1-3. 1) ¿Máakalmáak junpʼéel tiʼ le jatsʼuts baʼaxoʼob u siimajtoʼon Jéeobaoʼ? 2) ¿Baʼax jeʼel u yúuchul wa maʼ t-kanáantik baʼax k-aʼalikeʼ? 3) ¿Bix unaj u meyajtoʼon k-chiʼ?

 KOʼOX aʼalikeʼ juntúul taatatsileʼ ku síik junpʼéel bicicleta tiʼ u hijo. Le taatatsiloʼ jach kiʼimak u yóol tumen páajchaj u tsʼáaiktiʼ junpʼéel jatsʼuts regalo. Chéen baʼaleʼ u hijoeʼ ku máan chéen minaʼan u cuentail yéetel le bicicletaoʼ, ku jéenantik wa máax yéetel ku beetik loob tiʼ. ¿Bix a tuklik ken u yuʼubiluba le taatatsiloʼ?

² «Tuláakal le baʼaloʼob maʼalobtak yéetel chúukaʼantak ku siʼibiltoʼonoʼ» tiʼ Jéeoba u taaloʼob (Santiago 1:17). Junpʼéel tiʼ le baʼaxoʼob tsʼoʼok u síiktoʼonoʼ letiʼe u páajtalil k-tʼaanoʼ tumen beyoʼ ku páajtal k-aʼalik baʼax k-tuklik yéetel bix k-uʼuyikba. Jeʼel u páajtal xan k-aʼalik baʼaloʼob jeʼel u yáantik u maasil yéetel jeʼel u beetik u yuʼubikubaʼob maʼalobileʼ. Chéen baʼaleʼ yéetel le baʼax k-aʼalikoʼ jeʼel k-beetik loob tiʼ u maasileʼ.

³ Le baʼaxoʼob k-aʼalikoʼ jeʼel u beetkoʼob uts wa kʼaaseʼ, le oʼolal Jéeobaeʼ ku kaʼansiktoʼon bix unaj k-tʼaan, ku yaʼaliktoʼon: «Maʼ u jóokʼol mix junpʼéel kʼaakʼas tʼaan ta chiʼex, baʼaxeʼ chéen le baʼax maʼalob jeʼel u líiʼsik u yóol máak jeʼex u kʼaʼabéettaleʼ, utiaʼal beyoʼ ka u taas utsil tiʼ le máaxoʼob chʼenxikintikeʼexoʼ» (Efesios 4:29). Koʼox ilik bix jeʼel  u meyajtoʼon k-chiʼ utiaʼal k-alabartik Jéeobaeʼ yéetel utiaʼal k-líiʼsik u yóol u maasil.

4, 5. ¿Baʼax ku kaʼansiktoʼon u libroil Proverbios?

⁴ Le baʼaxoʼob k-aʼalikoʼ jeʼel u beetkoʼob uts wa kʼaaseʼ, le oʼolal unaj k-kanáantik baʼax k-aʼalik yéetel bix k-aʼalik. Proverbios 15:4, ku yaʼalik: «Junpʼéel aakʼ ku utsul tʼaaneʼ bey junkúul cheʼ ku tsʼáaik kuxtaleʼ, pero junpʼéel tʼaan maʼ pataleʼ ku beetik u yaatal u yóol máak». U boʼoy junkúul nuxiʼ cheʼeʼ síis óol, ku beetik u yuʼubikuba máak maʼalobil yéetel «ku tsʼáaik kuxtal». Bey xan u yúuchul yéetel le jatsʼuts tʼaanoʼob ku jóokʼol t-chiʼoʼ, ku beetkoʼob u yuʼubikuba maʼalobil u maasil. Chéen baʼaleʼ le tʼaanoʼob chéen minaʼan u cuentail ku yaʼalik máakoʼ ku beetik loob tiʼ u maasil yéetel ku beetik u lúubul u yóoloʼob (Proverbios 18:21).

⁵ Proverbios 12:18, ku yaʼalik: «Le máax chéen ku jáajan tʼaanoʼ bey táan u loʼolomik máak yéetel junpʼéel espadaeʼ». Le máax ku tʼaan beyaʼ ku beetik u yaatal u yóol máak yéetel jeʼel u beetik u náachtal u amigoʼob tiʼ letiʼeʼ. ¿Tsʼoʼok wa a yáax kʼeʼekʼeyaʼal tumen wa máax? Maʼ xaaneʼ leloʼ tu beetaj u jach yaatal a wóol. Chéen baʼaleʼ Proverbios 12:18, ku yaʼalik xan: «Pero u yaakʼ le máax yaan u naʼatoʼ ku tsʼakik le tuʼux uchaʼan looboʼ». Wa táanil tiʼ k-tʼaan k-tuklik tubeel baʼax ken k-aʼaleʼ jeʼel u páajtal k-beetik u kiʼimaktal u yóol juntúul máax yaachajaʼan u yóoleʼ. Tsʼoʼoleʼ jeʼel xan k-kaʼa bisikba yéetel máax yanchajtoʼon junpʼéel problemaeʼ (xok Proverbios 16:24). Unaj u kʼaʼajaltoʼon mantatsʼeʼ kʼaʼabéet k-kanáantik baʼax k-aʼalik tumen wa maʼeʼ jeʼel k-beetik loob tiʼ u maasileʼ.

6. ¿Baʼaxten maʼ chéen chʼaʼabil u kanáantik máak baʼax ku yaʼalikiʼ?

⁶ Toʼoneʼ unaj k-kanáantik xan baʼax k-aʼalik tumen kʼeban máakoʼon. Le Bibliaoʼ ku yaʼalikeʼ desde tu táankelmil  máakeʼ «chéen baʼaloʼob kʼaastak yaan tu puksiʼikʼal». Ku yaʼalik xaneʼ «le baʼax ku jóokʼol tu chiʼ máakoʼ ku yeʼesik baʼax yaan ichil u puksiʼikʼal» (Génesis 8:21; Lucas 6:45). U jaajileʼ maʼ chéen chʼaʼabil u kanáantik máak baʼax ku yaʼalikiʼ (xok Santiago 3:2-4). Kex beyoʼ maʼ unaj u xuʼulul k-tʼanik u maasil yéetel utsiliʼ.

7, 8. ¿Baʼax jeʼel u yúuchul wa maʼ t-controlartik k-aakʼeʼ?

⁷ Unaj xan k-kanáantik baʼax k-aʼalik tumen yaan k-kʼubik cuenta tu táan Jéeoba yoʼolal bix k-tʼaan. Santiago 1:26, ku yaʼalik: «Wa juntúul máak ku tuklik táan u adorartik Dios, chéen baʼaleʼ maʼ tu controlartik u yaakʼeʼ táan u tusik u puksiʼikʼal, yéetel chéen kunel le bix u adoraroʼ» (1 Corintios 15:17). Jeʼex k-ilkoʼ wa maʼ t-controlartik k-aakʼeʼ jeʼel u káajal k-náachtal tiʼ Jéeobaeʼ wa jeʼel tak u xuʼulul k-bisikba tu yéeteleʼ (Santiago 3:8-10).

⁸ Tak beoraaʼ tsʼoʼok k-ilik óoxpʼéel baʼaloʼob eʼesiktoʼon jach unaj k-kanáantik baʼax k-aʼalik bey xan le bix k-aʼalikoʼ. Beoraaʼ koʼox ilik baʼaxoʼob maʼ unaj k-aʼalikiʼ utiaʼal beyoʼ ka meyajnaktoʼon maʼalob le chiʼ u siimajtoʼon Diosoʼ.

9, 10. 1) Teʼ kʼiinoʼobaʼ, ¿bix suuk u tʼaan le máakoʼoboʼ? 2) ¿Baʼaxten maʼ unaj k-aʼalik baʼaloʼob kʼaastakiʼ?

⁹ Bejlaʼeʼ tuláakal tuʼux ku yuʼubaʼal u kʼaakʼas tʼaan le máakoʼoboʼ. Yaʼab máakoʼobeʼ ku tuklikoʼobeʼ kʼaʼabéet u yaʼalikoʼob baʼaloʼob kʼaastak utiaʼal ka beetaʼak u cuentail baʼax ku yaʼalikoʼob. Yaʼab tiʼ le máaxoʼob ku tsikbaltikoʼob chisteʼoboʼ ku yaʼalikoʼob baʼaloʼob kʼaastak yéetel suʼtsiltak utiaʼal cheʼejtbil. Chéen baʼaleʼ apóstol Pabloeʼ tu yaʼalaj: «Kʼaʼabéet a tselkeʼex tiʼ teʼex tuláakal le baʼaloʼobaʼ: kʼuuxilil, pʼuʼujulil, kʼasaʼanil, poochʼilil bey xan kʼaakʼas tʼaanoʼob ku jóokʼol tu chiʼ máak» (Colosenses 3:8). Tu yaʼalaj xaneʼ maʼ unaj u jóokʼol tu chiʼ máak «kʼaakʼas báaxal tʼaanoʼob[iʼ]» (Efesios 5:3, 4).

¹⁰ Jéeobaeʼ jach u pʼekmaj u yaʼalaʼal baʼaloʼob kʼaastak, le oʼolal toʼoneʼ bey xan unaj k-ilkoʼ. Le Bibliaoʼ ku yaʼalikeʼ le máaxoʼob ku tʼaanoʼob beyaʼ tiaʼanoʼob ichil le máaxoʼob ku biskoʼob junpʼéel éekʼ kuxtaloʼ (Gálatas 5:19-21). Juntúul máak ku yaʼalik kʼaakʼas tʼaanoʼobeʼ jeʼel xan u beetik uláakʼ baʼaloʼob kʼaastakeʼ. Wa juntúul máax meyajtik Jéeoba suuk u poochʼil wa u yaʼalik baʼaloʼob jach kʼaastak yéetel maʼ u kʼáat u pʼateʼ jeʼel tak u jóoʼsaʼal ichil u kaajal Dioseʼ (2 Corintios 12:21; Efesios 4:19; ilawil nota 23).

11, 12. 1) ¿Baʼaxten maʼ unaj u tsikbaltik máak chismesiʼ? 2) ¿Baʼaxten maʼ unaj u yaʼalik máak baʼaloʼob maʼ jaajtak tu contra wa máaxiʼ?

¹¹ Toʼoneʼ maʼ unaj k-aʼalik chismesiʼ. Maʼ kʼaas u taaktal k-ojéeltik bix yanil k-amigoʼob wa k-láakʼtsiloʼobiʼ, yéetel maʼ kʼaas xan ka tʼaanakoʼon tiʼ baʼax ku yúuchultiʼobiʼ. Le máaxoʼob meyajt Dios teʼ yáax siglooʼ u kʼáat kaʼach u yojéeltoʼob bix yanik le u maasil sukuʼunoʼoboʼ yéetel baʼax jeʼel u beetkoʼob utiaʼal u yáantkoʼobeʼ (Efesios 6:21, 22;  Colosenses 4:8, 9). Chéen baʼaleʼ le baʼax ku tsikbaltaʼal yoʼolal u maasiloʼ séeb jeʼel u suut chismeileʼ. Tsʼoʼoleʼ wa ku máan u tsikbalt máak junpʼéel chismeeʼ jeʼel u yaʼalik junpʼéel baʼal maʼ jaajeʼ wa jeʼel tak u yaʼalik junpʼéel baʼal maʼ unaj u yojéeltaʼaleʼ. Wa maʼ t-kanáantik baʼax k-aʼalikeʼ jeʼel k-líiʼsik falsoeʼ wa jeʼel k-aʼalik baʼaloʼob maʼ jaajtak tu contra wa máaxeʼ. Úuchjeakileʼ le fariseoʼoboʼ tu yaʼaloʼob baʼaloʼob maʼ jaajtak tu contra Jesúsiʼ (Mateo 9:32-34; 12:22-24). Wa k-aʼalik baʼaloʼob maʼ jaajtak tu contra wa máaxeʼ jeʼel k-beetik u pʼáatal ich suʼtsilileʼ, u yaatal u yóol, u xuʼulul u biskuba yéetel wa máaxeʼ wa jeʼel tak k-beetik u yantal baʼatelileʼ (Proverbios 26:20).

¹² Jéeobaeʼ u kʼáat ka k-líiʼs u yóol u maasil, maʼ u kʼáat ka k-aʼal baʼaloʼob jeʼel u beetik u pʼektikubaʼobiʼ. Letiʼeʼ u pʼekmaj le máax «ku beetik u yantal problemas ichil sukuʼuntsiloʼob[oʼ]» (Proverbios 6:16-19). Le Kʼaasilbaʼaloʼ letiʼ yáax aʼal baʼaloʼob maʼ jaajtak tu contra Jéeobaiʼ (Apocalipsis 12:9, 10). Le máakoʼob bejlaʼoʼ suuk xan u líiʼskoʼob falso tu contra u maasil, baʼaleʼ toʼoneʼ maʼ unaj k-beetik jeʼex letiʼoboʼ (Gálatas 5:19-21). Le oʼolaleʼ táanil tiʼ k-aʼalik wa baʼaxeʼ unaj k-tuklik tubeel. Táanil tiʼ k-tsikbaltik junpʼéel baʼax aʼalaʼabtoʼon yoʼolal wa máaxeʼ maʼalob ka tuukulnakoʼon tiʼ lelaʼ: «¿Jach wa jaaj le baʼax ken in waʼalaʼ? ¿Yaan wa in beetik u yaatal u yóol? ¿Yaan wa u taasik utsil? ¿Jeʼel wa in waʼalik kex tiaʼan tin wiknaleʼ? ¿Bix jeʼel in wuʼuyikinba wa tiʼ teen ka aʼalaʼakeʼ?» (xok 1 Tesalonicenses 4:11).

13, 14. 1) ¿Baʼaxten maʼ unaj u meyajtoʼon tʼaanoʼob ku beetik u yaatal u yóol máakiʼ? 2) ¿Baʼaxten maʼ unaj u poochʼil máakiʼ?

¹³ Yaan horaeʼ kéen tsʼoʼokok k-aʼalik junpʼéel baʼaleʼ k-arrepentir úuchik k-aʼalik. Chéen baʼaleʼ maʼ unaj u suuktaltoʼon k-tʼaan chéen minaʼan u cuentailiʼ mix k-aʼalik tʼaanoʼob jeʼel u beetik u yaatal u yóol máakeʼ. Le  tʼaanoʼob beyaʼ maʼ unaj u meyajtoʼoniʼ tumen ku mixbaʼalkúuntikoʼob máak yéetel ku beetkoʼob u yuʼubik bey mix baʼal u biilaleʼ. Maases bey u yuʼubikuba le mejen paalaloʼob kéen tʼaʼankoʼob beyoʼ. Le oʼolaleʼ jach unaj k-kanáantik bix k-tʼankoʼob (Colosenses 3:21).

¹⁴ Le Bibliaoʼ ku yaʼalik xaneʼ yaan junpʼéel baʼax jach kʼaas unaj k-evitartik, le poochʼil wa le aʼalaj baʼaloʼ. Pabloeʼ tu yaʼalaj: «Tseleʼex tiʼ teʼex tuláakal u jejeláasil kʼaakʼas kʼuuxilil, pʼujaʼanil, tsʼíikilil, awat tʼaan, poochʼil» (Efesios 4:31). Wa juntúul máax meyajtik Dios maʼ tu xuʼulul u poochʼil wa u yaʼalik baʼal kex tsʼoʼok u yaʼalaʼaltiʼ maʼ maʼalobeʼ jeʼel u jóoʼsaʼal ichil u kaajal Dioseʼ (1 Corintios 5:11-13; 6:9, 10). Jeʼex tsʼoʼok k-ilkoʼ maʼ unaj k-poochʼiliʼ, k-aʼalik kʼaakʼas tʼaanoʼobiʼ, k-aʼalik baʼaloʼob maʼ jaajtakiʼ mix k-aʼalik tʼaanoʼob ku beetik u yaatal u yóol máakiʼ. Juntúul máax ku tʼaan beyaʼ jeʼel u xuʼulul u biskuba yéetel Jéeobaeʼ bey xan yéetel u maasil.

15. ¿Bix le tʼaanoʼob jeʼel u líiʼsik u yóol máakoʼ?

¹⁵ Jéeobaeʼ u kʼáat ka meyajnaktoʼon maʼalob le u páajtalil k-tʼaan u tsʼaamajtoʼonoʼ. Le Bibliaoʼ maʼ tu yaʼaliktoʼon jach tuláakal baʼax unaj k-aʼalik, baʼaleʼ ku yaʼaliktoʼon ka k-aʼal «chéen le baʼax maʼalob jeʼel u líiʼsik u yóol máak[oʼ]» (Efesios 4:29). Le baʼaxoʼob jeʼel u líiʼsik u yóol máakoʼ letiʼe tʼaanoʼob limpiotakoʼ, tʼaanoʼob jaajtak yéetel tʼaanoʼob ku beetkoʼob uts. Jéeobaeʼ u kʼáat ka k-áant yéetel ka k-líiʼs u yóol u maasil yéetel le baʼaxoʼob k-aʼalikoʼ. Lelaʼ maʼ chéen chʼaʼabiliʼ, u jaajileʼ maas chéen chʼaʼabil u yaʼalik máak baʼaloʼob chéen minaʼan u cuentail jeʼel u beetkoʼob u yaatal u yóol u maasileʼ (Tito 2:8). Beoraaʼ yaan k-ilik bix jeʼel k-líiʼsik u yóol u maasil yéetel baʼaxoʼob k-aʼalikeʼ.

16, 17. 1) ¿Baʼaxten unaj k-aʼalik tiʼ u maasil jach maʼalob baʼax ku beetkoʼob? 2) ¿Maases tiʼ máaxoʼob unaj k-aʼalik maʼalob baʼax ku beetkoʼob?

 ¹⁶ Jéeoba yéetel Jesúseʼ jach uts tu tʼaan u yaʼalikoʼob tiʼ u maasil jach maʼalob baʼax ku beetkoʼob. Toʼoneʼ unaj k-beetik jeʼex letiʼoboʼ (Mateo 3:17; 25:19-23; Juan 1:47). Utiaʼal k-aʼalik tiʼ u maasil jach maʼalob baʼax ku beetkoʼobeʼ kʼaʼabéet k-tuklik tubeel baʼax ken k-aʼale. Utiaʼal lelaʼ unaj k-tuukul tiʼ le baʼaloʼob maʼalobtak ku beetkoʼoboʼ yéetel k-chʼenxikintikoʼob. Proverbios 15:23, ku yaʼalik: «Junpʼéel tʼaan ku yaʼalaʼal teʼ súutuk kʼaʼabéetoʼ, ¡jach táaj maʼalob u yuʼubaʼal!». Jach ku beetik u kiʼimaktal k-óol u yaʼalaʼaltoʼon jach maʼalob baʼax t-beetaj wa u tsʼaʼabaltoʼon u diosboʼotikil yoʼolal junpʼéel wa baʼax (xok Mateo 7:12; ilawil nota 27).

¹⁷ Wa ku suuktal k-ilik le baʼaloʼob maʼalobtak ku beetik u maasiloʼ maas chéen chʼaʼabil ken k-aʼaltiʼob jach maʼalob baʼax ku beetkoʼob. Maʼ xaaneʼ juntúul sukuʼun wa juntúul kiikeʼ jach maʼalob bix u máansik u discurso wa bix u comentar. Maʼ xaaneʼ juntúul táankelmeʼ kex maʼ chéen chʼaʼabileʼ ku yilik u beetik baʼax ku yaʼalik Jéeoba teʼ escuelaoʼ, wa juntúul sukuʼun xaneʼ kex tsʼoʼok u chan yantal u jaʼabileʼ jach ku tsʼáaik u yóol u tsikbalt u tʼaan Dios. Maʼ xaaneʼ le baʼax ken k-aʼaltiʼoboʼ jach letiʼe baʼax kʼaʼabéettiʼob teʼ súutukoʼ. Le íichamtsiloʼ jach kʼaʼabéet xan u yaʼalik tiʼ u yatan u yaabiltmaj yéetel ku naʼatik bix u yuʼubikuba (Proverbios 31:10, 28). Jeʼex le xíiwoʼob kʼaʼabéet jaʼ tiʼoboʼ máakeʼ kʼaʼabéet xan u yuʼubik yaabiltaʼan. Lelaʼ maases bey u yúuchul yéetel le mejen paalaloʼoboʼ. Le oʼolaleʼ le kéen k-il u jatsʼuts modosoʼob yéetel bix u tsʼáaik u yóol u beetoʼob baʼax maʼalobeʼ unaj k-aʼaliktiʼob jach maʼalob baʼax ku beetkoʼob. Wa k-beetkeʼ yaan k-áantkoʼob utiaʼal maʼ u  sajaktaloʼob, utiaʼal u yuʼubikoʼob maʼ tu juunal yanoʼobiʼ bey xan utiaʼal u seguer u beetkoʼob baʼax maʼalob.

18, 19. 1) ¿Baʼaxten unaj k-ilik líiʼsik u yóol u maasil? 2) ¿Bix unaj k-líiʼsik u yóol u maasil?

¹⁸ Le kéen k-líiʼs u yóol u maasil yéetel le kéen k-áantoʼobeʼ táan k-beetik jeʼex u beetik Jéeobaeʼ. Letiʼeʼ jach ku yilik u yáantik «le óotsiloʼoboʼ» bey xan «le ku pechʼ óoltaʼaloʼoboʼ» (Isaías 57:15). Jéeobaeʼ ku yaʼaliktoʼon: «Seguernak a paklan líiʼsik a wóoleʼex». Tsʼoʼoleʼ ku yaʼalik xan toʼon: «Tʼaaneneʼex yéetel le máaxoʼob jach lubaʼan u yóoloʼoboʼ, líiʼseʼex u yóoloʼob» (1 Tesalonicenses 5:11, 14). Letiʼeʼ jach ku kiʼimaktal u yóol le kéen u yil táan k-tsʼáaik k-óol k-líiʼs u yóol u maasil.

 ¹⁹ Maʼ xaaneʼ ka tsʼáaik cuentaeʼ juntúul sukuʼun wa kiik teʼ múuchʼuliloʼ jach lubaʼan u yóol. ¿Baʼax jeʼel u páajtal a beetik utiaʼal a wáantikeʼ? Maʼ xaaneʼ maʼ tu páajtal a wutskíintik le problema yaantiʼoʼ. Baʼaleʼ jeʼel u páajtal a weʼesiktiʼ taak a wáantikeʼ. Junpʼéel baʼax jeʼel u páajtal a beetkeʼ a jóoʼsik tiempo utiaʼal a tsikbal tu yéetel. Maʼ xaaneʼ jeʼel u páajtal a xokik junpʼéel teksto jeʼel u beetik u líikʼil u yóoleʼ wa a orar tu yéetel (Salmo 34:18; Mateo 10:29-31). Maʼalob xan ka a kʼaʼajstiʼeʼ yaabiltaʼan tumen le múuchʼuliloʼ (1 Corintios 12:12-26; Santiago 5:14, 15). Le kéen tʼaanakech tu yéeteleʼ unaj u yilik tu jaajil a wóol ka tʼaan yéetel ta puksiʼikʼal ku jóokʼol le baʼax ka waʼalikoʼ (xok Proverbios 12:25).

20, 21. ¿Baʼax jeʼel u yáantaj utiaʼal ka kʼaʼamak le tsolnuʼuk k-tsʼáaikoʼ?

 ²⁰ K-líiʼsik u yóol u maasil le kéen k-tsʼáa maʼalob consejo tiʼob. Yaan kʼiineʼ ku kʼaʼabéettal xan u tsʼaʼabaltoʼon consejo tumen tuláakloʼon kʼeban máakoʼon. Proverbios 19:20, ku yaʼalik: «Uʼuy le consejooʼ yéetel kʼam le nuʼuktajoʼ beyoʼ kéen máanak kʼiineʼ yaan u yantal a naʼat». Maʼ chéen le ancianoʼob jeʼel u páajtal u tsʼáaikoʼob consejo wa tsolnuʼukoʼ. Le taatatsiloʼoboʼ kʼaʼabéet xan u nuʼuktik u paalaloʼob (Efesios 6:4). Le kiikoʼoboʼ jeʼel u páajtal xan u tsolkoʼob u nuʼuk tiʼ uláakʼ kiikoʼobeʼ (Tito 2:3-5). Toʼoneʼ jach k-yaabiltmaj le sukuʼunoʼoboʼ, le oʼolal le kéen k-tsol u nuʼuk tiʼobeʼ unaj k-kanáantik bix k-beetik utiaʼal maʼ u yuʼubikubaʼob jelaʼanil. ¿Baʼax jeʼel u yáantkoʼoneʼ?

²¹ Maʼ xaaneʼ ka tsolnuʼuktaʼabecheʼ chéen chʼaʼabil ta kʼamil le baʼax aʼalaʼabtechoʼ. ¿Baʼaxten? Maʼ xaaneʼ tumen ta wilaj jach tu jaajil u kʼáat u yáantech le máax tsoltech u nuʼukoʼ wa maʼ xaaneʼ tumen yéetel yaabilaj tu beetaj (Colosenses 4:6). Tsʼoʼoleʼ ta wilaj xaneʼ teʼ Biblia tu chʼaʼaj le baʼax tu yaʼalajtechoʼ (2 Timoteo 3:16). Le kéen k-tsol u nuʼuk tiʼ wa máaxeʼ mantatsʼ unaj k-chʼaʼik teʼ Biblia le baʼax ken k-aʼaloʼ kex wa yaan k-xokik wa maʼ. Maʼ unaj k-obligartik u beet chéen baʼax k-tuklikiʼ mix unaj k-kʼexik baʼax ku yaʼalik junpʼéel teksto chéen utiaʼal k-eʼesik jaaj baʼax k-aʼalikiʼ. Wa k-kʼaʼajsik bix úuchik k-tsolnuʼuktaʼaleʼ yaan xan k-tsolnuʼuktik u maasil yéetel yaabilaj.

22. ¿Bix unaj u meyajtoʼon le u páajtalil k-tʼaanoʼ?

²² Jéeobaeʼ u siimajtoʼon u páajtalil k-tʼaan. Toʼoneʼ tumen k-yaabiltmaj Jéeobaeʼ k-ilik u meyajtoʼon tubeel le baʼax u siimajtoʼonaʼ. Kʼaʼajaktoʼoneʼ le baʼaxoʼob k-aʼalikoʼ jeʼel u beetkoʼob uts wa kʼaas tiʼ le máaxoʼob uʼuyikoʼ. Le oʼolaleʼ unaj k-beetik tuláakal le ku páajtal utiaʼal k-líiʼsik u yóol u maasil yéetel le baʼaxoʼob k-aʼalikoʼ.