LE CHAN tajador de barco yaan tu kʼab Jordanoʼ bey maʼ nojbaʼaleʼ. Chéen baʼaleʼ Jordaneʼ ku tsolik baʼaxten jach koʼoj u yilik: «Russell, juntúul nojoch máak jach ku biskuba yéetel in láakʼtsiloʼob, síiten tin chichnil». Ka kíim Ruselleʼ, Jordaneʼ tu yojéelteʼ le máakaʼ jach tu yáantaj u abuelo yéetel u taataʼob teʼ súutuk jach táan u muʼyajoʼoboʼ. Letiʼeʼ ku yaʼalik: «Beora tsʼoʼok in wojéeltik baʼax tu beetaj Russell tu yoʼolal in láakʼtsiloʼoboʼ, maas nojbaʼal in wilik le tajador tu síiajtenoʼ».

Yaan máakeʼ maʼ nojbaʼal u yilik le baʼax ku siʼibiltiʼoʼ, baʼaleʼ uláakʼoʼob jeʼex Jordaneʼ kex chichan le baʼax ku siʼibiltiʼoboʼ jach koʼoj u yilkoʼob. Le Bibliaoʼ ku yaʼalikeʼ yaan junpʼéel baʼal síiʼantoʼon maʼ tu páajtal u keʼetel yéetel mix baʼal: «Dioseʼ tumen jach u yaabiltmaj yóokʼol kaabeʼ tu tsʼáaj u juntúuliliʼ Paal, utiaʼal beyoʼ maʼ u xuʼulsaʼal tiʼ le máaxoʼob ken u tsʼáa u fejoʼob tiʼ letiʼoʼ, baʼaxeʼ ka yanaktiʼob kuxtal minaʼan u xuul» (Juan 3:16).

¡Junpʼéel siibal ku tsʼáaik kuxtal minaʼan u xuul! ¿Máasaʼ minaʼan uláakʼ siibal maas nojoch tiʼ lelaʼ? Kex yaan máax maʼ tu yilik bukaʼaj koʼojil le siibalaʼ, utiaʼal le jaajil cristianoʼoboʼ junpʼéel baʼal ‹maʼ tu páajtal u maʼanal yéetel taakʼin› (Salmo 49:8; 1 Pedro 1:18, 19). ¿Baʼaxten tu tsʼáaj Dios u kuxtal u Hijo bey siibal utiaʼal tuláakal wíinikeʼ?

Apóstol Pabloeʼ ku tsolik baʼaxten: «Tu yoʼolal chéen juntúul máak ook le kʼeban way yóokʼol kaab, yéetel tu yoʼolal le kʼeban ook le kíimiloʼ, bey xan úuchik u máan le kíimil tiʼ tuláakal máakoʼ» (Romailoʼob 5:12). Adán, le yáax wíinikoʼ, u yojliliʼ táan u bin tu contra Dios le ka kʼebanchajoʼ, le oʼolal anchaj u kíimil. Bey úuchik u máansik le kíimil tiʼ tuláakal u paalal, wa tiʼ tuláakal wíinikoʼ.

 «Le boʼol ku tsʼáaik le kʼebanoʼ letiʼe kíimiloʼ, baʼaleʼ le siibal ku tsʼáaik Diosoʼ, kuxtal minaʼan u xuul tu yoʼolal k-Yuumtsil Cristo Jesús» (Romailoʼob 6:23). Utiaʼal u jáalkʼabtik wíinik tiʼ le kíimiloʼ Dioseʼ tu túuxtaj Jesucristo, u Hijo, utiaʼal u tsʼáaik u kuxtal minaʼan u kʼeban tu yoʼolal le yóokʼol kaabaʼ. Tu yoʼolal u kuxtal Jesús, wa «le boʼol» tu tsʼáaj Diosoʼ, tuláakal le máax ku tsʼáaik u fe tiʼ Jesuseʼ yaan u kuxtal utiaʼal minaʼan u xuul (Romailoʼob 3:24).

Le ka tʼaanaj apóstol Pablo tiʼ le bendicionoʼob tu tsʼáaj Dios yoʼolal u kuxtal Jesusoʼ, tu yaʼalaj: «Tsʼaʼabak gracias tiʼ Dios tu yoʼolal le sen nojoch siibal ku tsʼáaikoʼ» (2 Corintoiloʼob 9:15). Le boʼol tu tsʼáaj Dios t-oʼolaloʼ junpuliʼ maʼ tu páajtal u keʼetel yéetel mix baʼal. Baʼaleʼ tiʼ tuláakal le baʼaxoʼob u siimajtoʼon Diosoʼ, ¿baʼaxten maas nojoch le boʼol tu tsʼáaj t-oʼolaloʼ? ¿Baʼaxten minaʼan uláakʼ siibal beyoʼ? * ¿Baʼax unaj u péeksikoʼon k-beete? Teʼ tuláakʼ xookoʼoboʼ yaan a wilik bix u núukik le Biblia le kʼáatchiʼob táant k-aʼalikoʼ.