Controlart bix a wuʼuyikaba
Le Bibliaoʼ ku yaʼalikeʼ yaan baʼaxoʼob kʼaʼabéet u kanik u controlart máak yéetel yaan jatsʼuts modos unaj u yilik u yantaltiʼ.
U PʼUʼUJUL MÁAK
BAʼAX KU YAʼALIK LE BIBLIAOʼ: «Juntúul máax maʼ tu jáan pʼuʼujuleʼ maas maʼalob ke juntúul máax jach yaan u páajtalil» (Proverbios 16:32, TNM).
BAʼAX U KʼÁAT U YAʼALE: Jach kʼaʼabéet u kanik máak u controlart bix u yuʼubikuba. Yaan kʼiineʼ yaan baʼax oʼolal u pʼuʼujul máak, chéen baʼaleʼ wa maʼ tu controlartkubaeʼ jeʼel u beetik u maas nojochtal le problemaoʼ. Tsʼoʼok u yilaʼaleʼ le máax maʼ tu controlarkubaoʼ ku yaʼalik yéetel ku beetik baʼaloʼob maʼ maʼalobiʼ.
BAʼAX JEʼEL U PÁAJTAL A BEETKEʼ: Kan a controlartaba wa maʼeʼ yaan a beetik chéen baʼaloʼob minaʼan u cuentail. Jach kʼaas u pʼuʼujul máak, kex u jaajileʼ yaan máakoʼobeʼ maʼ bey u yilkoʼobiʼ. Le oʼolal le Bibliaoʼ ku yaʼalik: «Juntúul máax maʼ tu páajtal u controlarkuba kéen pʼuʼujukeʼ bey jeʼex junpʼéel kaaj juʼujutaʼan u pakʼiloʼobeʼ» (Proverbios 25:28, TNM). Junpʼéel baʼax jeʼel u yáantik máak utiaʼal maʼ u jáan aʼalik wa u beetik wa baʼaxeʼ letiʼe u yojéeltik jach baʼax úuchoʼ. Le Bibliaoʼ ku yaʼalik: «Le naʼatoʼ ku beetik maʼ u jáan pʼuʼujul máak» (Proverbios 19:11, TNM). U yuʼubik máak jach baʼax úucheʼ ku yáantaj utiaʼal u naʼatik baʼax úuchi yéetel maʼ u jáan kʼuuxil.
U TSʼÁAIK GRACIAS MÁAK
BAʼAX KU YAʼALIK LE BIBLIAOʼ: «Tsʼáaʼex xan u graciasil tuláakal baʼal» (Colosasiloʼob 3:15).
BAʼAX U KʼÁAT U YAʼALE: Ku yaʼalaʼaleʼ chéen le máaxoʼob ku tsʼáaikoʼob gracias jach kiʼimak u yóoloʼoboʼ. Le máaxoʼob yaan baʼax tsʼoʼok u peʼertikoʼoboʼ bey xan u yaʼalikoʼoboʼ. Ku yaʼalikoʼob xaneʼ le u tsʼáaikoʼob u graciasil le baʼaxoʼob yaantiʼoboʼ le áantkoʼob utiaʼal maʼ u sen chʼíikil u tukloʼob le baʼax tu peʼertoʼoboʼ.
BAʼAX JEʼEL U PÁAJTAL A BEETKEʼ: Sáamsamaleʼ tsʼíibt baʼax oʼolal jeʼel u páajtal a tsʼáaik gracias tiʼ Dioseʼ. Suukchajak a tsʼáaik gracias yoʼolal le baʼaxoʼob maʼalobtak ku yúuchul ichil a kuxtaloʼ. Jeʼel u páajtal a tsʼáaik u graciasil úuchik u sáastaleʼ, úuchik a tsikbal yéetel juntúul máax a yaabiltmaj wa úuchik a kuxtal junpʼéel kʼiin maas. Wa ka beetik beyaʼ yaan u maas kiʼimaktal a wóol yéetel yaan a wuʼuyikaba maas maʼalob.
Uláakʼ baʼax jeʼel u yáantkecheʼ letiʼe a tsʼáaik u graciasil tiʼ a láakʼtsiloʼob bey xan tiʼ a amigoʼoboʼ. Tukult baʼaxoʼob tsʼoʼok u beetkoʼob ta woʼolal, tsʼoʼoleʼ aʼaltiʼob wa tsʼíibtiʼob tiʼ correo electrónico wa tiʼ celular. Wa ka beetik beyaʼ yaan a biskaba maʼalob yéetel u maasil, tsʼoʼoleʼ yaan u kiʼimaktal a wóol ikil a beetik baʼax maʼalob tu yoʼolaloʼob (Baʼaxoʼob [Hechos] 20:35).
ULÁAKʼ BAʼAX KU YAʼALIK LE BIBLIAOʼ
Jeʼel u páajtal a wéemsik le Biblia utiaʼal a wuʼuyik u xookiloʼ, lelaʼ jóoʼsaʼan ich 40 idiomaʼob teʼ sitio jw.org
MAʼ A BAʼATELTʼAAN
«U káajsaʼal junpʼéel baʼateleʼ bey ka jeʼekʼabtaʼak junpʼéel jool tuʼux ku tuul jaʼeʼ, antes u káajal junpʼéel baʼateltʼaaneʼ náachkuntaba» (PROVERBIOS 17:14, TNM).
MAʼ A CHIʼICHNAKTAL YOʼOLAL BAʼAX MAʼ ÚUCHUKIʼ
«Le beetkeʼ junpuliʼ maʼ a sen chiʼichnaktaleʼex yoʼolal u kʼiinil sáamal, tumen sáamaleʼ yaan xan u yantal baʼaloʼob jeʼel u beetik a chiʼichnaktaleʼexeʼ. Cada kʼiineʼ yaan yéetel le chiʼichnakiloʼob ku taaskoʼ» (MATEO 6:34).
TUKULT TÁANIL BAʼAX MAAS MAʼALOB KA A BEETE
«Le maʼalob tuukuloʼ yaan u kanáantkech, le a kanik baʼax unaj a beetkoʼ yaan xan u kanáantkech» (PROVERBIOS 2:11, TNM).
Maʼ xaaneʼ jeʼel u yutstal xan ta wicheʼ
¡AAJKECH!
¿Bix jeʼel a controlartik le estrésoʼ?
Ilawil jujunpʼéel baʼaloʼob jeʼel u yáantkech utiaʼal maʼ a sen estresareʼ.
