Bix u naʼataʼal kaʼachi: Cada junpʼéel u táan u yich le querubínoʼoboʼ ku chíikbesik le kanpʼéel jatsʼuts modos maases ku yeʼesik Jéeobaoʼ.

Bix u naʼataʼal bejlaʼeʼ: Cada junpʼéel u táan u yich le querubínoʼoboʼ ku chíikbesik le kanpʼéel jatsʼuts modos maases ku yeʼesik Jéeobaoʼ. Chéen baʼaleʼ tu kanpʼéelil u táan u yich le querubínoʼoboʼ ku chíikbeskoʼob tuláakal le jatsʼuts modos yaan tiʼ Jéeobaoʼ. Lelaʼ ku yeʼesiktoʼon xan bukaʼaj nojchil u poder Jéeoba bey xan u kiʼichkelmil.

Baʼaxten kʼeʼexi: Teʼ Bibliaoʼ le número cuatrooʼ maʼ junpʼéeliliʼ baʼax u kʼáat u yaʼaliʼ, yaan kʼiineʼ u kʼáat u yaʼal «tuláakal» wa «chúukaʼan» junpʼéel wa baʼax. Le oʼolal le kéen úuchuk tʼaan tiʼ tuláakal u kanpʼéelil u táan u yich le querubínoʼoboʼ u jaajileʼ táan u yúuchul tʼaan tiʼ tuláakal le jatsʼuts modos yaan tiʼ Jéeobaoʼ. U táan u yich le máak, le león, le wakax yéetel le águilaoʼ ku chíikbesik kiʼichkelmil, muukʼ yéetel poder. Kex beyoʼ Ezequieleʼ tu yileʼ le kantúul baʼaloʼob u beetmaj Jéeobaoʼ tiaʼanoʼob yáanal u tronoeʼ. Lelaʼ ku yeʼesiktoʼoneʼ Jéeoba gobernartik tuláakal baʼal.

Bix u naʼataʼal kaʼachi: Kaʼacheʼ k-aʼalikeʼ le máak u chʼaʼamaj u nuʼukulil tsʼíiboʼ letiʼe yéeyaʼanoʼob pʼáatloʼob way Luʼumoʼ. Ikil u tsikbaltaʼal u tʼaan Dios yéetel u beetaʼal discípuloʼobeʼ, le yéeyaʼanoʼoboʼ bey táan u tsʼáaikoʼob junpʼéel marca tu táanpoolal le máakoʼob kun antaloʼob ichil le «yaʼabkach máakoʼob» ken u salvartubaʼoboʼ (Apo. 7:9).

Bix u naʼataʼal bejlaʼeʼ: Le máak u chʼiknakʼmaj u nuʼukulil u tsʼíib juntúul secretariooʼ ku chíikbesik Jesús. Tu kʼiiniloʼob le nojoch muʼyajiloʼ yaan u juzgartik le máakoʼob utiaʼal u yilik máaxoʼob beyoʼob tamaneʼ yéetel máaxoʼob beyoʼob chivoʼobeʼ (Mat. 24:21).

Baʼaxten kʼeʼexi: Jéeobaeʼ tsʼoʼok u kʼubéentik tiʼ Jesús ka u juzgart tuláakal máak (Juan 5:22, 23). Jeʼex u yeʼesik Mateo 25:31-33, Jesús kun aʼalik máaxoʼob beyoʼob tamaneʼ yéetel máaxoʼob beyoʼob chivoʼobeʼ.

Bix u naʼataʼal kaʼachi: Oholáeʼ kiktsil (Samaria, u reinoil le diez tribuʼoboʼ), letiʼeʼ ku chíikbesik le religión católicaoʼ. Oholibáeʼ íitsʼintsil (Jerusalén, u reinoil le kaʼapʼéel tribuʼoboʼ), letiʼeʼ ku chíikbesik uláakʼ religiónoʼob maʼ tu kaʼanskoʼob u jaajil yoʼolal Cristooʼ.

Bix u naʼataʼal bejlaʼeʼ: Oholá yéetel Oholibáeʼ maʼ tu chíikbeskoʼob le cristiandadoʼ. Le baʼax ku yaʼalik le Biblia tu yoʼolaloʼoboʼ ku kaʼansiktoʼon baʼax ku tuklik Jéeoba yoʼolal le máaxoʼob ku xuʼulul u adorarkoʼob yéetel ku joʼopʼol u beetkoʼob le baʼaxoʼob ku beetik u maasil religiónoʼoboʼ. Lelaʼ ku yeʼesiktoʼon bix u yuʼubikuba Jéeoba kéen u yil le baʼaloʼob kʼaastak ku beetik u maasil religiónoʼoboʼ.

Baʼaxten kʼeʼexi: Le Bibliaoʼ maʼatech u yeʼesik wa Oholá yéetel Oholibáeʼ ku chíikbeskoʼob le cristiandadoʼ. Israel yéetel Judáeʼ bey tsʼokaʼan u beeloʼob kaʼach tu yéetel Jéeobaeʼ, chéen baʼaleʼ maʼ bey u yaʼalaʼal yoʼolal le religiónoʼob maʼatech u kaʼanskoʼob u jaajiloʼ. Tsʼoʼoleʼ le capítulo 16 yéetel 23 tiʼ u libroil Ezequieloʼ ku yeʼesikeʼ le máaxoʼob tu xúumpʼattoʼob Jéeobaoʼ ku keʼeteloʼob yéetel le x-prostitutaʼoboʼ, tiʼ letiʼobeʼ aʼalaʼab ka u kʼex u tuukuloʼob yéetel ka u yutskíint u kuxtaloʼob utiaʼal u kaʼa kʼaʼamloʼob tumen Jéeoba. Chéen baʼaleʼ Jéeobaeʼ maʼ bey u yaʼalik tiʼ le religiónoʼob yanoʼob ichil le cristiandadoʼ tumen letiʼobeʼ táakaʼanoʼob ichil le Nojoch Babiloniaoʼ.

Bix u naʼataʼal kaʼachi: U kʼasaʼan kaajil Jerusaléneʼ ku chíikbesik le cristiandadoʼ. Úuchik u xuʼulsaʼal u kaajil Jerusaléneʼ tu yeʼeseʼ le cristiandadoʼ yaan xan u xuʼulsaʼal.

Bix u naʼataʼal bejlaʼeʼ: Le baʼaloʼob kʼaastak ku beetaʼal kaʼach tu kaajil Jerusalén, jeʼex u adorartaʼal yaanal diosoʼob, yéetel u beetaʼal uláakʼ baʼaloʼob kʼaastakeʼ ku beetik k-tuukul tiʼ le baʼaloʼob kʼaastak ku beetaʼal ichil le cristiandadoʼ. Chéen baʼaleʼ teʼ kʼiinoʼobaʼ maʼatech k-aʼalik wa Jerusaléneʼ ku chíikbesik le cristiandadoʼ.

Baʼaxten kʼeʼexi: Le Bibliaoʼ maʼatech u yeʼesik wa u kaajil Jerusaléneʼ ku chíikbesik le cristiandadoʼ. Tu kaajil Jerusaléneʼ chéen Jéeoba ku adorartaʼal kaʼachiʼ, chéen baʼaleʼ le cristiandadoʼ mix juntéen u adorartoʼob chéen Jéeoba. Tsʼoʼoleʼ kex xuʼulsaʼab tiʼ u kaajil Jerusaléneʼ, ka máan kʼiineʼ perdonartaʼab tumen Jéeoba. Chéen baʼaleʼ le cristiandadoʼ mix juntéen kʼaʼamak tumen Jéeoba yéetel mix bikʼin kun kʼambil.

Bix u naʼataʼal kaʼachi: Tu añoil 1918 le sukuʼunoʼob yéeyaʼanoʼoboʼ táan kaʼach u chʼaʼpachtaʼaloʼob yéetel ka máan kʼiineʼ esclavizartaʼaboʼob tumen le Nojoch Babiloniaoʼ. Úuchik u yúuchul leloʼ bey kíimoʼobeʼ. Chéen baʼaleʼ tu añoil 1919, jeʼel u páajtal u yaʼalaʼaleʼ u kaajal Dioseʼ bey kaʼa kuxlajeʼ tumen káaj u tsikbaltik u tʼaan Dios tiʼ u maasil.

Bix u naʼataʼal bejlaʼeʼ: Úuchjeakileʼ le máaxoʼob meyajtik Diosoʼ bey kimenoʼob kaʼacheʼ yéetel xáanchaj bey yaniloʼoboʼ, lelaʼ káaj yaʼab años antes tiʼ 1918. Lelaʼ káaj teʼ kaʼapʼéel siglo tsʼ.t.J., yéetel tsʼoʼok tu añoil 1919. Letiʼobeʼ xáanchaj esclavizartaʼanoʼob jeʼex tu yaʼalil Jesús le ka tʼaanaj tiʼ le maʼalob trigo yéetel le kʼaakʼas xíiwoʼ.

Baʼaxten kʼeʼexi: U kaajil Israeleʼ xáanchaj esclavizartaʼanoʼob, lelaʼ káaj tu añoil 740 tak 537 t.t.J. Kʼaʼajaktoʼoneʼ Ezequieleʼ tu yileʼ le baakoʼoboʼ «jach tikinoʼob», leloʼ ku yeʼesikeʼ u kaajil Israeleʼ yaan u xáantal bey kimen yanileʼ. Le oʼolal le kéen u yaʼal le Biblia yaan u kaʼa kuxtal le baakoʼoboʼ táan u yeʼesikeʼ jujunpʼíitil kun kaʼa kuxtaloʼob.

Bix u naʼataʼal kaʼachi: Tu kʼiiniloʼob le Yáax Guerra Mundialoʼ yanchaj máakoʼob beet u jatskuba u yalab le sukuʼunoʼob yéeyaʼanoʼob pʼaatloʼob way Luʼumeʼ, chéen baʼaleʼ tu añoil 1919 káaj u kaʼa múuchʼ meyajoʼob.

Bix u naʼataʼal bejlaʼeʼ: Le profecíaaʼ ku kaʼansiktoʼoneʼ Jéeoba kun beetik ka pʼáatak junpʼéeliliʼ le máaxoʼob adorarkoʼ. Le ka tsʼoʼok u añoil 1919, joʼopʼ u yaʼabtal le máaxoʼob adorartik Jéeoba junmúuchʼ yéetel le sukuʼunoʼob yéeyaʼanoʼoboʼ. Le yéeyaʼanoʼob yéetel le máaxoʼob kun pʼáatloʼob kuxtal way Luʼumeʼ junmúuchʼ táan u adorarkoʼob Jéeoba teʼ kʼiinoʼobaʼ.

Baʼaxten kʼeʼexi: Le profecíaoʼ maʼatech u yaʼalik wa ku kaʼachal le cheʼ utiaʼal u kaʼa nuʼupuloʼ. Le kaʼapʼéel cheʼoboʼ maʼ u kʼáat u yaʼal wa u jatsmuba kaʼach le kaʼapʼéel grupo máakoʼoboʼ, baʼaxeʼ chéen táan u yeʼesik bix kun pʼáatloʼob junpʼéeliliʼ.

Bix u naʼataʼal kaʼachi: Gog tiʼ u luʼumil Magogueʼ letiʼe kʼaabaʼ tsʼaʼab tiʼ Satanás le ka jóoʼsaʼab teʼ kaʼanoʼ.

Bix u naʼataʼal bejlaʼeʼ: Gog ku taal tiʼ u luʼumil Magogueʼ ku chíikbesik junmúuchʼ kaajoʼob ken u atacartoʼob u kaajal Dios tu kʼiiniloʼob le nojoch muʼyajiloʼ.

Baʼaxten kʼeʼexi: Le Bibliaoʼ ku yeʼesikeʼ Gogueʼ yaan u jaantaʼal u bakʼel tumen chʼíichʼoʼob ku jaantikoʼob bakʼ yéetel yaan u muʼukul way Luʼumeʼ. Lelaʼ ku yeʼesikeʼ Gogueʼ maʼ juntúul ángeliʼ. Tsʼoʼoleʼ u libroil Daniel yéetel Apocalipsiseʼ ku yeʼeskoʼobeʼ le kaajoʼoboʼ yaan u atacarkoʼob u kaajal Dios tu kʼiiniloʼob le nojoch muʼyajiloʼ (Dan. 11:40, 44, 45; Apo. 17:14; 19:19).