U kʼaabaʼ Dioseʼ Jéeoba. Le kʼaabaʼaʼ u kʼáat u yaʼal «Letiʼ Beetik u Yúuchul». Jéeobaeʼ letiʼe Dios jach táaj yaan u poderoʼ yéetel letiʼ beet tuláakal baʼal. Jeʼel u páajtal xan u beetik tuláakal baʼax ku chʼaʼtuklikeʼ.

Ich hebreoeʼ u kʼaabaʼ Dioseʼ ku tsʼíibtaʼal yéetel kanpʼéel letraʼob. Le letraʼobaʼ letiʼe jeʼeloʼobaʼ: YHWH wa JHVH. U kʼaabaʼ Dioseʼ ku chíikpajal óoliʼ 7,000 u téenel teʼ Tsʼíiboʼob ich Hebreooʼ. Tiʼ tuláakal yóokʼol kaabeʼ jejeláas bix u tsʼíibtaʼal yéetel u yaʼalaʼal le kʼaabaʼ Jéeobaoʼ.

▸ Xook 1, xóotʼol 15, nota

Kex máakoʼob tsʼíibt le Bibliaoʼ u jaajileʼ tiʼ Dios u taal le baʼax ku yaʼalikoʼ. Bey jeʼex juntúul taatatsil ku yaʼalik tiʼ u hijo ka u tsʼíibt junpʼéel carta tu kʼaabaʼeʼ. Le baʼax ku tsʼíibtik le hijotsiloʼ letiʼe baʼax ku tuklik u taataoʼ. Bey túun xanoʼ Jéeobaeʼ tu nuʼuktaj jujuntúul máakoʼob yéetel u espíritu santo utiaʼal ka u tsʼíibtoʼob le baʼax ku tuklikoʼ. Jejeláas bix úuchik u nuʼuktikoʼob, yaan kʼiineʼ tu tsʼáaj u wayakʼtoʼob wa tu tsʼáaj u yiloʼob.

▸ Xook 2, xóotʼol 5

Le nuʼuktajoʼob wa principios yaan teʼ Bibliaoʼ ku kaʼansiktoʼon baʼaloʼob kʼaʼanaʼantak. Jeʼex kéen u yaʼal «u biskuba máak yéetel máaxoʼob kʼasaʼanoʼobeʼ ku kʼaskúuntik u maʼalob modos máak[eʼ]» u kʼáat u yaʼaleʼ le máaxoʼob yéetel k-bisikbaoʼ jeʼel u túulchʼintkoʼon k-beet baʼax uts wa kʼaaseʼ (1 Corintios 15:33). Kéen u yaʼal xan «jeʼel baʼaxak ka u pakʼ máakeʼ le xan ken u joch[eʼ]» u kʼáat u yaʼaleʼ wa k-beetik baʼax kʼaaseʼ maʼ tu páajtal k-jechik le muʼyajil ku taaskoʼ (Gálatas 6:7).

▸ Xook 2, xóotʼol 12

Letiʼe baʼaxoʼob ku tsʼáaik ojéeltbil Diosoʼ: baʼaxoʼob u kʼáat u beete, bix unaj u kuxtal máak, baʼax unaj u beetaʼal wa baʼax kun beetbil tiʼ wa máax. Yaan horaeʼ ku tsʼáaik ojéeltbil xan baʼax ku taal u kʼiin u yúuchul. Yaʼab profecíaʼob tsʼoʼok u béeytal.

▸ Xook 2, xóotʼol 13

Tuláakal le profecíaʼob ku tʼaanoʼob tu yoʼolal le Mesíasoʼ béeychajoʼob tiʼ Jesús. Ilawil le cuadro « Profecíaʼob yoʼolal le Mesíasoʼ».

▸ Xook 2, xóotʼol 17, nota

Jéeobaeʼ u kʼáat kaʼach ka pʼáatak paraísoil le Luʼumaʼ utiaʼal ka kajlak le máaxoʼob yaabiltmiloʼ. Letiʼeʼ maʼ kʼexpajak u tuukuliʼ. Maʼ kun xáantaleʼ yaan u xuʼulsik le kʼasaʼaniloʼ yéetel yaan u tsʼáaik kuxtal minaʼan u xuul tiʼ máaxoʼob uʼuyik u tʼaan.

▸ Xook 3, xóotʼol 1

Letiʼe ángel beet u tsʼáaikuba máak tu contra Diosoʼ. Le tʼaan Satanásoʼ u kʼáat u yaʼal «máax ku tsʼáaikuba tu contra uláakʼ». Le tʼaan Diablooʼ u kʼáat u yaʼal «j-líiʼsaj tʼaan». Ku yaʼalaʼaltiʼ beyoʼ tumen ku yaʼalik baʼaloʼob maʼ jaajtak yoʼolal Dios utiaʼal u tusik máak.

▸ Xook 3, xóotʼol 4

Jéeobaeʼ tu beetaj le ángeloʼob táanil tiʼ u beetik le Luʼumaʼ. Tu beetoʼob utiaʼal ka kajlakoʼob teʼ kaʼanoʼ. Yaan maas tiʼ 100 millones ángeloʼob (Daniel 7:10). Cada juntúuleʼ yaan u kʼaabaʼ, tsʼoʼoleʼ jejeláas bix u modosoʼob. Le ángeloʼob pʼáatoʼob tu tséel Diosoʼ kabal u yóoloʼob, le oʼolal maʼ u kʼáatoʼob ka adorartaʼakoʼobiʼ. Jejeláas u páajtaliloʼob yéetel jejeláas meyaj tsʼaʼan u beetoʼob. Yanoʼobeʼ ku meyajoʼob tu táan u trono Jéeoba, ku biskoʼob u tʼaan Dios, ku kanáantkoʼob yéetel ku nuʼuktikoʼob máaxoʼob meyajtik Dios way Luʼumeʼ, ku tsʼoʼokbeskoʼob u tʼaan Dios wa ku yáantajoʼob utiaʼal u tsʼaʼabal kʼaj óoltbil le Reinooʼ (Salmo 34:7; Apocalipsis 14:6; 22:8, 9). Maʼ kun xáantaleʼ yaan u yáantkoʼob Jesús tu baʼatelil Armagedón (Apocalipsis 16:14, 16; 19:14, 15).

▸ Xook 3, xóotʼol 5; xook 10, xóotʼol 1

Le kʼebanoʼ letiʼe baʼax k-uʼuyik, k-tuklik wa k-beetik ku bin tu contra baʼax uts tu tʼaan Jéeoba. Le kʼebanoʼ ku náachkuntkoʼon tiʼ Dios. Utiaʼal maʼ k-kʼebantal tu juunal k-óoleʼ ku tsʼáaiktoʼon leyoʼob yéetel nuʼuktajoʼob. Tu káajbaleʼ Jéeobaeʼ tu beetaj tuláakal baʼal x-maʼ kʼebanil, baʼaleʼ Adán yéetel Evaeʼ tu chʼaʼtukloʼob u náachtaloʼob tiʼ Dios. Le oʼolal kʼebanchajoʼob yéetel xuʼul u pʼáatloʼob maʼalobil tu táan Dios. Chʼíijoʼob yéetel kíimoʼob. Toʼon xaneʼ k-chʼíijil yéetel k-kíimil tumen Adán máanstoʼon le kʼebanoʼ.

▸ Xook 3, xóotʼol 7; xook 5, xóotʼol 3

U baʼateʼel Dios utiaʼal u xuʼulsik u yóokʼol kaab Satanás bey xan le kʼasaʼaniloʼ.

▸ Xook 3, xóotʼol 13; xook 8, xóotʼol 18

Junpʼéel gobierno u tsʼaamaj Jéeoba teʼ kaʼanoʼ. U Reyileʼ Jesucristo. Maʼ kun xáantaleʼ u Reino Dioseʼ yaan u xuʼulsik tuláakal le kʼasaʼaniloʼ yéetel yaan u gobernartik tuláakal le Luʼumaʼ.

▸ Xook 3, xóotʼol 14

Letiʼ yáax beetaʼab tumen Dios táanil tiʼ tuláakal baʼal. Jéeobaeʼ tu túuxtaj way Luʼum utiaʼal u tsʼáaik u kuxtal tu yoʼolal tuláakal máak. Ka tsʼoʼok u kíimil Jesúseʼ kaʼa kuxkíintaʼab tumen Jéeoba. Bejlaʼeʼ táan u gobernar teʼ kaʼan tu Reino Diosoʼ.

▸ Xook 4, xóotʼol 2

Le Bibliaoʼ tu yaʼalaj baʼax kʼiin u chíikpajal le Mesíasoʼ. Tu yaʼaleʼ yaan u máan 69 semanaʼob. Káaj u xoʼokol teʼ año 455 táanil tiʼ u taal Jesús (t.t.J.) yéetel tsʼoʼok tu añoil 29 tsʼoʼokok u taal Jesús (tsʼ.t.J.).

¿Bix k-ojéeltik teʼ año 29 tsʼ.t.J. ka tsʼoʼok le 69 semanaʼoboʼ? Le 69 semanaʼoboʼ káaj teʼ año 455 t.t.J., le ka kʼuch Nehemías Jerusalén yéetel ka tu káajsaj u jel líiʼsik u pakʼiloʼob le kaajoʼ (Daniel 9:25; Nehemías 2:1, 5-8). U semanailoʼob le profecíaaʼ maʼ de 7 kʼiinoʼobiʼ, baʼaxeʼ semanaʼob de 7 años. Tiʼ uláakʼ profecíaeʼ le Bibliaoʼ ku yaʼalik: «Junpʼéel díaeʼ junpʼéel año» (Números 14:34; Ezequiel 4:6). Wa k-jóoʼsik u cuentaileʼ le 69 semanaʼob ku yaʼalaʼal teʼ profecíaoʼ 483 años  ku xáantal (7 u téenel 69). Wa k-xokik 483 años desde teʼ año 455 t.t.J., k-kʼuchul teʼ año 29 tsʼ.t.J. (tumen minaʼan año cero). Jach letiʼe año ka okjaʼanaj Jesús ka kʼuch u beetuba le Mesíasoʼ (Lucas 3:1, 2, 21, 22).

Le profecíaaʼ ku tʼaan xan tiʼ uláakʼ junpʼéel semana, wa uláakʼ 7 años. Tu chúumukil le «semanaoʼ», teʼ año 33 tsʼ.t.J., kíimsaʼab le Mesíasoʼ. Teʼ año 36 túunoʼ káaj u tsikbaltaʼal  le maʼalob baʼaloʼob ken u beet u Reino Dios tiʼ tuláakal le kaajoʼoboʼ, maʼ chéen tiʼ le judíoʼoboʼ (Daniel 9:24-27).

▸ Xook 4, xóotʼol 7

Le Bibliaoʼ ku yaʼalikeʼ Jéeoba beetmil tuláakal baʼal; letiʼ xan beet Jesús táanil tiʼ u beetik tuláakal le baʼaloʼoboʼ (Colosenses 1:15, 16). Jesúseʼ maʼ letiʼe Dios jach táaj yaan u poderoʼ. Letiʼeʼ mix juntéen tu ketuba yéetel Dios, baʼaxeʼ tu yaʼalaj: «Le Taataoʼ maas nojoch tiʼ teen» (Juan 14:28; 1 Corintios 15:28). Chéen baʼaleʼ yaan religiónoʼobeʼ ku kaʼanskoʼobeʼ Dioseʼ junpʼéel Trinidad. Ku yaʼalikoʼobeʼ Dioseʼ de óoxtúul dios yanil: le Taataoʼ, le Hijooʼ yéetel le espíritu santooʼ. Baʼaleʼ leloʼ maʼ jaajiʼ. Le tʼaan trinidadoʼ mix tuʼux ku chíikpajal teʼ Bibliaoʼ.

Le espíritu santooʼ letiʼe muukʼ wa poder ku meyaj tiʼ Dios utiaʼal u beetik baʼax u kʼáatoʼ. Maʼ juntúul máakiʼ. Le oʼolal le cristianoʼob teʼ yáax siglooʼ «chuʼupoʼob yéetel espíritu santo». Jéeobaeʼ tu yaʼalaj xan: «Yaan in tsʼáaik in poder tiʼ tuláakal u jejeláasil máakoʼob» (Hechos 2:1-4, 17).

▸ Xook 4, xóotʼol 12; xook 15, xóotʼol 17

¿Baʼaxten maʼatech u meyaj cruz tiʼ le u jaajil cristianoʼoboʼ?

1. Le religiónoʼob maʼatech u kaʼanskoʼob u jaajiloʼ úuch káajak u meyajtiʼob le cruzoʼ. Úuchjeakileʼ meyajnaj utiaʼal u adorartaʼal le Kʼiinoʼ bey xan utiaʼal junpʼéel kʼaakʼas adoración tuʼux ku múul chital xiiboʼob yéetel koʼoleloʼob. Teʼ yáax 300 años kíimik Jesúsoʼ maʼ meyajnaj le cruz tiʼ le cristianoʼob ichil u adoraciónoʼoboʼ. Baʼaleʼ Constantino, juntúul emperador romanoeʼ, káaj u meyaj le cruz tiʼ utiaʼal u yeʼesik ku creertik Cristooʼ. Bey úuchik u beetkoʼ tumen u kʼáat ka séeb kʼaʼamak le cristianismo tumen yaʼab máakoʼoboʼ. Chéen baʼaleʼ le cruzoʼ mix baʼal yaan  yil yéetel Jesucristo. Junpʼéel libro católicoeʼ ku yaʼalik: «Le cruzoʼ meyajnajaʼan tiʼ kaajoʼob yanchajoʼob táanil tiʼ Cristo bey xan tiʼ kaajoʼob maʼ cristianoʼobiʼ» (New Catholic Encyclopedia).

2. Jesúseʼ maʼ kíim tiʼ junpʼéel cruziʼ. Le tʼaan ich griego ku suʼutul «cruzoʼ» u kʼáat u yaʼal «junpʼéel cheʼ toj». Le tʼaan ich griego meyajnaj utiaʼal u tsʼíibtaʼal le Nuevo Testamentooʼ «mix tuʼux ku tsʼáaik naʼatbil kaʼatsʼíit cheʼ» (The Companion Bible). Jesúseʼ kíim tiʼ junpʼéel cheʼ toj yanil.

3. Jéeobaeʼ maʼ u kʼáat ka meyajnaktoʼon imagenoʼob mix uláakʼ símboloʼob utiaʼal k-adorarkiʼ (Éxodo 20:4, 5; 1 Corintios 10:14).

▸ Xook 5, xóotʼol 12

Jesúseʼ tu yaʼalaj tiʼ u discípuloʼob ka u kʼaʼajsoʼob le úuchik u kíimiloʼ. Bejlaʼeʼ cada año k-kʼaʼajsik tu kʼiinil 14 tiʼ nisán, u kʼiinil u kʼiinbesaʼal kaʼach le Pascua tumen le israelitaʼoboʼ. Teʼ Kʼaʼajsajiloʼ ku máansaʼal waaj yéetel vinoiʼ, le baʼaloʼobaʼ ku chíikbeskoʼob u wíinklil yéetel u kʼiʼikʼel Jesús. Le máaxoʼob kun binoʼob gobernar yéetel Jesús teʼ kaʼanoʼ ku jaantikoʼob le waajoʼ yéetel ku yukʼikoʼob le vinooʼ. Baʼaleʼ le máaxoʼob kun kuxtaloʼob utiaʼal mantatsʼ way Luʼumeʼ kex ku binoʼob teʼ Kʼaʼajsajiloʼ maʼatech u jaantikoʼob le waajoʼ mix tech u yukʼikoʼob le vinooʼ.

▸ Xook 5, xóotʼol 21

Le tʼaanoʼob ich hebreo yéetel ich griego ku suʼutul «espíritu» teʼ Biblia Túumben Luʼumoʼ yaʼab baʼax u kʼáat u yaʼale. Baʼaleʼ mantatsʼ u kʼáat u yaʼal junpʼéel baʼax maʼ tu páajtal u yilik máak, jeʼex le iikʼ ku péekoʼ, le iikʼ k-chʼaʼikoʼ wa le iikʼ ku chʼaʼik le baʼalcheʼoboʼ. Yaan tuʼuxeʼ bey u yaʼalaʼal tiʼ le ángeloʼob wa tiʼ le demonioʼoboʼ, bey xan tiʼ le espíritu santo, u muukʼil u meyaj Diosoʼ. Le Bibliaoʼ mix tuʼux ku yaʼalik wa yaan junpʼéel espíritu wa pixan ku jóokʼol kéen kíimik máak (Éxodo 35:21; Salmo 104:29; Mateo 12:43; Lucas 11:13).

▸ Xook 6, xóotʼol 5, nota; xook 15, xóotʼol 17

Le Gehenaoʼ u kʼaabaʼ junpʼéel táax luʼum yaan naatsʼ Jerusalén. Teʼeloʼ ku tóokaʼal kaʼach u taʼ míis yéetel kimen baʼalcheʼobiʼ. Tu kʼiiniloʼob Jesúseʼ mix baʼal eʼesik wa teʼ lugaraʼ ku beetaʼal u muʼyaj baʼalcheʼob wa máakoʼobiʼ. Tsʼoʼoleʼ mix baʼal eʼesik xan wa kuxaʼan le baʼalcheʼob wa le máakoʼob ku tóokaʼaloʼob kaʼach teʼeloʼ. Le Gehena túunoʼ maʼ junpʼéel lugar tuʼux ku beetaʼal u muʼyaj wa u tóokaʼal le máaxoʼob ku kíimloʼoboʼ. Ka tu yaʼalaj Jesús yaan máaxoʼob kun binoʼob teʼ Gehenaoʼ tu yóotaj u yaʼaleʼ yaan u xuʼulsaʼaloʼob utiaʼal mantatsʼ (Mateo 5:22; 10:28).

▸ Xook 7, xóotʼol 20

Letiʼe oración tu beetaj Jesús utiaʼal u yeʼesik tiʼ u discípuloʼob bix unaj u oraroʼoboʼ. Jesúseʼ tu kaʼansaj ka orarnakoʼon yoʼolal le baʼaloʼobaʼ:

• «Santificartaʼak a kʼaabaʼ»

  K-kʼáatik tiʼ Jéeoba ka u pʼat limpioil u kʼaabaʼ tiʼ tuláakal le tuusoʼob aʼalaʼan tu yoʼolaloʼ. Beyoʼ le máaxoʼob yaan teʼ  kaʼan bey xan le yanoʼob way Luʼumoʼ yaan u alabarkoʼob Dios yéetel yaan u yeʼeskoʼob respeto tiʼ u kʼaabaʼ.

• «Taalak a Reino»

  K-kʼáatik ka taalak u Reino Dios utiaʼal u xuʼulsik u kʼasaʼan yóokʼol kaab Satanás, utiaʼal u gobernartik le Luʼumaʼ bey xan utiaʼal u sutik paraísoil.

• «Beetaʼak baʼax a kʼáat [...] way luʼumeʼ»

  K-kʼáatik ka béeyak baʼax u kʼáat Dios utiaʼal le Luʼumoʼ: ka pʼáatak minaʼan u kʼeban wíinik yéetel ka kuxlak utiaʼal mantatsʼ tiʼ junpʼéel paraíso, jeʼex u kʼáat kaʼach Jéeoba desde tu káajbaloʼ.

▸ Xook 8, xóotʼol 2

Jéeobaeʼ tu tsʼáaj junpʼéel boʼol utiaʼal u jáalkʼabtik wíinik tiʼ le kʼeban yéetel tiʼ le kíimiloʼ. Le boʼoloʼ junpʼéel baʼal kʼaʼabéetchaj u tsʼaʼabal utiaʼal u kaʼa maʼanal le jach maʼalob kuxtal tu perdertaj Adánoʼ bey xan utiaʼal u kaʼa biskuba wíinik yéetel Dios. Jéeobaeʼ tu túuxtaj u Hijo utiaʼal ka kíimik tu yoʼolal tuláakal kʼeban wíinik. Yoʼolal u kuxtal Jesús tu kʼuboʼ tuláakal máak jeʼel u pʼáatal minaʼan u kʼeban yéetel jeʼel u páajtal u kuxtal utiaʼal mantatsʼeʼ.

▸ Xook 8, xóotʼol 21; xook 9, xóotʼol 13

Le profecía yaan teʼ capítulo 4 tiʼ Danieloʼ ku yeʼesikeʼ u Reino Dioseʼ káaj u gobernar 1914.

Baʼax aʼalaʼan: Jéeobaeʼ tu tsʼáaj junpʼéel náay tiʼ rey Nabucodonosor. Teʼ náayoʼ tu yilaj u kúulchʼaktaʼal junpʼéel nuxiʼ cheʼ. Ka tsʼoʼokeʼ jéepʼkʼaxtaʼab u chuun yéetel fierro bey xan yéetel cobre utiaʼal maʼ u jóokʼol u kʼuʼukʼ ich «siete años». Kéen máanak le siete añosoʼ yaan kaʼach u kaʼa nojochtal le cheʼaʼ (Daniel 4:1, 10-16).

 Baʼax u kʼáat u yaʼale: Le cheʼoʼ ku chíikbesik u gobierno Dios. Úuchjeakileʼ Jéeobaeʼ xáanchaj táan u tsʼáaik reyoʼob tu kaajil Jerusalén utiaʼal u gobernartik le israelitaʼoboʼ (1 Crónicas 29:23). Baʼaleʼ le reyoʼoboʼ xuʼul u yuʼubikoʼob tʼaan, le oʼolal xuʼul u gobernaroʼob. Jerusaléneʼ xuʼulsaʼab teʼ año 607 táanil tiʼ u taal Jesúsoʼ (t.t.J.). Teʼ año jeʼeloʼ káaj le «siete años» aʼalaʼanoʼ (2 Reyes 25:1, 8-10; Ezequiel 21:25-27). Jesúseʼ tu yaʼaleʼ «Jerusaléneʼ yaan u pepeʼchaʼataʼal tumen le kaajoʼoboʼ tak ken tsʼoʼokok le kʼiinoʼob tsʼaʼan tiʼ le kaajoʼoboʼ». «Le kʼiinoʼob tsʼaʼan tiʼ le kaajoʼoboʼ» láayliʼ letiʼe «siete años» aʼalaʼanoʼ (Lucas 21:24). Bey túunoʼ le ‹siete añosoʼ› maʼ tsʼoʼokoʼob le tiaʼan Jesús way Luʼumoʼ. Jéeobaeʼ tu yaʼaleʼ yaan u tsʼáaik juntúul Rey tu tsʼoʼokbal le ‹siete añosoʼ›. Le Reyoʼ Jesús; u gobiernoeʼ yaan u taasik yaʼabkach utsiloʼob tiʼ máaxoʼob meyajtik Dios way Luʼumeʼ (Lucas 1:30-33).

Bukaʼaj kun xáantal: Le «siete años» aʼalaʼanoʼ xáanchaj 2,520 años. ¿Baʼaxten bey k-aʼalikoʼ? Le Bibliaoʼ ku yaʼalikeʼ tres años y medioeʼ ku tsʼáaik 1,260 días (Apocalipsis 12:6, 14). Bey túunoʼ le siete añosoʼ u dobleil, leloʼ ku tsʼáaik 2,520 días. Le Bibliaoʼ ku yaʼalikeʼ «junpʼéel díaeʼ junpʼéel año» (Números 14:34; Ezequiel 4:6). Le oʼolaleʼ le 2,520 díasoʼ ku xoʼokol 2,520 años.

Wa k-xokik 2,520 años desde teʼ año 607 t.t.J., k-kʼuchul teʼ año 1914 (tumen minaʼan año cero). Tu añoil 1914, Jéeobaeʼ tu tsʼáaj Jesucristo, le Mesías, u beet u Reyil teʼ kaʼanoʼ.

▸ Xook 8, xóotʼol 23

Le tʼaan arcángeloʼ u kʼáat u yaʼal «u nojchil le ángeloʼoboʼ». Teʼ Bibliaoʼ chéen juntúul arcángel ku chʼaʼchiʼitaʼaliʼ, u kʼaabaʼeʼ Miguel (Daniel 12:1; Judas 9).

Migueleʼ letiʼ nuʼuktik u soldadoʼob Dios yaan teʼ kaʼanoʼ. Le Bibliaoʼ ku yaʼalik: «Miguel yéetel u ángeloʼobeʼ baʼatelnajoʼob tu contra le [...] nojoch kaan yéetel u ángeloʼoboʼ» (Apocalipsis 12:7). Ku yaʼalik xaneʼ Jesús nuʼuktik u soldadoʼob Dios. Miguel túuneʼ uláakʼ kʼaabaʼ ku tsʼaʼabal tiʼ Jesús (Apocalipsis 19:14-16).

▸ Xook 9, xóotʼol 4, nota

Letiʼe tiempo kéen úuchuk baʼaloʼob jach kʼaʼanaʼantak way Luʼumoʼ, le jach taʼaytak u xuʼulsaʼal u yóokʼol kaab Satanás tumen u Reino Diosoʼ. Teʼ Bibliaoʼ ku yaʼalaʼal xan «u tsʼoʼokol tiʼ le yóokʼol kaabaʼ» yéetel le kʼiinoʼob «way yaan u Paal máak[oʼ]» (Mateo 24:3, 27, 37). Le u «tsʼook kʼiinoʼob[aʼ]» káaj le ka tsʼaʼab u Reino Dios teʼ kaʼan tu añoil 1914, yéetel yaan u tsʼoʼokol kéen xuʼulsaʼak u yóokʼol kaab Satanás tu baʼatelil Armagedón (2 Timoteo 3:1; 2 Pedro 3:3).

▸ Xook 9, xóotʼol 5

U suʼutul u kuxtal wa u líiʼsaʼal juntúul máak kimen. Le Bibliaoʼ ku tʼaan tiʼ nueve u túulal máakoʼob kaʼa kuxkíintaʼaboʼob. Jéeobaeʼ tu tsʼáaj páajtalil tiʼ Elías, Eliseo, Jesús, Pedro yéetel Pablo utiaʼal u kaʼa kuxkíintikoʼob le kimenoʼoboʼ. Letiʼeʼ u yaʼalmeʼ yaan u líiʼsik «utsoʼob» yéetel «kʼasaʼanoʼob» utiaʼal ka kuxlakoʼob way Luʼumeʼ (Hechos 24:15). Le Bibliaoʼ ku yaʼalik xaneʼ yaan máakoʼob kun kaʼa kuxkíintbil utiaʼal ka xiʼikoʼob kaʼan. Dios yéeymiloʼob utiaʼal ka yanakoʼob teʼ kaʼan yéetel Jesúsoʼ (Juan 5:28, 29; 11:25; Filipenses 3:11; Apocalipsis 20:5, 6).

▸ Xook 9, xóotʼol 13

Le espiritismooʼ letiʼe u tratartik u tʼaan máak yéetel le kimenoʼoboʼ. Lelaʼ yaan kʼiineʼ tu juunal máak ku beetik yéetel yaan kʼiineʼ ku bin tu yiknal juntúul j-meen wa jeʼel máaxak ku tsʼaak yéetel u yáantaj le demonioʼoboʼ. Leloʼ maʼ maʼalobiʼ. Máaxoʼob beetkeʼ ku creerkoʼobeʼ kéen kíimik máakeʼ ku jóokʼol u pixan yéetel láayliʼ jeʼel u beetik uts wa kʼaaseʼ. Leloʼ maʼ jaajiʼ. Le demonioʼoboʼ u kʼáatoʼob ka u tsʼáauba máak tu contra Dios. Ichil le baʼaxoʼob ku meyajtiʼob utiaʼal u tuskoʼob máakoʼ táakaʼan u naʼataʼal baʼax bin u kʼáat u yaʼal le estrellaʼoboʼ, u jóoʼsaʼal suerte yéetel sáastun wa yéetel barajas, pulyaʼajil, j-wáayil, tomojchiʼ yéetel u xoʼokol u táan u kʼab máak. Yaʼab libroʼob, revistaʼob, horóscopoʼob, películaʼob, kʼaayoʼob, fotoʼob yéetel uláakʼ baʼaloʼobeʼ ku beetkoʼob u yilaʼal bey maʼ kʼaas le espiritismooʼ. Yaʼab tiʼ le baʼaxoʼob ku beetaʼal kéen kíimik máakoʼ yaan baʼax u yil yéetel le demonioʼoboʼ, jeʼex u tsʼaʼabal janal yóoʼ mesa utiaʼal le kimenoʼoboʼ, u beetaʼal u biixoʼob, u novenaʼob wa uláakʼ baʼaloʼob. Yaʼab máakeʼ utiaʼal u tsʼaʼabal poder tiʼob tumen le demonioʼoboʼ ku drogarkubaʼob, ku tsʼuʼutsʼkoʼob chamal wa ku káaltaloʼob (Gálatas 5:20; Apocalipsis 21:8).

▸ Xook 10, xóotʼol 12; xook 16, xóotʼol 4

Jéeobaeʼ letiʼe Dios maas yaan u poderoʼ; letiʼ beetmil tuláakal baʼal (Apocalipsis 15:3). Le oʼolaleʼ letiʼ u yuumil tuláakal baʼal, u kʼáat u yaʼaleʼ chéen tiʼ letiʼ yaan u derechoil u gobernartik baʼaxoʼob u beetmaj (Salmo 24:1; Isaías 40:21-23; Apocalipsis 4:11). Jéeobaeʼ u tsʼaamaj xan leyoʼob utiaʼal tuláakal baʼax u beetmaj. Yaan xan u páajtalil u yéeyik máaxoʼob kun gobernar. Kéen k-eʼes k-yaabiltmaj yéetel kéen k-uʼuy u tʼaaneʼ k-tsʼáaikba tu tséel u gobernación (1 Crónicas 29:11).

▸ Xook 11, xóotʼol 10

Maʼ maʼalob ka luʼsaʼak u kuxtal juntúul chaambal maʼ síijikiʼ. Desde kéen pʼáatak embarazada juntúul koʼoleleʼ ku káajal u yantal junpʼéel túumben kuxtal. Le chaambaloʼ maʼ chéen junxéetʼ u wíinklil u maamaiʼ.

▸ Xook 13, xóotʼol 5

Utiaʼal u tsʼaʼakal máakeʼ yaan kʼiineʼ ku yoksaʼal kʼiʼikʼ tu wíinklil wa junpʼéel tiʼ le kanpʼéel baʼaloʼob ku jóoʼsaʼal tiʼ le kʼiʼikʼoʼ: plasma, glóbulos rojos, glóbulos blancos yéetel plaquetas. Yaan kʼiineʼ u kʼiʼikʼel máak ku kaʼa tsʼaʼabaltiʼ yéetel yaan kʼiineʼ u kʼiʼikʼel yaanal máak.

▸ Xook 13, xóotʼol 13

Kéen meyajnak teʼ Biblia le tʼaan tsolnuʼukoʼ u kʼáat u yaʼal u kaʼansaʼal máak, u tsoʼolol wa baʼax tiʼ, u tojkíintaʼal u beel yéetel yaan kʼiineʼ táakaʼan xan le castigooʼ. Jéeobaeʼ mix juntéen ku beetik u kʼasaʼanil kéen u tsol u nuʼuk tiʼ máak (Proverbios 4:1, 2). Le tsolnuʼuk ku tsʼáaik Jéeobaoʼ jach maʼalob, le oʼolal jeʼel tak k-kʼuchul k-yaabilteʼ (Proverbios 12:1). Jéeobaeʼ ku kaʼanskoʼon yéetel ku tsolnuʼuktikoʼon tumen u yaabiltmoʼon. Letiʼeʼ ku yaʼaliktoʼon bix jeʼel k-utskíintik k-tuukuleʼ, beyoʼ jeʼel k-tuukul jeʼex letiʼeʼ yéetel jeʼel k-beetik baʼax uts tu tʼaaneʼ. Le taatatsiloʼoboʼ kéen u tsoloʼob u nuʼuk tiʼ u paalaloʼobeʼ unaj u beetkoʼob jeʼex Jéeobaeʼ. Unaj u yáantik u yiloʼob baʼaxten unaj u yuʼubikoʼob tʼaan. Kʼaʼabéet xan u kaʼanskoʼob u yaabiltoʼob Jéeoba, u yaabiltoʼob le Bibliaoʼ yéetel u naʼatoʼob le nuʼuktajoʼob wa principios yaan ichiloʼ.

▸ Xook 14, xóotʼol 13

Kex maʼ tu páajtal u yilaʼaloʼobeʼ yaan poder tiʼob yéetel jach kʼasaʼanoʼob. Ángeloʼob kaʼachi baʼaleʼ tu kʼaskúuntubaʼob, yéetel xuʼul u yaabiltikoʼob Dios (Génesis 6:2; Judas 6). Tu tsʼáajubaʼob tu tséel Satanás utiaʼal u binoʼob tu contra Jéeoba (Deuteronomio 32:17; Lucas 8:30; Hechos 16:16; Santiago 2:19).

▸ Xook 16, xóotʼol 4