CHÉEN ocho jaʼaboʼob yaan tiʼ Josías ka káaj u gobernartik le kaʼapʼéel chʼiʼibal tiʼ Israeloʼ. Jach chichan utiaʼal u beetuba reyil. Le oʼolal tu káajbaleʼ letiʼe nukuch máakoʼob áantik u gobernart le kaajoʼ.

Siete jaʼaboʼob káajak u gobernar Josías ka joʼopʼ u kaxtik u nuʼuktaj Jéeoba. Tu beetaj baʼaloʼob maʼalobtak jeʼex tu beetaj rey David, Josafat yéetel Ezequíaseʼ. Tu táankelmileʼ tu beetaj upʼéel baʼal yéetel x-maʼ saajkilil.

Yaʼab israelitaʼobeʼ tsʼoʼok u yúuchtal joʼopʼok u beetkoʼob baʼaloʼob kʼaastak. Ku adorarkoʼob maʼ jaajil diosoʼobiʼ. Josías túun yéetel u j-meyajoʼobeʼ káaj u xuʼulskoʼob tiʼ le maʼ jaajil adoracionoʼ. Lelaʼ maʼ chéen chʼaʼabil úuchik u beetkoʼobiʼ tumen yaʼab máakoʼob adorartik le maʼ jaajil diosoʼoboʼ. Teʼ dibujoaʼ jeʼel u páajtal a wilik Josías yéetel u j-meyajoʼob táan u yoyopʼ jatsʼkoʼob le beetbil diosoʼoboʼ.

Ka tsʼoʼokeʼ Josíaseʼ tiaʼalaj tiʼ óoxtúul máakoʼob ka u yutskíintoʼob u templo Jéeoba. Kʼáataʼab taakʼin tiʼe kaaj utiaʼal u boʼotaʼal le meyaj ku beetaʼal tumen le máakoʼoboʼ. Le táan u meyajoʼob teʼ templooʼ, le nojoch j-kʼiin Hilcíasoʼ tu kaxtaj upʼéel baʼal jach kʼaʼanan, u libroi u ley Jéeoba tsʼíibtaʼan tumen Moisés.

Ka bisaʼab le libro tiʼ Josíasoʼ, tiaʼalaj ka xoʼokok u yuʼube. Ka túun tu yilaj Josíaseʼ, le kaajoʼ maʼ táan u beetik baʼax kiaʼalik Jéeobaiʼ. Jach okʼom óolchajeʼ, ka tu jáatpaytaj u nookʼ jeʼex a wilik teʼ dibujoaʼ. Tiaʼalaj: Jéeobaeʼ kʼuuxchajaʼan t-éetel, tumen k-taataʼobeʼ maʼ tu beetoʼob baʼax kiaʼalik le libroaʼ.

Josíaseʼ tiaʼalaj tiʼe nojoch j-kʼiin Hilcíasoʼ ka u kʼáatpéeks baʼax kun beetbiltiʼob tumen Jéeoba. Hilcías túuneʼ bin u kʼáat tiʼ Hulda, le x-profeetaoʼ. Hulda túuneʼ tiaʼalaj ka aʼalaʼak tiʼ Josías le baʼax tsʼoʼok u yaʼalik Jéeobaaʼ: Jerusalén yéetel tuláakal le kaajoʼ yaan u castigartaʼaloʼob tumen tsʼoʼok u binoʼob tu paach maʼ jaajil diosoʼobiʼ yéetel tsʼoʼok u sen beetkoʼob baʼaloʼob kʼaastak teʼ luʼumaʼ. Baʼaleʼ, tumen tech tsʼoʼok a beetik baʼax maʼalobeʼ Josías, lelaʼ maʼ tu kʼiiniloʼob a kuxtal ken úuchkiʼ.