Jéeoba Dios beetmiloʼon. Letiʼ beet tuláakal baʼal, le baʼaxoʼob ku yilaʼaloʼoboʼ yéetel le maʼ tu yilaʼaloʼoboʼ. Táanil tiʼ u beetik le baʼaxoʼob ku páajtal k-ilkoʼ, tu beetaj yaʼab ángeloʼob. ¿A wojel wa bix le ángeloʼoboʼ? Letiʼobeʼ chíikaʼanoʼob tiʼ Jéeoba, chéen baʼaleʼ maʼ tu páajtal k-ilkoʼob jeʼex maʼ tu páajtal k-ilik Jéeobaeʼ. Le yáax ángel beetaʼab tumen Jéeobaoʼ letiʼe máax áant u beet le estrellaʼoboʼ yéetel le u maasil baʼaloʼoboʼ. Junpʼéel tiʼ leloʼobaʼ letiʼe jatsʼuts Luʼum tuʼux kajaʼanoʼonaʼ.

Ka tsʼoʼokeʼ Jéeobaeʼ tu beetaj tuláakal baʼax kʼaʼabéet way Luʼumeʼ utiaʼal u páajtal u kajtal baʼalcheʼ yéetel wíinikiʼ. Tu beetaj u juul u sáasilil le Kʼiin yóokʼol le Luʼumaʼ. Tu beetaj xan montañaʼob, kʼáaʼnáab yéetel ríoʼob.

¿Baʼax túun úuch ka tsʼoʼoki? Jéeobaeʼ tu yaʼalaj: ‹Nikaʼaj in beet xíiwoʼob, paakʼaloʼob yéetel cheʼob›. Bey túunoʼ le luʼumoʼ joʼopʼ u tsʼáaik u yich, jeʼex u jejeláasil frutaʼob, verduraʼob yéetel looloʼob. Jéeoba xaneʼ tu beetaj u jejeláas claseil baʼalcheʼob, jeʼex le ku xikʼnaloʼoboʼ, le kuxaʼanoʼob ich jaʼoʼ yéetel le ku jíiltikubaʼoboʼ. Tu beetaj mejen baʼalcheʼob jeʼex le tʼuʼuloʼ bey xan nukuch baʼalcheʼob jeʼex le elefanteoʼ. ¿Máakalmáak tiʼ le baʼalcheʼob maas uts ta wichoʼ?

Ka tsʼoʼokeʼ Jéeobaeʼ tu yaʼalaj tiʼ le yáax ángeloʼ: ‹Koʼox beetik máak›. Le máakoʼoboʼ maʼ beetaʼaboʼob jeʼex le baʼalcheʼoboʼ. Letiʼobeʼ yaan u béeytal u kanik  u  beetoʼob  túumben  baʼaloʼob,  u tʼaanoʼob, u cheʼejoʼob yéetel u  oraroʼob tiʼ Dios. Letiʼob kun kanáantik le Luʼum yéetel le baʼalcheʼoboʼ. ¿A kʼáat wa a wojéelt máax le yáax máak beetaʼaboʼ? Koʼox ilik.