Tiʼ tuláakal yóokʼol kaabeʼ yaʼab baʼax ku tuklik le máakoʼob yoʼolal le baʼaloʼob ku káalkuntik máakoʼ wa le alcoholoʼ. Yanoʼobeʼ suuk u yukʼikoʼob cada wa baʼax kʼiin yéetel u amigoʼob. Uláakʼoʼobeʼ junpuliʼ maʼ tu yukʼikoʼob mix baʼal yaan alcohol ichil. Yéetel uláakʼoʼobeʼ ku yukʼikoʼob hasta u káaltaloʼob. Pero, ¿baʼax ku yaʼalik le Biblia yoʼolal le baʼaloʼob ku káalkuntik máakoʼ?

1. ¿Kʼaas wa u yuʼukʼul baʼaloʼob yaan alcohol ichil?

Le Bibliaoʼ maʼatech u yaʼalik wa kʼaas u yuʼukʼul baʼaloʼob yaan alcohol ichil. Hasta ku yaʼalikeʼ le vinooʼ «ku kiʼimakkúuntik u yóol u puksiʼikʼal máak» (Salmo 104:14, 15). Tsʼoʼoleʼ le Bibliaoʼ ku tʼaan xan tiʼ xiiboʼob yéetel koʼoleloʼob tu meyajtoʼob Jéeoba tu yukʼoʼob baʼaloʼob yaan alcohol ichil (1 Timoteo 5:23).

2. ¿Baʼax ku yaʼalik le Biblia tiʼ le máaxoʼob ku yukʼikoʼob alcoholoʼ?

Jéeobaeʼ jach kʼaas u yilik u káaltal máak bey xan u píitmáan u yukʼik alcohol (Gálatas 5:21). Le Bibliaoʼ ku yaʼalik: «Maʼ a wantal ichil le máaxoʼob ku yukʼikoʼob yaʼab vinooʼ» (Proverbios 23:20). Le oʼolaleʼ wa k-chʼaʼtuklik k-ukʼik alcohol chéen t-juunal wa yéetel uláakʼ máakoʼobeʼ unaj k-ilik maʼ u píitmáan k-ukʼik. Tumen wa maʼeʼ jeʼel u saʼatal k-óoleʼ yéetel maʼ ken k-kanáant baʼax ken k-aʼale mix baʼax ken k-beete, tsʼoʼoleʼ jeʼel xan k-kʼojaʼantaleʼ. Le máax maʼ u yojel u tsʼáa u pʼiis bukaʼaj ken u yukʼeʼ maas maʼalob maʼ u yukʼik.

3. ¿Bix jeʼel k-respetartik baʼax ku chʼaʼtuklik u maasileʼ?

Cada juntúul unaj u chʼaʼtuklik wa yaan u yukʼik alcohol wa maʼ. Le oʼolal maʼ unaj k-aʼalik baʼal tiʼ máaxoʼob ku yukʼikoʼob junpʼíit alcoholiʼ yéetel maʼ unaj k-obligartik le máaxoʼob maʼ tu yukʼikoʼoboʼ (Romanos 14:10). Tsʼoʼoleʼ maʼ unaj k-ukʼik alcohol tu táan le máaxoʼob jelaʼan u yilkoʼob u yukʼik máakoʼ (xok Romanos 14:21). Le máax meyajtik Jéeobaoʼ maʼ tu «kaxtik chéen u yutsil, baʼaxeʼ u yutsil u yéet máakil» (xok 1 Corintios 10:23, 24).

 UTIAʼAL A MAAS NAʼATIK

4. Ilawil wa yaan a wukʼik wa maʼ

¿Kʼaas wa u yilik kaʼach Jesús u yuʼukʼul baʼaloʼob ku káalkuntik máak? Utiaʼal k-ojéeltikeʼ koʼox ilik le yáax milagro tu beetoʼ. Xokeʼex Juan 2:1-11, kéen tsʼoʼokkeʼ ka tsikbaltikeʼex lelaʼ:

• Jeʼex u yeʼesik le tekstooʼ, ¿kʼaas wa u yilik kaʼach Jesús u yuʼukʼul alcohol? ¿Baʼax ku tuklik yoʼolal le máaxoʼob ukʼikoʼ?

• Jesúseʼ maʼ kʼaas kaʼach u yilik u yuʼukʼul alcoholiʼ. Kux túun le máaxoʼob meyajtik Jéeobaoʼ, ¿bix unaj u yilkoʼob le máax ku yukʼik junpʼíit alcoholoʼ?

Wa maʼ kʼaas u yuʼukʼul alcoholeʼ, ¿jeʼel wa túun u páajtal u yukʼik máak tiʼ jeʼel baʼalak súutukileʼ? Xokeʼex Proverbios 22:3, kéen tsʼoʼokkeʼ ka tsikbaltikeʼex wa maʼalob ka u yukʼ máak alcohol teʼ súutukiloʼobaʼ:

• Wa yaan u manejartik u coche wa jeʼel baʼalak clase maquinaeʼ.

• Wa embarazada.

• Wa aʼalaʼantiʼ tumen le doctor maʼ u yukʼik mix baʼal yaan alcohol ichiloʼ.

• Wa maʼ u yojel u tsʼáa u pʼiis bukaʼaj ken u yukʼiʼ.

• Wa prohibirtaʼan tumen le autoridadoʼoboʼ.

• Wa tiaʼan yéetel máax u chʼaʼtukultmaj maʼ u yukʼik alcohol tumen kaʼacheʼ jach ku píitmáan u yukʼik.

¿Maʼalob wa ka tʼoʼoxok alcohol tiʼ junpʼéel boda wa tiʼ uláakʼ wa baʼax fiestaileʼ? Utiaʼal a wilik baʼax unaj a chʼaʼik en cuentaeʼ, chaʼanteʼex le VIDEOOʼ.

Xokeʼex Romanos 13:13 yéetel 1 Corintios 10:31, 32. Kéen tsʼoʼokok a xokikeʼex cada tekstoeʼ ka tsikbaltikeʼex lelaʼ:

• Le tekstoaʼ, ¿bix jeʼel u yáantkech utiaʼal a chʼaʼtuklik junpʼéel baʼal uts tu tʼaan Jéeobaeʼ?

 5. Ilawil bukaʼaj ken a wukʼiʼ

Wa yaan a wukʼik alcohol wa cervezaeʼ kʼaʼajaktecheʼ kex Jéeoba maʼ kʼaas u yilkeʼ u pʼeek u píitmáan u yukʼik máak. ¿Baʼaxten? Xokeʼex Oseas 4:11, 18, kéen tsʼoʼokkeʼ ka tsikbaltikeʼex lelaʼ:

• ¿Baʼax jeʼel u yúuchul wa ku píitmáan u yukʼik máakeʼ?

¿Baʼax jeʼel u yáantik máak utiaʼal maʼ u píitmáan u kʼabeʼ? Kʼaʼabéet u tsʼáaik u pʼiis tiʼ le bukaʼaj ken u yukʼoʼ. Xokeʼex Proverbios 11:2, kéen tsʼoʼokkeʼ ka tsikbaltikeʼex lelaʼ:

• ¿Baʼaxten maʼalob ka u tsʼáa u pʼiis máak tiʼ le bukaʼaj ken u yukʼoʼ?

6. Púutsʼkech tiʼ le alcoholoʼ

 BAʼAX TSOʼOLI

Jéeobaeʼ u tsʼaamaj le baʼaloʼob ku káalkunajoʼob utiaʼal u kiʼimaktal u yóol máakoʼ. Chéen baʼaleʼ jach u pʼeek u káaltal máak yéetel u píitmáan u yukʼik.

Baʼax ta kanaj

• ¿Baʼax ku yaʼalik le Biblia yoʼolal le baʼaloʼob yaan alcohol ichiloʼ?

• ¿Bix u bin tiʼ máak wa ku píitmáan u yukʼik?

• ¿Bix jeʼel k-respetartik baʼax ku chʼaʼtuklik u maasil yoʼolal le baʼaxoʼob yaan alcohol ichiloʼ?