Jesuseʼ ku yeʼesik nojoch tsiikil tiʼ Juan Bautista, baʼaleʼ u maasil máakoʼoboʼ maʼatech. Letiʼeʼ tu yaʼalaj: «Le generacionaʼ [...] bey jeʼex le mejen paalaloʼob kulukbaloʼob teʼ kʼíiwikoʼ, ku yawtikoʼob u yéet báaxaloʼob, táan u yaʼaliktiʼob: ‹T-paxaj le flautaoʼ, baʼaleʼ teʼexeʼ maʼ óokʼotnajeʼexiʼ; awat okʼolnajoʼon, baʼaleʼ teʼexeʼ maʼ ta loʼoloxaj a tseemeʼex utiaʼal a weʼeskeʼex okʼomchajaʼan a wóoleʼexiʼ›» (Mateo 11:16, 17).

¿Baʼax tu yóotaj u yaʼal Jesús tiʼob? Letiʼeʼ tu yaʼalaj: «Ka taal Juaneʼ maʼ jaaniʼ mix ukʼulnaj jeʼex u maasiloʼ, baʼaleʼ le máakoʼoboʼ tu yaʼaloʼob: ‹Okaʼan demonio tiʼ›; ka taal u Paal máakeʼ jaani yéetel ukʼulnaj jeʼex u maasiloʼ, baʼaleʼ le máakoʼoboʼ ku yaʼalikoʼob: ‹¡Ileʼex! Le máakaʼ jach maʼatech u tsʼáaik u pʼiis u janal yéetel yaʼab u yukʼik vino, ku biskuba yéetel le j-kʼam impuestoʼoboʼ bey xan yéetel j-kʼeban máakoʼob›» (Mateo 11:18, 19). Juaneʼ tu bisaj junpʼéel kuxtal jeʼex u beetik juntúul nazareoeʼ, baʼaleʼ aʼalaʼabtiʼ tumen le máakoʼoboʼ okaʼan demonio tiʼ (Números 6:2, 3; Lucas 1:15). Baʼaleʼ Jesuseʼ kuxlaj jeʼex suukil u beetik u maasil máakoʼobeʼ, letiʼeʼ jaani yéetel tu yukʼaj vino, baʼaleʼ aʼalaʼab jach ku píitmáan. Mix baʼal kiʼimakkúuntik u yóoloʼob.

Jesuseʼ tu yaʼaleʼ le máakoʼoboʼ beyoʼob jeʼex le mejen paalaloʼob yanoʼob teʼ kʼíiwikoʼ, letiʼobeʼ maʼ óokʼotnajoʼob le ka paʼax le flauta tumen uláakʼ mejen paalaloʼoboʼ yéetel mix yaachaj u yóoloʼob ka tu yiloʼob yaachajaʼan u yóol u maasiliʼ. Letiʼeʼ tu yaʼalaj: «Yoʼolal le baʼaloʼob maʼalobtak ku beetik máakoʼ ku chíikpajal yaan u naʼat» (Mateo 11:16, 19). Jach beyoʼ, «le baʼaloʼob maʼalobtak» tu beetaj Juan yéetel Jesusoʼ ku yeʼesik maʼ jaaj le baʼaxoʼob aʼalaʼab tu contraʼoboʼ.

Le ka tsʼoʼok u yaʼalik Jesús mix baʼal kiʼimakkúuntik u yóol le máakoʼoboʼ, tʼaanaj tiʼ le baʼax maʼ maʼalob ku beetik u kaajiloʼob Corazín, Betsaida yéetel Capernaum, le tuʼuxoʼob tsʼoʼok u beetik yaʼab milagroʼoboʼ. Jesuseʼ tu yaʼaleʼ wa ka xiʼik u beet milagroʼob tu kaajil Tiro yéetel Sidón yaan tu luʼumil Feniciaeʼ, maas jeʼel u arrepentir u kajnáaliloʼobeʼ. Jesuseʼ tu chʼaʼchiʼitaj tak Capernaum, naatsʼ teʼ tuʼux kajaʼan kaʼachoʼ, tumen láayliʼ maʼ kʼaʼam tumen le máakoʼoboʼ. Tu yaʼalaj tiʼ le kaajoʼ: «Tu Kʼiinil le Juiciooʼ maas jeʼel u chʼaʼabal óotsilil tiʼ u kaajil Sodomaeʼ ke tiʼ teech» (Mateo 11:24).

Ka tsʼoʼokeʼ Jesuseʼ tu kiʼikiʼtʼantaj u Taata, tumen tu taʼakaj u jaajil «tiʼ le máaxoʼob jach kaanbalnajaʼanoʼob yéetel yaan u naʼatoʼoboʼ» baʼaleʼ tu yeʼesaj tiʼ le máaxoʼob kabal u yóoloʼob ku keʼeteloʼob yéetel le mejen paalaloʼoboʼ (Mateo 11:25). Letiʼeʼ tu kʼáat óoltaj tiʼ le máakoʼoboʼ: «Koʼoteneʼex tin wiknal, tuláakleʼex máaxeʼex yaʼab a meyajeʼex yéetel aal a kuucheʼex, teen ken in beet a jeʼelsikabaʼex. Biseʼex ta wóokʼoleʼex u cheʼil in kuuch yéetel kaanbalneneʼex tiʼ teen, tumen teneʼ maʼ séeb in kʼuuxiliʼ yéetel kabal u yóol in puksiʼikʼal, beyoʼ jeʼel a kaxtikeʼex jeʼelel a tiaʼaleʼexeʼ. Tumen u cheʼil in kuucheʼ maʼ talam u bisaʼaliʼ, yéetel in kuucheʼ jach sáal» (Mateo 11:28-30).

¿Bix u sáalkuntik Jesús u kuuch máak? U nuuktakil le judíoʼoboʼ tsʼoʼok u aalkúuntik u kuuch le máakoʼoboʼ, ku yaʼalikoʼob maʼ tu páajtal u beetaʼal baʼaloʼob tu kʼiinil sábado. Baʼaleʼ Jesuseʼ tu sáalkuntaj u kuuchoʼob, tumen tu kaʼansajtiʼob u jaajil yoʼolal Dios, maʼ le baʼaloʼob chéen suuk u beetaʼaloʼoboʼ. Letiʼeʼ tu yaʼalaj xan yaan u beetik u jeʼelel le máaxoʼob aalkúuntaʼan u kuuchoʼob tumen le autoridadoʼoboʼ bey xan le máaxoʼob ku muʼyajoʼob yoʼolal le kʼebanoʼ. Jesuseʼ tu yeʼesajtiʼob bix jeʼel u perdonartaʼaloʼob yéetel u yantal jeetsʼelil tiʼob yéetel Dioseʼ.

Le máaxoʼob kʼamik le kuuch ku tsʼáaik Jesusoʼ jeʼel u páajtal u kʼubik u kuxtaloʼob utiaʼal u meyajtikoʼob le Dios kuxaʼan teʼ kaʼan yéetel ku chʼaʼik óotsililoʼ. Lelaʼ maʼ talam u beetaʼaliʼ, tumen le baʼaxoʼob ku kʼáatik Diosoʼ «maʼ talam u tsʼoʼokbesaʼaloʼobiʼ» (1 Juan 5:3).