Ezequieleʼ tu yileʼ le templooʼ ku tsʼaʼabal «yóokʼol junpʼéel jach kaʼanal montaña» 1). Le baʼaxoʼob k-beetkoʼ, ¿ku yeʼesik wa k-tsʼaamaj u adoración Jéeoba yóokʼol u maasil baʼaloʼoboʼ?

Le pakʼ baʼpachtmil u terrenoil le templooʼ 2) jach nojoch tuláakal le terreno u kʼalmoʼ 3), tu chúumukeʼ tiʼ yaan le templooʼ. Lelaʼ ku kaʼansiktoʼoneʼ maʼ unaj k-chaʼik tiʼ mix baʼal ka u kʼaskúunt le adoración k-tsʼáaik tiʼ Jéeobaoʼ. Le pakʼ baʼpachtmil u terrenoil le templooʼ ku jatsik le luʼum santo tiʼ le luʼum maʼ santooʼ, lelaʼ ku yeʼesiktoʼoneʼ le máaxoʼob meyajtik Jéeobaoʼ unaj u náachtaloʼob tiʼ tuláakal le baʼaloʼob kʼaastak u pʼekmaj Jéeobaoʼ (Eze. 42:20).

Teʼ templooʼ káaj u jóokʼol jaʼiʼ, lelaʼ joʼopʼ u yaʼabtal taak ka suunaj junpʼéel río. Le tuʼux ku máan le jaʼoʼ yaʼab baʼax ku kuxtaliʼ 4). Teʼ xook 19 tiʼ le libroaʼ yaan k-ilik máakalmáak le bendiciónoʼobaʼ.

U entradailoʼob le nojoch táankab 5) yéetel le chichan táankaboʼ 9) ku kʼaʼajsiktoʼoneʼ Jéeobaeʼ u yaʼalmaj bix uts tu tʼaan ka k-adorarteʼ. Kʼaʼajaktoʼoneʼ le entradaʼobaʼ jach igualoʼob. Lelaʼ ku kaʼansiktoʼoneʼ junpʼéeliliʼ baʼax u yaʼalmaj Jéeoba tiʼ tuláakal le máaxoʼob meyajtikoʼ, kex jeʼel baʼaxak meyajil tsʼaʼantiʼob teʼ múuchʼuliloʼ.

Le lugaroʼob tuʼux ku yúuchul janaloʼ 8) ku kʼaʼajsiktoʼoneʼ le judíoʼoboʼ ku páajtal kaʼach u jaantikoʼob le sacrificioʼob ku biskoʼob teʼ templooʼ, kéen u beetoʼob lelaʼ táan kaʼach u múul janaloʼob yéetel Jéeoba. Teʼ kʼiinoʼobaʼ le máaxoʼob adorartik Diosoʼ maʼatech u kʼubkoʼob sacrificioʼob jeʼex úuchjeakileʼ tumen Jesúseʼ tu kʼubaj «junpʼéeliliʼ sacrificio» (Heb. 10:12). Chéen baʼaleʼ le baʼaxoʼob k-beetik utiaʼal k-adorarkoʼ beyoʼob junpʼéel sacrificioeʼ (Heb. 13:15).

Maʼ xaaneʼ le bukaʼaj baʼaloʼob ku chʼaʼchiʼitaʼal teʼ templo tu yilaj Ezequieloʼ jeʼel u beetik u chiʼibal u pool máakeʼ. Chéen baʼaleʼ lelaʼ ku kaʼansiktoʼoneʼ tuláakal le baʼaxoʼob u yaʼalmaj Jéeobaeʼ yaan u béeykuntik, letiʼeʼ yaan u beetik u kaʼa adorartaʼal. Le baʼax tsʼaʼab u yil Ezequieloʼ ku yeʼesik bix úuchik u tsoʼolol u nuʼuk tiʼ le sacerdoteʼoboʼ, u nojchiloʼob le kaajoʼ bey xan u kajnáaliloʼoboʼ. Tuláakal máax meyajtik Jéeobaeʼ kʼaʼabéet u adorartik jeʼex uts tu tʼaaneʼ.