Tu kaajil Cesareaeʼ kajaʼan kaʼach juntúul u nojchil u soldadoiloʼob Roma ku kʼaabaʼtik Cornelio. Kex maʼ judíoeʼ jach ku respetartaʼal tumen le judíoʼoboʼ. Letiʼeʼ juntúul máak jach uts tumen suuk kaʼach u yáantik le óotsiloʼoboʼ. Cornelioeʼ u kʼubmaj u yóol kaʼach tiʼ Jéeoba yéetel mantatsʼ ku orar tiʼ. Juntéenjeakeʼ chíikpaj juntúul ángel tiʼeʼ ka tu yaʼalajtiʼ: ‹Dioseʼ tsʼoʼok u yuʼubik a oraciónoʼob. Túuxt a j-meyajoʼob tu kaajil Jope, teʼ tuʼux yaan Pedrooʼ utiaʼal u yaʼalikoʼobtiʼ ka taalak u yilech›. Cornelioeʼ tu séebaʼanil tu túuxtaj óoxtúul máakoʼob tu kaajil Jope, le kaajaʼ tiaʼan kex 12 leguas (óoliʼ 50 kilómetros) teʼ noojoloʼ.

Le táan u bin ilbil tu kaajil Jopeoʼ, Pedroeʼ anchaj junpʼéel náay tiʼ. Tu yilaj jujuntúul baʼalcheʼob maʼ tu páajtal u jaantik kaʼach le judíoʼoboʼ. Tsʼoʼoleʼ tu yuʼubaj u yaʼalaʼaltiʼ ka u jaante. Pedroeʼ maʼ tu yóotiʼ, ka tu yaʼalaj: «Mix juntéen in jaant baʼaloʼob maʼ limpioʼob tu táan Diosiʼ». Ka tu yuʼubaj u kaʼa aʼalaʼaltiʼ: «Xuʼuluk a waʼalik maʼ limpio yanil le baʼaloʼob tsʼoʼok u limpiokíintaʼal tumen Diosoʼ». Aʼalaʼab xan tiʼ: ‹Táan a kaxtaʼal tumen óoxtúul máakoʼob, xeen tu yéeteloʼob›. Pedroeʼ bin u yiloʼobeʼ ka tu kʼáatajtiʼob baʼax taal u beetoʼob. Letiʼobeʼ tu yaʼaloʼobtiʼ: ‹Cornelio túuxtoʼon, juntúul u nojchil u soldadoiloʼob Roma. U kʼáat ka xiʼikech t-éetel tu yotoch yaan Cesareaoʼ›.  Pedroeʼ tu yaʼalaj tiʼ le máakoʼob ka pʼáatkoʼob tu yotoch teʼ áakʼaboʼ. Ka sáaschajeʼ bin tu yéeteloʼob tak Cesarea. Jujuntúul sukuʼunoʼob kajaʼanoʼob Jopeeʼ binoʼob xan tu yéeteloʼob.

Ka tu yilaj Cornelio tsʼoʼok u kʼuchul Pedroeʼ, xolaj tu táan. Chéen baʼaleʼ Pedroeʼ tu yaʼalajtiʼ: ‹Líiʼkech, tumen teneʼ láayliʼ chéen juntúul wíinikeneʼ. Techeʼ jach a wojleʼ juntúul judíoeʼ maʼ uts ka u muchʼuba wa ka u natsʼuba yiknal juntúul máak yaanal u razaiʼ. Beora túunaʼ kin kʼáatiktech baʼax oʼolal ta túuxtaj tʼanbilen›.

Cornelioeʼ tu yaʼalaj tiʼ Pedro: ‹Walajki cuatro díasaʼ táan kaʼach in orar tiʼ Dios. Teʼ súutukoʼ chíikpaj juntúul ángeleʼ ka tu yaʼalajten ka in túuxt tʼanbilech. Beet uts a kaʼansiktoʼon le baʼaxoʼob ku yaʼalik Jéeobaoʼ›. Pedro túuneʼ tu yaʼalajtiʼ: ‹Beoraaʼ tsʼoʼok in kʼuchul in naʼateʼ Dioseʼ mix máak jelaʼan u paktik, baʼaxeʼ ku kʼamik jeʼel máaxak ku beetik baʼax maʼalobeʼ›. Pedroeʼ tu kaʼansajtiʼob yaʼab baʼaloʼob yoʼolal Jesús. Bey túunoʼ Cornelio yéetel le uláakʼ máaxoʼob yanoʼob tu yotochoʼ tu kʼamoʼob espíritu santoeʼ ka okjaʼanajoʼob.