ILAWIL tuʼux kulukbal Jesús. Tu kaʼanlil upʼéel u witsil Galilea kulukbal u kaʼans le máakoʼobaʼ. Le yanoʼob naatsʼ tiʼoʼ u j-kaambaloʼob. Jesuseʼ tsʼoʼok u yéeyik doce u túulul utiaʼal u beet u apóstoliloʼobiʼ. Le apóstoloʼoboʼ letiʼe j-kaambaloʼob jach máanoʼob yéetel Jesusoʼ. ¿A wojel wa bix u kʼaabaʼob?

Yáaxeʼ, Simón Pedro yéetel Andrés u yíitsʼin. Uláakʼ sukuʼuntsiloʼobeʼ, Santiago yéetel Juan. Uláakʼ utúul apóstoleʼ Santiago xan u kʼaabaʼ, uláakʼ utúuleʼ Simón xan u kʼaabaʼ. Kaʼatúuleʼ Judas u kʼaabaʼob. Utúuleʼ Judas Iscariote, uláakʼ utúuleʼ Judas Tadeo. Tiaʼan xan Felipe yéetel Natanaeliʼ (ku kʼaabaʼtik xan Bartolomeo), yéetel Mateo bey xan Tomás.

Ka jóokʼ Jesús tu kaajil Samariaeʼ, káaj u kʼaʼaytik: U reinoi le kaʼanoʼoboʼ tsʼoʼok u náatsʼal. ¿A wojel wa baʼax le reinooʼ? Upʼéel gobierno ku taal tiʼ Dios. U reyileʼ, Jesús. Yaan u gobernar teʼ kaʼanoʼ yéetel yaan u taasik jeetsʼelil yóokʼol le Luʼumaʼ. U reino Dioseʼ yaan u sutik paraísoi le Luʼumaʼ.

Teʼelaʼ Jesuseʼ táan u kaʼansik le reino tiʼe máakoʼoboʼ. Tu tsolaj xan tiʼob: Teʼexeʼ, kʼaʼabéet a payalchiʼex beyaʼ: K-Taata yanech teʼ kaʼanoʼ, kiliʼichkúuntaʼak a kʼaabaʼ. Taalak a reino. Beetaʼak baʼax a kʼáat teʼ Luʼumaʼ, jeʼex u beetaʼal teʼ kaʼanoʼ. Yaʼabeʼ u kʼaj óolmiloʼob le payalchiʼaʼ, U payalchiʼ Yuumtsil. Uláakʼoʼobeʼ Padrenuestro u kʼaj óolmiloʼob. ¿Jeʼel wa u páajtal a láaj aʼalik le payalchiʼaʼ?

Jesuseʼ táan xan u kaʼansik tiʼe máakoʼob bix kʼaʼabéet u paklan biskubaʼoboʼ. Tiaʼalaj: Beet tiʼ uláakʼ máakoʼob le baʼax a kʼáat ka beetaʼaktechoʼ. ¿Maʼ wa utstatʼaan ka u maʼalob bisuba máak ta wéeteliʼ? Le beetikeʼ kʼaʼabéet k-maʼalob bisikba yéetel tuláakal máak. ¡Bukaʼaj jaʼtsil ken u maʼalob bisuba tuláakal máak teʼ Luʼum sutaʼan paraísoiloʼ! ¿Máasaʼ?