1. ¿Baʼaxten unaj k-maas kʼaj óoltik le angeloʼoboʼ?

UTIAʼAL k-kʼaj óoltik tubeel utúul máakeʼ, maʼalob ka k-ojéelt bix u familia. Utiaʼal xan k-kʼaj óoltik Jéeoba tu beeleʼ kʼaʼabéet kʼaj óoltik le angeloʼoboʼ, u familia yaan teʼ kaʼanoʼ. Le Bibliaoʼ ku yaʼalikeʼ le angeloʼoboʼ u paalal Jajal Dios (Job 38:7). Baʼaleʼ ¿bix u yáantkoʼob Dios utiaʼal u béeykuntik baʼax u kʼáat? ¿Yaan wa tiʼ baʼaxoʼob ku yáantkoʼob wíinik? ¿Yaan wa baʼax u yil le angeloʼob ichil k-kuxtaloʼ? Wa beyoʼ, ¿bixi?

2. ¿Bix úuchik u yantal le angeloʼoboʼ, yéetel jaytúuloʼob?

² Le Bibliaoʼ jach ku tʼaan tiʼ le angeloʼoboʼ. Koʼox ilik jujumpʼéel tekstos ku tʼaan tiʼ letiʼob utiaʼal k-maas kʼaj óoltikoʼob. Yáaxeʼ, ¿bix yanchajikoʼob? Colosailoʼob 1:16 ku yaʼalik: «Tu yoʼolal letiʼeʼ [wa tu yoʼolal Jesuseʼ] Jajal Dioseʼ tu beetaj tuláakal baʼax yaan teʼ kaʼanoʼ yéetel teʼ luʼumoʼ». Bey túunoʼ, tuláakal le angeloʼoboʼ jujuntúulil beetaʼabikoʼob tumen Jéeoba yéetel u yáantaj Jesús, u yáax Paal. ¿Jaytúul angeloʼob yaan? Le Bibliaoʼ ku yaʼalikeʼ yaan u millonesi angeloʼob yéetel tuláakal jach yaan u muukʼoʼob (Salmo 103:20). *

3. ¿Baʼax ku kaʼansiktoʼon Job 38:4-7 tiʼ le angeloʼoboʼ?

³ Le Bibliaoʼ ku yaʼalikeʼ le ka beetaʼab le Luʼum tumen Jéeobaaʼ, tuláakal u paalaloʼob, wa le angeloʼoboʼ, kiʼimakchaj  u yóoloʼob (Job 38:4-7). Lelaʼ ku kaʼansiktoʼoneʼ le angeloʼoboʼ yaniliʼob maʼ beetaʼak wíinikeʼ, tumen yaniliʼob maʼ beetaʼak le Luʼumaʼ. Ku yeʼesik xaneʼ le angeloʼoboʼ kiʼimakchaj u yóoloʼob ka beetaʼab le Luʼumaʼ. K-ilik túuneʼ, teʼ kʼiinoʼob jeʼeloʼ láaj muchʼ yanikoʼob bey upʼéeliliʼ familia táan u múul meyajkoʼob Jéeobaeʼ.

4. Le Bibliaoʼ, ¿bix u yeʼesik le utsul angeloʼoboʼ jach táan u yilkoʼob baʼax ku beetik wíinikoʼob?

⁴ Ka tsʼoʼok u beetaʼal Adán yéetel Evaeʼ, le utsul angeloʼoboʼ káaj u yilkoʼob jach baʼax ku beetik wíinikoʼob yéetel bix kun béeytal baʼax u tukulmaj Dios (Proverbios 8:30, 31; 1 Pedro 1:11, 12). Baʼaleʼ jeʼex máanik le jaʼaboʼoboʼ tsʼoʼok u yilkoʼobeʼ óoliʼ tuláakal máak maʼ tu yóotik u meyajtoʼob Dios. Lelaʼ jach ku beetik u yaatal u yóol le utsul angeloʼoboʼ. Baʼaleʼ kex chéen utúul kʼeban wíinik ka u kʼex u tuukul utiaʼal u meyajtik Jéeobaeʼ ku yantal «kiʼimak óolal ichil u angeloʼob Dios» (Lucas 15:10). Jeʼex tsʼoʼok ilkoʼ, le angeloʼoboʼ u kʼáatoʼob ka xiʼik utsil tiʼ máaxoʼob meyajtik Dios. Le oʼolal Jéeobaeʼ yaʼab u téenel tu túuxtaj u angeloʼob way Luʼum utiaʼal u kanáantik yéetel u tsʼáaik muukʼ tiʼ máaxoʼob uʼuyik u tʼaan (Hebreob 1:7, 14). Koʼox ilik bix tu yáantil jujuntúul máaxoʼob meyajtik.

5. ¿Máaxoʼob kʼam áantaj tiʼ le angeloʼoboʼ?

⁵ Ka xuʼulsaʼab u kʼasaʼan kaajil Sodoma yéetel Gomorra tumen Dioseʼ, Lot yéetel u hijaseʼ maʼ kíimoʼobiʼ tumen jóoʼsaʼaboʼob tiʼ u kaajil Sodoma tumen kaʼatúul angeloʼob (Génesis 19:15, 16). Ku máan yaʼab jaʼaboʼob xaneʼ le profeta Danieloʼ puʼul ichil u sajkab le leonoʼoboʼ, baʼaleʼ mix baʼal úuch tiʼ. Letiʼeʼ tu yaʼalaj baʼaxten: «In [Dioseʼ] tu túuxtaj u ángel, letiʼeʼ tu nupʼaj u chiʼ le leonoʼob[oʼ]» (Daniel 6:22). Ka kʼaʼal xan apóstol Pedroeʼ chaʼab tumen utúul ángel (Beetaʼanoʼob 12:6-11). Jesús xaneʼ áantaʼab tumen le angeloʼob le ka tu káajsaj u meyaj teʼ Luʼumaʼ (Marcos 1:13). Taʼaytak xan u kíimileʼ, taal utúul ángel «utiaʼal tsʼáaik muukʼ tiʼ» (Lucas 22: 43). ¡Bukaʼaj wal líikʼik u yóol úuchik u yáantaʼal teʼ súutukiloʼobaʼ!

6. 1) ¿Bix u kanáantikoʼob u kaajal Dios le angeloʼob bejlaʼoʼ? 2) ¿Baʼax kʼáatchiʼiloʼob ken k-núuke?

⁶ Bejlaʼeʼ maʼatech u yilaʼal le angeloʼoboʼ, tumen maʼatech u chíikbeskubaʼob tiʼ máaxoʼob meyajtik Dios way Luʼumeʼ. Baʼaleʼ le angeloʼoboʼ láayliʼ táan u kanáantkoʼob u kaajal Dioseʼ, maases tiʼ baʼaxoʼob jeʼel u beetik u náachtaloʼob tiʼ letiʼeʼ. Le Bibliaoʼ ku yaʼalik: «U ángel le Yuumtsiloʼ ku kanáantik yéetel ku tokik le máaxoʼob tsikik le Yuumtsiloʼ». (Salmo 34:7, Los Salmos en Maya). ¿Baʼaxten ku líiʼsik k-óol le tekstoaʼ? Tumen yaan kʼaakʼas pixanoʼob taak u beetkoʼobtoʼon loob. ¿Máaxoʼobiʼ? ¿Bix úuchik u yantaloʼob? ¿Bix u yilik u beetkoʼobtoʼon kʼaas? Utiaʼal k-ojéeltikeʼ, koʼox ilik baʼax úuch ka káaj u yaʼabtal wíinikoʼob.

7. ¿Jaytúul wíinikoʼob tu náachkuntaj Satanás tiʼ Dios?

⁷ Jeʼex t-kanaj teʼ óoxpʼéel xookoʼ, utúul angeleʼ káaj u tsʼíiboltik u gobernar yóokʼol wíinikoʼob, le oʼolal tu tsʼáajuba tu contra Dios. Ku máan kʼiineʼ le angelaʼ kʼaabaʼtaʼab Satanás, wa u Kʼaasilbaʼal (Apocalipsis 12:9). Ka tsʼoʼok u tusik Evaeʼ, tuláakʼ mil seisientos jaʼaboʼob máanoʼ tu náachkuntaj óoliʼ tuláakal máak tiʼ Dios. Chéen jujuntúul uʼuy u tʼaan Diosiʼ. Ichil le tu yuʼuboʼob tʼaanoʼ tiaʼan Abel, Enoc yéetel Noé (Hebreob 11:4, 5, 7).

8. 1) ¿Bix úuchik u kʼastal jujuntúul angeloʼob? 2) ¿Baʼax tu beetoʼob le ka taal le Búulkabaloʼ?

⁸ Tu kʼiiniloʼob Noeiʼ uláakʼ angeloʼob xaneʼ tu tsʼáajubaʼob tu contra Jéeoba. Jóokʼoʼob ichil u familia Dios teʼ kaʼanoʼ, ka éemoʼob way Luʼumeʼ ka tu beetubaʼob bey wíinikoʼobeʼ. ¿Baʼaxten tu beetoʼob lelaʼ? Génesis 6:2 ku yaʼalik: «U paalal [Dioseʼ] tu yilajoʼob kiʼichpamtak le [koʼoleloʼoboʼ]. Ka túun tu yéeyajoʼob utiaʼal u tsʼoʼokol u beeloʼob, [...] [le jaytúul] tu yóoltajoʼobeʼ». K-ilik túuneʼ le kʼasaʼan angeloʼobaʼ táan kaʼach  u kʼaskúuntkoʼob u kuxtal wíinikoʼob, baʼaleʼ Jéeobaeʼ maʼ tu chéen ilaj baʼax ku beetkoʼobiʼ. Tu túuxtaj upʼéel búulkabal utiaʼal u xuʼulsik tuláakal le kʼasaʼan máakoʼoboʼ; chéen máaxoʼob meyajtik maʼ kíimoʼobiʼ (Génesis 7:17, 23). Utiaʼal maʼ u kíimloʼobeʼ le kʼasaʼan angeloʼobaʼ tu kaʼa sutubaʼob angelil, jeʼexoʼob kaʼacheʼ, ka suunajoʼob teʼ kaʼanoʼ. Yoʼolal baʼax tu beetoʼobeʼ tu tsʼáajubaʼob tu tséel le Kʼaasilbaʼaloʼ. Satanás túuneʼ suunaj «u nojochil le kʼaakʼas pixanoʼob[oʼ]» (Mateo 9:34).

9. 1) ¿Baʼax úuch tiʼ le kʼasaʼan angeloʼob ka suunajoʼob teʼ kaʼanoʼ? 2) ¿Baʼax ken k-il beoraaʼ?

⁹ Ka suunaj le kʼasaʼan angeloʼob teʼ kaʼanoʼ, Dioseʼ maʼ tu kaʼa chaʼa u yantaloʼob ichil u familiaiʼ, jeʼex tu beetil yéetel  Satanaseʼ (2 Pedro 2:4). Kex bejlaʼa maʼ tu páajtal u sutkubaʼob bey wíinikoʼobeʼ, láayliʼ jach táan u beetkoʼob kʼaas tiʼ máakeʼ. Táan u yáantkoʼob Satanás utiaʼal u «tusik tuláakal yóokʼol kaab» (Apocalipsis 12:9; 1 Juan 5:19). ¿Bix u beetkoʼob? Le kʼasaʼan angeloʼoboʼ yaʼab bix u tuskoʼob máak (2 Corintoiloʼob 2:11). Koʼox ilik jujumpʼéel tiʼ letiʼobiʼ.

10. ¿Baʼax le espiritismooʼ?

¹⁰ Le kʼaakʼas pixanoʼoboʼ ku meyaj le espiritismo tiʼob utiaʼal u tuskoʼob wíinikoʼ. Le espiritismooʼ yaan u yil yéetel tuláakal baʼal ku beetik u yoksikuba máak yéetel le kʼaakʼas pixanoʼoboʼ. Le Bibliaoʼ ku yaʼalik jach upuliʼ maʼ uts le baʼaloʼobaʼ yéetel ku yaʼaliktoʼon maʼ k-beetik mix upʼéel tiʼ letiʼobiʼ (Galaciailoʼob 5:19-21). Le espiritismooʼ jeʼel u páajtal k-ketik yéetel le jejeláas baʼaxoʼob ku tsʼaʼabal u jaant le chʼíichʼoʼob utiaʼal u chuʼukloʼoboʼ. Tiʼ utúul j-chuk chʼíichʼeʼ jejeláas oʼochoʼob ku meyaj utiaʼal u chukik jejeláas chʼíichʼoʼob. Tiʼ le kʼaakʼas pixanoʼob xanoʼ u jejeláasil espiritismo ku meyajtiʼob utiaʼal u yilik u táabskoʼob u jejeláasil máakoʼob.

11. ¿Baʼaxoʼob táakaʼan ichil le jóoʼsaj suerteoʼ, yéetel baʼaxten kʼaʼabéet k-náachkuntikba tiʼ?

¹¹ Le jóoʼsaj suerteoʼ upʼéel baʼal ku meyaj tiʼ le kʼasaʼan angeloʼob utiaʼal u táabskoʼob máakoʼ. ¿Baʼax táakaʼan ichil? Ichileʼ táakaʼan tuláakal baʼax ku meyaj utiaʼal u yilaʼal u yojéeltaʼal baʼax kun úuchul, wa u yilaʼal yojéeltaʼal upʼéel baʼal taʼakaʼan. U yilaʼal baʼax u kʼáat u yaʼal le estrellaʼoboʼ, u jóoʼsaʼal suerte yéetel sáastun wa yéetel barajas, u xoʼokol u táan u kʼab máak yéetel u yilaʼal baʼax u kʼáat u yaʼal le wayakʼoʼoboʼ, láaj yaan u yiloʼob yéetel le espiritismooʼ. Kex yaʼab máak aʼalik maʼ kʼaas le baʼaloʼobaʼ, le Bibliaoʼ ku yaʼalikeʼ le máaxoʼob beetik lelaʼ táan u meyajoʼob yéetel le kʼasaʼan angeloʼoboʼ. Le Bibliaoʼ ku yaʼalikeʼ «juntúul pixan ku naʼat[eʼ]» le áantik kaʼach utúul chʼúupal utiaʼal u páajtal u «naʼat» wa u jóoʼsik suerte. Baʼaleʼ le ka jóoʼsaʼab le kʼaakʼas pixan tiʼoʼ, pʼáat maʼ tu páajtal u beetik (Beetaʼanoʼob 16:16-18).

12. ¿Baʼaxten maʼ uts ka wil a tʼaan yéetel le kimenoʼoboʼ?

 ¹² Uláakʼ bix u tuskoʼob máak le kʼasaʼan angeloʼoboʼ letiʼe u tsʼáaikoʼob tu tuukul máak ka tʼaanak yéetel le kimenoʼoboʼ. Yaʼab máakeʼ ken kíimik máax u yaabiltmeʼ ku beetaʼal u tuklik baʼaloʼob maʼ jaajtak yoʼolal le kimenoʼoboʼ. Maʼ xaaneʼ, le máax chʼaʼachiʼitik le kimenoʼ jeʼel u yaʼalik upʼéel baʼax maʼ jach ojéelaʼan tiʼ le kimenoʼ yéetel jeʼel tak u jóoʼsik u tʼaaneʼ. Lelaʼ ku beetik u tuklaʼal tumen yaʼab máakoʼobeʼ le kimenoʼoboʼ láayliʼ kuxaʼanoʼobeʼ yéetel wa ku tʼaanoʼob tu yéeteloʼobeʼ yaan u kiʼimaktal u yóoloʼob. Baʼaleʼ chéen tu tuskuba máax ku yoksik tu yóol le baʼaloʼobaʼ yéetel jeʼel u beetik u tuʼusleʼ. ¿Baʼaxten? Tumen le kʼasaʼan angeloʼoboʼ jeʼel u jóoʼskoʼob u tʼaan le kimenoʼoboʼ yéetel u tsʼáaik u yojéeltoʼob tiʼ le espiritistaʼob baʼaloʼob tu yoʼolal le kimenoʼoboʼ (1 Samuel 28:3-19). Jeʼex t-ilaj tu seis xookil le libroaʼ ken kíimik máakeʼ jach tsʼoʼokol ku beetik (Salmo 115:17). Le oʼolaleʼ tuláakal le ku «tʼaan yéetel kimenoʼob[oʼ]» tsʼoʼok u tuʼusloʼob tumen le kʼasaʼan angeloʼoboʼ yéetel táan u beetkoʼob baʼax maʼ utstutʼaan Diosiʼ (Deuteronomio 18:10, 11; Isaías 8:19). Le beetikeʼ, maʼ uts ka tʼaanakech yéetel le kimenoʼoboʼ.

13. ¿Baʼax tsʼoʼok u beetik yaʼab máakoʼob saajkoʼob kaʼach tiʼ le kʼasaʼan angeloʼoboʼ?

 ¹³ Le kʼasaʼan angeloʼoboʼ maʼ chéen ku tusikoʼob wíinikiʼ, ku yilkoʼob xan u tsʼáaikoʼob saajkil tiʼ máak. Satanás yéetel u kʼasaʼan angeloʼobeʼ u yojloʼob «chéen jumpʼíit kʼiin» pʼaataltiʼob utiaʼal u xuʼulsaʼaloʼob; le oʼolal jach táan u beetik u kʼasaʼaniloʼob (Apocalipsis 12:12, 17). Kex beyoʼ, u milesi máakoʼob saajkoʼob kaʼach tiʼ le kʼasaʼan angeloʼoboʼ, tsʼoʼok u tokkubaʼob tiʼ letiʼob. ¿Bix tu beetiloʼob? ¿Bix jeʼel u tokkuba máak tiʼ le kʼasaʼan angeloʼob, kex wa ku yoksikuba kaʼach tu yéeteloʼobeʼ?

14. ¿Bix jeʼel k-náachkuntikba tiʼ le kʼasaʼan angeloʼob, jeʼex tu beetil le máaxoʼob kʼam Cristo tu kaajil Efesooʼ?

¹⁴ Le Bibliaoʼ ku yaʼaliktoʼon bix jeʼel k-kanáantikba yéetel k-náachkuntikba tiʼ le kʼasaʼan angeloʼoboʼ. Koʼox ilik baʼax tu beetaj le máaxoʼob kʼam Cristo tu kaajil Éfeso teʼ yáax siglooʼ. Táanil tiʼ u yoksik u yóoloʼob tiʼ Jesuseʼ, yaan tiʼ letiʼobeʼ espiritistaʼob kaʼachi. Le ka tu tukultaj u pʼatkoʼobeʼ, ¿baʼax tu beetoʼob? Le Bibliaoʼ ku yaʼalikeʼ «yaʼab tiʼ le máaxoʼob j-pulyaʼajoʼob kaʼachoʼ tu taasajoʼob u juʼuniloʼob le pulyaʼajoʼ ka tu tóokajoʼob tu táan tuláakal» (Beetaʼanoʼob 19:19). Le efesoiloʼob táant u kʼamkoʼob Cristo kaʼachoʼ tu tóokaj u juʼunil u pulyaʼajoʼob, bey túunoʼ tu yeʼesoʼob baʼax kʼaʼabéet u beetik le máaxoʼob taak u náachkuntikubaʼob tiʼ le kʼasaʼan angeloʼoboʼ. Máaxoʼob taak u meyajtkoʼob Jéeobaeʼ kʼaʼabéet u tselkoʼob tiʼ letiʼob tuláakal le baʼaxoʼob yaan u yil yéetel le espiritismooʼ, jeʼex libroʼob, revistaʼob, peliculaʼob, oocheloʼob yéetel kʼaayoʼob jeʼel u beetik u yoksikuba máak yéetel le kʼasaʼan angeloʼoboʼ wa xan jeʼel u beetkoʼob u yilaʼal bey upʼéel baʼal jatsʼuts le espiritismooʼ. Ichil xan le baʼaloʼobaʼ táakaʼan jeʼel baʼalak ku meyaj tiʼ máak utiaʼal u kanáantikuba maʼ u beetaʼal kʼaas tiʼeʼ (1 Corintoiloʼob 10:21).

15. ¿Baʼax unaj k-beetik utiaʼal k-kanáantikba tiʼ le kʼasaʼan angeloʼoboʼ?

 ¹⁵ Maʼ yaʼab jaʼaboʼob u tóok u juʼunil u pulyaʼajob le máaxoʼob kʼam Cristo tu kaajil tiʼ Efesooʼ, le apóstol Pablooʼ tu tsʼíibtajtiʼob: «Táan k-baʼateʼel [...] tu contra u muukʼ kʼaakʼas pixanoʼob» (Efesoiloʼob 6:12). Lelaʼ ku yeʼeskeʼ le kʼasaʼan angeloʼoboʼ láayliʼ táan u yilik u léechkoʼob kaʼach le máaxoʼob kʼam Cristo tu kaajil Efesooʼ. ¿Baʼax túun uláakʼ unaj u beetkoʼob kaʼachiʼ? Pabloeʼ tu yaʼalajtiʼob «Tu yóokʼol tuláakaleʼ yanak teʼex le oksaj óolal bey jeʼel bix jumpʼéel pixibeʼ, utiaʼal ka páatak a tupikeʼex tuláakal u tʼabaʼan juluboʼob [wa u flechas] kʼaasil baʼal» (Efesoiloʼob 6:16). Toʼon xaneʼ wa k-ilik muʼukʼankúuntik k-oksaj óolal wa k-fe ku keʼetel yéetel upʼéel pixib wa escudoeʼ, yaan u páajtal k-kanáantikba tiʼ le kʼasaʼan angeloʼoboʼ (Mateo 17:20).

16. ¿Bix jeʼel k-muʼukʼankuntik k-oksaj óolaleʼ?

¹⁶ ¿Bix túun jeʼel k-muʼukʼankúuntik k-oksaj óolaleʼ? Kʼaʼabéet k-xokik le Bibliaoʼ. Utiaʼal u yantal u muukʼ upʼéel pakʼeʼ, kʼaʼabéet maʼalob u chuumpakʼil. Utiaʼal u yantal xan u muukʼ k-oksaj óolaleʼ kʼaʼabéet yaan u muukʼ tuʼux etsʼekba. Utiaʼal lelaʼ kʼaʼabéet jach k-kanik baʼax ku yaʼalik u Tʼaan Dios. Wa sáamsamal k-xokik le Biblia utiaʼal k-ilik jach baʼax ku yaʼalikeʼ, yaan u maas muʼukʼantal k-oksaj óolal. Jeʼex upʼéel muʼukʼaʼan pakʼeʼ, k-oksaj óolal tiʼ Dioseʼ yaan u kanáantkoʼon tiʼ le kʼasaʼan angeloʼoboʼ (1 Juan 5:5).

17. ¿Baʼax unaj k-beetik utiaʼal k-kanáantikba tiʼ le kʼasaʼan angeloʼoboʼ?

¹⁷ ¿Baʼax uláakʼ unaj kaʼach u beetik le máaxoʼob kʼam Cristo tu kaajil Efesooʼ? Tumen kajakbaloʼob tiʼ upʼéel kaaj tuʼux jach yaan j-meenileʼ, jach kʼaʼabéet u kanáantikubaʼob kaʼachi. Le beetik Pabloeʼ tu yaʼalajtiʼob: «Beeteʼex tuláakal lelaʼ yéetel payalchiʼ [wa oración] táan a kʼáat óolaleʼex mantatsʼ tiʼ Jajal Dios tu yoʼolal le kiliʼich pixanoʼ» (Efesoiloʼob 6:18). Toʼon xaneʼ jach kʼaʼabéet k-kʼáat óoltik tiʼ Jéeoba ka u kanáantoʼon, tumen le yóokʼol kaabaʼ tiʼ yaan tu kʼab le kʼasaʼan angeloʼoboʼ. Upʼéel baʼal jach kʼaʼabéet k-beetkeʼ k-chʼaʼachiʼitik u kʼaabaʼ Dios ichil k-payalchiʼob (Proverbios 18:10). Mantatsʼ xan  kʼaʼabéet k-kʼáatik ka u «tokoʼo[n] tiʼ kʼaasilbaʼal», tumen Dioseʼ yaan u núukik le baʼax k-kʼáatik tiʼaʼ (Juan 17:15; Salmo 145:19).

18, 19. 1) ¿Bix k-ojéeltik jeʼel u páajtal k-ganartik le baʼateʼel yantoʼon tu contra le kʼasaʼan angeloʼoboʼ? 2) ¿Baʼax kʼáatchiʼi kun núukbil tuláakʼ xookoʼ?

¹⁸ Le kʼasaʼan angeloʼoboʼ jeʼel u beetkoʼobtoʼon kʼaaseʼ. Baʼaleʼ wa k-náachkuntikba tiʼ le Kʼaasilbaʼaloʼ yéetel k-natsʼikba tiʼ Dios ikil k-beetik baʼax u kʼáateʼ, maʼ unaj k-chʼaʼik saajkiliʼ (Santiago 4:7, 8). U muukʼ le kʼasaʼan angeloʼoboʼ yaan u xuul. Tu kʼiiniloʼob Noeiʼ, jumpáaykuntaʼaboʼob tumen Dios utiaʼal u xuʼulsaʼaloʼob ken kʼuchuk u kʼiinil (Judas 6). Kʼaʼajaktoʼon xaneʼ táan k-kanáantaʼal tumen le utsul angeloʼob jach yaan u muukʼoʼoboʼ (2 Reyes 6:15-17). Letiʼobeʼ jach u kʼáatoʼob ka k-ganart le baʼateʼel yantoʼon tu contra le kʼasaʼan angeloʼoboʼ, yéetel táan u yáantkoʼonoʼob utiaʼal k-beetik. Le oʼolal túuneʼ, maʼ unaj k-náachtal tiʼ Jéeoba yéetel tiʼ le utsul angeloʼob yanoʼob ichil u familiaoʼ. Baʼaleʼ kʼaʼabéet xan maʼ k-oksikba tiʼ mix baʼal yaan u yil yéetel le espiritismooʼ yéetel kʼaʼabéet k-kuxtal jeʼex k-kanik teʼ Bibliaoʼ (1 Pedro 5:6, 7; 2 Pedro 2:9). Beyoʼ yaan k-ganartik le baʼateʼel yantoʼon tu contra le kʼasaʼan angeloʼoboʼ.

¹⁹ Baʼaleʼ ¿baʼaxten u chaʼamaj Dios u yantal tak bejlaʼa le kʼasaʼan angeloʼob yéetel le kʼasaʼanil wa ku taaskoʼob jach yaʼab muʼyajiloʼ? Tuláakʼ xookoʼ tiʼ kun núukbil le kʼáatchiʼaʼ.