Le Bibliaoʼ ku yaʼalikeʼ utiaʼal u béeytal baʼax u tukultmaj Dioseʼ le angeloʼoboʼ tu yáantoʼob jujuntúul máaxoʼob meyajt úuchjeakil (Salmo 34:7). Koʼox ilik bix tu beetiloʼob.

• Le ka xuʼulsaʼab u kaajil Sodoma yéetel Gomorraeʼ, le angeloʼoboʼ tu yáantoʼob púutsʼul Lot yéetel u láakʼtsiloʼob (Génesis 19:1, 15-26).

• Le kaʼa puʼul óoxtúul xiʼipalal hebreoʼob ichil junpʼéel horno tu luʼumil Babiloniaeʼ, Dioseʼ «tu túuxtaj u ángel» utiaʼal u tokikoʼob (Daniel 3:19-28).

• Danieleʼ tu máansaj junpʼéel áakʼab ichil junpʼéel sajkab tuʼux yaan leonoʼob wiʼijoʼob, pero maʼ jaantaʼabiʼ tumen Dioseʼ «tu túuxtaj u ángel, letiʼeʼ tu nupʼaj u chiʼ le leonoʼob[oʼ]» (Daniel 6:16, 22).

Teʼ yáax siglooʼ utiaʼal u béeytal baʼax u kʼáat Dioseʼ, le angeloʼoboʼ tu yáantoʼob le máaxoʼob meyajtik Diosoʼ. Koʼox ilik bix tu beetiloʼob.

• Juntúul angeleʼ tu jeʼekʼabtaj le cárcel tuʼux kʼalaʼan le apostoloʼoboʼ ka tu yaʼalajtiʼob ka seguernak u tsikbaltikoʼob u tʼaan Dios (Baʼaxoʼob [Hechos] 5:17-21).

• Juntúul angeleʼ tu yaʼalaj tiʼ Felipe ka xiʼik teʼ bej yaan Jerusalén ku yéemel tu kaajil Gazaoʼ yéetel ka u kaʼans juntúul máak etiopíail bin Jerusalén u adorart Dios (Baʼaxoʼob 8:26- 33).

• Le ka tu yaʼalaj Dios ka kaʼansaʼak le máaxoʼob maʼ judíoʼoboʼ, tu chíikbesuba juntúul ángel tiʼ Cornelio, juntúul u nojchil le soldadoʼoboʼ, ka tu yaʼalajtiʼ ka u invitart apóstol Pedro tu yotoch (Baʼaxoʼob 10:3-5).

• Le ka kʼaʼal cárcel apóstol Pedroeʼ chíikpaj juntúul ángel tiʼ yéetel jáalkʼabtaʼabi (Baʼaxoʼob 12:1-11).

Bejlaʼeʼ mix baʼal eʼesik wa ku yáantkoʼon Dios yéetel u angeloʼob jeʼex úuchjeakileʼ. Chéen baʼaleʼ Jesuseʼ tu yaʼalaj: «U maʼalob péektsilil le Reinoaʼ yaan u kʼaʼaytaʼal tiʼ tuláakal yóokʼol kaab utiaʼal ka ojéeltaʼak tumen u kajnáaliloʼob tuláakal kaajoʼob, ken tsʼoʼokkeʼ letiʼ túun ken taalak u xuul» (Mateo 24:14). Le meyaj tu kʼubéentaj Jesús tiʼ u disipuloʼoboʼ táan u beetaʼal yéetel u yáantaj le angeloʼoboʼ.

U libroil Apocalipsiseʼ ku yaʼalikeʼ le angeloʼoboʼ táan u yáantkoʼob tuláakal máak utiaʼal u kaanbaloʼob tiʼ Jéeoba yéetel tiʼ baʼaxoʼob ken u beete. Apóstol Juaneʼ tu yaʼalaj: «Ka tin wilaj uláakʼ juntúul ángel táan u xikʼnal chúumuk tiʼ le kaʼanoʼ; tiʼ letiʼeʼ kʼubéentaʼan maʼalob péektsil minaʼan u xuul utiaʼal u kʼaʼayt tiʼ u kajnáaliloʼob Luʼum, tiʼ tuláakal luʼumoʼob, chʼiʼibaloʼob, tʼaanoʼob yéetel kaajoʼob. Le angelaʼ táan kaʼach u kʼaʼam aʼalik: ‹Chʼaʼex saajkil tiʼ Dios, yéetel nojbeʼenkúunteʼex, tumen tsʼoʼok u kʼuchul u kʼiinil le juicio ken u beetoʼ; le oʼolaleʼ, adorarteʼex le Máax beet kaʼan, Luʼum, kʼáaʼnáab, bey xan u sayabiloʼob le jaʼoʼ›» (Apocalipsis 14:6, 7). Yaʼab baʼax eʼesikeʼ le angeloʼoboʼ táan u yáantajoʼob utiaʼal u kʼaj óotaʼal Jéeoba tuláakal tuʼux teʼ kʼiinoʼobaʼ. Le Bibliaoʼ ku yaʼalik: «U angeloʼob Dioseʼ ku kiʼimaktal u yóoloʼob ken u kʼex u tuukul juntúul j-kʼeban máak» (Lucas 15:10).

¿Baʼax kun úuchul ken xuʼuluk u tsikbaltaʼal u tʼaan Dios? Le angeloʼoboʼ junmúuchʼ yéetel Jesuseʼ yaan u baʼateloʼob teʼ Armagedonoʼ, wa u «noj kʼiinil le Dios yaan tuláakal páajtalil tiʼoʼ» (Apocalipsis 16:14-16; 19:14-16). Letiʼe angeloʼob kun áantik Jesús «u sut u jeel le kʼaas ku beetik [...] le máaxoʼob maʼ tu tsʼoʼokbeskoʼob le maʼalob péektsil yaan yil yéetel k-Yuumtsil Jesusoʼ» (2 Tesalonicailoʼob 1:7, 8).

Jeʼex túun k-ilkoʼ le utsul angeloʼoboʼ jach taak u yáantkoʼob máak. U kʼáatoʼob ka kiʼimakchajak u yóol máaxoʼob meyajtik Dios. Jéeobaeʼ yaʼab u téenel tsʼoʼok u túuxtikoʼob utiaʼal u muʼukʼaʼankúuntik u fe yéetel u kanáantik le máaxoʼob beetik baʼax uts tu tʼaanoʼ (Hebreoʼob 1:14).

Bey túunoʼ maʼalob ka k-tukle: ¿Yaan wa in kʼamik le baʼaxoʼob jatsʼutstak ken u beet Dios táan u kaʼansaʼal tuláakal Luʼumoʼ? U j-jaajkunajoʼob Jéeobaeʼ jeʼel u yáantkechoʼob a kʼam le áantaj ku tsʼáaik le angeloʼoboʼ.