1, 2. 1) Teʼ tu tsʼook kʼiinoʼobaʼ, ¿bix tsʼoʼok u béeychajal Isaías 60:22? 2) ¿Baʼax táan u maas kʼaʼabéettal cada año?

«LE JUN chan láapʼaʼ bíin sen yaʼabchajak; le junpʼíit máakoʼobaʼ bíin suunak junpʼéel nojoch múuchʼ kaajoʼob» (Isa. 60:22). Le profecíaaʼ táan u béeychajal teʼ tu tsʼook kʼiinoʼobaʼ. Teʼ tu añoil 2015, tiʼ tuláakal yóokʼol kaabeʼ anchaj 8,220,105 máaxoʼob kʼaʼayt le baʼaxoʼob ken u beet le Reinooʼ. Ka tʼaanaj tiʼ bix kun maas yaʼabtal máaxoʼob meyajtikeʼ, Dioseʼ tu yaʼalaj: «Teen Yuumtsil, teen bíin in beet u séeb úuchul, jach tu kʼiinil». Jeʼex u bin u máan le kʼiinoʼoboʼ bey u bin u maas yaʼabtal le meyaj ichil u kaajal Jéeobaoʼ. ¿Táan wa k-beetik tuláakal le ku páajtal utiaʼal k-kʼaʼaytik yéetel k-kaʼansik le baʼax ken u beet le Reinooʼ? Yaʼab sukuʼunoʼob yéetel kiikoʼobeʼ tsʼoʼok u káajal u beetik u precursor regulariloʼob wa auxiliaroʼob. Yanoʼobeʼ tsʼoʼok u binoʼob áantaj teʼ tuʼuxoʼob maas kʼaʼabéet j-kʼaʼaytajoʼoboʼ, uláakʼoʼobeʼ tsʼoʼok u binoʼob áantaj utiaʼal u beetaʼal u Najiloʼob Reino.

² Cada añoeʼ óoliʼ dos mil túumben múuchʼuliloʼob ku yantal, tsʼoʼoleʼ teʼ múuchʼuliloʼobaʼ ku kʼaʼabéettal ancianoʼob yéetel siervo ministerialoʼobiʼ. Le oʼolaleʼ cada año ku máaneʼ kʼaʼabéet u yantal u  milesil u túumbenil siervos ministerialoʼob yéetel u milesil túumben ancianoʼob. Chéen baʼaleʼ ichil u kaajal Jéeobaeʼ yaʼab baʼax yaan beetbiliʼ, le oʼolaleʼ tuláakloʼon unaj k-maas k-tsʼáaik k-óol meyajt Dios, kex wa sukuʼunoʼob bey xan wa kex kiikoʼob (1 Cor. 15:58).

3, 4. Techeʼ, ¿baʼax taak a beetik utiaʼal a maas maʼalobkíintik bix a meyajtik Dios?

³ (Xok 1 Timoteo 3:1.) Le apóstol Pablooʼ tu yaʼaleʼ «wa juntúul xiib táan u kaxtik u tsʼaʼabaltiʼ u meeyjil u kanáantaʼal le múuchʼuliloʼ, jach maʼalob le baʼax ku tsʼíiboltikoʼ». Le baʼax tu yaʼalaʼ ku beetik k-tuukul tiʼ juntúul máak ku satsʼik wa ku tichʼik u kʼab utiaʼal u chʼaʼik junpʼéel baʼax yaan náach. Jeʼex le máak ku tsʼáaik u yóol u mach le baʼax u kʼáatoʼ, juntúul sukuʼun u kʼáat u beet u siervo ministerialileʼ kʼaʼabéet u tsʼáaik u yóol u yeʼes le jatsʼuts modos ku kʼáataʼal tiʼ máax u kʼáat u beet junpʼéel meyaj teʼ múuchʼuliloʼ. Tsʼoʼoleʼ ken tsʼaʼabak u beet u siervo ministerialileʼ, ku tsʼáaik xan u yóol utiaʼal u beet u ancianoil.

⁴ Yaan sukuʼunoʼob yéetel kiikoʼobeʼ yaʼab baʼaloʼob ku kʼexik ichil u kuxtaloʼob utiaʼal u béeytal u maas maʼalobkíintik bix u meyajtikoʼob Dios. Yanoʼobeʼ taak u beetik u precursor regulariloʼob, u meyajoʼob Betel wa u yáantajoʼob utiaʼal u beetaʼal u Najiloʼob Reino. Koʼox ilik bix u yáantaj le Biblia utiaʼal maʼ u xuʼulul k-maas maʼalobkíintik bix k-meyajtik Diosoʼ.

5. Le xiʼipalaloʼob yéetel le x-chʼúupalaloʼoboʼ, ¿bix jeʼel u maas meyajtikoʼob Dioseʼ?

⁵ Le máaxoʼob táankelmoʼoboʼ yaʼab baʼaxoʼob jeʼel u páajtal u beetkoʼob utiaʼal u maas meyajtikoʼob Jéeobaoʼ tumen letiʼobeʼ maas yaan u muukʼoʼob yéetel maas tʼaʼajoʼob (xok Proverbios 20:29). Yaʼab táankelmoʼobeʼ ku yáantajoʼob utiaʼal u imprimirtaʼal Bibliaʼob yéetel uláakʼ publicacionoʼob. Yanoʼob xaneʼ ku yáantajoʼob utiaʼal u yutskíintaʼal wa utiaʼal u beetaʼal u Najiloʼob Reino. Uláakʼoʼobeʼ ku binoʼob áantaj teʼ tuʼuxoʼob ku yúuchul nukuch loobiloʼoboʼ. Tsʼoʼoleʼ yaan precursoroʼob táankelmoʼobeʼ táan u kankoʼob uláakʼ idioma wa ku binoʼob kʼaʼaytaj tuʼux kʼaʼabéet áantaj.

6-8. 1) ¿Baʼax áant juntúul xiʼipal u kʼex u tuukul yéetel baʼax utsil tu kʼamaj? 2) ¿Baʼaxten jeʼel u páajtal k-aʼalik jach uts Jéeobaeʼ?

⁶ Toʼoneʼ k-yaabiltmaj Jéeoba yéetel k-kʼáat k-maas tsʼáa u maʼalobil tiʼ. Kex beyoʼ yaan horaeʼ k-uʼuyikba jeʼex juntúul sukuʼun ku kʼaabaʼtik Aaroneʼ. Letiʼeʼ taak kaʼach u maas tsʼáaik u yóol u meyajt Dios, chéen baʼaleʼ ku yuʼubik maʼ kiʼimak u yóoliʼ. Kex ku bin kaʼach teʼ muchʼtáambaloʼob yéetel ku jóokʼol kʼaʼaytaj desde tu chichnileʼ, letiʼeʼ ku yaʼalik: «Teneʼ jach ku náakal in wóol kaʼach teʼ muchʼtáambal yéetel teʼ kʼaʼaytajoʼ». ¿Baʼax tu beetaj le sukuʼunaʼ?

⁷ Aaroneʼ tu tsʼáaj u yóol u xok le Biblia sáamsamaloʼ, u preparartikuba utiaʼal le muchʼtáambaloʼoboʼ yéetel u comentar. Letiʼeʼ káaj xan u maas orar tiʼ Jéeoba. Lelaʼ le áant utiaʼal u maas maʼalobkíintik bix u meyajtik Dios, u maas kʼaj óoltik yéetel u maas yaabiltik. Ka tsʼoʼokeʼ Aaroneʼ tu yuʼubaj jach kiʼimak u yóol. Letiʼeʼ tu beetaj u precursoril, bin áantaj tuʼux ku yúuchul nukuch loob yéetel bin xan kʼaʼaytaj tuʼux maas kʼaʼabéet áantaj. Bejlaʼeʼ letiʼeʼ juntúul anciano yéetel tiʼ ku meyaj Beteleʼ. ¿Bix u yuʼubikuba bejlaʼeʼ? Letiʼeʼ ku yaʼalik: «Teneʼ tsʼoʼok in wilik Jéeobaeʼ jach uts. Letiʼeʼ tsʼoʼok u bendecirken, le oʼolaleʼ kin wuʼuyik yaʼab in pʼaax tiʼ, lelaʼ le beetik in maas meyajtik. Jéeoba túuneʼ maas ku bendecirken».

⁸ Le salmistaoʼ tu yaʼalaj: «Ilawileʼex bukaʼaj utsil le Yuumtsiloʼ». Tsʼoʼoleʼ tu yaʼalaj xan: «Le máaxoʼob ku kaxtikoʼob Yuumtsileʼ mix bikʼin jeʼel u bineltik wa baʼax tiʼobeʼ» (xok Salmo 34:8-10). Ken k-tsʼáa u maas maʼalobil tiʼ  Jéeobaeʼ ku kiʼimaktal k-óol tumen k-ojel táan k-beetik baʼax uts tu tʼaan. Wa k-beetik lelaʼ Jéeobaeʼ mix bikʼin ken u pʼatoʼon.

9, 10. ¿Baʼaxten kʼaʼabéet u yantal tiʼ máak paciencia?

⁹ Maʼ xaaneʼ toʼoneʼ k-kʼáat maas meyajt Jéeoba. Chéen baʼaleʼ, ¿kux túun wa úuch joʼopʼok k-páaʼtik u tsʼaʼabaltoʼon junpʼéel privilegio teʼ múuchʼuliloʼ? ¿Kux túun wa úuch joʼopʼok k-páaʼtik u kʼexpajal wa baʼax ichil k-kuxtal utiaʼal k-maas meyajtik Jéeoba? Kʼaʼabéet u yantaltoʼon paciencia (Miq. 7:7). Jéeobaeʼ yaan horaeʼ ku chaʼik u seguer u aktáantik máak le baʼaxoʼob ku yúuchultiʼoʼ, chéen baʼaleʼ letiʼeʼ mix bikʼin ken u pʼatoʼon chéen t-juunal. Toʼoneʼ yaʼab baʼaloʼob jeʼel u páajtal k-kanik tiʼ Abrahaneʼ. Jéeobaeʼ tu yaʼalajtiʼeʼ yaan u yantal juntúul u hijo, chéen baʼaleʼ máan yaʼab años tak ka síij Isaak. Abrahaneʼ jach anchaj u paciencia yéetel seguernaj u tsʼáaik u fe tiʼ Jéeoba (Gén. 15:3, 4; 21:5; Heb. 6:12-15).

¹⁰ U jaajileʼ maʼ chéen chʼaʼabil u páaʼtik máak wa baʼaxiʼ (Pro. 13:12). Chéen baʼaleʼ wa ku seguer k-tuukul tiʼ baʼax ku yúuchultoʼoneʼ yaan k-kʼuuxil yéetel yaan u lúubul k-óol. Baʼax unaj k-beetkeʼ letiʼe k-aprovechartik utiaʼal k-kanik k-eʼes uláakʼ jatsʼuts modos kun kʼaʼabéettal utiaʼal u tsʼaʼabaltoʼon uláakʼ meyajoʼob teʼ múuchʼuliloʼ.

11. ¿Baʼax jatsʼuts modosil unaj k-ilik u yantaltoʼon, yéetel baʼaxten kʼaʼabéetoʼob?

¹¹ Kan a weʼes le jatsʼuts modos kʼaʼabéettechoʼ. A xokik le Biblia yéetel a tuukul tiʼ baʼax ka xokikoʼ jeʼel u yáantkech utiaʼal ka maas yanak a naʼateʼ, ka tuukulnakech maʼalob yéetel ka a beet baʼax maʼalob ichil a kuxtal. Le sukuʼunoʼoboʼ unaj u yantaltiʼob le jatsʼuts modosaʼ utiaʼal u meyajoʼob teʼ múuchʼuliloʼ (Pro. 1:1-4;  Tito 1:7-9). Ken k-xok le Bibliaoʼ k-kʼuchul k-il baʼax ku tuklik Jéeoba yoʼolal yaʼab baʼaxoʼob. Le baʼaxoʼob k-kanikoʼ jeʼel u yáantkoʼon sáamsamal utiaʼal k-chʼaʼtuklik k-beetik baʼax uts tu tʼaan Jéeobaeʼ. Maʼ xaaneʼ yaan k-ojéeltik bix unaj k-tratartik u maasil, tiʼ baʼax unaj k-xupik k-taakʼin, tiʼ baʼax unaj k-náaysik k-óol yéetel baʼax nookʼil unaj k-tsʼáaik.

12. ¿Baʼax unaj u beetik máak utiaʼal ka tsʼaʼabak u beet u maasil meyaj teʼ múuchʼuliloʼ?

¹² Tsʼáa a wóol a beet le meyaj tsʼaʼantechoʼ. Le táan u yutskíintaʼal le templo tumen máaxoʼob meyajtik Diosoʼ, Nehemíaseʼ kʼaʼabéetchaj u kaxtik máakoʼob utiaʼal ka u beetoʼob jejeláas meyajoʼob. Letiʼeʼ tu yéeyaj le máaxoʼob yaantiʼob junpʼéel maʼalob kuxtal tu táan Diosoʼ. Letiʼeʼ u yojleʼ le máakoʼobaʼ u yaabiltmoʼob Dios yéetel yaan u tsʼáaik u yóol u beetoʼob jeʼel baʼalak meyajil ka tsʼaʼabaktiʼobeʼ (Neh. 7:2; 13:12, 13). Bejlaʼa xaneʼ teʼ múuchʼuliloʼ tiʼ le máaxoʼob chúukaʼan u yóoloʼob yéetel yaantiʼob junpʼéel maʼalob kuxtal tu táan Jéeobaoʼ ku tsʼaʼabaltiʼob u maasil meyaj u beetoʼob (1 Cor. 4:2). Le oʼolaleʼ tuláakloʼon unaj u seguer k-tsʼáaik k-óol k-beet jeʼel baʼalak meyajil ka tsʼaʼabaktoʼoneʼ, ichil lelaʼ táakaʼan tak le kiikoʼoboʼ (xok 1 Timoteo 5:25).

13. U ejemplo Joseeʼ, ¿bix jeʼel u yáantkech ken beetaʼaktech wa baʼaxeʼ?

¹³ Chaʼa u yáantkech Jéeoba. ¿Baʼax jeʼel u páajtal a beetik wa yaan máax ku beetiktech wa baʼaxeʼ? Maʼ xaaneʼ jeʼel u páajtal a tʼaan tu yéetel utiaʼal a waʼaliktiʼ bix a wuʼuyikabaeʼ. Wa ka waʼalik maʼ tiʼ tech anchaj u culpail yéetel chéen teech beetik baʼax maʼalobeʼ jeʼel a maas nojochkíintik le problemaoʼ. Toʼoneʼ yaʼab baʼaloʼob jeʼel k-kanik tiʼ Joseeʼ. U sukuʼunoʼobeʼ yaʼab baʼaloʼob tu beetoʼob tiʼ, tsʼoʼoleʼ tak le máakoʼob tuusnajoʼob ka tu beetoʼob u yoksaʼal cárcel kex mix baʼal kʼaas u beetmaj. Chéen baʼaleʼ Joseeʼ tu kʼubaj u yóol tiʼ Jéeoba. Letiʼeʼ mantatsʼ tuukulnaj tiʼ u promesaʼob Jéeoba yéetel chúukpaj u yóol (Sal. 105:19). Tu aprovechartaj xan le tiempo utiaʼal u yilik u yantaltiʼ uláakʼ jatsʼuts modosoʼ, lelaʼ le áant u beet maʼalob le nojoch meyaj tsʼaʼabtiʼ ka máan kʼiinoʼ (Gén. 41:37-44; 45:4-8). Bey túunoʼ wa ku beetaʼaltech wa baʼaxeʼ kʼáat tiʼ Jéeoba ka u tsʼáatech naʼat. Letiʼeʼ yaan u yáantkech utiaʼal maʼ a tsʼíikil yéetel a weʼesik yaabilaj ken tʼaanakech yéetel le máax anchajtech le problemaoʼ (xok 1 Pedro 5:10).

14, 15. 1) ¿Baʼaxten unaj k-maʼalobkíintik bix k-kʼaʼaytaj? 2) ¿Bix uláakʼ jeʼel u páajtal a kʼaʼaytaj le tuʼux yanechoʼ? (Ilawil le fotoʼob yaan tu káajbal le xookaʼ bey xan le cuadro ku kʼaabaʼtik « ¿A kʼáat wa a kʼex bix a kʼaʼaytaj?».)

¹⁴ Apóstol Pabloeʼ tu yaʼalaj tiʼ Timoteo ka u maas maʼalobkíint u kaʼansaj, tu yaʼalajtiʼ: «Maʼ u xuʼulul a kanáantkaba yéetel mantatsʼ jach kanáant baʼax ka kaʼansik» (1 Tim. 4:13, 16). Timoteoeʼ tsʼoʼok kaʼach u máan yaʼab años joʼopʼok u kʼaʼaytaj, le oʼolaleʼ, ¿baʼaxten unaj u kanáantik bix u kaʼansaj? Tumen letiʼeʼ u yojleʼ le máakoʼoboʼ séeb u kʼexpajal bix u tuukuloʼob yéetel bix u kuxtaloʼob. Wa Timoteo u kʼáat ka seguernak u yuʼubaʼal tumen le máakoʼoboʼ unaj u seguer u maʼalobkíintik bix u kʼaʼaytaj yéetel unaj u yilik u beetik jejeláas bixi. Teʼ kʼiinoʼobaʼ toʼoneʼ unaj k-beetik xan beyoʼ.

¹⁵ Yaan tuʼuxoʼobeʼ ken kʼaʼaytajnakoʼon joonaj joonajileʼ, k-ilkeʼ maʼ kulaʼan u yuumiloʼob najiʼ. Tuláakʼ tuʼuxoʼobeʼ tiaʼanoʼob tu yotochoʼobeʼ, chéen baʼaleʼ maʼ tu páajtal k-okol teʼ edificioʼob wa teʼ tuʼuxoʼob kajaʼanoʼoboʼ. Wa bey u yúuchul teʼ territorio tsʼaʼantoʼonoʼ unaj k-kaxtik uláakʼ bix jeʼel u páajtal k-kʼaʼaytajtiʼobeʼ.

16. ¿Bix jeʼel u bintoʼon utsil ken kʼaʼaytajnakoʼon teʼ tuʼux ku máan yaʼab máakoʼ?

¹⁶ Yaʼab sukuʼunoʼob yéetel kiikoʼobeʼ jatsʼuts u yilkoʼob u kʼaʼaytajoʼob teʼ tuʼux yaʼab u máan máak jeʼex tu estacionil le tren wa autobusoʼ, mercadoʼob yéetel parqueʼob. ¿Tiʼ baʼax ku tʼaanoʼob? Utiaʼal u káajsik u tsikbaloʼobeʼ  yaan horaeʼ ku tʼaanoʼob tiʼ junpʼéel túumben noticia. Yaan horaeʼ ku yaʼalikoʼob wa baʼax maʼalob tu yoʼolal u paalaloʼob le u yuumil najoʼ wa ku beetkoʼob junpʼéel kʼáatchiʼ yoʼolal u meyajoʼob. Wa ku yilkoʼob jatsʼuts u yuʼubik u yuumil najeʼ ku tsolkoʼob baʼax ku yaʼalik le Bibliaoʼ yéetel ku kʼáatkoʼobtiʼ baʼax ku tuklik tu yoʼolal le baʼax tsʼoʼok u yuʼubikoʼ. Yaan horaeʼ le máakoʼoboʼ ku taaktal u kankoʼob u maasil.

17, 18. 1) ¿Baʼax jeʼel u yáantkoʼon utiaʼal maʼ k-sajaktal ken kʼaʼaytajnakoʼon tuʼux yaʼab u máan máakeʼ? 2) Ken jóokʼkech kʼaʼaytajeʼ, ¿bix jeʼel u yáantkech le baʼax tu yaʼalaj Davidoʼ?

¹⁷ Maʼ xaaneʼ techeʼ istikyaj a wilik a káajsik a tsikbal yéetel le máakoʼob teʼ calleʼoboʼ tumen maʼ a kʼaj óoloʼobiʼ. Lelaʼ letiʼe baʼax úuch tiʼ Eddie, juntúul precursor yaan tu kaajil Nueva Yorkoʼ. ¿Baʼax áant utiaʼal maʼ u sajaktal? Letiʼeʼ ku yaʼalik: «Teʼ adoración ich familiaoʼ, teen yéetel in wataneʼ k-ilik bix jeʼel k-núukik le baʼaloʼob maas jeʼel u yaʼalik le máakoʼob utiaʼal maʼ u yuʼubikoʼonoʼ. Tsʼoʼoleʼ k-kʼáatik xan tiʼ uláakʼ j-Jaajkunajoʼob bix u beetkoʼob». Bejlaʼeʼ Eddieeʼ jatsʼuts u yilik u kʼaʼaytaj teʼ tuʼux yaʼab u máan máakoʼ.

¹⁸ Wa ku kiʼimaktal k-óol ikil k-kʼaʼaytaj bey xan wa k-ilik k-maas maʼalobkíintikeʼ, u maasiloʼobeʼ yaan u yilkoʼob táan k-maas maʼalobkíintik bix k-meyajtik Jéeoba (xok 1 Timoteo 4:15). Maʼ xaaneʼ hasta jeʼel u páajtal k-áantik wa máax utiaʼal u meyajtik Jéeobaeʼ. Davideʼ tu yaʼalaj: «Mantatsʼ bíin in kiʼikiʼtʼant Yuumtsil; maʼ bíin jáawak u kiʼikiʼtʼantaʼal tumen in chiʼiʼ. Teneʼ kin wuʼuyikinba kaʼanal in wich tu yoʼolal Yuumtsil; ¡uʼuyeʼex kiʼimakchajak xan a wóoleʼex, kabal óol máakeʼex!» (Sal. 34:1, 2).

19. Juntúul máax meyajtik Dioseʼ, ¿baʼaxten jeʼel u kiʼimaktal u yóol kex maʼ chéen chʼaʼabil bix u kuxtaleʼ?

¹⁹ Davideʼ tu yaʼalaj xan: «¡Ka u kiʼikiʼtʼantechoʼob, Yuumtsil, tuláakal a meyajoʼob! ¡Ka u yutsil tʼantechoʼob tuláakal le ku yoksik yóoloʼob tiʼ techeʼ! ¡Ka tʼaanakoʼob tu yoʼolal u ayikʼalil a [gobernación]! ¡Ka úuchuk tʼaan tu yoʼolal a páajtalil meyajoʼob! ¡Ka tsʼaʼabak u yojéelt le máakoʼoboʼ a páajtalil yéetel u nojoch ayikʼalil a [gobernación]!» (Sal. 145:10-12). Le máaxoʼob yaabiltmil Jéeoba yéetel chúukaʼan u yóoloʼob tiʼoʼ jach u kʼáat u tsikbaltoʼob tiʼ uláakʼ máakoʼob tu yoʼolal Jéeoba. Chéen baʼaleʼ, ¿kux túun wa maʼ tu páajtal k-sen jóokʼol kʼaʼaytaj joonaj joonajil tumen kʼojaʼanoʼon wa tumen tsʼoʼok k-chʼíijil? Maʼ unaj k-tuʼubsikeʼ toʼoneʼ k-nojbeʼenkúuntik Jéeoba cada ken tʼaanakoʼon tiʼ letiʼ yéetel wa máax, ichiloʼobeʼ okaʼan tak le enfermeraʼoboʼ tak le doctoroʼoboʼ. ¿Kux túun wa kʼalaʼanoʼon cárcel ikil k-meyajtik Jéeoba? Láayliʼ jeʼel u páajtal xan k-tʼaan tiʼ Jéeobaeʼ yéetel k-beetik u kiʼimaktal u yóol u puksiʼikʼal (Pro. 27:11). Jéeoba xaneʼ ku kiʼimaktal u yóol wa táan k-meyajtik kex u maasil k-láakʼtsiloʼob maʼ tu beetkoʼob (1 Ped. 3:1-4). Jeʼex k-ilkoʼ jeʼel bixak kuxlikoʼoneʼ jeʼel u páajtal k-nojbeʼenkúuntik Jéeobaeʼ, k-maas natsʼikba tu yiknal yéetel k-maas maʼalobkíintik bix k-meyajtik.

20, 21. Wa k-tsʼáaik k-óol maas meyajt Dioseʼ, ¿bix ken u yiloʼon u maasil?

²⁰ Jéeobaeʼ yaan u bendecirkoʼon wa k-maas natsʼikba tu yiknal yéetel wa k-maas maʼalobkíintik bix k-meyajtik. Wa k-kʼexik jujunpʼéel baʼaloʼob ichil k-kuxtal yéetel wa k-jóoʼsik tiempoeʼ, jeʼel u páajtal k-áantik maas yaʼab máakoʼob utiaʼal ka kaanbalnakoʼob tiʼ u jatsʼuts promesaʼob Jéeobaeʼ. Tsoʼoleʼ jeʼel xan u páajtal k-maas áantik le sukuʼunoʼoboʼ. Letiʼobeʼ ken u yiloʼob bix k-tsʼáaik k-óol meyajt Dios teʼ múuchʼuliloʼ, yaan u kʼuchul u maas yaabiltoʼonoʼob.

²¹ Kex jeʼel bukaʼaj tiempo joʼopʼok k-meyajtik Jéeobaeʼ tuláakloʼon unaj k-ilik maas k-natsʼikba tu yiknal Jéeoba yéetel k-maas maʼalobkíintik bix k-meyajtik. Teʼ tuláakʼ xookoʼ yaan k-kanik bix jeʼel k-áantik u maasil utiaʼal ka u beetoʼob xan beyoʼ.