1. ¿Baʼax ku páaʼtik Jéeoba tiʼ toʼon?

 LE BAʼAX maas taasik kiʼimak óolal tiʼ le tsʼokaʼan u beeloʼoboʼ letiʼe kéen síijik u chaambaloʼoboʼ, maases wa toj u yóol le chaambaloʼ. Chéen baʼaleʼ kex jach u yaabiltmoʼobeʼ u kʼáatoʼob ka nojochchajak. Hasta jeʼel u preocuparkubaʼob wa ku yilkoʼob maʼ tu nojochtaleʼ. Jéeoba xaneʼ jach ku kiʼimaktal u yóol kéen u yil táan u káajal k-kʼaj óoltik yéetel táan u káajal k-beetikba u discípulo Jesús. Chéen baʼaleʼ maʼ u kʼáat ka pʼáatkoʼon mantatsʼ bey mejen paalaloʼoneʼ (1 Cor. 3:1). Baʼaxeʼ letiʼeʼ ku páaʼtik ka pʼáatkoʼon bey «nukuch máakoʼob[eʼ]» (1 Cor. 14:20).

2. ¿Baʼax ken k-il teʼ xookaʼ?

² Teʼ xookaʼ yaan u núukaʼal le preguntaʼobaʼ: ¿Bix juntúul máak ku adorartik Dios tsʼoʼok u pʼáatal bey juntúul nojoch máakeʼ? ¿Baʼax unaj k-beetik utiaʼal ka yiijchajak k-tuukul? ¿Bix u yáantkoʼon utiaʼal ka yiijchajak k-tuukul le kaʼansaj ku keʼetel yéetel chichich janaloʼ? ¿Baʼaxten maʼ unaj u confiarkuba máakiʼ?

¿BIX JUNTÚUL MÁAK KU ADORARTIK DIOS TSʼOʼOK U PʼÁATAL BEY JUNTÚUL NOJOCH MÁAKEʼ?

3. ¿Baʼax u kʼáat u yaʼal u yiijtal u tuukul máak?

³ Teʼ Bibliaoʼ le tʼaan griego ku traducirtaʼal bey «nukuch máakoʼobeʼ» u kʼáat xan u yaʼal «yiijchajaʼan u tuukul», «perfecto» yéetel «chúukaʼan» (1 Cor. 2:6). a Jeʼex u bin u nojochtal juntúul chaambal hasta u pʼáatal nojoch máakileʼ toʼon xaneʼ kʼaʼabéet u bin u maas nojochtal le yaabilaj k-uʼuyik yoʼolal Jéeobaoʼ. Wa k-beetik beyoʼ yaan u yiijchajal k-tuukul. Chéen baʼaleʼ maʼ tiʼ unaj u náakliʼ, kʼaʼabéet u seguer k-progresar  (1 Tim. 4:15). Tuláakloʼon tak le táankelmoʼoboʼ jeʼel u páajtal u yiijtal k-tuukuleʼ. Chéen baʼaleʼ, ¿baʼax eʼesik tsʼoʼok u yiijtal u tuukul juntúul máak?

4. ¿Baʼax ku beetik juntúul máak yiijchajaʼan u tuukul?

⁴ Juntúul máak yiijchajaʼan u tuukuleʼ ku beetik tuláakal baʼax ku yaʼalik Dios, maʼ chéen le baʼax ku convenir tiʼeʼ. Chéen baʼaleʼ como kʼebaneʼ yaan horaeʼ jeʼel xan u beetik baʼax maʼ maʼalobeʼ, pero kex beyoʼ yéetel baʼax ku tuklik bey xan yéetel baʼax ku beetkeʼ ku yeʼesik u kʼáat u beet baʼax uts tu tʼaan Dios. Letiʼeʼ tsʼoʼok u túumbenkuntik u modos yéetel ku yilik u tuukul jeʼex u tuukul Dioseʼ (Efe. 4:​22-24). Le kéen u chʼaʼ decisiónoʼobeʼ ku chʼaʼik en cuenta baʼax ku yaʼalik le Bibliaoʼ. Le oʼolal maʼ kʼaʼabéettiʼ junpʼéel lista tuʼux ku yaʼalik baʼax unaj u beetkiʼ yéetel baʼax maʼ unaj u beetkiʼ. Tsʼoʼoleʼ le kéen u chʼaʼ junpʼéel decisióneʼ ku yilik u beetik beyoʼ (1 Cor. 9:​26, 27).

5. ¿Baʼax ku yúuchul tiʼ le máax maʼ yiijchajaʼan u tuukuloʼ? (Efesios 4:​14, 15).

⁵ Le máax maʼ yiijchajaʼan u tuukuloʼ jach séeb u creertik baʼax ku yaʼalik le «máakoʼob jach yaan u naʼatoʼob utiaʼal u tuusoʼob[oʼ]». Le oʼolal séeb jeʼel u creertik le baʼaxoʼob maʼ jaajtak ku yaʼalik le apóstataʼoboʼ (xok Efesios 4:​14, 15). b Tsʼoʼoleʼ le máax maʼ yiijchajaʼan u tuukuloʼ jach séeb u tsʼíikil, séeb u ofender, ku baʼateʼel yéetel u maasil yéetel jach séeb jeʼel u lúubul tiʼ kʼebaneʼ (1 Cor. 3:3).

6. ¿Baʼax yéetel ku keʼetel u yiijtal u tuukul máak? (Ilawil xan le fotooʼ).

⁶ Jeʼex tsʼoʼok k-ilkoʼ teʼ Bibliaoʼ ku comparartaʼal u yiijtal u tuukul máak yéetel u bin u nojochtal juntúul chan paal tak ken pʼáatak nojoch máakil. Juntúul chan paaleʼ maʼ tu páajtal u kanáantkuba tu juunal, baʼaxeʼ kʼaʼabéet u kanáantaʼal tumen juntúul nojoch máak. Utiaʼal k-naʼatikeʼ koʼox ketik beyaʼ: koʼox aʼalikeʼ juntúul maamatsileʼ ku machik u kʼab u chan hija kéen u kʼáatmáansoʼob junpʼéel calle, pero kéen nojochchajak le chan x-chʼúupaloʼ ku chaʼik u kʼáatmáansik le calle tu juunaloʼ, chéen baʼaleʼ ku yaʼaliktiʼ ka u kanáantuba yéetel ka paakatnak tuláakal tuʼux táanil tiʼ u kʼáatmáan. U suukileʼ le kéen nojochchajak máakeʼ tu juunal ku kanáantkuba. Jeʼex le mejen paalaloʼob kʼaʼabéet  u kanáantaʼaloʼob tumen juntúul nojoch máakoʼ le máaxoʼob maʼ yiijchajaʼan u tuukuloʼoboʼ kʼaʼabéet u yáantaʼaloʼob tumen juntúul máax yiijchajaʼan u tuukul utiaʼal ka u chʼaʼob maʼalob decisiónoʼob bey xan utiaʼal maʼ u náachtaloʼob tiʼ Jéeoba. Pero le máax yiijchajaʼan u tuukuloʼ le kéen u chʼaʼtukult baʼax ken u beeteʼ ku chʼaʼik en cuenta baʼax ku yaʼalik le Biblia utiaʼal u yilik baʼax ku tuklik Jéeobaoʼ.

7. ¿Ku kʼaʼabéettal wa u yáantaʼal le máaxoʼob yiijchajaʼan u tuukuloʼoboʼ?

⁷ ¿U kʼáat wa túun u yaʼaleʼ le máaxoʼob yiijchajaʼan u tuukuloʼoboʼ maʼ kʼaʼabéet u yáantaʼaloʼobiʼ? Maʼatech. Yaan horaeʼ ku kʼaʼabéettal u kʼáatkoʼob áantaj, pero le máaxoʼob maʼ yiijchajaʼan u tuukuloʼoboʼ ku páaʼtkoʼob ka aʼalaʼaktiʼob baʼax unaj u beetkoʼob wa ka chʼaʼabak junpʼéel decisión tu yoʼolaloʼob. Le máax yiijchajaʼan u tuukuloʼ ku chʼaʼik en cuenta le consejo ku tsʼaʼabaltiʼ tumen le máaxoʼob maas yaan u naʼatoʼoboʼ yéetel u yojleʼ «cada juntúuleʼ yaan u bisik u kuuch» (Gál. 6:5).

8. ¿Igual wa tuláakal baʼax ku beetik le máaxoʼob yiijchajaʼan u tuukuloʼoboʼ?

⁸ U jaajileʼ tuláakloʼon diferenteʼon. Bey xan u yúuchul yéetel le máaxoʼob yiijchajaʼan u tuukuloʼoboʼ, maʼ igual bix u modosoʼobiʼ. Por ejemploeʼ yaneʼ jach yaan u naʼat, uláakʼoʼobeʼ maʼ saajkoʼobiʼ, yaan xaneʼ jach uts u modosoʼob yéetel uláakʼoʼobeʼ jach ku naʼatkoʼob bix u yuʼubikuba máak. Koʼoneʼex aʼalikeʼ kaʼatúul máakoʼob yiijchajaʼan u tuukuloʼobeʼ táan u aktáantkoʼob junpʼéel problema, cada juntúuleʼ jelaʼan le decisión ku chʼaʼik utiaʼal u yutskíintikoʼ, pero mix juntúul ku bin tu contra le Bibliaoʼ. Lelaʼ maases ku yúuchul yéetel baʼaloʼob yaan yil yéetel u conciencia máak. Le oʼolal mix juntúul ku criticartik le baʼax tu beetaj le uláakʼ juntúuloʼ, baʼaxeʼ ku yilkoʼob u múul adorarkoʼob Dios (Rom. 14:10; 1 Cor. 1:10).

¿BAʼAX UNAJ K-BEETIK UTIAʼAL KA YIIJCHAJAK K-TUUKUL?

9. ¿Chéen wa bey u yiijtal u tuukul máakoʼ? Tsole.

⁹ Desde kéen síijik máakeʼ k-ojel yaan u nojoch máaktal, pero maʼ bey u yúuchul yéetel u yiijchajal u tuukul máakoʼ, tumen utiaʼal leloʼ yaan baʼax kʼaʼabéet u beetik. Leloʼ bey u yeʼesik le baʼax úuch yéetel le sukuʼunoʼob yanoʼob kaʼach Corintooʼ. Letiʼobeʼ tu creertoʼob u tʼaan «Yuumtsil», okjaʼanajoʼob yéetel tsʼaʼabtiʼob espíritu santo. Tsʼoʼoleʼ yanchajtiʼob u privilegioil u kaʼansaʼaloʼob tumen apóstol Pablo (Hech. 18:​8-11). Kex beyoʼ ka máan kʼiineʼ tu yeʼesoʼob maʼ yiijchajaʼan u tuukuloʼobiʼ (1 Cor. 3:2). ¿Baʼax unaj k-beetik utiaʼal maʼ u yúuchultoʼon beyoʼ?

10. ¿Baʼaxoʼob jeʼel u páajtal k-beetik utiaʼal ka yiijchajak k-tuukuleʼ? (Judas 20).

¹⁰ Utiaʼal ka yiijchajak k-tuukuleʼ táanil kʼaʼabéet k-tsʼíiboltik. Le máaxoʼob u yaabiltmoʼob «le j-maʼ naʼatiloʼ» maʼ tu progresaroʼob, tumen letiʼobeʼ uts tu tʼaan u pʼáatloʼob bey mejen paalaloʼobeʼ (Pro. 1:22). Toʼoneʼ maʼ k-kʼáat pʼáatal jeʼex le máakoʼob tsʼoʼok u chʼíijloʼob pero láayliʼ ku kʼáatkoʼob tiʼ u papáʼob baʼax unaj u beetkoʼobeʼ. Baʼaxeʼ k-kʼáat pʼáatal jeʼex máakoʼob responsableʼob tiʼ baʼax ku beetkoʼob yéetel yiijchajaʼan u tuukuloʼobeʼ (xok Judas 20). Wa todavía maʼ yiijchajak a tuukuleʼ kʼáat tiʼ Jéeoba ka u tsʼáatech «u tsʼíibolalil yéetel u páajtalil» a beetik (Fili. 2:13).

11. ¿Baʼax áantajil yaantoʼon utiaʼal ka yiijchajak k-tuukul? (Efesios 4:​11-13).

¹¹ Jéeobaeʼ u yojel kʼaʼabéet k-áantaʼal utiaʼal ka yiijchajak k-tuukul. Le máaxoʼob ku beetik u j-kanan tamaniloʼob yéetel le ku kaʼansajoʼob teʼ múuchʼuliloʼ u yojloʼob bix jeʼel u yáantkoʼonoʼob utiaʼal ka pʼáatkoʼon «jeʼex juntúul nojoch wíinikeʼ, utiaʼal beyoʼ ka kuxlakoʼon jeʼex úuchik u kuxtal Cristoeʼ» (xok Efesios 4:​11-13). Jéeobaeʼ ku tsʼáaiktoʼon  xan u espíritu santo utiaʼal ka yanaktoʼon «u tuukul Cristo» (1 Cor. 2:​14-16). Tsʼoʼoleʼ tu beetaj xan u tsʼíibtaʼal le cuatro Evangelioʼob utiaʼal k-ilik bix úuchik u tuukul, baʼax tu yaʼalaj yéetel baʼax tu beetaj Jesús le táan u kaʼansaj way Luʼumeʼ. Wa k-tuukul jeʼex Jesús yéetel k-beetik le baʼaxoʼob tu beetoʼ yaan u yiijtal k-tuukul.

¿BIX U YÁANTKOʼON LE CHICHICH JANAL ESPIRITUALOʼ?

12. Aʼal jujunpʼéel tiʼ le baʼaloʼob ku yáax kanik máakoʼ.

¹² Wa k-kʼáat ka yiijchajak k-tuukuleʼ maʼ chéen unaj k-kanik «le yáax baʼaloʼob unaj u kaʼanal tiʼ Cristooʼ» baʼaxeʼ kʼaʼabéet u seguer k-kaanbal. Jujunpʼéel tiʼ le baʼaloʼob ku yáax kanik máakoʼ letiʼe u arrepentiroʼ, u yantal u fe, u yokjaʼ yéetel u kanik yaan u kaʼa kuxtal le kimenoʼoboʼ (Heb. 6:​1, 2). Tuláakal le máaxoʼob meyajtik Diosoʼ unaj u yojloʼob lelaʼ. Apóstol Pedroeʼ le ka kʼaʼaytajnaj tu táan yaʼabkach máakoʼob teʼ Pentecostésoʼ tʼaanaj tiʼ le baʼaloʼobaʼ (Hech. 2:​32-35, 38). Jeʼex k-ilkoʼ utiaʼal ka k-beetba u discípulo Jesúseʼ kʼaʼabéet k-kʼamik le yáax kaʼansajoʼoboʼ. Leloʼ bey u yeʼesik le baʼax tu kaʼansaj apóstol Pablooʼ, letiʼeʼ tu yaʼaleʼ le máax ku rechazartik le yáax kaʼansajoʼoboʼ táan xan u rechazartik le u maasil kaʼansajoʼoboʼ (1 Cor. 15:​12-14). Chéen baʼaleʼ maʼ tiʼ ku náakliʼ, kʼaʼabéet u seguer k-kaanbal.

13. ¿Baʼax unaj k-beetik utiaʼal k-jóoʼsik u yutsil le chichich janal ku yaʼalik Hebreos 5:14? (Ilawil xan le fotooʼ).

¹³ Le chichich janal espiritualoʼ maʼ igual yéetel le baʼaxoʼob ku yáax kanik máakoʼ. Tumen ichileʼ maʼ chéen yaan k-kanik u leyoʼob Jéeobaiʼ, baʼaxeʼ yaan xan k-kanik le principioʼob ku yáantkoʼon k-naʼat bix u tuukul Jéeobaoʼ. Utiaʼal ka k-jóoʼs u yutsil le janal jeʼelaʼ kʼaʼabéet k-xakʼalxook, k-tuukul tiʼ le baʼax k-xokikoʼ yéetel k-tsʼáaik ichil k-kuxtal le baʼax k-kanikoʼ. Kéen k-beet beyoʼ táan k-preparartikba utiaʼal k-chʼaʼik decisiónoʼob uts tu tʼaan Dios (xok Hebreos 5:14). c

14. ¿Bix úuchik u yáantik Pablo le sukuʼunoʼob yanoʼob Corinto utiaʼal ka yiijchajak u tuukuloʼoboʼ?

¹⁴ Le máax maʼ yiijchajaʼan u tuukuloʼ maas istikyaj u yilik baʼax ken u beet wa maʼ tu jach aʼalik le Biblia baʼax unaj u beetaʼaloʼ. Letiʼeʼ ku tuklikeʼ wa minaʼan junpʼéel teksto  jach aʼalik baʼax unaj u beetkeʼ jeʼel u páajtal u beetik jeʼel baʼaxak u kʼáateʼ. Yaan horaeʼ u kʼáat ka jach aʼalaʼaktiʼ baʼax unaj u beetik cuando maʼ jach tsaaj ka aʼalaʼaktiʼiʼ. Por ejemploeʼ le sukuʼunoʼob kajaʼanoʼob kaʼach Corintooʼ tu kʼáatoʼob tiʼ Pablo wa jeʼel u páajtal u jaantikoʼob le janaloʼob kʼubaʼanoʼob kaʼach tiʼ imagenoʼoboʼ. Pero Pabloeʼ maʼ tu yaʼalajtiʼob baʼax unaj u beetkoʼobiʼ baʼaxeʼ tu tsolajtiʼob tiʼ letiʼob yaan u «derechoil» u yéeyikoʼob baʼax unaj u beetkoʼob de acuerdo yéetel u concienciaʼob. Tsʼoʼoleʼ tu yeʼesajtiʼob principioʼob jeʼel u yáantkoʼob u chʼaʼob junpʼéel maʼalob decisióneʼ, beyoʼ yaan u pʼáatal tranquiloil u concienciaʼob yéetel maʼ ken u beetoʼob u tʼóochpajal mix máak (1 Cor. 8:​4, 7-9). Jeʼex k-ilkoʼ Pabloeʼ tu yáantoʼob utiaʼal ka yiijchajak u tuukuloʼob yéetel utiaʼal ka u chʼaʼob maʼalob decisiónoʼob. Beyoʼ maʼ kun kʼaʼabéettal u kʼáatkoʼob tiʼ u maasil baʼax unaj u beetkoʼob.

15. ¿Bix úuchik u yáantik Pablo le sukuʼunoʼob hebreoʼob utiaʼal ka seguernak u progresaroʼoboʼ?

¹⁵ Yaan baʼax xan jeʼel k-kanik tiʼ le carta tu tsʼíibtaj Pablo tiʼ le sukuʼunoʼob hebreoʼoboʼ. Jujuntúul tiʼ letiʼobeʼ xuʼul u progresaroʼob, aʼalaʼabtiʼob: «Tsʼoʼok u kaʼa kʼaʼabéettal a tséentaʼaleʼex yéetel leche, maʼ yéetel chichich janaliʼ» (Heb. 5:12). Letiʼobeʼ xuʼul u kʼamkoʼob le kaʼansaj ku tsʼaʼabal teʼ múuchʼuliloʼ (Pro. 4:18). Por ejemploeʼ yaan judíoʼobeʼ u kʼáatoʼob kaʼach ka seguernak u beetaʼal le baʼax ku yaʼalik le ley tsʼaʼab tiʼ Moisésoʼ, kex tsʼoʼok 30 años xuʼuluk u meyaj. Le bukaʼaj años tsʼoʼok u máanoʼ suficiente tiempo kaʼach utiaʼal u naʼatkoʼob tsʼoʼok u xuʼulul u meyaj le Leyoʼ (Rom. 10:4; Tito 1:10). Le kéen k-xok le baʼax tu yaʼalaj Pablo tiʼ le sukuʼunoʼob hebreoʼoboʼ k-ilkeʼ leloʼ chichich janal espiritual. Jach letiʼe baʼax kʼaʼabéet kaʼach tiʼ le sukuʼunoʼob utiaʼal u muʼukʼaʼantal u fejoʼoboʼ yéetel utiaʼal u yilkoʼobeʼ le bix tu kaʼansil Jesús unaj u adorartaʼal Diosoʼ maas maʼalob tiʼ le bix u beetkoʼob kaʼachoʼ. Yéetel tu yáantoʼob xan utiaʼal maʼ u chʼaʼikoʼob saajkil kʼaʼaytaj kex pʼektaʼanoʼob tumen le judíoʼoboʼ (Heb. 10:​19-23).

¿BAʼAXTEN MAʼ UNAJ U CONFIARKUBA MÁAKIʼ?

16. ¿Baʼax unaj k-beetik utiaʼal ka seguernak u yiijtal k-tuukul?

¹⁶ Kʼaʼabéet k-beetik tuláakal le ku páajtal utiaʼal u seguer u yiijtal k-tuukul, utiaʼal leloʼ  maʼ unaj k-confiartikbaiʼ (1 Cor. 10:12). Mantatsʼ unaj k-ilik wa láayliʼ táan k-tsʼáaik k-óol k-meyajt Jéeobaeʼ (2 Cor. 13:5).

17. Le carta tu tsʼíibtaj Pablo tiʼ le colosailoʼoboʼ, ¿bix u yeʼesik u kʼaʼanaʼanil u seguer u yiijtal u tuukuloʼob?

¹⁷ Kex le sukuʼunoʼob kajaʼanoʼob Colosas yiijchajaʼan u tuukuloʼoboʼ, le ka tsʼíibnaj Pablo tiʼobeʼ tu yaʼalaj ka seguernak u yiijtal u tuukuloʼob. Tu yaʼalaj xan tiʼob ka u kanáantubaʼob utiaʼal maʼ u kʼaskúuntaʼal u tuukuloʼob tumen le yóokʼol kaabaʼ (Col. 2:​6-10). Epafraseʼ jach u kʼaj óol kaʼach tubeel le sukuʼunoʼoboʼ, le oʼolal mantatsʼ ku orar kaʼach utiaʼal ka pʼáatkoʼob «bey máakoʼob tsʼoʼok u kʼantal u tuukuloʼobeʼ» (Col. 4:12). Lelaʼ ku yeʼesiktoʼoneʼ Pablo yéetel Epafraseʼ u yojloʼobeʼ utiaʼal ka seguernak u yiijtal u tuukul máakeʼ kʼaʼabéet u tsʼáaik u yóoliʼ yéetel kʼaʼabéet xan u yáantaʼal tumen Dios. Letiʼobeʼ u kʼáatoʼob kaʼach ka seguernak u yiijtal u tuukul le colosailoʼob kex yaan problemas táan u aktáantkoʼoboʼ.

18. ¿Baʼax jeʼel u yúuchul tiʼ juntúul sukuʼun yiijchajaʼan u tuukuleʼ? (Ilawil xan le fotooʼ).

¹⁸ Apóstol Pabloeʼ tu yaʼalaj tiʼ le sukuʼunoʼob hebreoʼoboʼ tak le máaxoʼob yiijchajaʼan u tuukuloʼob jeʼel u pʼáatal junpuliʼ maʼ tu kʼaʼamloʼob tumen Dioseʼ. Wa ku chaʼik u chichtal u puksiʼikʼaloʼob yéetel maʼ tu arrepentiroʼob yoʼolal le baʼax ku beetkoʼoboʼ maʼ kun perdonartbiloʼob tumen Dios. Yaaske tiʼ le sukuʼunoʼob hebreoʼoboʼ maʼ úuchtiʼob beyoʼ (Heb. 6:​4-9). Teʼ kʼiinoʼobaʼ, ¿baʼax ku yúuchul yéetel le inactivoʼob wa expulsadoʼob ku arrepentiroʼoboʼ? Wa ku arrepentiroʼob yéetel u jaajil u yóoloʼobeʼ ku yeʼeskoʼob maʼ beyoʼob jeʼex le máaxoʼob tu chʼaʼchiʼitaj Pablooʼ. Tsʼoʼoleʼ le kéen suunakoʼob ichil u kaajal Jéeobaeʼ ku tsʼaʼabaltiʼob le áantaj kʼaʼabéettiʼoboʼ (Eze. 34:​15, 16). Le ancianoʼoboʼ jeʼel u páajtal u yaʼalikoʼob tiʼ juntúul Testigo yiijchajaʼan u tuukul ka u yáant le sukuʼunoʼobaʼ.

19. ¿Baʼax maʼalob ka u beet le máax táan u yilik ka yiijchajak u tuukuloʼ?

¹⁹ Wa táan a wilik u yiijtal a tuukuleʼ jach maʼalob baʼax táan a beetik. Utiaʼal leloʼ seguernak a jaantik le chichich janaloʼ yéetel a tuukul jeʼex u tuukul Dioseʼ. Wa tsʼoʼok u yiijtal a tuukuleʼ ilawil ka seguernak a beetik beyoʼ.