LE X-CHʼÚUPAL jach kiʼichpamaʼ María u kʼaabaʼ. X-israelita, tiʼ kajaʼan kaʼach Nazareteʼ. Dioseʼ u yojel Maríaeʼ utúul x-chʼúupal jach jatsʼuts u modos. Le beetik tu túuxtaj ángel Gabriel bisik upʼéel kʼuben tʼaan tiʼ. ¿A wojel wa baʼax tiaʼalaj Gabriel tiʼ María? Koʼox ilik.

Ka kʼuch Gabrieleʼ tiaʼalaj: Maʼalob jaʼatskab kʼiin x-chʼúupal, jach kʼambeʼenech tu táan Dios. Jéeobaeʼ tiaʼan ta wéeteleʼ. Maríaeʼ mix utéen kaʼach u yilmaj le máakaʼ. Letiʼeʼ péeknaj u yóol, tumen maʼ tu naʼataj baʼax tiaʼalaj le ángeloʼ. Baʼaleʼ tu séebaʼanil kiʼimakkúuntaʼab u yóol tumen Gabriel.

Gabrieleʼ tiaʼalajtiʼ: María, maʼ sajaktal tumen tsʼoʼok a lúubul utsil tiʼ Jéeoba. Le oʼolaleʼ yaan u beetik u yúuchul tech upʼéel baʼal mix utéen ilaʼak. Maʼ tu xáantaleʼ yaan u yantal utúul a chaambal; Jesús ken a tsʼáa u kʼaabaʼ.

Gabrieleʼ tiaʼalaj xan tiʼ: Le chan xiʼipalaʼ yaan u beetik u nojchil, yéetel yaan u yaʼalaʼaltiʼ u Paal le Sen Kaʼanal Diosoʼ. Yaan u beetaʼal reyil tumen Jéeoba jeʼex Davideʼ. ¡Baʼaleʼ Jesuseʼ yaan u beetkuba reyil utiaʼal mantatsʼ, yéetel u reinoeʼ mix bikʼin kun xuʼulul tiʼ!

Maríaeʼ tu kʼáataj: ¿Bix túun kun úuchul lelaʼ? ¿Jeʼel wa u páajtal u yantal in chaambal kex maʼ tsʼokaʼan in beel yéetel maʼ kajaʼanen yéetel xiibeʼeʼ?

Gabrieleʼ tiaʼalajtiʼ: U páajtalil Dios kun taal ta wóokʼol. Le beetik le chan xiʼipaloʼ yaan u yaʼalaʼaltiʼ u Paal Dios. Kʼaʼajaktecheʼ Elisabet, a láakʼtsilileʼ, ku yaʼalaʼal kaʼacheʼ jach chʼijaʼan utiaʼal ka yanak u paalal. Baʼaleʼ maʼ tu xáantaleʼ yaan u yantal utúul u chaambal. Jeʼex a wilik túunoʼ, mix baʼal talam yiknal Dios.

María túuneʼ tiaʼalaj: ¡U x-palitsilen Jéeoba! Úuchukten jeʼex tsʼoʼok a waʼalikoʼ. Ka tsʼoʼokeʼ ka bin le ángeloʼ.

María túuneʼ tu séebaʼanil bin u xíimbalt Elisabet. Ka tu yuʼubaj Elisabet u tʼaan Maríaeʼ, le chaambal yaan tu jobneloʼ síitʼnaj yéetel kiʼimak óolal. Elisabet túuneʼ chuʼup yéetel kiliʼich muukʼeʼ ka tiaʼalaj tiʼ María: Teech le sen kiʼikiʼtʼantaʼan ichil u maasil koʼoleloʼoboʼ. Maríaeʼ óoxpʼéel mes tu máansaj yiknal Elisabet, ka tsʼoʼokeʼ ka suunaj Nazaret.

Maʼ kun xáantaleʼ Maríaeʼ yaan u tsʼoʼokol u beel yéetel José. Baʼaleʼ ka tu yojéeltaj José taʼaytak u yantal u chaambal Maríaeʼ, ka tu tukleʼ maʼ maʼalob ka tsʼoʼokok u beel yéeteliʼ. Baʼaleʼ u ángel Dioseʼ tiaʼalajtiʼ: Maʼ chʼaʼik saajkil u tsʼoʼokol a beel yéetel María. Tumen le chaambal kun síijloʼ u Paal Dios. María yéetel José túuneʼ tsʼoʼok u beeloʼob, ka túun tu páaʼtoʼob u kʼuchul u kʼiinil u síijil Jesús.