Jesús yéetel u disipuloʼobeʼ táan u suutoʼob teʼ kʼaʼaytaj tu beetoʼob tu yáamil Perea yéetel Jerusalenoʼ, tu chʼaktoʼob u áalkab jaʼil Jordán naatsʼ tiʼ Jericó. Le táan u suutoʼoboʼ yaan uláakʼ máakoʼob ku bin tu yéetel utiaʼal le Pascua tiʼ u jaʼabil 33.

Le táan u binoʼob Jerusalenoʼ, Jesús ku bin táanil tiʼ u disipuloʼob, letiʼeʼ jach taak u kʼuchul táanil tiʼ u káajal le Pascuaoʼ. Baʼaleʼ le disipuloʼoboʼ saajkoʼob. Le ka bin Perea, tu luʼumil Judea, le tsʼoʼok u kíimil Lázarooʼ, Tomaseʼ tu yaʼalaj tiʼ u maasil apostoloʼoboʼ: «Koʼoneʼex túun xaniʼ, utiaʼal ka kíimkoʼon tu yéetel» (Juan 11:16, 47-53). Bey túunoʼ sajbeʼentsil u binoʼob Jerusalén, le oʼolal ku naʼataʼal baʼaxten sajak le disipuloʼoboʼ.

Utiaʼal u yáantkoʼob u aktáantoʼob le baʼax ku taal u kʼiinoʼ, tu yaʼalajtiʼob: «Táan k-bin Jerusalén, u Paal máakeʼ yaan u kʼuʼubul tiʼ u nuuktakil le sacerdoteʼoboʼ yéetel tiʼ le escribaʼoboʼ, yaan u yaʼalaʼal ka kíimsaʼak, yaan xan u kʼuʼubul tiʼ le máaxoʼob maʼ judíoʼoboʼ utiaʼal ka pʼaʼastaʼak, ka jaʼajatsʼaʼak yéetel ka baʼajak tiʼ junpʼéel cheʼ; tu yóoxpʼéel kʼiin túuneʼ yaan u líiʼsaʼal» (Mateo 20:18, 19).

Lelaʼ letiʼe u yóoxtéen u yaʼalik tiʼ u disipuloʼob yaan u kíimsaʼal yéetel yaan u kaʼa kuxkíintaʼaloʼ (Mateo 16:21; 17:22, 23). Baʼaleʼ teʼ kʼiin jeʼelaʼ tu yaʼalaj yaan u baʼajal tiʼ junpʼéel cheʼ. Letiʼobeʼ tu yuʼuboʼob baʼax tu yaʼalaj, baʼaleʼ maʼ tu naʼatoʼobiʼ. Maʼ xaaneʼ letiʼobeʼ táan u páaʼtkoʼob kaʼach u jel tsʼaʼabal le Reino tu kaajil Israel utiaʼal u tsʼaʼabal nojbeʼenil tiʼob yéetel Cristo way Luʼumeʼ.

Salomé, u maama apóstol Santiago yéetel Juaneʼ, táan xan u bin tu yéeteloʼob. Jesuseʼ tu yaʼaleʼ u kʼaabaʼ le kaʼatúul apostoloʼobaʼ «u Paalal u Kíilbal Cháak», lelaʼ jach maʼalob yoʼolal  le bix u tuukuloʼob kaʼachoʼ (Marcos 3:17; Lucas 9:54). Letiʼobeʼ tsʼoʼok u máan kʼiin káajak u tsʼíiboltkoʼob u beetik u nojchiloʼob tu Reino Cristo. Tak u maamaʼob u yojel lelaʼ. Letiʼeʼ náatsʼ yiknal Jesuseʼ ka xolaj tu táan utiaʼal u kʼáatik junpʼéel baʼal tiʼ. Jesuseʼ tu kʼáatajtiʼ: «¿Baʼax a kʼáat?». Letiʼeʼ tu núukaj: «Aʼal ka kulak le in kaʼatúul paalaloʼobaʼ, juntúuleʼ ta x-noʼoj yéetel uláakʼeʼ ta x-tsʼíik, teʼ ta Reinooʼ» (Mateo 20:20, 21).

U jaajileʼ Santiago yéetel Juan kʼáatik lelaʼ. Tumen u yojel le suʼtsilil ken u máans yéetel le baʼax ken u muʼyajtoʼ, tu yaʼalajtiʼob: «Teʼexeʼ maʼ a wojleʼex baʼax ka kʼáatkeʼexiʼ. ¿Jeʼel wa u páajtal a wukʼikeʼex le copa jach taʼaytak in wukʼikoʼ?». Letiʼobeʼ tu yaʼaloʼob: «Jeʼel u páajtaleʼ» (Mateo 20:22). Baʼaleʼ maʼ xaaneʼ maʼ u naʼatoʼob baʼax u kʼáat u yaʼaliʼ.

Jesuseʼ tu yaʼalajtiʼob: «U jaajileʼ yaan a wukʼikeʼex in copa, baʼaleʼ le u kutal máak tin x-noʼoj wa tin x-tsʼíikoʼ maʼ teen unaj in tsʼáaikiʼ, leloʼ u tiaʼal le máaxoʼob yéeyaʼanoʼob tumen in Taataoʼ» (Mateo 20:23).

Ka tu yojéeltaj le uláakʼ diez apostoloʼob baʼax tu kʼáataj Santiago yéetel Juaneʼ kʼuuxilnajoʼob. Maʼ xaaneʼ Santiago yéetel Juaneʼ jach tu baʼateltʼantoʼob máax u maas nojchil ichiloʼob yéetel u maasil apostoloʼoboʼ (Lucas 9:46-48). Le baʼax tu kʼáatoʼoboʼ ku yeʼesik tu doceiloʼobeʼ maʼ u yeʼesoʼob kabal óolal jeʼex tsʼoʼok u kaʼansaʼaltiʼob tumen Jesusoʼ. Baʼaxeʼ láayliʼ táan u tsʼíiboltik u beetik u nojchiloʼobeʼ.

Ka tu yilaj Jesús le bix u tuukuloʼoboʼ tu chʼaʼtuklaj u maas áantkoʼob. Tu tʼanoʼobeʼ ka tu yaʼalajtiʼob yéetel yaabilaj: «Teʼexeʼ a wojleʼexeʼ le máaxoʼob bey táan u gobernartik le kaajoʼoboʼ ku nojbaʼalkúuntkubaʼob tu yóokʼoloʼob, yéetel le máaxoʼob yaan autoridad tiʼoboʼ ku tsʼáaikoʼob xan le kaajoʼob yáanal u páajtaliloʼoboʼ. Baʼaleʼ ichileʼexeʼ maʼ beyiʼ, baʼaxeʼ le máax u kʼáat u beetuba u maas nojchil ichileʼexeʼ kʼaʼabéet u meyajtikeʼex, le máax xan u kʼáat antal táanil tiʼ teʼexeʼ kʼaʼabéet u beetkuba palitsil tiʼ tuláakleʼex» (Marcos 10:42-44).

Jesuseʼ tu yaʼalajtiʼobeʼ unaj u beetkoʼob jeʼex u beetik letiʼeʼ. Tu yaʼalajtiʼob: «U Paal máakeʼ, letiʼeʼ maʼ taal utiaʼal ka meyajtaʼakiʼ, baʼaxeʼ utiaʼal ka u meyajt u maasil bey xan utiaʼal u tsʼáaik u kuxtal bey junpʼéel boʼol utiaʼal u salvartaʼal yaʼab máakoʼobeʼ» (Mateo 20:28). Jesuseʼ tsʼoʼok u meyajtik u maasil kex ich óoxpʼéel jaʼab. Tsʼoʼoleʼ yaan u seguer u beetik tak ken u kʼub u kuxtal yoʼolal tuláakal máak. Lelaʼ bey unaj u beetik le disipuloʼoboʼ, unaj u taaktal u meyajtikoʼob u maasil, maʼ ka meyajtaʼakoʼob letiʼobiʼ, u beetkubaʼob maas chichnil, maʼ u beetkubaʼob nojchil yóokʼol u maasiliʼ.