¿Máakalmáak le teksto maas uts ta wichoʼ? Maʼ xaaneʼ yaʼab. Por ejemploeʼ junpʼéel jeʼel u líiʼsik a wóoleʼ, junpʼéel ku yáantkech utiaʼal ka yanaktech maʼalob tuukul wa junpʼéel uts ta tʼaan a tsikbaltik tiʼ u maasil (Sal. 119:​11, 111). Pero yaan horaeʼ istikyaj a kʼaʼajsik baʼax ku yaʼalik wa tuʼux teʼ Biblia yanoʼ. Koʼoneʼex ilik baʼax jeʼel u yáantkoʼoneʼ.

• Meyajnaktech le etiquetas yaan teʼ JW Library^®. Le kéen a xok le Biblia teʼ JW Library, yéetel ka wilik junpʼéel teksto uts ta wicheʼ utiaʼal a kʼaʼajsikeʼ jeʼel u páajtal a tsʼáaik junpʼéel etiqueta ku yaʼalik: «Tekstoʼob uts tin wich».

• Tsʼáa tuʼux jeʼel u páajtal a wilkeʼ. Yaan sukuʼunoʼobeʼ ku tsʼíibtikoʼob tiʼ junpʼéel juʼun le tekstooʼ, tsʼoʼoleʼ ku takʼikoʼob teʼ néenoʼ wa teʼ refrigeradoroʼ. Uláakʼoʼobeʼ ku chʼaʼikoʼob u foto le tekstooʼ, tsʼoʼoleʼ ku tsʼáaikoʼob tu pantallail u celularoʼob wa u computadoraʼob, beyoʼ le kéen u tʼaboʼobeʼ le kun yáax chíikpajal.

• Beet tarjetaʼob. Tiʼ juntséel le tarjetaoʼ ka tsʼíibtik baʼax ku yaʼalik le tekstooʼ, tiʼ uláakʼ juntséeleʼ ka tsʼíibtik baʼax tekstoil aʼalik. Kéen tsʼoʼokkeʼ ka wilik chéen juntséel le tarjetaoʼ utiaʼal a wilik wa ka kʼaʼajsik.