Huldaeʼ páajchaj u manik le baʼax jach ku tsʼíiboltikoʼ
WA KA xiʼikech tu islail Sangir Besar (Indonesia) walajki wa jaypʼéel añosaʼ, maʼ xaaneʼ jeʼel kaʼach a wilik óoxtúul kiikoʼob teʼ playaoʼ. Kex kʼaj óoltaʼanoʼob tumen ku kaʼanskoʼob tiʼ u maasil baʼax ku yaʼalik le Bibliaoʼ, u jaajileʼ maʼ kʼaʼaytaj ku beetkoʼob teʼ playaoʼ. ¿Baʼax túun ku beetkoʼob kaʼachiʼ?
U islail Sangir Besar tu xamanil Indonesia
Yáaxeʼ ku yookloʼob teʼ kʼáaʼnáab utiaʼal u kaxtikoʼob nukuch tuunichoʼob bukaʼajoʼob jeʼex junpʼéel u balónil fútboleʼ, kéen tsʼoʼokkeʼ ku jóoʼskoʼob tu jáal le kʼáaʼnáaboʼ. Le kiikoʼoboʼ ku kutaloʼob tiʼ junpʼéel silla, tsʼoʼoleʼ yéetel junpʼéel martilloeʼ ku jatsʼkoʼob le tuunich hasta ken pʼáatak maas chichan tiʼ junpʼéel jeʼoʼ. Kéen tsʼoʼokkeʼ ku butʼikoʼob tiʼ junpʼéel chʼóoy de plástico yéetel ku biskoʼob tu yotochoʼob. Teʼ túunoʼ ku butʼikoʼob tiʼ junpʼéel nuxiʼ bolsa, tu tsʼookeʼ ku taal chʼaʼabil tumen camión. Le tuunichoʼobaʼ ku meyaj utiaʼal u beetaʼal carreteraʼob.
Huldaeʼ táan u molik tuunich jáal jaʼ
Juntúul tiʼ le kiikoʼoboʼ ku kʼaabaʼtik Hulda. Letiʼeʼ ku páajtal kaʼach u meyaj junpʼíit maas tiempo teʼ playa ke u maasiloʼ. Yéetel le ku náajaltik ikil u konik le tuunichoʼoboʼ ku páajtal u yáantik u familia yéetel le gastooʼ. Chéen baʼaleʼ beoraaʼ yéetel le taakʼin ku náajaltikoʼ taak u manik junpʼéel tablet utiaʼal u yokol JW Library®. Huldaeʼ u yojleʼ le videoʼob yéetel le publicaciónoʼob yaan teʼ aplicaciónoʼ yaan u yáantik utiaʼal u maas kanik kʼaʼaytaj bey xan utiaʼal u maas naʼatik le Bibliaoʼ.
Huldaeʼ meyajnaj dos horas sáamsamal de temprano ichil junpʼéel mes y medio. Letiʼeʼ páajchaj u chupik junpʼéel chan camión yéetel le tuunichoʼob tu baʼabaxoʼ. Páajchaj u manik u tablet yéetel le taakʼin tu náajaltoʼ.
Hulda yéetel u tablet
Huldaeʼ ku yaʼalik: «U jaajileʼ jach kaʼanen yéetel yaachaj in wíinklil ikil in jaʼajatsʼik le tuunichoʼoboʼ. Chéen baʼaleʼ ka tin wilaj in tableteʼ hasta tuʼubten wa yaachajaʼan in wíinklil, tumen yéetel le tabletoʼ yaan u páajtal in kʼaʼaytaj maas maʼalob yéetel maas séeb ken in preparartinba utiaʼal le reuniónoʼoboʼ». Tu yaʼalaj xaneʼ le tabletoʼ le áant le ka káaj le pandemiaoʼ tumen puro tiʼ videoconferencia ku beetaʼal le reuniónoʼoboʼ. Jach kiʼimak k-óol tumen Huldaeʼ páajchaj u manik le baʼax jach ku tsʼíiboltikoʼ.
