Tiʼ junpʼéel kaaj ku kʼaabaʼtik Uzeʼ kuxlaj juntúul máak ku adorartik Dios. U kʼaabaʼeʼ Job, letiʼeʼ jach ayikʼal yéetel yaʼab u paalal. Tsʼoʼoleʼ jach uts, jach ku yáantik le óotsiloʼoboʼ, le koʼoleloʼob kimen u yíichamoʼoboʼ yéetel le paalal minaʼan u papáʼoboʼ. Tumen juntúul máak jach utseʼ jeʼel k-tuklik maʼ kun antal problemas tiʼeʼ, ¿máasaʼ?

Jobeʼ maʼ u yojel wa táan u yilaʼal bix u kuxtal tumen le Kʼaasilbaʼaloʼ. Jéeobaeʼ tu yaʼalaj tiʼ Satanás: «¿Máasaʼ tsʼoʼok a wilik bix u kuxtal Job? Minaʼan uláakʼ máak jeʼex letiʼ teʼ luʼumoʼ. Letiʼeʼ yaantiʼ junpʼéel toj kuxtal yéetel chúukaʼan u yóol u beet baʼax maʼalob». Satanás túuneʼ tu núukajtiʼ: ‹Jaaj, pero yaan baʼax oʼolal ku yuʼubik a tʼaan, tumen jach a kanáantmaj, a bendecirmaj, a yaʼabkúuntmaj u luʼumoʼob yéetel u yaalakʼoʼob. Luʼstiʼ tuláakal, ka a wil wa jeʼel u seguer u adorarkecheʼ›. Jéeobaeʼ tu yaʼalajtiʼ: «Maʼalob, kin pʼatik ta kʼab. Pero ¡bik xiʼikech a kíimse!». ¿Baʼaxten tu chaʼaj Jéeoba u probartaʼal Job? Tumen u yojel maʼ tun xuʼulul u chúukpajal u yóol.

Satanáseʼ tu sen beetaj u muʼyaj Job utiaʼal u probartik. Yáaxeʼ tu beetaj u yoklaʼal u yalakʼ wakaxoʼob yéetel u yalakʼ x-burraʼob tumen le sabeoʼoboʼ. Tu beetaj xan u tóokaʼal tuʼux u kʼalmaj u yalakʼ tamanoʼob yéetel oklaʼab u yalakʼ camelloʼob tumen le caldeoʼoboʼ. Tsʼoʼoleʼ kíimsaʼab le máaxoʼob kanáantik le baʼalcheʼoboʼ. Chéen baʼaleʼ le baʼax beet u maas yaatal u yóoloʼ, letiʼe ka tu yojéeltaj láaj kíim u paalaloʼob le ka lúub tu yokʼoloʼob le naj tuʼux ku janaloʼob kaʼachoʼ. Kex jach lúub u yóoleʼ maʼ xuʼul u adorartik Jéeobaiʼ.

Satanáseʼ u kʼáat kaʼach u beet u maas muʼyaj Job, le oʼolal tu beetaj u yantal junpʼéel yaayaj kʼojaʼanil  tu wíinklil. Yoʼolal leloʼ Jobeʼ jach muʼyajnaji. Kex letiʼ maʼ u yojel kaʼach baʼaxten táan u yúuchultiʼ tuláakal leloʼ, seguernaj u adorartik Jéeoba. Ka tu yilaj Dios le baʼax tu beetoʼ jach kiʼimakchaj u yóol.

Ka tsʼoʼokeʼ, Satanáseʼ tu túuxtaj óoxtúul máakoʼob utiaʼal u probarkoʼob Job. Letiʼobeʼ tu yaʼaloʼobtiʼ: ‹Techeʼ taak a taʼakik le kʼeban ta beetoʼ, le oʼolal táan a castigartaʼal tumen Dios›. Jobeʼ tu núukajtiʼob: ‹Teneʼ maʼ in beet mix baʼal kʼaasiʼ›. Job túuneʼ káaj u tuklikeʼ u culpa Dios tuláakal le baʼax táan u yúuchultiʼoʼ, tu yaʼaleʼ maʼ maʼalob le baʼax ku beetaʼaltiʼ tumen Diosoʼ.

Juntúul táankelem xiʼipal ku kʼaabaʼtik Eliúeʼ táan kaʼach u yuʼubik le baʼax ku tsikbaltikoʼoboʼ. Chéen baʼaleʼ, tu yuʼubaj kʼaʼabéet u tʼaaneʼ, ka tu yaʼalaj: ‹Tuláakal le baʼax ka waʼalikeʼexoʼ maʼ jaajiʼ. Jéeobaeʼ jach táaj nojoch u poder, le oʼolal maʼ tu páajtal k-naʼatik baʼax ku beetik. Letiʼeʼ junpuliʼ maʼ tu beetik baʼax maʼ maʼalobiʼ, letiʼeʼ ku yilik tuláakal yéetel ku yáantik le máaxoʼob yaantiʼob problemaʼoboʼ›.

Jéeobaeʼ tʼaanaj xan yéetel Job. Tu yaʼalajtiʼ: ‹¿Tuʼux yanech ka tin beetaj le kaʼan yéetel le luʼumoʼ? ¿Baʼaxten ka waʼalik maʼ maʼalob baʼax kin beetkiʼ? Techeʼ chéen ka jáan tʼaan, maʼ a wojel baʼaxten ku yúuchul wa baʼaxiʼ›. Job túuneʼ tu tsʼáaj cuenta maʼ maʼalob bix u tuukuliʼ, ka tu yaʼalaj: ‹Perdonarten yoʼolal le baʼax tin waʼaloʼ. Teneʼ in wuʼuymaj u yúuchul tʼaan kaʼach tiʼ teech, pero beoraaʼ jach tu jaajil in kʼaj óolech yéetel in wojel tuláakal baʼal ku páajtal a beetik›.

Ka tsʼoʼok u probartaʼaleʼ, Jéeobaeʼ tu tsʼakaj Job yéetel tu tsʼáajtiʼ maas yaʼab baʼaloʼob ke le yaantiʼ kaʼachoʼ. Jobeʼ yaʼab años kuxlaj ich kiʼimak óolal. Jéeobaeʼ tu bendecirtaj tumen tu yuʼubaj tʼaan kex yaan kʼiin maʼ chéen chʼaʼabil úuchik u beetkiʼ. Techeʼ ¿yaan wa a adorartik Jéeoba kex jeʼel baʼalak ka a aktáant jeʼex tu beetil Jobeʼ?