KA TSʼOʼOK u jóoʼsaʼaloʼob Adán yéetel Eva teʼ jardín tiʼ Edenoʼ yanchaj yaʼab talmil tiʼob. Yanchaj u xachkubaʼob meyaj utiaʼal u kaxtik yoʼochoʼob. Teʼ tuʼux kajlajoʼoboʼ maʼ tu yiloʼob u nuuktal jatsʼuts cheʼob ku yichankiloʼobiʼ, chéen u jejeláasil kʼiʼixoʼob yéetel xíiwoʼob. Úuchtiʼob tuláakal leloʼ tumen maʼ tu uʼuyajtʼantoʼob Diosiʼ yéetel xuʼul u biskubaʼob tu yéetel.

Baʼaleʼ, u maas yajileʼ Adán yéetel Evaeʼ káaj u kíimiloʼob. Kʼaʼajaktecheʼ Dioseʼ tiaʼalajtiʼob wa ku jaantkoʼob u yich le cheʼoʼ, yaan u kíimloʼob. Bey túunoʼ, le kʼiin ka tu jaantoʼobeʼ káaj u kíimloʼob. ¡Tu yeʼesoʼob jach j-maʼ naʼatoʼob ikil maʼ tu yuʼubiloʼob u tʼaan Diosiʼ!

Tsʼokaʼaniliʼ u jóoʼsaʼaloʼob Adán yéetel Eva teʼ jardín tiʼ Edén ka síij tuláakal u paalaloʼoboʼ. Leloʼ u kʼáat u yaʼaleʼ u paalaloʼobeʼ láayliʼ yaan xan u chʼíijloʼob yéetel u kíimloʼobeʼ.

Wa Adán yéetel Eva ka u beetoʼob baʼax u kʼáat Jéeobaeʼ, tsʼoʼok u kuxtaloʼob kaʼach mantatsʼ teʼ Luʼum ich kiʼimak óolal yéetel u paalaloʼobeʼ. Mix máak kaʼach kun chʼíijil, kun kʼojaʼantal yéetel kun kíimil.

Dioseʼ u kʼáat ka kuxlak le máakoʼob utiaʼal mantatsʼ ich kiʼimak óolaloʼ, le oʼolaleʼ kiaʼalik yaan u kʼuchul u kʼiinil u yúuchul beyoʼ. Maʼ chéen kun jatsʼutstal tuláakal le Luʼumaʼ, yaan xan u yantal toj óolal tiʼ tuláakal máak. Tuláakloʼob yaan u maʼalob biskubaʼob tu baatsiloʼob bey xan yéetel Dios.

Baʼaleʼ, Evaeʼ xuʼul u biskuba yéetel Dios. Le oʼolaleʼ, talamchaj u síijsik u paalal tumen yanchaj kʼiʼinamil tiʼ. Le úuchik u beetkuba x-maʼ uʼuyaj tʼaaniloʼ tu taasaj yaʼab kʼiʼinamil tiʼ, ¿máasaʼ?

Adán yéetel Evaeʼ yanchaj yaʼab u xibil paalal bey xan u x-chʼupul paalal. Le ka síij u yáax paaloʼobeʼ tu tsʼáajoʼob u kʼaabaʼt Caín. Tiʼ u kaʼatúul paaloʼ tu tsʼáajoʼob u kʼaabaʼt Abel. ¿A wojel wa baʼax úuchtiʼob?