Jesuseʼ tsʼoʼok u yaʼalikeʼ chéen u ‹chan múuchʼ tamanoʼob› kun kʼamik u Reinoil kaʼan (Lucas 12:32). Kex beyoʼ maʼ unaj u mixbaʼalkúuntaʼal le siibalaʼ. Letiʼeʼ seguernaj u tsolik baʼax unaj u beetik máak utiaʼal u kʼamik.

Tu yaʼalaj tiʼ u disipuloʼob ka u páaʼtoʼob u suut. Tu yaʼalajtiʼob: «Líiʼsabaʼex yéetel tʼabeʼex a lamparaʼex, tsʼoʼoleʼ beetabaʼex jeʼex le máakoʼob táan u páaʼtkoʼob u tsʼuulil le ken suunak tiʼ le tsʼoʼokol beeloʼ, beyoʼ ken kʼuchuk yéetel ken kʼoopnakeʼ, tu séebaʼanil ken a jeʼekʼabteʼex le joonaj tiʼoʼ. ¡Kiʼimak u yóol le palitsiloʼob wa táan u kananoʼob le ken kʼuchuk u tsʼuuliloʼoboʼ!» (Lucas 12:35-37).

Le disipuloʼoboʼ séebaʼan úuchik u naʼatkoʼob le baʼax tu yaʼalaj Jesús tiʼoboʼ. Le palitsiloʼob tu yaʼaloʼ ku chúukpajal u yóoloʼob u páaʼtoʼob u suut u tsʼuuliloʼob. Jesuseʼ tu yaʼalaj: «Jach kiʼimak xan u yóol le palitsiloʼob wa táan u kananoʼob ken kʼuchuk u tsʼuuliloʼob le taʼaytak chúumuk áakʼaboʼ, bey xan wa le tsʼoʼok u máan chúumuk áakʼab ken kʼuchkoʼ» (Lucas 12:38).

Lelaʼ maʼ chéen táan u yaʼalik tiʼ juntúul palitsil ka u tsʼáa u yóol meyajiʼ, tumen ku táakbeskuba letiʼ bey u Paal Máak ichil le kettʼaanoʼ. Letiʼeʼ tu yaʼalaj tiʼ u disipuloʼob: «Teʼex xaneʼ eʼeseʼex maʼ táan a weenleʼexiʼ, tumen tiʼ junpʼéel hora maʼ táan a páaʼtkeʼexeʼ yaan u kʼuchul u Paal máak» (Lucas 12:40). Maʼ kun xáantaleʼ yaan u taal Jesús. Letiʼeʼ u kʼáat ka páaʼtaʼak tumen tuláakal u disipuloʼob, maases le u ‹chan múuchʼ tamanoʼoboʼ›.

Pedroeʼ u kʼáat u naʼat jach baʼax u kʼáat u yaʼale, le oʼolal tu kʼáatajtiʼ: «Yuumtsil, ¿tiʼ toʼon wa ka waʼalik le kettʼaanaʼ wa tiʼ tuláakal?». Jesuseʼ maʼ tu núukaj le baʼax tu kʼáatoʼ, baʼaxeʼ tu beetaj junpʼéel kettʼaan. Tu yaʼalaj: «¿Máax jach tu jaajil le j-kanan ayikʼalil chúukaʼan u yóol, le máax yaan u naʼatoʼ, le máax kun tsʼaabil tumen u Tsʼuulil tu yóokʼol uláakʼ u palitsiloʼob utiaʼal ka seguernak u tsʼáaik le bukaʼaj janal kʼaʼabéettiʼob jach tu yorailoʼ? ¡Kiʼimak u yóol le palitsil wa le ken kʼuchuk u Tsʼuuliloʼ ka u yil táan u beetik beyoʼ! Tu jaajil kin waʼalikteʼex: Yaan u tsʼáaik u kanáant tuláakal le baʼaxoʼob yaantiʼoʼ» (Lucas 12:41-44).

Tiʼ uláakʼ kettʼaan tsʼoʼok u yáax aʼalikeʼ le «Tsʼuuloʼ» láayliʼ Jesús, le u Paal máakoʼ. Bey túunoʼ «le j-kanan ayikʼalil» tu yaʼaloʼ táakaʼan tuláakal le u ‹chan múuchʼ tamanoʼob› kun tsʼaabil le Reino tiʼoboʼ (Lucas 12:32). Teʼelaʼ Jesuseʼ táan u yaʼalikeʼ jujuntúul tiʼ le junpʼíit tamanoʼoboʼ yaan u táakpajloʼob utiaʼal u tsʼáaikoʼob tiʼ «uláakʼ u palitsiloʼob» le «janal kʼaʼabéettiʼob jach tu yorailoʼ». Le oʼolal Pedro yéetel uláakʼ disipuloʼob ku tséentaʼaloʼob, wa ku kaʼansaʼaloʼob tumen Jesusoʼ, yaan u táakpajloʼob utiaʼal u tsʼáaʼob janal teʼ kʼiinoʼob ken taalak u Paal Máakoʼ. Teʼ kʼiinoʼob jeʼeloʼ yaan u yantal máaxoʼob ku tsʼáaik janal, wa kaʼansaj tiʼ «uláakʼ u palitsiloʼob[oʼ]».

Jesuseʼ tu yaʼalaj uláakʼ bix unaj u kanáantik u disipuloʼob maʼ u náayal u yóoloʼob yéetel baʼax tuukulil unaj u yantaltiʼob. Tumen jach séeb jeʼel u xuʼulul u tsʼáaik u yóol máakeʼ wa u tsʼáaikuba tu tséel le máaxoʼob pʼekmiloʼ. Tu yaʼalaj: «Baʼaleʼ wa ku káajal u tuklik le palitsil ichil u puksiʼikʼal: ‹In tsʼuulileʼ tsʼoʼok u xáantal maʼ taalakiʼ›, ka joʼopʼok u jaʼajatsʼik le palitsiloʼob yéetel le x-palitsiloʼoboʼ, bey xan u janal, u yukʼul yéetel u káaltaleʼ, yaan u taal u Tsʼuulil le palitsil tiʼ junpʼéel kʼiin maʼ táan u páaʼtikoʼ bey xan tiʼ junpʼéel hora maʼ u yojliʼ, yéetel yaan u tsʼáaik junpʼéel jach nojoch castigo tiʼ, yaan xan u tsʼáaik ichil le máaxoʼob maʼ chúukaʼan u yóoloʼoboʼ» (Lucas 12:45, 46).

Jesuseʼ tu yaʼaleʼ taal u «tʼab junpʼéel kʼáakʼ way Luʼumeʼ». Tumen u kaʼansajeʼ ku beetik u baʼateʼel wa u kʼuuxil máak yoʼolal le kaʼansajoʼob maʼ jaajtakoʼ bey xan le baʼaxoʼob suukaʼan u beetaʼaloʼ. Le baʼaloʼob beyaʼ ku beetik u jatskuba tak máaxoʼob unaj u yaabiltikubaʼob, letiʼeʼ tu yaʼalaj: «Le taatatsil  túunoʼ yaan u tsʼáaikuba tu contra u hijo, le hijotsiloʼ tu contra u taata, le maamatsiloʼ tu contra u hija, le hijatsiloʼ tu contra u maama, le suegratsiloʼ tu contra u yilib, yéetel le x-ilibtsiloʼ tu contra u suegra» (Lucas 12:49, 53).

Le tʼaanoʼobaʼ tiʼ u disipuloʼob tu yaʼalaj. Ka tsʼoʼokeʼ ka tu sutuba u pakt le u maasil máakoʼoboʼ. U maas yaʼabil tiʼ letiʼobeʼ maʼ u yóot u kʼamoʼob le Mesíasoʼ, le oʼolal tu yaʼalajtiʼob: «Ken a wileʼex táan u nookoytal tu tojil chikʼineʼ, tu séebaʼanil ka waʼalikeʼex: ‹Táan u taal junpʼéel kʼaʼamkach cháak›, tsʼoʼoleʼ bey xan u yúuchloʼ. Yéetel ken a wileʼex noojol u taal le iikʼoʼ, ka waʼalikeʼex: ‹Yaan u sen beetik ooxol›, tsʼoʼoleʼ bey xan u yúuchloʼ. J-kaʼapʼéel icheʼex, ken a pakteʼex u yich kaʼan yéetel ken a pakteʼex le luʼumoʼ ka naʼatkeʼex baʼax tiempoil tsʼoʼok u náatsʼal, baʼaleʼ ¿bix yanil túun maʼ ta kanik a kʼaj óolteʼex baʼax u kʼáat u yaʼal le kʼiinoʼob jeʼelaʼ?» (Lucas 12:54-56). Bey túunoʼ letiʼobeʼ maʼ táan u páaʼtkoʼobiʼ.