Ka tsʼoʼok le Búulkabaloʼ u paalal Noéeʼ anchaj yaʼab u paalaloʼob. Jeʼex binik u yaʼabtal le familiaʼoboʼ bey xan úuchik u binoʼob kajtal jejeláas tuʼuxoʼob jeʼel bix tu yaʼalaj Jéeoba ka u beetoʼoboʼ.

Chéen baʼaleʼ yaan familiaʼobeʼ maʼ tu beetoʼob le baʼax tu yaʼalaj Jéeobaoʼ. Letiʼobeʼ tu yaʼaloʼob: «¡Koʼoteneʼex! Koʼox beetik junpʼéel kaaj utiaʼal k-antaliʼ, koʼox beetik xan junpʼéel torre ka kʼuchuk tak teʼ kaʼanoʼ utiaʼal beyoʼ maʼ u tuʼubsaʼal k-kʼaabaʼ».

 Jéeobaeʼ maʼ maʼalob tu yilil le baʼax táan kaʼach u beetkoʼoboʼ, le oʼolal maʼ tu chaʼaj u tsʼoʼoksikoʼob le torreoʼ. ¿A wojel wa baʼax tu beetaj utiaʼal maʼ u tsʼoʼoksikoʼob? Chéen ka tu jáan beetaj u tʼaanoʼob ich jejeláas idiomaʼob. Tumen maʼ tu naʼatkubaʼobeʼ xuʼul u beetkoʼob le torreoʼ. Le máakoʼoboʼ tu tsʼáajoʼob u kʼaabaʼt Babel le kaajoʼ, lelaʼ u kʼáat u yaʼaleʼ «xaʼakʼbesaj». Letiʼobeʼ lukʼoʼob teʼeloʼ ka binoʼob kajtal jejeláas tuʼuxoʼob teʼ Luʼumaʼ. Chéen baʼaleʼ maʼ xuʼul u beetkoʼob baʼaloʼob kʼaastak teʼ tuʼuxoʼob binoʼob kajtaloʼ. A tuklikeʼ, teʼ kʼiinoʼob jeʼeloʼ, ¿láayliʼ wa yaan máax u yaabiltmaj Jéeobaeʼ? Lelaʼ yaan k-ilik teʼ tuláakʼ xookoʼ.