Jesuseʼ láayliʼ tiaʼan tu kʼiinbesajil le tabernaculoʼob (wa paseloʼob) tu kaajil Jerusalenoʼ. Letiʼeʼ kiʼimak u yóol tumen «yaʼab tiʼ le máakoʼoboʼ seguernaj u tsʼáaik u fejoʼob tiʼ». Baʼaleʼ leloʼ maʼ utschaj tu tʼaan u nuuktakil le judíoʼoboʼ. Ka tu túuxtoʼob le máakoʼob kanáantik le templo ku meyajoʼob bey policía utiaʼal machikoʼ (Juan 7:31, 32). Baʼaleʼ Jesuseʼ maʼ tu taʼakuba tiʼobiʼ.

Baʼaxeʼ seguernaj u kaʼansik le máakoʼob yanoʼob Jerusalenoʼ, tu yaʼalajtiʼob: «Yaan in pʼáatal junpʼíit tiempo maas ta wéeteleʼex táanil tiʼ in bin tu yiknal le máax túuxtenoʼ. Teʼexeʼ yaan a máan a kaxteneʼex, baʼaleʼ maʼ ken a wileneʼex, teʼ tuʼux kin antaloʼ teʼexeʼ maʼ tu páajtal a taaleʼexiʼ» (Juan 7:33, 34). Le judíoʼoboʼ maʼ tu naʼatoʼobiʼ, le oʼolal joʼopʼ u yaʼalikoʼob tu baatsiloʼob: «¿Tuʼux túun ku tuklik u bin le máak ka pʼáatak maʼ tu páajtal k-kaxtikoʼ? ¿Máasaʼ maʼ táan u tuklik u bin tu yiknal le judíoʼob kʼiʼitpajaʼanoʼob ichil le griegoʼob, utiaʼal ka u kaʼans le griegoʼoboʼ? ¿Baʼax túun u kʼáat u yaʼal yéetel le baʼax ku yaʼalikaʼ: ‹Yaan a máan a kaxteneʼex, baʼaleʼ maʼ ken a wileneʼex, teʼ tuʼux kin antaloʼ teʼexeʼ maʼ tu páajtal a taaleʼexiʼ›?» (Juan 7:35, 36). Baʼaleʼ Jesuseʼ táan u tʼaan tiʼ u kíimil yéetel tiʼ u kaʼa kuxtal utiaʼal u bin teʼ kaʼanoʼ, teʼeloʼ maʼ kun páajtal u bin le máaxoʼob pʼekmiloʼ.

Tsʼoʼok u chukik u siete kʼiinoʼob káajak le kʼiinbesajoʼ, sáamsamal de jaʼatskabeʼ ku taal juntúul sacerdote u chʼaʼ jaʼ tu pilail Siloam utiaʼal u bis u wek tu yook le altaroʼ. Maʼ xaaneʼ utiaʼal u kʼaʼajsiktiʼob lelaʼ tu yaʼalajtiʼob: «Wa yaan máax ukʼajeʼ taalak tin wiknal ka u yukʼ jaʼ. Le máax ku tsʼáaik u fe tiʼ teneʼ, jeʼex u yaʼalik le Kiliʼich Tsʼíiboʼoboʼ: ‹Tu tsʼuʼ u puksiʼikʼaleʼ yaan u tuul kuxaʼan jaʼiʼ›» (Juan 7:37, 38).

Jesuseʼ táan u tʼaan tiʼ le baʼax kun úuchul ken tsʼaʼabak u yokjaʼ u disipuloʼob yéetel kiliʼich muukʼ utiaʼal u yéeyaʼaloʼob utiaʼal u binoʼob kaʼan. Lelaʼ  úuch le ka tsʼoʼok u kíimil Jesusoʼ. Tu káajbal le Pentecostés teʼ tuláakʼ jaʼaboʼ, bey yaan u káajal u tuul u jaʼil le kuxtal ken joʼopʼok u kaʼansaʼal u jaajil tiʼ le máakoʼob tumen le disipuloʼoboʼ.

Yoʼolal le baʼaxoʼob ku kaʼansik Jesusoʼ, yaan tiʼ le máakoʼoboʼ joʼopʼ u yaʼalikoʼob: «Le máakaʼ jach tu jaajil letiʼe Profeta aʼalaʼan kun taaloʼ». Uláakʼoʼobeʼ ku yaʼalikoʼob kaʼachi: «Le máakaʼ, letiʼe Cristooʼ». Baʼaleʼ yanoʼobeʼ ku yaʼalikoʼob: «¿Máasaʼ le Cristooʼ, maʼ tiʼ u luʼumil Galilea aʼalaʼan kun taaliʼ? ¿Maʼ wa tu yaʼalik le Kiliʼich Tsʼíiboʼ, le Cristooʼ tiʼ u chʼiʼibal David kun taal, tu chan kaajil Belén, le tuʼux kajaʼan David kaʼachoʼ?» (Juan 7:40-42).

Bey túunoʼ maʼ junpʼéeliliʼ bix u tuukuloʼobiʼ. Kex taak u machkoʼob Jesuseʼ mix máak óotik u beete. Le ka suunaj le máakoʼob túuxtaʼaboʼob machikoʼ maʼ tu taasoʼobiʼ, le fariseoʼob yéetel le sacerdoteʼob túunoʼ tu kʼáatoʼobtiʼob: «¿Baʼaxten maʼ ta taaseʼexiʼ?». Le j-kananoʼoboʼ tu núukoʼob: «Mix juntéen k-uʼuymaj u yúuchul tʼaan beyaʼ». U nuuktakil le judíoʼoboʼ jach kʼuuxilnajoʼobeʼ ka joʼopʼ u yaʼalikoʼob: «¿Tak wa teʼex tsʼoʼok a chaʼik a tuʼusleʼex? ¿Máasaʼ mix juntúul tiʼ le gobernanteʼob wa tiʼ le fariseoʼob tsʼoʼok u tsʼáaik u fejoʼob tiʼ letiʼoʼ? Baʼaleʼ le yaʼabkach máakoʼob maʼ u yojloʼob baʼax ku yaʼalik le Leyoʼ, kʼaakʼastʼantaʼanoʼob» (Juan 7:45-49).

Teʼ súutukoʼ, Nicodemo, juntúul fariseo yéetel ku meyaj teʼ Sanedrín xanoʼ, tʼaanaj tu kʼaabaʼ Jesús. Kex dos años y medio táanil tiʼ lelaʼ, letiʼeʼ bin u yil Jesús de áakʼab yéetel tu tsʼáaj u fe tiʼ letiʼ. Beoraaʼ Nicodemoeʼ ku yaʼalik: «Le ley yaantoʼonoʼ, ¿maʼ wa ku yaʼalikeʼ táanil tiʼ u juzgartaʼal juntúul máakeʼ unaj u yuʼubaʼal baʼax ken u yaʼal tu yoʼolal yéetel unaj u yojéeltaʼal baʼax ku beetik?». Ka túun tu núukoʼobtiʼ: «¿Máasaʼ techeʼ maʼ Galilea xan a taaliʼ? Xakʼalt le Kiliʼich Tsʼíiboʼoboʼ ka a wileʼ, tiʼ Galileaeʼ mix juntúul profeta kun jóokʼoliʼ» (Juan 7:51, 52).

Le Kiliʼich Tsʼíiboʼoboʼ maʼatech u yaʼalik wa yaan u jóokʼol juntúul profeta tu luʼumil Galilea. Baʼaleʼ ku yaʼalikeʼ le Cristooʼ tiʼ kun taaliʼ. Le profecíaoʼ ku yaʼalikeʼ yaan u yilaʼal «junpʼéel nojoch sáasil» tu luʼumil «Galilea le tuʼux kajaʼan le j-táanxel luʼumiloʼoboʼ» (Isaías 9:1, 2; Mateo 4:13-17). Tsʼoʼoleʼ jach jeʼex aʼalaʼaniloʼ, Jesuseʼ síij tu kaajil Belén yéetel taal tiʼ u chʼiʼibal David. Maʼ xaaneʼ le fariseoʼoboʼ u yojloʼob tuláakal lelaʼ, baʼaleʼ letiʼob kaʼansik tiʼ le máakoʼob baʼaloʼob maʼ jaajtak tu yoʼolal Jesusoʼ.