BAʼAX ÚUCHI. Yaʼab politicoʼob yéetel religiosoʼobeʼ tu tsʼáajubaʼob tu contra baʼax ku yaʼalik le Bibliaoʼ. Yaʼab u téeneleʼ yéetel le autoridad yaantiʼoboʼ tu prohibirtoʼob u yantal u Biblia máak, u imprimirtaʼal wa u traducirtaʼal. Koʼox ilik kaʼapʼéel ejemplo:

• Kex tu añoil 167 táanil tiʼ Cristoeʼ, le rey Antíoco Epífanesoʼ (tiʼ le dinastía seléucidaoʼ) tu túuxtaj tóokbil tuláakal u copiasil le Kiliʼich Tsʼíiboʼob ich Hebreo utiaʼal ka kʼaʼamak u religión le griegoʼob tumen le judíoʼoboʼ. Le historiador Heinrich Graetzoʼ ku yaʼalikeʼ le máakoʼob túuxtaʼab tumen le reyoʼ «tu jaʼajatoʼob yéetel tu tóokoʼob u rolloiloʼob le Ley jeʼel tuʼuxak tu yiloʼobeʼ, ka tu kíimsoʼob xan tuláakal le máaxoʼob xokikoʼ».

• Walajki 800 añosaʼ, u nuuktakil le Iglesia Catolicaoʼ u pʼeekoʼob kaʼach u máan tsikbaltbil baʼax ku yaʼalik le Biblia tumen máaxoʼob maʼ sacerdoteʼobiʼ, tumen maʼ igual yéetel u kaʼansaj le Iglesiaoʼ. Wa ku yilkoʼob juntúul máak táan u xokik uláakʼ libro tiʼ le Bibliaoʼ ku yaʼalikoʼobeʼ juntúul hereje, wa u enemigo le Iglesiaoʼ, tumen chéen u libroil Salmos ich latín ku chaʼikoʼob u xokik máak. Juntéenjeakeʼ le Iglesiaoʼ tu túuxtaj máakoʼob utiaʼal «ka u tsʼáa u yóol u xakʼal kaxtoʼob herejeʼob [...] tiʼ tuláakal najoʼob bey xan teʼ tuneloʼob tuʼux ku tuklaʼal u taʼakmubaʼoboʼ. Le naj tuʼux ken u yiloʼob juntúul herejeeʼ kʼaʼabéet u xuʼulskoʼob».

Wa ka xuʼulsaʼak kaʼach le Biblia tumen le máaxoʼob pʼekmiloʼ bejlaʼa maʼ ken k-ojéelt baʼax ku yaʼalikeʼ.

BAʼAXTEN TAK BEJLAʼA YANEʼ. Rey Antíocoeʼ maases tu tsʼáajuba u xuʼuls le Kiliʼich Tsʼíiboʼob tu luʼumil Israeloʼ pero yaan uláakʼ judíoʼob kajaʼanoʼob kaʼach tiʼ uláakʼ luʼumoʼob. Ku yaʼalaʼaleʼ teʼ yáax siglooʼ maas tiʼ u 60% le judíoʼoboʼ maʼ tu luʼumil Israel kajaʼanoʼobiʼ. Tu sinagogaʼobeʼ tiʼ ku líiʼskoʼob kaʼach u copiasil le Kiliʼich Tsʼíiboʼoboʼ. Le copiaʼobaʼ letiʼe meyajnaj tiʼ le máaxoʼob kuxlajoʼob ka máan kʼiinoʼ, tak tiʼ le cristianoʼoboʼ (Hechos 15:21).

Kex sen chʼaʼpachtaʼab le máaxoʼob yaabiltmil le Biblia teʼ siglo 5 tak 15, seguernaj u traducirkoʼob yéetel u copiarkoʼob. Tak tu chúumukil le siglo 15 le maʼ inventartaʼak le imprenta tsolbil u beetaʼal u letrasiloʼ, tsʼokaʼaniliʼ u traducirtaʼal yéetel u imprimirtaʼal jujunpʼéel jaatsoʼob tiʼ le Biblia ich 33 idiomaʼoboʼ. Desde teʼ kʼiinoʼoboʼ káaj u traducirtaʼal yéetel u imprimirtaʼal le Biblia jeʼex mix juntéen tuklaʼab u beetaʼaloʼ.

U YUTSIL. Kex óotaʼab xuʼulsbil le Biblia tumen reyoʼob yéetel máaxoʼob nuʼuktik le Iglesiaoʼ, bejlaʼeʼ letiʼe libro maas kʼaj óolaʼan yéetel maas traducirtaʼanoʼ. Tiʼ leyoʼob yéetel tiʼ jujunpʼéel idiomaʼobeʼ tsʼoʼok tak u yoksaʼal u tuukulil baʼax ku yaʼalik le Bibliaoʼ. U millonesil máakoʼob tsʼoʼok u yáantaʼaloʼob tumen baʼax ku yaʼalik le Bibliaoʼ.