Juaneʼ u hijo kaʼach Zacarías yéetel Elisabet. Jéeobaeʼ tu tsʼáaj u beet u profetail yéetel tu yaʼalajtiʼ ka u kʼaʼayt jach taʼaytak u taal le Mesíasoʼ. Chéen baʼaleʼ tu lugar u kʼaʼaytaj teʼ kaajoʼob wa teʼ sinagogaʼoboʼ ku bin kʼaʼaytaj kaʼach teʼ desiertooʼ. Yaʼab tiʼ u kajnáaliloʼob Jerusalén yéetel Judeaeʼ ku bin kaʼach u yuʼuboʼob baʼax ku yaʼalik Juan. Letiʼeʼ ku yaʼalik kaʼach tiʼob unaj u xuʼulul u beetkoʼob baʼaloʼob kʼaastak utiaʼal u lúubloʼob utsil tiʼ Dios, beyoʼ yaan u kiʼimakkúuntkoʼob u yóol. Le oʼolaleʼ yaʼab máak arrepentirnaji, ka tsʼaʼab u yokjaʼob tumen Juan teʼ río Jordánoʼ.

Juaneʼ kuxlaj chéen yéetel junpʼíit baʼaloʼob. U nookʼeʼ beetaʼan kaʼach yéetel u tsoʼotsel camello, ku jaantik kaʼach sáakʼ yéetel u kaabil kʼáax. Le oʼolal le máakoʼoboʼ jach taak kaʼach u yojéeltikoʼob máaxiʼ. Kex ku creerkubaʼob le fariseoʼob yéetel le saduceoʼoboʼ bin u yiloʼob xan. Juaneʼ tu yaʼalajtiʼob: ‹Kʼaʼabéet a kʼexik a tuukuleʼex yéetel a arrepentireʼex. Teʼexeʼ ka waʼalikeʼexeʼ u paalaleʼex Abrahán, chéen baʼaleʼ leloʼ maʼ u kʼáat u yaʼal wa u paalaleʼex Diosiʼ›.

Yaʼab máakeʼ ku kʼáatik kaʼach tiʼ Juan: ‹¿Baʼax unaj k-beetik utiaʼal k-lúubul utsil tiʼ Dios?›. Letiʼeʼ tu yaʼalajtiʼob: «Le máax yaan kaʼapʼéel nookʼ tiʼeʼ u tsʼáa junpʼéel tiʼ le máax minaʼan tiʼoʼ». ¿A wojel wa baʼaxten tu yaʼalajtiʼob leloʼ? Tumen Juaneʼ u kʼáat ka u yojéeltoʼobeʼ utiaʼal u lúubloʼob utsil tiʼ Dioseʼ kʼaʼabéet u yaabiltikoʼob u maasil.

Juaneʼ tu yaʼalaj tiʼ le máaxoʼob cobrartik impuestooʼ: «Maʼ a cobrarkeʼex u maasil impuesto tiʼ le bajux unaj u boʼotaʼaloʼ». Tiʼ le soldadoʼoboʼ tu yaʼalaj: ‹Maʼ a tokikeʼex u taakʼin mix máak yéetel maʼ a tuuseʼex›.

 Le sacerdoteʼob yéetel le levitaʼoboʼ bin xan u yiloʼob Juan ka tu yaʼaloʼobtiʼ: ‹Tuláakal máak taak u yojéeltik máaxechiʼ›. Juaneʼ tu yaʼalajtiʼob: ‹Teen le máax ku yawat teʼ desierto utiaʼal u natsʼik le máakoʼob yiknal Jéeoba jeʼex tu yaʼalil profeta Isaíasoʼ›.

Le máakoʼoboʼ uts tu tʼaan u yuʼubikoʼob kaʼach baʼax ku kaʼansik Juan, yaʼab tiʼ letiʼobeʼ taakchaj u yojéeltikoʼob wa letiʼ le Mesíasoʼ. Juan túuneʼ tu yaʼalajtiʼob: «Le uláakʼ máax kun taaloʼ maas yaan u páajtalil ke teen, maʼ in náajaltmaj mix tak in chintal in wachʼ u táabil u xaanabiʼ. Teneʼ tin tsʼáaj a wokjaʼex yéetel jaʼ, chéen baʼaleʼ letiʼeʼ yaan u tsʼáaik a wokjaʼex yéetel espíritu santo».