¿TÁAN wa wilik baʼax tsʼoʼok u yúuchul? Le xiʼipalaʼ tsʼoʼok u tokik le chan taman tiʼe osooʼ. Le osooʼ tu bisaj kaʼach le chan taman utiaʼal u jaantoʼ. Baʼaleʼ le xiʼipalaʼ bin tu paach, maʼ tu chaʼaj u jaantaʼal le chan taman tumen le osooʼ. ¡Le ka óotaʼab xan jaantbil le xiʼipal tumen le osooʼ ka túun tu kíimsaj! Uláakʼ utéeneʼ le xiʼipalaʼ tu tokaj xan utúul taman tiʼ utúul león. ¿Bix a wilik le xiʼipal beet le baʼaloʼobaʼ, máasaʼ jach maʼ saajkiʼ? ¿A wojel wa bix u kʼaabaʼ?

U kʼaabaʼeʼ David. Letiʼeʼ Belén kajaʼan kaʼachi. U abueloeʼ Obed, u paal Rut yéetel Booz. ¿Kʼajaʼanoʼob wa tech? U taata Davideʼ Isaí (Jesé). Davideʼ letiʼ kanáantik u tamanoʼob u taata. Diez jaʼaboʼob yéeyaʼak u beet u reyil Saúl tumen Jéeoba ka síij David.

Kʼuch u kʼiinil u yaʼalik Jéeoba tiʼ Samuel beyaʼ: Chʼaʼa aceiteiʼ ka xiʼikech Belén tu yotoch Isaí. Tsʼoʼok in yéeyik utúul tiʼ u paalal utiaʼal u beetuba reyil. Le ka kʼuch Samuel ka tu yilaj Eliab, u nojchil u paal Isaieʼ, ka tu jáan tuklaj: In waʼalikeʼ letiʼe yéeyaʼanaʼ. Baʼaleʼ Jéeobaeʼ tiaʼalajtiʼ: Maʼ paktik u kaʼanlil yéetel u kiʼichkelmil. Tumen maʼ letiʼ in yéeymaj utiaʼal u beet u reyiliʼ.

Isaí túuneʼ tu tʼanaj Abinadab, u paal, ka tu bisaj yiknal Samuel. Baʼaleʼ Samueleʼ tiaʼalaj: Maʼ letiʼeʼ yéeyaʼan xan tumen Jéeobaaʼ. Ku tsʼoʼokleʼ Jeseiʼ tu taasaj xan Sama, uláakʼ utúul u paal. Baʼaleʼ Samueleʼ tu kaʼa aʼalaj: Láayliʼ maʼ yéeyaʼan xaneʼ. Isaieʼ siete u paalal tu taasaj tu táan Samuel, baʼaleʼ Jéeobaeʼ mix utúul tu yéeyiʼ. Samuel túuneʼ tu kʼáataj tiʼ Isaí: ¿Chéen wa le jaaj a paalaloʼobaʼ?

Isaí túuneʼ tu núukaj: Pʼaatal u maas chichnil. Baʼaleʼ bijaʼan kanan taman. Le ka taasaʼab Davideʼ, jach kiʼichkelem ilaʼabik tumen Samuel. Jéeoba túuneʼ tiaʼalaj: Letiʼe in yéeymaʼ, yal aceite tu pool. Samuel túuneʼ bey tu beetiloʼ. Ka máan kʼiineʼ David kʼuch u beetubaj u reyil Israel.