1-3. 1) ¿Baʼaxten utúul maamatsileʼ ku yilik ka pʼáatak limpio u chan hijo? 2) ¿Baʼaxten u kʼáat Jéeoba ka pʼáatak limpio máaxoʼob meyajtik, yéetel baʼax unaj u péekskoʼon k-pʼáatal limpioi tiʼ tuláakal baʼal?

 TÁANIL tiʼ u bin utúul chan paal wa tuʼuxeʼ, le maamatsiloʼ ku yilik wa tsʼoʼok u yichkíil yéetel wa limpio u nookʼ. ¿Baʼaxten bey u beetik le maamatsiloʼ? Tumen u yojleʼ wa mantatsʼ limpio u chan hijoeʼ maʼ kun jach kʼojaʼantal. Tsʼoʼoleʼ, u yojel xan jeʼel u yaʼalaʼal baʼal tiʼ wa ka ilaʼak sucio u chan hijoeʼ.

² Dioseʼ u kʼáat xan ka pʼáatak limpio le máaxoʼob meyajtikoʼ. Le Bibliaoʼ ku yaʼalikeʼ Jéeobaeʼ yaan u yeʼesikuba limpio «yéetel le máax limpiooʼ» (Salmo 18:26). a ¿Baʼaxten jach u  kʼáat Dios ka pʼáatkoʼon limpioi tu táan? Yáaxeʼ tumen u yaabilmoʼon yéetel u yojel utiaʼal k-utsil. U kaʼapʼéeleʼ, tumen le bix ken u yiloʼon le máakoʼoboʼ jeʼel u beetik u tʼaanoʼob maʼalob tu yoʼolaleʼ. Toʼoneʼ maʼ k-kʼáat ka úuchuk tʼaan kʼaas tu yoʼolal u kʼaabaʼiʼ, baʼaxeʼ k-kʼáat ka nojbeʼenkúuntaʼak. Le oʼolaleʼ unaj k-pʼáatal limpio tu táan Dios (Ezequiel 36:22; 1 Pedro 2:12).

³ ¿Baʼax unaj u péekskoʼon k-pʼáatal limpioi tu táan Dios? Yáaxeʼ letiʼe k-ojéeltik u yaabilmaj le máaxoʼob limpiotakoʼoboʼ. Tsʼoʼoleʼ, tumen k-yaabilmaj Jéeobaeʼ k-kʼáat nojbeʼenkúunt yéetel tuláakal baʼax k-beetik. Tu tsʼookeʼ k-kʼáat xan eʼes mantatsʼ k-yaabilmaj. Le oʼolaleʼ koʼox ilik baʼaxten unaj k-limpiokíintikba, baʼaxoʼob táakaʼaniʼ yéetel baʼaxten unaj k-beetik mantatsʼ. Leloʼ yaan u yáantkoʼon k-il wa yaan tiʼ baʼax unaj k-pʼáatal limpioi.

4, 5. 1) ¿Baʼaxten jach kʼaʼabéet k-ilik k-pʼáatal limpioi? 2) Le baʼaxoʼob u beetmaj Jéeobaoʼ, ¿bix u yeʼesik letiʼeʼ u kʼáat ka pʼáatak limpioi tuláakal baʼal?

⁴ Jéeobaeʼ jejeláas bix u kaʼansikoʼon. Upʼéel bix u béetkeʼ letiʼe ken u yeʼestoʼon letiʼeʼ limpio. Le Bibliaoʼ ku yaʼalik: «Ilawileʼex a béeytaleʼex jeʼel bix [Dioseʼ]» (Efesoiloʼob 5:1). Yoʼolal le baʼax ku yaʼalik le Bibliaaʼ, ¿baʼaxten jach kʼaʼabéet k-pʼáatal limpioi? Tumen táan k-adorartik utúul Dios limpio yéetel santo (Levítico 11:44, 45).

⁵ Tiʼ tuláakal le baʼaxoʼob u beetmaj Jéeobaoʼ, k-ilikeʼ jach limpio (Romailoʼob 1:20). Utiaʼal k-ilik lelaʼ, koʼox tʼaan tiʼ le Luʼum tuʼux kajaʼanoʼonaʼ. Ka tu beetaj le Luʼumaʼ tu tsʼáaj tuláakal baʼax kʼaʼabéet utiaʼal ka pʼáatak limpioi. Le ka tu tsʼáaj le iikʼ yéetel le jaʼoʼ, tu beetaj upʼéel bix jeʼel u pʼáatloʼob limpioʼob tu juunaloʼobeʼ, tsʼoʼoleʼ tu beetaj xan mejen ikʼeloʼob ku luʼskoʼob le baʼaxoʼob jeʼel u beetik u kʼastal le Luʼumaʼ. Le mejen ikʼeloʼobaʼ jach maʼalob u beetik u meyajoʼob, le oʼolaleʼ tak tiʼ le cientificoʼob ku meyajoʼob utiaʼal u limpiarkoʼob le kʼáaʼnáab ken weʼekek petróleo wa uláakʼ baʼaloʼob tumen  máaxoʼob kʼasaʼanoʼoboʼ. Jeʼex túun k-ilkaʼ Jéeoba, le Máax beet le Luʼumaʼ jach u kʼáat ka pʼáatak limpio tuláakal baʼal (Jeremías 10:12). ¿Máasaʼ bey xan unaj k-beetikoʼ?

6, 7. ¿Bix tu yeʼesil le Ley u kʼáat kaʼach Jéeoba ka pʼáatak limpio le máaxoʼob adorartikoʼ?

⁶ ¿Yaan wa uláakʼ baʼax oʼolal k-ilik k-pʼáatal limpioi? Yaan. Tumen Jéeobaeʼ u kʼáat ka pʼáatkoʼon beyoʼ. Le Ley tu tsʼáaj tiʼ le israelitaʼoboʼ ku yeʼesikeʼ utiaʼal u kʼamik le adoración ku tsʼaʼabaltiʼoʼ kʼaʼabéet limpio máak. Le oʼolaleʼ, u nojchil le sacerdoteʼoboʼ kʼaʼabéet kaʼach u yichkíil kaʼatéen utiaʼal u páajtal u yokol u kʼub le kíimsbil baʼalcheʼoboʼ (Levítico 16:4, 23, 24). Le Leyoʼ ku yaʼalik xaneʼ le sacerdoteʼoboʼ unaj u pʼoʼik u kʼaboʼob yéetel u yookoʼob cada ken ookkoʼob u kʼuboʼob utúul baʼalcheʼ (Éxodo 30:17-21; 2 Crónicas 4:6). Ku yaʼalik xan setenta baʼaxoʼob jeʼel u beetik u pʼáatal maʼ limpio utúul israelitaeʼ, yéetel wa maʼ tu beetik le baʼax ku yaʼalik le leyoʼobaʼ jeʼel tak u kíimsaʼal kaʼacheʼ. Tsʼoʼoleʼ wa utúul israelita ku pʼáatal kaʼach maʼ limpioeʼ maʼ tu páajtal u adorartik Dios (Levítico 15:31). Le Ley xanoʼ ku yaʼalikeʼ tuláakal máax ku pʼáatal maʼ limpioeʼ unaj u beetik kaʼach jujumpʼéel baʼaloʼob jeʼex u yichkíil wa u pʼoʼik u nookʼ; wa maʼ tu beetkeʼ jeʼel kaʼach u «xotʼkʼíintaʼal ichil u kaajal[eʼ]» (Números 19:17-20).

⁷ Kex le Ley tsʼaʼab tiʼ Moisés maʼatech u meyajtoʼon bejlaʼeʼ, ku yáantkoʼon k-naʼat bix u tuukul Dios. Tsʼoʼoleʼ ku yeʼesikeʼ utiaʼal Jéeobaeʼ u pʼáatal limpio máakeʼ upʼéel baʼal jach kʼaʼabéet utiaʼal u adorartaʼal, yéetel le bix u tuukulaʼ maʼ kʼexpajkiʼ (Malaquías 3:6). Jeʼex úuchileʼ Jéeobaeʼ chéen ku kʼamik le adoración «kiliʼich yéetel minaʼan u kʼasaʼanil tu táan[oʼ]» (Santiago 1:27). Bey túunoʼ jach maʼalob ka k-il bix jeʼel k-pʼáatal limpio tu táan Dioseʼ.

8. ¿Tiʼ baʼaxoʼob u kʼáat Jéeoba ka pʼatkoʼon limpioi?

⁸ Le Bibliaoʼ maʼatech u tʼaan chéen tiʼ bix unaj u pʼatik limpio  máak u wíinklil. Baʼaxeʼ ku yeʼesikeʼ utiaʼal ka pʼáatkoʼon limpio tu táan Dioseʼ mantatsʼ unaj k-beetik baʼaloʼob maʼalobtak tu táan. Jéeobaeʼ u kʼáat ka pʼáatkoʼon limpioi espiritualmente, ka k-limpiokíint k-kuxtal, k-tuukul yéetel k-wíinklil. Koʼox ilik baʼax táakaʼan tiʼ cada upʼéel tiʼ le baʼaloʼobaʼ.

9, 10. ¿Baʼax u kʼáat u yaʼal u pʼáatal máak limpio espiritualmente, yéetel tiʼ baʼaxoʼob maʼatech k-táakpajal?

⁹ Unaj k-pʼáatal limpio espiritualmente. Lelaʼ u kʼáat u yaʼal maʼ u yantal mix baʼal u yil máak yéetel le maʼ jaajil religionoʼ. Bey úuchik u yeʼesik le baʼax úuch tiʼ le israelitaʼob bisaʼaboʼob tu kaajil Babiloniaoʼ. Utiaʼal maʼ u náachtaloʼob tiʼ Dioseʼ, ken suunakoʼob tu kaajil Jerusaleneʼ, unaj kaʼach u beetkoʼob le baʼax aʼalaʼabtiʼobaʼ: «Jóokʼeneʼex tu luʼumil Babilonia, maʼ a machikeʼex mix baʼal [kʼaschajaʼan]» (Isaías 52:11). Le israelitaʼoboʼ yaan kaʼach u suutoʼob utiaʼal u chʼaʼajoʼolkoʼob u adorarkoʼob Jéeoba. Le adoración unaj u tsʼáaikoʼob tiʼ Jéeobaoʼ kʼaʼabéet limpio yéetel maʼ unaj u beetkoʼob mix upʼíit tiʼ le baʼax ku beetik le babilonioʼoboʼ.

¹⁰ Teʼ kʼiinoʼob xanaʼ unaj k-kanáantikba utiaʼal maʼ u yantal mix baʼal k-il yéetel le maʼ jaajil religionoʼoboʼ (1 Corintoiloʼob 10:21). Le baʼaxoʼob ku kaʼansikoʼobaʼ jach kʼiʼitpajaʼanoʼob, le oʼolal unaj k-kanáantikba. Yaʼab tuʼuxoʼobeʼ, ikil u kaʼansaʼal baʼaloʼob maʼ jaajtak jeʼex le u yaʼalaʼal yaan baʼax ku pʼáatal kuxaʼan tiʼ máak ken kíimikeʼ, ku beetik u kʼiimbesaʼal yaʼab baʼaloʼob (Eclesiastés 9:5, 6, 10). Baʼaleʼ, toʼoneʼ maʼ k-kʼáat táakpajal tiʼ mix upʼíit tiʼ le baʼaloʼob suuk u kʼiimbesaʼaloʼobaʼ. b Maʼ unaj k-chaʼik tiʼ mix máak ka u beet k-bin tu contra le baʼaxoʼob ku yaʼalik Dios unaj k-beetik utiaʼal k-adorartikoʼ (Beetaʼanoʼob [Hechos] 5:29).

11. ¿Baʼax unaj k-beetik utiaʼal u yantaltoʼon upʼéel kuxtal limpio tu táan Dios, yéetel baʼaxten jach kʼaʼabéet k-beetik?

¹¹ Upʼéel kuxtal limpio tu táan Dios. Utiaʼal u yantaltoʼon upʼéel kuxtal beyaʼ, unaj k-kanáantik maʼ k-lúubul tiʼ baʼaloʼob  kʼaastak yéetel subtsiltak; lelaʼ upʼéel baʼal jach kʼaʼabéet k-beetik utiaʼal k-eʼesik jach k-yaabilmaj Dios (Efesoiloʼob 5:5). Jeʼex ken k-il teʼ tuláakʼ xookoʼ, le máaxoʼob meyajtik Diosoʼ unaj u «púutsʼ[loʼob], [...] tiʼ le núupkʼebanoʼ». Le Bibliaoʼ ku yaʼalikeʼ le máaxoʼob ku lúubloʼob tiʼ lelaʼ, wa maʼ tu arrepentiroʼobeʼ «maʼ bíin utiaʼaltoʼob u [reino] Jajal Diosiʼ» (1 Corintoiloʼob 6:9, 10, 18). Utiaʼal Jéeobaeʼ le máaxoʼob maʼ tu arrepentiroʼobaʼ maʼ limpioʼobiʼ yéetel ku yaʼalikeʼ «yaan u binoʼob ichil u kʼáakʼil azufre. Lelaʼ letiʼ le kaʼatéen kíimiloʼ» (Apocalipsis 21:8).

12, 13. Le baʼaxoʼob k-tuklikoʼ, ¿baʼax jeʼel u péekskoʼon k-beeteʼ, yéetel baʼax jeʼel u yáantkoʼon utiaʼal ka pʼáatak limpio k-tuukuleʼ?

¹² U pʼáatal limpioi k-tuukul. Tumen tuláakal le baʼax k-beetik ku taal tiʼ baʼax k-tuklikeʼ, wa k-chaʼik ka yanak t-tuukul yéetel t-puksiʼikʼal baʼaloʼob kʼaastakeʼ yaan u péekskoʼon k-beet baʼaloʼob kʼaastak (Mateo 5:28; 15:18-20). Baʼaleʼ wa ku yantal t-tuukul baʼaloʼob maʼalobtakeʼ, jeʼel u péekskoʼon k-bis upʼéel kuxtal limpioeʼ (Filiposiloʼob 4:8). Baʼaleʼ ¿baʼax jeʼel u yáantkoʼon utiaʼal ka pʼáatak limpio k-tuukul? Yáaxeʼ, maʼ k-táakpajal tiʼ náaysaj óoloʼob jeʼel u beetik k-tuukul tiʼ baʼax kʼaaseʼ. c U kaʼapʼéeleʼ, k-xokik mantatsʼ le Biblia utiaʼal ka tuukulnakoʼon tiʼ baʼaloʼob maʼalobtakoʼ (Salmo 19:8, 9).

¹³ Jeʼex tsʼoʼok k-ilkoʼ, utiaʼal maʼ u xuʼulul k-eʼesik yaabilaj tiʼ Dioseʼ, kʼaʼabéet limpioʼon espiritualmente, u yantaltoʼon upʼéel kuxtal limpio tu táan Dios yéetel u pʼáatal limpio k-tuukul. Le óoxpʼéel baʼaloʼobaʼ ku tsoʼolol tiʼ uláakʼ xookoʼob teʼ libroaʼ. Baʼaleʼ beoraeʼ koʼox tʼaan tiʼ uláakʼ clasei limpieza: U limpiokíintik u wíinklil máak.

14. Tsol baʼaxten maʼ chéen tu juunal máak unaj u chʼaʼatuklik wa yaan u pʼáatal limpioi.

¹⁴ Unaj k-ilik u pʼáatal limpioi k-wíinklil bey xan k-otoch. Yaan máaxoʼobeʼ ku tuklikoʼobeʼ, lelaʼ upʼéel baʼax unaj u chʼaʼatuklik máak tu juunal. Baʼaleʼ máax meyajtik Dioseʼ maʼ unaj  u tuukul beyaʼ. Jeʼex t-ilaj tu káajbal le xookaʼ, Jéeobaeʼ maʼ chéen ku yaʼaliktoʼon ka k-il u pʼáatal limpio k-wíinklil yéetel k-nookʼ utiaʼal maʼ k-kʼojaʼantaliʼ, ku kʼáatiktoʼon ka k-beete tumen jeʼel u beetik u yúuchul tʼaan maʼalob tiʼ letiʼeʼ. Kʼaʼajaktoʼon le chan paal t-aʼalaj tu káajbaloʼ: wa mantatsʼ sucio u yilaʼaleʼ, ¿máasaʼ jeʼel u yaʼalaʼal baʼal tiʼ u taataʼobeʼ? Wa toʼon xan maʼatech k-pʼáatal limpioeʼ, ¿máasaʼ jeʼel k-beetik u yúuchul tʼaan kʼaas yoʼolal Jéeoba yéetel yoʼolal le baʼax k-kʼaʼaytikoʼ? Le oʼolaleʼ maʼ u tuʼubultoʼon le baʼax ku yaʼalik le Bibliaaʼ: «Maʼ táan k-tsʼáaik mix tuʼux u tʼóochpajal mix máak, utiaʼal maʼ u pʼaʼastaʼal k-meyaj. Baʼaleʼ k-kʼáat k-eʼes tiʼ jeʼel baʼalakeʼ toʼoneʼ u palitsiloʼon Jajal Dios» (2 Corintoiloʼob 6:3, 4). Koʼox ilik tiʼ baʼaxoʼob unaj k-pʼáatal limpioi.

15, 16. ¿Baʼaxoʼob unaj u beetik máak utiaʼal ka pʼáatak limpio, yéetel bix unaj u yilaʼal le nookʼ k-tsʼáaikoʼ?

¹⁵ U pʼatik limpio u wíinklil máak. Kex óotsiloʼon yéetel kex  jeʼel tuʼuxak kajaʼanoʼoneʼ, unaj k-ilik ichkíil sáamsamal. Óoliʼ tuláakal tuʼux yaan jaʼ yéetel jabón utiaʼal u pʼáatal limpio máak. U pʼáatal limpio máakeʼ u kʼáat u yaʼal u pʼoʼik u kʼab táanil tiʼ u janal, táanil tiʼ u beetik janal, ken tsʼoʼokok u bin baño wa ken tsʼoʼokok u choʼobol le mejen paalaloʼoboʼ. K-beetik beyaʼ ku yáantaj utiaʼal maʼ u yantal kʼojaʼaniloʼob jeʼel u kíimsik máak jeʼex le waachʼliloʼ. Wa minaʼan bacín tu yotoch máakeʼ kʼaʼabéet u mukik u baʼal u choochel, jeʼex aʼalaʼab tiʼ le israelitaʼob ka u beetoʼoboʼ (Deuteronomio 23:12, 13).

¹⁶ Unaj xan k-pʼoʼik k-nookʼ mantatsʼ. Kex maʼ túumben yéetel kex maʼ de modaeʼ, mantatsʼ unaj u yilaʼal limpio (1 Timoteo 2:9, 10). Tiʼ bix k-vestirtikba tiʼ tuláakal súutukil yéetel jeʼel tuʼuxak ka yanakoʼoneʼ, k-kʼáat eʼes «u jatsʼutsil u kaʼansajoʼob Jajal Dios» (Tito 2:10).

17. ¿Baʼaxten unaj u pʼáatal limpio k-otoch bey xan le uláakʼ baʼaxoʼob yantoʼonoʼ?

¹⁷ K-otoch yéetel le uláakʼ baʼaxoʼob yantoʼonoʼ. Kex wa nojoch k-otoch bey xan wa maʼeʼ mantatsʼ unaj k-pʼatik limpioi. Wa yaan xan k-cocheeʼ mantatsʼ unaj k-ilik u pʼáatal limpioi, lelaʼ maases wa ku meyajtoʼon utiaʼal k-bin teʼ muchʼtáambaloʼoboʼ wa teʼ kʼaʼaytajoʼ. Tuláakal le baʼaxoʼob yantoʼonoʼ unaj u pʼáatal limpioi. K-beetik beyaʼ ku yáantaj utiaʼal ka úuchuk tʼaan maʼalob tiʼ Jéeoba. Tsʼoʼoleʼ k-kaʼansik xan tiʼ u maasileʼ Jéeoba, le Dios jach limpiooʼ, yaan u «xuʼulsik le máaxoʼob loobiltik le luʼum[aʼ]», yéetel k-kaʼansik tiʼobeʼ u Reinoeʼ yaan u sutik paraísoi le Luʼumaʼ (Apocalipsis 11:18; Lucas 23:43). Le oʼolaleʼ, le bix k-otoch bey xan le uláakʼ baʼaloʼob yantoʼonoʼ unaj u yeʼesik táan k-kanik bix le limpieza ken k-beet teʼ paraísooʼ.

18. ¿Bix unaj k-ilik ka pʼáatak mantatsʼ le u Najil Reinooʼ?

¹⁸ U Najil Reino. Toʼoneʼ k-ilik ka jach pʼáatak limpio le Najil Reinooʼ tumen letiʼe tuʼux k-adorartik Diosoʼ. Lelaʼ ku beetik xan u tʼaan maʼalob le máaxoʼob ku bin u xíimbaltoʼonoʼoboʼ. Utiaʼal u pʼáatal jatsʼutseʼ unaj u limpiartaʼal mantatsʼ yéetel u yutskíintaʼal le baʼaxoʼob ku kʼastal tiʼoʼ. Ken áantajnakoʼon  utiaʼal u beetaʼal lelaʼ k-eʼesik jach kʼaʼanan k-tiaʼal le kúuchil tuʼux k-muchʼtal k-adorart Jéeobaoʼ. K-áantaj utiaʼal «u meeyjul u yutskíinajil» le Najil Reinooʼ, jach ku taasiktoʼon kiʼimak óolal (2 Crónicas 34:10). Láayliʼ bey unaj u beetaʼal yéetel le kúuchiloʼob tuʼux ku beetaʼal le asambleaʼoboʼ.

19. ¿Tiʼ baʼaxoʼob unaj k-náachtal utiaʼal u limpiotal k-wíinklil, yéetel bix u yáantikoʼon le Biblia k-il baʼax ku tuklik Diosoʼ?

¹⁹ ¿Baʼax uláakʼ táakaʼan ichil k-pʼáatal limpioi? Letiʼe k-náachtal tiʼ baʼax jeʼel u kʼaskúuntik k-wíinklileʼ. Yoʼolal lelaʼ toʼoneʼ maʼatech k-tsʼuʼutsʼik chamal, maʼatech k-káaltal yéetel maʼatech u meyajtoʼon tsʼaakoʼob beetaʼanoʼob yéetel droga wa maʼ doctor aʼalmiltoʼoniʼ. U jaajileʼ le Bibliaoʼ maʼatech u tʼaan tiʼ tuláakal le vicioʼoboʼ, baʼaleʼ yaan tekstoʼob ku yáantkoʼon k-naʼat baʼaxten u pʼeek Jéeoba le baʼaloʼobaʼ. Koʼox ilik cinco baʼaxoʼob ku yaʼalik le Biblia jeʼel u yáantkoʼon k-pʼáatal tiʼ u yaakunaj Dios yéetel utiaʼal ka u kʼam le adoración k-tsʼáaiktiʼoʼ.

20, 21. ¿Tiʼ baʼax u kʼáat Jéeoba ka k-náachkuntba, yéetel baʼaxten unaj k-beetik?

²⁰ «In yaabilaj sukuʼuneʼex, leloʼobaʼ letiʼ le tsʼaabil tʼaanoʼob yaan tiʼ toʼonaʼ. Le oʼolaleʼ unaj k-pʼoʼikba tiʼ jeʼel baʼalak ku páajtal u paʼapaʼakʼik k-wíinklil yéetel k-pixaneʼ. Yéetel unaj chúukaʼan k-kʼubikba tiʼ Jajal Dios ichil u sajakilil.» (2 Corintoiloʼob 7:1.) Jeʼex k-ilkoʼ, Jéeobaeʼ u kʼáat ka náachchajkoʼon tiʼ baʼaxoʼob jeʼel u éekʼkuntik «k-wíinklil» yéetel «k-pixan» wa le bix k-tuukuloʼ. Le oʼolaleʼ k-náachtal tiʼ jeʼel baʼalak jeʼel u suuttoʼon vicioileʼ wa jeʼel u kʼaskúuntik k-tuukul yéetel k-wíinklileʼ.

²¹ Le teksto xanoʼ ku yaʼalik baʼaxten «unaj k-pʼoʼikba tiʼ jeʼel baʼalak ku páajtal u paʼapaʼakʼik k-wíinklil[eʼ]». U káajbal 2 Corintoiloʼob 7:1 ku tʼaan tiʼ «le tsʼaabil tʼaanoʼob yaan tiʼ toʼonaʼ». ¿Baʼax le tsʼaabil tʼaanoʼob ku yaʼalaʼal teʼ tekstoaʼ? Letiʼe baʼax u yaʼalmaj Jéeoba u tsʼáaiktoʼon, jeʼex le ku chíikpajal  teʼ 2 Corintoiloʼob 6:17, 18, tuʼux ku yaʼalik: «Teneʼ jeʼel in kʼamikeʼexeʼ. Yéetel bíin in beet in taatai tiʼ teʼex». ¿Máasaʼ jach jatsʼuts le baʼax ku yaʼaliktoʼon Jéeobaaʼ? Letiʼeʼ ku yaʼalik yaan u kanáantikoʼon jeʼex u kanáantik u paalal utúul taatatsileʼ. Baʼaleʼ utiaʼal u beetik lelaʼ, ku yaʼaliktoʼoneʼ «unaj k-pʼoʼikba tiʼ jeʼel baʼalak ku páajtal u paʼapaʼakʼik k-wíinklil yéetel k-pixaneʼ». Mix upʼíit utsil jeʼel k-jóoʼsik wa chéen yoʼolal upʼéel vicio wa upʼéel baʼal kʼaas ku xuʼulul k-bisikba tu yéetel Jéeoba.

22-25. ¿Baʼaxoʼob ku yaʼalik le Biblia jeʼel u yáantkoʼon utiaʼal maʼ k-lúubul tiʼ upʼéel vicioeʼ?

²² «Yaabilt Yuumtsil a Jajal Dios yéetel tuláakal a puksiʼikʼal, yéetel tuláakal a wóol, yéetel tuláakal a naʼat.» (Mateo 22:37.) Jesuseʼ tu yaʼaleʼ lelaʼ letiʼe u maas nojchil tiʼ le mandamientoʼoboʼ (Mateo 22:38). Tsʼoʼoleʼ, chéen Jéeoba unaj k-yaabiltik yéetel tuláakal k-óol. Utiaʼal leloʼ unaj k-náachtal tiʼ jeʼel baʼalak jeʼel u beetik k-séeb kíimil wa u kʼaskúuntik k-tuukuleʼ.

²³ «[Jéeoba] tsʼáaiktoʼon le kuxtaloʼ, le iikʼoʼ, yéetel tuláakal baʼal.» (Beetaʼanoʼob 17:24, 25.) Toʼoneʼ jach k-eʼesik tsiikil yoʼolal le kuxtaloʼ tumen upʼéel baʼal jach jatsʼuts u siimajtoʼon Jéeoba. Le oʼolaleʼ, maʼatech k-oksik t-wíinklil mix baʼal jeʼel u beetik k-kʼojaʼantaleʼ. Wa maʼ k-beetik beyaʼ k-eʼesik maʼ k-yaabilmaj le kuxtal u tsʼaamajtoʼonoʼ (Salmo 36:9).

²⁴ «Yaabilt a láakʼ jeʼel bix ka yaabiltkabaeʼ.» (Mateo 22:39.) Utúul máax yaan upʼéel vicio tiʼeʼ maʼ chéen tiʼ letiʼ ku beetik kʼaasiʼ, baʼaxeʼ tak tiʼ uláakʼ máakoʼob. Jeʼex utúul máak ku tsʼuʼutsʼik chamaleʼ, maʼ chéen tiʼ letiʼ ku beetaʼal kʼaas tumen u buutsʼiliʼ, baʼaxeʼ tak tiʼ le máaxoʼob yaan naatsʼ tiʼoʼ. Le máax beetik beyaʼ maʼatech u yeʼesik yaabilaj tiʼ u yéet wíinikil mix tiʼ Diosiʼ (1 Juan 4:20, 21).

²⁵ «Yana[keʼex] yáanal le jalaʼach wíinikoʼoboʼ yéetel yáanal u noj pooliloʼob kaaj.» (Tito 3:1.) Yaʼab tuʼuxoʼobeʼ ku bin tu contra le ley u usartik máak tsʼaakoʼob yaan droga ichiloʼob wa maʼ doctor recetarmiliʼ. Le oʼolaleʼ k-ilik kanáantikba tiʼ leloʼ (Romailoʼob 13:1).

26. 1) ¿Baʼax unaj k-beetik utiaʼal k-eʼesik tiʼ Jéeoba k-yaabilmaj? 2) ¿Baʼaxten minaʼan uláakʼ baʼax maas maʼalob tiʼ k-bisik upʼéel kuxtal jach limpio tu táan Dios?

 ²⁶ Utiaʼal k-eʼesik k-yaabilmaj Jéeobaeʼ, maʼ chéen unaj k-beetik upʼéel wa kaʼapʼéel tiʼ le baʼaxoʼob ku yaʼaliktoʼon utiaʼal ka pʼáatkoʼon limpio tu táanoʼ, baʼaxeʼ unaj k-beetik tuláakal. Maʼ xaaneʼ jeʼel u talamtaltoʼon k-pʼatik upʼéel vicioeʼ, baʼaleʼ jeʼel u páajtal k-beetikeʼ. d Minaʼan uláakʼ baʼax maas maʼalob tiʼ k-bisik upʼéel kuxtal jach limpio. Unaj k-beetik jeʼex u yaʼaliktoʼon Jéeobaoʼ tumen utiaʼal k-utsil (Isaías 48:17). Tsʼoʼoleʼ, jach ku taasiktoʼon kiʼimak óolal, tumen táan k-beetik u yúuchul tʼaan maʼalob yoʼolal Jéeoba, le máax jach k-yaabiltmoʼ yéetel le máax jach u yaabiltmoʼonoʼ.