Jesúseʼ tu muchʼuba yéetel u discípuloʼob Galileaeʼ, ka tu kʼubéentajtiʼob le meyajaʼ: «Xeeneʼex tu yiknal u kajnáaliloʼob tuláakal le kaajoʼoboʼ ka a kaʼanseʼexoʼob utiaʼal ka taalakoʼob tin paach. Tsʼáaʼex u yokjaʼob». Ka tsʼoʼokeʼ tu yaʼalajtiʼob: ‹Maʼ u tuʼubulteʼexeʼ teneʼ mantatsʼ kin antal ta wéeteleʼex›.

Ka tsʼoʼok u kaʼa kuxtaleʼ, Jesúseʼ 40 días tu chíikbesuba tiʼ u cientosil u discípuloʼob yanoʼob Galilea yéetel Jerusalén. Tu kaʼansajtiʼob baʼaloʼob jach kʼaʼanaʼantak yéetel tu beetaj yaʼab milagroʼob. Tu muchʼuba xan u tsʼook juntéen yéetel u apóstoloʼob tu Montañail le Olivoʼoboʼ. Jesúseʼ tsʼoʼok kaʼach u yaʼaliktiʼob: «Maʼ a lukʼleʼex Jerusalén, baʼaxeʼ seguernak a páaʼtkeʼex le baʼax u yaʼalmaj le Taata u tsʼáaikoʼ».

Le apóstoloʼoboʼ maʼ tu jach naʼatoʼob le baʼax tu yaʼalaj Jesúsoʼ, le oʼolal tu kʼáatoʼob tiʼ: ‹¿Yaan wa a beetik a reyil tu luʼumil Israel teʼ kʼiinoʼobaʼ?›. Jesúseʼ tu yaʼalajtiʼob: ‹Jéeobaeʼ maʼ u kʼáat ka in beet in reyil beoraaʼ. Chéen baʼaleʼ, maʼ tun xáantaleʼ yaan a kʼamkeʼex espíritu santo. Lelaʼ yaan u tsʼáaikteʼex páajtalil utiaʼal a tʼaaneʼex tin woʼolal. Le oʼolal xeeneʼex kʼaʼaytaj tu kaajil Jerusalén, Judea, Samaria tak tu maas náachil le Luʼumaʼ›.

Jesús túuneʼ bin teʼ kaʼanoʼ ka piʼix tumen junpʼéel múuyal. U discípuloʼobeʼ táan kaʼach u paktikoʼob u bin teʼ kaʼanoʼ tak ka saʼati.

Le discípuloʼoboʼ lukʼoʼob tu Montañail le Olivoʼoboʼ ka binoʼob Jerusalén. Teʼeloʼ suuk u muchʼkubaʼob orar tiʼ junpʼéel cuarto yaan tu kaʼanlil junpʼéel naj. Táan kaʼach u páaʼtik u yaʼalaʼaltiʼob tumen Jesús baʼax uláakʼ unaj u beetkoʼob.