Jesuseʼ tu yeʼesaj le baʼax unaj u beetik le máaxoʼob tsaypachtikoʼ. Letiʼobeʼ unaj u tuukuloʼob jeʼex le mejen paalaloʼoboʼ, maʼ unaj u kaʼantal u yichoʼobiʼ. Le disipuloʼoboʼ unaj u ‹kʼamkoʼob juntúul chan xiʼipal tu kʼaabaʼ Jesús utiaʼal u kʼamkoʼob tak letiʼ› (Mateo 18:5).

Le apostoloʼoboʼ tsʼoʼok u baʼateltʼaanoʼob yoʼolal máax u maas nojchil ichiloʼob, le oʼolal maʼ xaaneʼ ku yilkoʼob bey táan u kʼeʼeyloʼob tumen Jesuseʼ. Baʼaleʼ beoraaʼ apóstol Juaneʼ ku yaʼalik junpʼéel baʼax táan u yúuchul: «T-ilaj juntúul máak ku jóoʼsik demonioʼob ta kʼaabaʼ, baʼaleʼ t-aʼalajtiʼ ka xuʼuluk u beetik tumen letiʼeʼ maʼatech u máan t-éetel» (Lucas 9:49).

Maʼ xaaneʼ Juaneʼ ku tuklik chéen tiʼ le apostoloʼob tsʼaʼan u páajtalil u tsʼakikoʼob kʼojaʼanoʼob yéetel u jóoʼskoʼob le demonioʼoboʼ. Le oʼolaleʼ, ¿bix túun u páajtal u jóoʼsaʼal demonioʼob tumen le judíooʼ? Juaneʼ tu tukleʼ maʼ unaj u beetkiʼ, tumen letiʼeʼ maʼatech u máan yéetel Jesús bey xan yéetel u apostoloʼob.

Baʼaleʼ Jesuseʼ tu yaʼalaj tiʼ Juan: «Maʼ a waʼalikeʼextiʼ ka xuʼuluk u beetik, tumen mix máak jeʼel u beetik junpʼéel milagro tin kʼaabaʼ, ku tsʼoʼokoleʼ ka jáan tʼaanak kʼaas tin contra; tumen le máax maʼ t-contra yaneʼ, t-éetel yaan. Tumen jeʼel máaxak ka u tsʼáateʼex junpʼéel vaso jaʼ a wukʼeʼex tumen u disipuloʼex Cristoeʼ, tu jaajil kin waʼalikteʼexeʼ junpuliʼ maʼ ken u peʼert le baʼax kun siibiltiʼoʼ» (Marcos 9:39-41).

Teʼ kʼiinoʼob jeʼeloʼ maʼ tsaaj ka máanak le máak yéetel Jesús utiaʼal u yeʼesik tiaʼan tu tséeloʼ. Tumen maʼ yanak mix junpʼéel múuchʼulileʼ, maʼ u kʼáat u yaʼal wa tu contra Jesús yaan le máakoʼ mix wa táan u beetik junpʼéel túumben religioniʼ. Le máakoʼ ku yeʼesik yaan u fe tiʼ Jesús, tsʼoʼoleʼ le baʼaxoʼob tu yaʼalaj Jesusoʼ ku yeʼesik yaan u kʼamik le baʼax ku síik Diosoʼ.

Baʼaleʼ wa tʼóochpaj le máak yoʼolal le baʼax tu yaʼalaj yéetel tu beetaj le apostoloʼoboʼ leloʼ junpʼéel nojoch kʼeban. Jesuseʼ tu yaʼalaj: «Jeʼel máaxak ka u beet u tʼóochpajal juntúul tiʼ le máaxoʼob beyoʼob mejen paalal ku tsʼáaik u fejoʼob tiʼ tenaʼ, maas maʼalob ka chʼuykíintaʼak junpʼéel u nojoch tuunichil juuchʼ tu kaal yéetel ka puʼuluk teʼ kʼáaʼnáaboʼ» (Marcos 9:42). Ka tsʼoʼokeʼ Jesuseʼ tu yaʼaleʼ wa ku tʼóochpajal máak yoʼolal u kʼab, u yook wa u yicheʼ unaj u luʼsik. Kex láaj kʼaʼabéetoʼob tiʼ toʼoneʼ, maas maʼalob ka k-luʼsoʼob utiaʼal k-okol tu Reino Dios ke ka puʼulkoʼon teʼ Gehenaoʼ (u táax luʼumil Hinón). Maʼ xaaneʼ le apostoloʼoboʼ u yilmoʼob le tuʼux ku tóokaʼal basura yaan tu paach Jerusalenoʼ, letiʼobeʼ tu naʼatoʼobeʼ leloʼ ku chíikbesik u xuʼulsaʼal junpuliʼ tiʼ tuláakal baʼal.

Jesuseʼ tu yaʼalaj: «Ilawil maʼ a taaskeʼex mix baʼalil mix juntúul tiʼ le máaxoʼob beyoʼob mejen paalaloʼobaʼ, tumen kex bey mix baʼal u yilaʼaloʼobeʼ, kin waʼalikteʼexeʼ teʼ kaʼanoʼ u angeloʼobeʼ mantatsʼ ku yilkoʼob u táan u yich in Taata». ¿Bix u  yilik Le Taata le «mejen paalaloʼobaʼ»? Jesuseʼ tu tsikbalteʼ juntúul máakeʼ yaan cien tamanoʼob tiʼ, baʼaleʼ saʼat juntúuliʼ. Letiʼeʼ tu pʼataj le 99, ka bin u kaxt le juntúuloʼ. Ka tu kaxteʼ maas kiʼimakchaj u yóol yoʼolal le juntúuloʼ ke yoʼolal le 99. Ka tsʼoʼokeʼ Jesuseʼ tu yaʼalaj: «In Taata yaan teʼ kaʼanoʼ maʼ u kʼáat ka saʼatak mix juntúul tiʼ le máaxoʼob beyoʼob mejen paalaloʼobaʼ» (Mateo 18:10, 14).

Maʼ xaaneʼ, táan u tuukul Jesús tiʼ le apostoloʼob u kʼáat u beet u maas nojchil ichil u maasiloʼ, tu yaʼalaj: «Yanak taʼab tiʼ teʼex, yéetel mantatsʼ yanakteʼex jeetsʼelil ta baatsileʼex» (Marcos 9:50). Le taʼaboʼ ku meyaj utiaʼal u kiʼikúuntaʼal junpʼéel janal. Toʼon xaneʼ, wa k-kanáantik bix k-tʼaaneʼ bey ka k-chʼóochʼkint baʼax k-aʼalikeʼ, lelaʼ jeʼel u yáantaj utiaʼal u yantal jeetsʼelileʼ (Colosasiloʼob 4:6).

Yaan kʼiineʼ yaan u yantaltoʼon problema yéetel wa máax. Baʼaleʼ Jesuseʼ ku yaʼalik baʼax unaj k-beetik: «Wa a sukuʼun ku kʼebantal ta contraeʼ, xeen tʼaan tu yéetel ta juunal, ka a waʼaltiʼ baʼax kʼaas u beetmaj. Wa tu yuʼubecheʼ, tsʼoʼok a wáantik utiaʼal ka u yutskíint baʼax tu beetaj». ¿Kux túun wa maʼ tu yuʼubik baʼax ka waʼalik? Jesuseʼ ku yaʼalik: «Wa maʼ tu yuʼubecheʼ, bis uláakʼ juntúul wa kaʼatúul máak utiaʼal ka jaajkúuntaʼak tuláakal baʼal tumen kaʼatúul wa óoxtúul máak». Wa láayliʼ maʼ tu yuʼubikeʼ, aʼaltiʼ «le múuchʼuliloʼ» wa le ancianoʼoboʼ, letiʼobeʼ jeʼel u tsʼáaikoʼob áantaj tiʼ le máaxoʼob kʼaʼabéetoʼ. ¿Kux túun wa maʼ tu yuʼubikoʼob xan? «Il bey juntúul máak maʼatech u meyajtik Dioseʼ wa bey juntúul tiʼ le máaxoʼob kʼamik le impuestoʼoboʼ», le máaxoʼob maʼatech u biskuba kaʼach le judíoʼoboʼ (Mateo 18:15-17).

Le ancianoʼoboʼ kʼaʼabéet u beetkoʼob le baʼaxoʼob ku yaʼalik le Bibliaoʼ. Wa ku yilkoʼob tsʼoʼok u kʼebantal wa máaxeʼ unaj u tsolnuʼuktikoʼob, le juicio ken u tsʼáaʼoboʼ «tsʼokaʼaniliʼ u kʼaʼaxal teʼ kaʼanoʼ». Baʼaleʼ wa ku yilkoʼob minaʼan u kʼeban wa máaxeʼ «tsʼokaʼaniliʼ [xan] u kʼaʼaxal teʼ kaʼanoʼ». Tuláakal lelaʼ jach meyajnaj desde ka káaj u yantal le múuchʼuliloʼoboʼ. Jesuseʼ tu yaʼalaj baʼax ku yúuchul ken beetaʼak beyaʼ: «Tuʼux u muchʼmuba kaʼatúul wa óoxtúul tin kʼaabaʼeʼ, teneʼ tiaʼanen chúumuk tiʼ letiʼobeʼ» (Mateo 18:18-20).