Máan u milesil años maʼ ojéelaʼaniʼ, yoʼolal leloʼ kíim u millonesil máakoʼob. Ka máan kʼiineʼ le cientificoʼoboʼ tu yojéeltoʼob baʼax beetik u kʼojaʼantal máak. Tu yiloʼobeʼ yaan bacteriaʼob wa baʼaloʼob jach pʼayachtak ku beetkoʼob kʼaas tiʼ máak. Le baʼax kʼuch u yojéeltoʼobaʼ tsʼoʼok u yáantaj utiaʼal u tsʼaʼakal máak, u maas chowaktal u kuxtal yéetel maʼ u jáan kʼojaʼantal.

¿Yaan wa uláakʼ baʼaxoʼob jach kʼaʼanaʼantak unaj a wojéeltik? ¿Jeʼel wa u yáantkech wa ka a wojéelt u núukil le baʼaloʼobaʼ?

• ¿Máax Dios?

• ¿Máax Jesucristo?

• ¿Baʼax u Reino Dios?

• ¿Baʼax ku taal u kʼiin u yúuchul?

Yaʼab máakeʼ tsʼoʼok u kanik u jaajil yoʼolal le baʼaloʼobaʼ yéetel tsʼoʼok u kʼamkoʼob yaʼab utsiloʼob. A wojéeltik u núukiloʼobeʼ jeʼel xan u taasiktech yaʼab utsiloʼobeʼ.

Maʼ xaaneʼ ka tuklik: «¿Láayliʼ wa yaan máax aʼalik u jaajil yoʼolal wa baʼaxeʼ?». Bejlaʼeʼ u maas yaʼabil le máakoʼoboʼ maases chéen tuus ku beetkoʼob, le oʼolal talam u yilaʼal máax aʼalik u jaajil.

Yaʼab máakeʼ maʼatech u jach creertik le baʼax ku yaʼalik le gobiernoʼoboʼ, le máaxoʼob yaan u empresaʼob bey xan uláakʼ baʼaxoʼob ku yaʼalaʼaloʼ. U jaajileʼ yaan máaxeʼ mix u yilmaj le baʼax úuchoʼ wa chéen uts tu tʼaan u yaʼalik baʼax ku tuklik, uláakʼoʼobeʼ maʼ tu yaʼalikoʼob tu chúukaʼanil wa baʼax yéetel yaneʼ chéen uts tu tʼaan u tuusoʼob. Yoʼolal le baʼax ku yúuchlaʼ, yaʼab máakeʼ maʼatech u confiar tiʼ baʼax ku yaʼalik u maasil yéetel maʼ u yojel baʼax unaj u creertikiʼ.

Kex jejeláas baʼaxoʼob ku yaʼalaʼaleʼ, jeʼel u páajtal a kaxtik u núukil le baʼaxoʼob maas kʼaʼanaʼan unaj a wojéeltikoʼ. ¿Bix jeʼel a beetkeʼ? Jeʼex suukil a beetik le kéen taakchajak a wojéeltik wa baʼaxeʼ.

Sáamsamal yaan baʼaxoʼob k-beetik utiaʼal maʼ k-tuʼusul. Ilawil baʼax ku beetik Jessica utiaʼal u kanáantik maʼ u manik baʼaloʼob tsʼaʼan cacahuate ichil. Letiʼeʼ ku yaʼalik: «In hijaeʼ jach junpuliʼ maʼ tu páajtal u jaantik mix junpʼíit baʼal yaan cacahuate ichil tumen jeʼel u kíimileʼ. Le oʼolaleʼ táanil tiʼ in manik wa baʼaxeʼ kin xokik tubeel yéetel baʼaxoʼob beetaʼan. Yaan kʼiineʼ hasta kin tʼaan teʼ empresa utiaʼal in wuʼuyik wa jach tu jaajil maʼ tsʼaʼan mix junpʼíit cacahuate ichiloʼ. Kin kʼáatik xan tiʼ uláakʼ máakoʼob u kʼaj óoloʼob bix u meyaj le empresa utiaʼal in wuʼuyiktiʼob wa jach tu jaajil maʼalob le baʼax ku konik utiaʼal jaantbiloʼ».

Maʼ xaaneʼ techeʼ maʼ kʼaʼabéet a beetik sáamsamal le baʼax ku beetik Jessicaoʼ, chéen baʼaleʼ wa yaan baʼaxoʼob jach kʼaʼanaʼantak a kʼáat a wojéelteʼ jeʼel u páajtal a beetik le baʼax ku beetkoʼ:

• Xok baʼax taak a wojéeltik.

• Ilawil a wojéeltik u maasil.

• Jach ilawil wa maʼ táan a tuʼusliʼ.

Le baʼaxoʼob tsʼoʼok k-aʼalikaʼ jach jeʼel u yáantkech a wojéelt le baʼaloʼob jach kʼaʼanaʼantakoʼ. Koʼox ilik bixi.

Utiaʼal u kaxtik u núukil le baʼaxoʼob maas kʼaʼanaʼantakoʼ, Jessicaeʼ anchaj u beetik le baʼax suukaʼan u beetik utiaʼal u yilik wa maʼ tsʼaʼan mix junpʼíit cacahuate ichil le baʼax ken u manoʼ. Letiʼeʼ ku yaʼalik: «In xokik le Biblia yéetel in tsʼáaik in wóol in kan u maasil tu yoʼolaloʼ tsʼoʼok u yáantken in kaxt u jaajil». U millonesil máakoʼob xaneʼ tsʼoʼok u beetkoʼob beyoʼ, le oʼolal tsʼoʼok u kankoʼob baʼax ku yaʼalik le Biblia yoʼolal le baʼaloʼobaʼ:

• ¿Baʼaxten kuxaʼanoʼon?

• ¿Baʼax ku yúuchul kéen kíimkoʼon?

• ¿Baʼaxten jach yaan muʼyajil?

• ¿Baʼax táan u beetik Dios utiaʼal u xuʼulsik le muʼyajiloʼ?

• ¿Bix jeʼel u yantal kiʼimak óolal ichil a familiaeʼ?

Utiaʼal a wojéeltik u núukil lelaʼ bey xan u núukil uláakʼ baʼaloʼobeʼ, xok baʼax ku yaʼalik le Bibliaoʼ yéetel ilawil baʼax uláakʼ ku yaʼalaʼal teʼ sitio www.jw.org.