Jesuseʼ táan u kaʼansaj yéetel táan u tsʼakik le kʼojaʼanoʼob tu luʼumil Judea yéetel tu kaajil Jerusalén. Ka tsʼookeʼ tu chʼaktaj u áalkab jaʼil le Jordanoʼ ka bin kaʼansaj tu luʼumil Perea. Baʼaleʼ maʼ kun xáantal ken suunak tu kaajil Jerusalén.

Le tiaʼan tu kaajil Pereaoʼ kʼáataʼabtiʼ tumen juntúul máak: «Yuumtsil, ¿junpʼíit wa le máakoʼob ken u salvartubaʼoboʼ?». Maʼ xaaneʼ u yuʼubmaj u baʼateltʼaan u nuuktakil le judíoʼob yoʼolal wa yaʼab máaxoʼob ken u salvartubaʼoboʼ wa maʼatech. Baʼaleʼ Jesuseʼ maʼ tu yaʼalajtiʼ wa yaʼab ken u salvartubaiʼ, baʼaxeʼ tu yaʼalaj baʼax unaj u beetik máak utiaʼal u salvarkuba. Tu yaʼalaj: «Beeteʼex tuláakal le ku páajtal utiaʼal a wookleʼex tiʼ le nuʼunutʼ joonajoʼ». Jach beyoʼ, kʼaʼabéet u beetik máak tuláakal le ku páajtal utiaʼal u salvarkubaoʼ. ¿Baʼaxten? Jesuseʼ ku yaʼalik: «Yaʼabeʼ yaan u taaktal u yookloʼobiʼ, baʼaleʼ maʼ kun béeytal u beetkoʼob» (Lucas 13:23, 24).

Utiaʼal u yeʼesiktiʼob u kʼaʼabéetil u beetkoʼob tuláakal le ku páajtaleʼ, tu yaʼalajtiʼob: «Tsʼoʼoleʼ wa u yuumil naj tsʼoʼok u líikʼil u chʼot le joonajoʼ, teʼexeʼ yaan a pʼáatleʼex waʼatal táankab yéetel yaan a kʼoopeʼex táan a waʼalikeʼex: ‹Yuumtsil, jeʼekʼabttoʼon joonaj› [...]. Baʼaleʼ letiʼeʼ yaan u yaʼalikteʼex: ‹Maʼ in kʼaj óoleʼexiʼ. ¡Náachkuntabaʼex tiʼ teen, kʼasaʼan máakeʼex!›» (Lucas 13:25-27).

Lelaʼ ku yeʼesik baʼax ku yúuchul wa juntúul máak chéen u yóoliliʼ maʼ u séeb kʼuchul, baʼaleʼ ken kʼuchkeʼ tsʼoʼok u chʼoʼotol le joonaj yéetel llaveoʼ. Letiʼeʼ unaj u beetik tuláakal le ku páajtal utiaʼal u kʼuchul kaʼach táanil tiʼ u kʼaʼalal. Lelaʼ bey u yúuchul tiʼ jujuntúul tiʼ le máaxoʼob uʼuy u kaʼansajoʼob Jesusoʼ. Baʼaleʼ maʼ tu tsʼáaj táanil ichil u kuxtaloʼob u meyajtikoʼob Diosiʼ. U maas yaʼabil le máaxoʼob yiknal túuxtaʼab Jesusoʼ maʼ ken u salvartubaʼob. Jesuseʼ tu yaʼaleʼ letiʼobeʼ yaan u yokʼoloʼob yéetel yaan u karachʼtik u kojoʼob ken pʼáatkoʼob paachil. Baʼaleʼ «yaan u taal yaʼab máakoʼob j-lakʼiniloʼob, j-chikʼiniloʼob, j-xamaniloʼob bey xan j-noojoliloʼob, yéetel yaan u kutaloʼob yiknal le mesa teʼ tu Reino Diosoʼ» (Lucas 13:28, 29).

Jesuseʼ ku yaʼalik: «Yaan tiʼ le máaxoʼob yanoʼob táaniloʼ yaan u pʼáatloʼob tu tsʼook, yéetel yaan tiʼ le yanoʼob tu tsʼookoʼ yaan u máanoʼob táanil» (Lucas 13:30). Le kʼasaʼan máakoʼob kun pʼáatloʼob «tu tsʼook» tu yaʼaloʼ maʼ kun ookloʼob tu Reino Dios.

Jujuntúul fariseoʼobeʼ taaloʼob u yaʼaloʼob tiʼ Jesús: «Jóokʼen, xeen, tumen Herodeseʼ taak u kíimskech». Maʼ xaaneʼ rey Herodes túuxt aʼalbil tiʼ Jesús ka jóokʼok teʼ kaajoʼ, tumen sajak u kíimsik uláakʼ juntúul profeta, jeʼex úuchik u kíimsik Juan Bautistaeʼ. Baʼaleʼ Jesuseʼ tu yaʼalaj tiʼ le  fariseoʼoboʼ: «Xeen a waʼaleʼex tiʼ le chʼomakoʼ: ‹¡Ile! Bejlaʼeʼ táan in jóoʼsik demonioʼob tiʼ le máakoʼoboʼ yéetel táan in tsʼakikoʼob, bey xan sáamal, baʼaleʼ tu yóoxpʼéel kʼiineʼ yaan u tsʼoʼokol›» (Lucas 13:31, 32). Le ka tu yaʼalaj «chʼomak» tiʼ Herodesoʼ, maʼ xaaneʼ táan u yaʼalik jach yaan u naʼat. Baʼaleʼ Jesuseʼ maʼ tu beetaj baʼax aʼalaʼabtiʼ tumen Herodesiʼ mix tumen uláakʼ máakoʼob. Letiʼeʼ u chʼaʼtukultmaj u beetik le baʼax túuxtaʼan u beet tumen u Taataoʼ yéetel u beetik teʼ kʼiin aʼalaʼan tumen Diosoʼ, maʼ le ken u yaʼal chéen wíinikeʼ.

Jesuseʼ seguernaj u pʼáatal Jerusalén, tumen ku yaʼalikeʼ «juntúul profetaeʼ maʼ unaj u kíimsaʼal paachil tiʼ Jerusaleniʼ» (Lucas 13:33). Baʼaleʼ mix junpʼéel profecía aʼalik wa le Mesíasoʼ unaj u kíimil Jerusalén, le oʼolaleʼ, ¿baʼaxten túun tu yaʼalaj Jesús tiʼ unaj u kíimiliʼ? Tumen Jerusalén u noj kaajil u luʼumil Israel yéetel tiʼ yaan le 71 u túulal máaxoʼob ku meyajoʼob teʼ Sanedrinoʼ, yéetel tiʼ yaan le máaxoʼob aʼal maʼ juntúul profetaoʼ. Tsʼoʼoleʼ teʼ kaaj ku kʼuʼubul le baʼalcheʼob bey siibaloʼoboʼ. Le oʼolal tu yaʼalaj Jesús maʼ maʼalob ka kíimsaʼak táanxeliliʼ.

Jesuseʼ tu yaʼalaj yéetel yaayaj óolal: «Jerusalén, Jerusalén, teech ka kíimsik le profetaʼob yéetel ka muruxtuntik le máaxoʼob ku túuxtaʼaloʼob ta wiknaloʼ..., ¡jaytéen tin wóotaj in muchʼkíint a paalal jeʼex u muchʼkíintik u mejnil le x-nuk kaax yáanal u xiikʼoʼoboʼ, baʼaleʼ teʼexeʼ maʼ ta wóoteʼexiʼ! ¡Ileʼex! A najileʼexeʼ yaan u xúumpʼattaʼal» (Lucas 13:34, 35). Le kaajoʼ maʼ tu kʼamaj u Hijo Diosiʼ, le oʼolal yaan u castigartaʼal tu yoʼolal.

Táanil tiʼ u kʼuchul tu kaajil Jerusaleneʼ, invitartaʼab tumen juntúul u nojchil le fariseoʼob tu yotoch utiaʼal ka xiʼik janal tu kʼiinil sabadooʼ. Letiʼobeʼ káaj u sen ilkoʼob baʼax ku beetik, tumen tiaʼan xan juntúul máak kʼojaʼan tiʼ hidropesíaiʼ (junpʼéel kʼojaʼanil ku beetik u chuʼupul u wíinklil máak yéetel jaʼ, maases u yookoʼob). Jesuseʼ tu kʼáataj tiʼ le fariseoʼob yéetel tiʼ le máaxoʼob jach u kʼaj óoloʼob le Leyoʼ: «¿Maʼalob wa ka tsʼaʼakak máak tu kʼiinil Sábado, wa maʼ?» (Lucas 14:3).

Mix máak núuke. Jesuseʼ tu tsʼakaj le máakoʼ, ka tsʼoʼokeʼ ka tu kʼáataj: «¿Máax ichileʼex wa ka lúubuk juntúul u paal wa juntúul u waakax ich chʼeʼen tu kʼiinil Sábado maʼ ken u jóoʼs tu séebaʼanil?» (Lucas 14:5). Láayliʼ mix baʼal tu yaʼaloʼobeʼ.