Wa ka xokik le Biblia yéetel juntúul u j-jaajkunaj Jéeobaeʼ, maʼ xaaneʼ ka wilik a líiʼskaba yéetel le jaats ken a xokeʼexoʼ. Utiaʼal xan k-maas jóoʼsik u yutsil le muchʼtáambaloʼoboʼ, maʼalob xan ka k-líiʼsba beyoʼ. Utiaʼal leloʼ maʼalob ka a seguert junpʼéel programa.

Ilawil baʼax kʼiin yéetel tuʼux kan xakʼalxook. ¿Tiʼ baʼax súutukil jeʼel a maas tuukul tiʼ le baʼax ka xokikoʼ? ¿Ken sáaschajak táanil tiʼ u káajal a meyaj, tu chíinil Kʼiin wa de áakʼab le ken chilak wenel le paalaloʼoboʼ? Tak wa maʼ jach yaʼab tiempo yaantecheʼ, ilawil bukaʼaj tiempo ken a jóoʼs utiaʼal a xakʼalxook yéetel ilawil maʼ u kʼatkuba mix baʼaliʼ. Kaxt junpʼéel lugar maʼalob yéetel utiaʼal maʼ u náayal a wóoleʼ, tup a radio, a televisión yéetel a teléfono. U payalchiʼ máak táanil tiʼ u káajal u xakʼalxookeʼ, jeʼel xan u yáantaj utiaʼal maʼ u jach tuukul tiʼ u chiʼichnakiloʼob yéetel ka tuukulnak tiʼ le baʼax ku yaʼalik u Tʼaan Diosoʼ (Filiposiloʼob 4:6, 7).

Marcart chéen le tʼaanoʼob maas kʼaʼanaʼantakoʼ yéetel ilawil a táakpajliʼ. Táanileʼ tukult bey baʼax ken a kaneʼ. Tuukulnen tiʼ u kʼaabaʼ le xookoʼ yéetel ilawil bix cada junpʼéel tiʼ le joʼol xookoʼoboʼ, yaan baʼax u yil yéetel le baʼax ken a kanoʼ, ilawil le fotoʼoboʼ yéetel xok le kʼáatchiʼob utiaʼal u kʼaʼajsaʼal le baʼaxoʼob maas kʼaʼanaʼantak tiʼ le xookoʼ. Ken tsʼoʼokkeʼ, xok cada xóotʼol yéetel kaxt u núukil. Kaxt teʼ Biblia le tekstoʼob maʼ tsʼíibtaʼanoʼob teʼ xookoʼ yéetel ilawil bix u tsʼáaikoʼob muukʼ tiʼ le baʼax ku kaʼansaʼaloʼ (Baʼaxoʼob 17:11). Ken a kaxt u núukil le kʼáatchiʼoboʼ, marcart chéen le tʼaanoʼob maas jeʼel u yáantkechoʼob a kʼaʼajs u núukiloʼ. Beyoʼ ken yanakech teʼ muchʼtáambaloʼ, wa a kʼáateʼ jeʼel u páajtal a líiʼsik a kʼab utiaʼal a núukik le kʼáatchiʼob sin ke a xokikoʼ, baʼaleʼ ilawil maʼ u jach chowaktal.

Jeʼex u bin a xakʼalxoktik le jejeláas baʼaxoʼob ku kaʼansaʼal teʼ muchʼtáambaloʼob cada semanaoʼ, yaan u maas yaʼabtal le baʼaxoʼob ken a kan teʼ Bibliaoʼ (Mateo 13:51, 52).

• ¿Baʼax jeʼel a beetik utiaʼal a líiʼskaba yéetel le baʼaxoʼob kun xakʼaltbil teʼ muchʼtáambaloʼoboʼ?

• ¿Baʼax jeʼel u yáantkech utiaʼal ka a núuk junpʼéel kʼáatchiʼ teʼ muchʼtáambaloʼoboʼ?