Tu luʼumil Egiptoeʼ kʼaj óoltaʼab u familia Jacob bey israelitaʼobeʼ. Le ka kíim Jacob yéetel Joséeʼ, káaj u gobernar juntúul túumben Faraón. Letiʼeʼ sajak kaʼachi tumen le israelitaʼoboʼ tsʼoʼok u maas yaʼabtaloʼob ke le egipcioʼoboʼ. Le oʼolal tu esclavizartoʼob. Tu obligartoʼob u beetoʼob ladrillos yéetel u sen meyajoʼob teʼ kʼáaxoʼ. Kex sen beetaʼab u muʼyajoʼobeʼ seguernaj u sen yaʼabtaloʼob. Faraóneʼ maʼ utschaj tu tʼaaniʼ, le oʼolal tu túuxtaj kíimsbil tuláakal le mejen xiʼipalaloʼob israelitaʼob táant u síijloʼoboʼ. Máans ta tuukul bix úuchik u sajaktal le israelitaʼoboʼ.

Juntúul koʼolel israelita u kʼaabaʼ Jokébedeʼ anchaj juntúul u chaambal, juntúul chan xiʼipal jach jatsʼuts. Utiaʼal u kanáantikeʼ tu tsʼáaj ichil junpʼéel canastaeʼ ka tu taʼakaj ichil le cañaʼob yaan tu jáal le río Nilooʼ. Míriam, u kiik le chaambaloʼ, pʼáat naatsʼ utiaʼal u yilik baʼax kun úuchul.

Ka bin ichkíil u hija Faraón teʼ ríooʼ tu yilaj le canastaoʼ. Ichil le canastaoʼ tu yilaj juntúul chaambal táan u yokʼol, ka tu chʼaʼaj óotsilil tiʼ.  Míriameʼ tu yaʼalajtiʼ: «¿A kʼáat wa ka xiʼiken in tʼan juntúul tiʼ le koʼolel hebreaʼob utiaʼal ka u kanáanttech le chaambaloʼ?». Letiʼeʼ tu yaʼalajtiʼ maʼalob, ka túun bin Míriam u tʼan u maama le chaambaloʼ. U hija Faraóneʼ tu yaʼalaj tiʼ Jokébed: «Bis le chaambaloʼ ka a kanáantten, jeʼel in boʼotiktecheʼ».

Le ka nojochchaj le chan xiʼipaloʼ Jokébedeʼ tu bisaj tiʼ u hija Faraón. Letiʼeʼ tu tsʼáaj u kʼaabaʼt Moisés, ka tu nojochkíintaj bey juntúul u hijoeʼ. Moiséseʼ nojochchaj bey juntúul príncipeeʼ, le oʼolal jeʼel u páajtal u yantal kaʼach tiʼ jeʼel baʼaxak u kʼáateʼ. Chéen baʼaleʼ Moiséseʼ maʼ tu tuʼubsaj Jéeobaiʼ. Letiʼeʼ u yojel maʼ egipcioiʼ, baʼaxeʼ israelita, le oʼolal tu yéeyaj u meyajtik Jéeoba.

Le yaan 40 años tiʼ Moisésoʼ tu chʼaʼtuklaj u yáantik u yéet kaajaloʼob. Junpʼéel kʼiineʼ tu yilaj bix u sen jaʼatsʼal juntúul israelita tumen juntúul egipcio. Moisés túuneʼ tu nóokjatsʼtaj le egipciooʼ ka tu kíimsaj. Ka tsʼoʼokeʼ tu taʼakaj teʼ arenaoʼ. Le ka tu yojéeltaj Faraón baʼax úucheʼ taakchaj u kíimsik Moisés, chéen baʼaleʼ letiʼeʼ púutsʼeʼ ka bin tu luʼumil Madián. Le tiaʼan teʼeloʼ kanáantaʼab tumen Jéeoba.