼalik baʼax uláakʼ úuchi: «Ku tsʼoʼokoleʼ ka tu tsʼáaj tiʼ u yíicham, letiʼ xaneʼ tu jaantaj» (Génesis 3:6).

¡Bukaʼaj wal yaachajik u yóol Dios tumen maʼ uʼuyaʼab u tʼaan tumen le máaxoʼob jach u yaabiltmoʼ! ¿Baʼax tu beetaj teʼ súutukoʼ? Jéeobaeʼ tu yaʼalaj tiʼ Adán: «Yaan a náajaltik a woʼoch waaj yéetel u kʼíilkabil a táan joʼol, tak ken suunakech luʼumil, tu yoʼolal luʼum beetaʼabikecheʼ, luʼum xan bíin suunakech» (Génesis 3:17-19). Jach béeychaj le baʼax aʼalaʼabtiʼoʼ, le Bibliaoʼ ku yaʼalikeʼ «novecientos treinta jaʼaboʼob» yaan tiʼ Adán ka kíimi (Génesis 5:5). Adaneʼ maʼ bin kaʼaniʼ, mix yaanal tuʼuxiʼ. Táanil tiʼ u beetaʼal tumen Dioseʼ minaʼan kaʼachi,  le oʼolal le ka kíimeʼ suunaj tuʼux chʼaʼabi, suunaj teʼ luʼumoʼ. Bey tsʼoʼokik tiʼoʼ.

Adán yéetel Evaeʼ maʼ tu yuʼuboʼob u tʼaan Diosiʼ le oʼolal kʼebanchajoʼob yéetel tu peʼertoʼob u páajtalil u kuxtaloʼob minaʼan u xuul. Desde teʼ súutuk jeʼeloʼ kʼaschajoʼob tu táan Dios, ook le kʼeban tu wíinkliloʼoboʼ. Chéen baʼaleʼ maʼ chéen letiʼob kʼebanchajoʼobiʼ, baʼaxeʼ tu máansoʼob xan tiʼ u paalaloʼob. Le oʼolal Romailoʼob 5:12, ku yaʼalik: «Tu yoʼolal chéen juntúul máak ook le kʼeban way yóokʼol kaab, yéetel tu yoʼolal le kʼeban ook le kíimiloʼ, bey xan úuchik u máan le kíimil tiʼ tuláakal máakoʼ tumen tuláakloʼob kaʼach tsʼoʼok u kʼebantaloʼob».

Le Bibliaoʼ ku yaʼalikeʼ le kíimiloʼ bey junpʼéel piimpim nookʼ ku kupik u yiikʼ tuláakal le máakoʼoboʼ (Isaías 25:7). Le piimpim nookʼaʼ bey jeʼex le sereno ku kʼáaxal yéetel mix máak jeʼel u púutsʼul tiʼeʼ. Bey túun xanoʼ tu yoʼolal Adaneʼ «tuláakal máak táan u kíimil» (1 Corintoiloʼob 15:22). Le oʼolal maʼ xaaneʼ ka tuukul jeʼex le apóstol Pablooʼ: «¿Máax kun jáalkʼabtiken tiʼ le wíinklil táan u bisken tiʼ le kíimiloʼ?» (Romailoʼob 7:24).