¿Ka weʼesik wa chéen Jéeoba unaj u gobernar?
¿Ka weʼesik wa chéen Jéeoba unaj u gobernar?
«Aʼaleʼex tiʼ le máaxoʼob ku [adorarkoʼob] beetbil diosoʼoboʼ: “Le Yuumtsiloʼ letiʼ rey”.» (SALMO 96:10, LSM.)
1, 2. 1) ¿Baʼax úuch tu jaʼabil 29 teʼ yáax siglooʼ? 2) ¿Baʼax tu tsʼáaj cuenta Jesús le ka tsʼoʼok u yokjaʼoʼ?
TU MESIL octubre tiʼ u jaʼabil 29 teʼ yáax siglooʼ úuch upʼéel baʼal jach mix utéen ilaʼak. Le oʼolal ku chʼaʼachiʼitaʼal teʼ kampʼéel Evangelioʼoboʼ. Mateoeʼ ku tsolik le baʼax úuchoʼ: «Le ka tsʼoʼok u tsʼaʼabal u yokjaʼ Jesuseʼ, jóokʼ tiʼ le jaʼoʼ. Ka téek jeʼepaj le kaʼanoʼ, [Juan Bautistaeʼ] ka tu yilaj [...] u yéemel u Kiliʼich [muukʼ] Yuum Jajal Dios bey juntúul palomaeʼ táan u taal tu yóokʼol [Jesús]. Ka jóokʼ teʼ kaʼanoʼ jumpʼéel tʼaan ku yaʼalikeʼ: Lelaʼ in paal in yaabilaj, tu yoʼolal máax jach kiʼimak in wóol» (Mateo 3:16, 17; Marcos 1:9-11; Lucas 3:21, 22; Juan 1:32-34).
2 Le kiliʼich muukʼ éem tu yóokʼol Jesusoʼ, tu yeʼesaj letiʼ le Mesías wa Cristooʼ (Juan 1:33). Bey úuchik u chíikpajal le «chʼiʼibal» aʼalaʼan kun taaloʼ. Tu táan Juan Bautistaeʼ tiʼ yaan kaʼach le máax kun chiʼibil tu tuunkuyoʼ yéetel kun kiimbesik u pool Satanás, le máax jach u pʼekmaj Jéeoba yéetel u tsʼaamuba tu contra u gobernacionoʼ (Génesis 3:15). Desde ka okjaʼanajeʼ, Jesuseʼ tu tsʼáaj cuenta le nojoch meyaj unaj u beetikoʼ: u yeʼesik chéen Jéeoba unaj u gobernar yéetel u tsʼáaik u Reino.
3. ¿Baʼax tu beetaj Jesús utiaʼal tsʼoʼokbesik le nojoch meyaj tsʼaʼabtiʼoʼ yéetel utiaʼal u yeʼesik chéen Jéeoba unaj u gobernar?
3 Utiaʼal u jach tuklik tubeel bix ken u beetil le nojoch meyajoʼ, «Jesus[eʼ] chuup yéetel Kiliʼich [muukʼeʼ] lukʼ tu áalkab jaʼil Jordanoʼ ka bisaʼab x-tokoy luʼum» (Lucas 4:1; Marcos 1:12). Ichil le cuarenta kʼiinoʼob tu máansaj tu juunaloʼ, Jesuseʼ béeychaj u tuukul tiʼ le baʼax tu yaʼalaj Satanás yoʼolal le derecho yaan tiʼ Jéeoba utiaʼal u gobernaroʼ yéetel tiʼ baʼax ken u beet letiʼ utiaʼal u yeʼesik chéen Jéeoba unaj u gobernar. Le baʼax tu yaʼalaj Satanasoʼ yaan yil yéetel tuláakal le angeloʼoboʼ bey xan yéetel máaxoʼob yanoʼob way Luʼumeʼ. Le oʼolaleʼ, jach maʼalob ka k-il tuláakal le baʼaxoʼob tu beetaj Jesusoʼ yéetel ka k-tukult bix jeʼel u páajtal k-eʼesik xan chéen Jéeoba unaj u gobernareʼ (Job 1:6-12; 2:2-6).
Jesuseʼ tu yeʼesaj máax unaj u gobernar
4. ¿Máakalmáak le túumtajil tu beetaj u yeʼesik Jesús máax unaj u gobernaroʼ?
4 Satanaseʼ maʼ chéen tu yilaj le baʼaxoʼob úuchoʼ, baʼaxeʼ tu kaxtaj bix jeʼel u xuʼulsik kaʼach tiʼ «u chʼiʼibal» «le koʼoleloʼ» (Génesis 3:15). Satanaseʼ óoxtéen tu yilaj u túuntik u yóol Jesús utiaʼal ka xuʼuluk u beetik baʼax utstutʼaan u Taata yéetel utiaʼal ka u kaxt kaʼach chéen u yutsil. Teʼ tu yóoxpʼéel túumtajiloʼ, Jesuseʼ tu yeʼesaj máax unaj u gobernar yóokʼol tuláakal baʼal. Ka tsʼoʼok u yeʼesik tiʼ Jesús «tuláakal u nukuch kaajiloʼob yóokʼol kaab, bey xan u ayikʼaliloʼob[eʼ]», le Kʼaasilbaʼaloʼ tu yaʼalajtiʼ: «Tiʼ teech bíin in tsʼáa tuláakal le baʼaloʼobaʼ wa ka xoltal a [adorarten]». Jesuseʼ u yojel kaʼacheʼ u Kʼaasilbaʼal nuʼuktik «tuláakal u nukuch kaajiloʼob yóokʼol kaab». Baʼaleʼ, Jesuseʼ maʼ tu beetaj le baʼax aʼalaʼabtiʼ tumen Satanasoʼ, beyoʼ tu yeʼesaj chéen Jéeoba unaj u gobernar. Jesuseʼ tu yaʼalajtiʼ: «Xeen, Satanás, tumen ku yaʼalik le Kiliʼich Tsʼíiboʼ: [Adorart] Yuumtsil a Jajal Dios, meyajt xan chéen letiʼ» (Mateo 4:8-10).
5. ¿Baʼax talam meyaj yaan kaʼach tiʼ Jesús?
5 Le baʼax maas kʼaʼanan kaʼach utiaʼal Jesuseʼ, letiʼe u yeʼesik chéen Jéeoba unaj u gobernaroʼ yéetel mantatsʼ bey tu yeʼesiloʼ. Letiʼeʼ u yojeleʼ utiaʼal u yeʼesik chéen Dios unaj u gobernareʼ, kʼaʼabéet u chúukpajal u yóol tak ken kíimik, wa jeʼex u yaʼalik le profecíaoʼ tak ken chiʼibik u tuunkuy le «chʼiʼibal» tumen Satanasoʼ (Mateo 16:21; 17:12). U yojel xan unaj u tsʼáaik ojéeltbileʼ le Reinooʼ letiʼeʼ baʼax kun meyaj tiʼ Jéeoba utiaʼal u xuʼulsik tiʼ Satanás yéetel utiaʼal u taasik jeetsʼelil (Mateo 6:9, 10). ¿Bix ken u beetil kaʼach Jesús le talam meyajaʼ?
«Naatsʼ yanil u [reino] Jajal Dios»
6. Jesuseʼ, ¿bix tu yeʼesil le Reinooʼ letiʼe baʼax kun meyaj tiʼ Jéeoba utiaʼal u xuʼulsik tiʼ u meyajoʼob Satanás?
6 Utiaʼal u beetik le meyajaʼ, «bin Galilea táan u tseʼektik u maʼalob péektsil u [reino] Jajal Dios. Ka tu yaʼalaj Jesús: Tsʼoʼok u kʼuchul u kʼiinil. Naatsʼ yanil u [reino] Jajal Dios» (Marcos 1:14,15). Tsʼoʼoleʼ tu yaʼalaj xan: «Kʼaʼabéet in tsʼáaik u maʼalob péektsilil u [reino] Jajal Dios tiʼ uláakʼ kaajoʼob xan, tumen le u biilal túuxtaʼabilaken» (Lucas 4:18-21, 43). Yéetel bey tu beetil xanoʼ: bin tiʼ tuláakal u kaajiloʼob Israel «táan u tseʼek yéetel táan u tsʼáaik kʼaj óoltbil u [reino] Jajal Dios» (Lucas 8:1). Tu beetaj xan yaʼab milagroʼob, jeʼex u tséentik yaʼab máakoʼob, u jetsʼik kʼaʼamkach iikʼoʼob, u tsʼakik kʼojaʼanoʼob yéetel u kaʼa kuxkíintik kimenoʼob. Yéetel le baʼaxoʼob tu beetaʼ, Jesuseʼ tu yeʼesaj Jéeobaeʼ jeʼel u páajtal u luʼsik tuláakal le muʼyajiloʼob anchaj úuchik u kʼebantal Adán yéetel Evaoʼ yéetel beyoʼ u «xuʼulsik u meyajoʼob kʼasibaʼal» (1 Juan 3:8, LTN).
7. ¿Utiaʼal baʼax tu kaʼansaj Jesús u disipuloʼob? ¿Yéetel bix úuchik u bintiʼob?
7 Jesuseʼ tu kaʼansaj xan u disipuloʼob utiaʼal ka u kʼaʼaytoʼob le maʼalob péektsil tiʼ u maasil máakoʼoboʼ. Yáaxeʼ tu kaʼansaj u doce apostoloʼob, yéetel ka «tu túuxtajoʼob utiaʼal u tseʼektoʼob u péektsil u [reino] Jajal Dios» (Lucas 9:1, 2). Ka máan kʼiineʼ tu túuxtaj xan 70 disipuloʼob utiaʼal u kʼaʼaytkoʼob: «U [reino] Jajal Dioseʼ tsʼoʼok u náatsʼal tiʼ teʼex» (Lucas 10:1, 8, 9). Le ka suunajoʼobeʼ tu yaʼaloʼob tiʼ Jesús jach maʼalob úuchik u bintiʼob, letiʼ túuneʼ tu yaʼalajtiʼob: «Tin wilaj u lúubul Satanás bey u léembal cháak ku yéemel kaʼaneʼ» (Lucas 10:17, 18).
8. ¿Baʼax tu yeʼesaj Jesús yéetel le baʼaxoʼob tu beetoʼ?
8 Jesuseʼ tuláakal súutukil tu kʼaʼaytaj le Reinooʼ. Tsʼoʼoleʼ maʼ tu kaxtaj u yantal baʼaloʼob tiʼiʼ. Letiʼeʼ tu yaʼalaj: «Le chʼomakoʼoboʼ yaan u áaktunoʼob, le chʼíichʼoʼoboʼ yaan u kʼuʼob, baʼaleʼ u Paal Máakeʼ minaʼan tuʼux u tʼalkúuntik u pool» (Lucas 9:58; Marcos 6:31; Juan 4:31-34). Tak le taʼaytak u kíimsaʼaloʼ Jesuseʼ tu yaʼalaj tiʼ Poncio Pilato: «Taalen way yóokʼol kaabeʼ utiaʼal in tʼaan tu yoʼolal le jaajoʼ» (Juan 18:37). Yéetel le baʼaxoʼob tu beetoʼ, Jesuseʼ tu yeʼesaj maʼ chéen taal way yóokʼol kaab utiaʼal ka u beetuba utúul jach maʼalob j-kaʼansajiʼ, u beetik milagroʼob wa chéen utiaʼal u tsʼáaik u kuxtal t-oʼolaliʼ. Baʼaxeʼ taal xan utiaʼal u yeʼes chéen Jéeoba unaj u gobernar yéetel yaan u béeykuntik le baʼax u kʼáat yéetel u Reinooʼ (Juan 14:6).
«Tsʼokaʼan tuláakal»
9. ¿Bix chiʼibik tu tuunkuy u «chʼiʼibal» le koʼoleloʼ?
9 Le meyaj tu beetaj Jesús yoʼolal le Reinooʼ maʼ utschajtutʼan Satanasiʼ. Yaʼab utéenel meyajnaj tiʼ le política yéetel le religionoʼob utiaʼal u xuʼulsik tiʼ u «chʼiʼibal» le koʼoleloʼ. Desde ka síij tak ka kíim Jesuseʼ, Satanaseʼ maʼ xuʼul u yilik bix jeʼel u beetik loob tiʼeʼ. Tu mesil abril tiʼ u jaʼabil 33 kʼuch u kʼiinil u chiʼibil tu tuunkuy le chʼiʼibaloʼ (Mateo 20:18, 19; Lucas 18:31-33). Le Evangelioʼoboʼ ku yeʼesikoʼobeʼ tiʼ Satanaseʼ meyajnaj Judas Iscariote, u nuuktakil le j-kʼiinoʼoboʼ, le fariseoʼoboʼ yéetel le romanoʼob utiaʼal ka u beetoʼob u muʼyajtik Jesús upʼéel yaayaj kíimiloʼ (Beetaʼanoʼob [Hechos] 2:22, 23).
10. ¿Baʼax tu béeykuntaj Jesús úuchik u kíimil?
10 ¿Baʼax ku taal t-tuukul ken k-kʼaʼajs le jach yaayaj kíimil anchaj tiʼ Jesusoʼ? Maʼ xaaneʼ ku kʼaʼajsiktoʼon le nojoch yaabilaj tu yeʼesaj úuchik u tsʼáaik u kuxtal yoʼolal kʼeban wíinikoʼoboʼ (Mateo 20:28; Juan 15:13). Maʼ xaaneʼ ku beetik xan k-tuukul tiʼ le nojoch yaabilaj tu yeʼesajtoʼon Jéeoba úuchik u túuxtik u Hijo kíimil t-oʼolaloʼ (Juan 3:16). Maʼ xaan xaneʼ ku beetik k-aʼalik jeʼex tu yaʼalil utúul u soldadoi Romaaʼ: «¡Tu jaajil, le máakaʼ u Paal Jajal Dios!» (Mateo 27:54). Jach jaaj tuláakal le baʼaloʼobaʼ. Baʼaleʼ unaj k-kʼaʼajsik jach u kaʼaj kíimil Jesuseʼ, tu yaʼalaj: «Tsʼokaʼan tuláakal» (Juan 19:30). ¿Baʼax tu yóotaj u yaʼal Jesús yéetel le tʼaanoʼobaʼ? U jaajileʼ yaʼab baʼaloʼob tu beetaj ka taal wal Luʼumeʼ, tsʼoʼoleʼ úuchik u kíimileʼ yaʼab baʼaloʼob xan tu béeykuntaj. Baʼaleʼ ¿máasaʼ maases taal way Luʼum utiaʼal u yeʼesik máax unaj u gobernareʼ? Tsʼoʼoleʼ jeʼex u yaʼalmaj le Bibliaoʼ, ¿máasaʼ le u «chʼiʼibal» le koʼoleloʼ yaan kaʼach u beetaʼal u muʼyaj tumen Satanás utiaʼal u nojbeʼenkúuntik Jéeoba? (Isaías 53:3-7.) Jesuseʼ tu tsʼoʼokbesaj le baʼax túuxtaʼab u beetoʼ. ¡Jach túun maʼalob le baʼax tu beetoʼ!
11. ¿Baʼax ken u beet Jesús utiaʼal u béeykuntik tuláakal baʼax ku yaʼalik u profecíai Génesis 3:15?
11 Úuchik u chúukpajal u yóol u meyajt Jéeobaeʼ, Jesuseʼ kaʼa kuxkíintaʼab bey «juntúul pixan ku tsʼáaik kuxta[leʼ]» (1 Corintoiloʼob 15:45; 1 Pedro 3:18). Jéeobaeʼ tu yaʼalajtiʼ: «Kulen tin x-noʼoj kʼabil, tak le ken in tsʼáa a j-pʼeekoʼob [bey] u kúuchilil a tʼalkúuntik a wookoʼob[eʼ]» (Salmo 110:1). Le «j-pʼeekoʼob» ku yaʼalaʼal teʼ tekstoaʼ Satanás yéetel u «chʼiʼibal». Jesucristo, u Reyil le Reino tsʼaʼabaʼan tumen Jéeobaoʼ, yaan u xuʼulsik tiʼ tuláakal le kʼasaʼan angeloʼoboʼ bey xan tiʼ le máakoʼob kʼasaʼanoʼob yanoʼob way Luʼumeʼ (Apocalipsis 12:7-9; 19:11-16; 20:1-3, 10). Bey túunoʼ yaan u béeykuntik le profecía ku chíikpajal tu libroi Génesis 3:15, yéetel le uláakʼ tʼaanoʼob ku chíikpajal teʼ tu payalchiʼiʼ le Padrenuestrooʼ, tuʼux ku yaʼalik: «Taalak a [reino]. Beetaʼak baʼax a kʼáat way luʼumeʼ jeʼel bix u beetaʼal teʼ kaʼanoʼ» (Mateo 6:10; Filiposiloʼob 2:8-11).
Unaj k-beetik jeʼex tu beetil Jesusoʼ
12, 13. 1) ¿Bix tsʼoʼok u kʼamik yaʼab máakoʼob le maʼalob péektsiloʼ? 2) ¿Tiʼ baʼax kʼáatchiʼiloʼob maʼalob ka tuukulnakoʼon wa k-kʼáat beet jeʼex tu beetil Cristoeʼ?
12 Jeʼex tu yaʼalaj Jesuseʼ, teʼ kʼiinoʼobaʼ táan u kʼaʼaytaʼal tiʼ yaʼab Luʼumiloʼob u maʼalob péektsilil le Reinooʼ (Mateo 24:14). Yoʼolal lelaʼ u millonesi máakoʼobeʼ tsʼoʼok u kʼubik u kuxtaloʼob utiaʼal u meyajtkoʼob Dios. Tuláakloʼobeʼ jach ku kiʼimaktal u yóoloʼob ken u yuʼuboʼob tuláakal le utsiloʼob ken u taas le Reinooʼ. Letiʼobeʼ jach u kʼáatoʼob kuxtal utiaʼal minaʼan u xuul tiʼ upʼéel paraíso tuʼux kun antal jeetsʼelil, le oʼolaleʼ jach utstutʼaan u tsikbaltikoʼob xan tiʼ uláakʼ máakoʼob (Salmo 37:11; 2 Pedro 3:13). Techeʼ, ¿táakaʼanech wa ichil le máaxoʼob ku kʼaʼaytikoʼob le maʼalob péektsiloʼ? Wa beyoʼ, jach maʼalob le baʼax tsʼoʼok a chʼaʼatuklik a beetikoʼ. Baʼaleʼ yaan upʼéel baʼal jach kʼaʼabéet k-tuklik tuláakloʼon.
13 Le apóstol Pedrooʼ tu yaʼalaj: «Cristoeʼ mukʼyajnaj ta woʼolaleʼex, ka tu tsʼáajteʼex jumpʼéel kaʼansaj, utiaʼal ka kuxlakeʼex jeʼel bix kuxlajik letiʼoʼ» (1 Pedro 2:21). ¿Baʼaxten teʼ tekstoaʼ Pedroeʼ tʼaanaj chéen tiʼ le muʼyajil tu aktáantaj Jesusoʼ, baʼaleʼ maʼ tiʼ bix úuchik u kʼaʼaytaj yéetel u kaʼansajoʼ? Tumen le apostoloʼ tu yilaj bix úuchik u muʼyaj Cristo utiaʼal u yeʼesik chéen Jéeoba unaj gobernar yéetel utiaʼal u yeʼesik maʼ jaaj le baʼax tu yaʼalaj Satanasoʼ. Toʼoneʼ, ¿bix jeʼel u páajtal k-eʼesik táan k-beetik jeʼex Jesuseʼ? Unaj k-tuklik lelaʼ: «¿Tak bukaʼaj jeʼel u chúukpajal in wóol utiaʼal in weʼesik chéen Jéeoba unaj u gobernareʼ? ¿Kin weʼesik wa yéetel in kuxtal bey xan yéetel in kʼaʼaytaj jach kʼaʼanan in tiaʼal in weʼesik chéen Jéeoba unaj u gobernar?» (Colosailoʼob 3:17).
14, 15. 1) ¿Baʼax tu beetaj Jesús ka aʼalaʼabtiʼ ka u beet baʼaloʼob ku bin tu contra Jéeoba, yéetel baʼaxten? 2) ¿Baʼax ku kaʼansiktoʼon le baʼax tu beetaj Jesusoʼ? (Aʼal jujumpʼéel baʼaxoʼob yaan teʼ cuadro: «Tu yeʼesoʼob chéen Jéeoba unaj u gobernar».)
14 Sáamsamaleʼ k-aktáantik yaʼab talamiloʼob yéetel yaʼab baʼaloʼob k-chʼaʼatuklik k-beetik. ¿Baʼax unaj k-beetik ken yanaktoʼon le talamiloʼoboʼ? ¿Baʼax jeʼel k-beetik wa k-aktáantik upʼéel baʼal jeʼel u beetik u xuʼulul k-meyajtik Dioseʼ? ¿Kʼajaʼan wa tech baʼax tu yaʼalaj Jesús tiʼ Pedro le ka aʼalaʼabtiʼ maʼ tsa ka muʼyajnakiʼ? Jesuseʼ tu yaʼalajtiʼ: «¡Tselaba tin táan Satanás[!]». «Techeʼ maʼ ta tuukul jeʼel bix u tuukul Jajal Diose.ʼ» (Mateo 16:21-23.) Ken yanaktoʼon u páajtalil u kaʼantal k-xook wa u yantaltoʼon upʼéel meyaj maas maʼalob u náajalileʼ, ¿k-beetik wa jeʼex tu beetil Jesuseʼ? Le ka ilaʼab táan u beetik yaʼab milagroʼobeʼ, «jach u kʼáat [kaʼach] bisbil yéetel muukʼ tumen le máakoʼob utiaʼal beetbil [reyoʼ]», baʼaleʼ Jesuseʼ tu tsʼáaj cuentaeʼ ka púutsʼi (Juan 6:15).
15 ¿Baʼaxten bey tu beetil Jesusoʼ? Tumen tu tsʼáaj cuenta yaan upʼéel baʼal maas kʼaʼanan ke u bin utsil tiʼ. Maas kʼaʼanan u yilik kaʼach u beetik baʼax aʼalaʼantiʼ tumen u Taata yéetel u yeʼesik chéen Jéeoba unaj u gobernar (Mateo 26:50-54). ¿Baʼax ku kaʼansiktoʼon lelaʼ? Ku kaʼansiktoʼoneʼ mantatsʼ unaj k-eʼesik máax unaj u gobernar, tumen wa maʼeʼ jeʼel k-beetik upʼéel baʼal maʼ maʼalob tu táan Jéeobaeʼ. Tsʼoʼoleʼ Satanaseʼ maas séeb jeʼel u beetik k-tsʼíiboltik baʼaloʼob maʼ maʼalobtak jeʼex tu beetil tiʼ Evaoʼ (2 Corintoiloʼob 11:14; 1 Timoteo 2:14).
16. ¿Baʼax unaj k-ilik kaʼansik tiʼ le máakoʼoboʼ?
16 Teʼ kʼaʼaytajoʼ k-eʼesik tiʼ le máakoʼob bix u yaʼalik le Biblia kun utskíintbil le talamiloʼob yantiʼoboʼ, lelaʼ upʼéel bix jeʼel k-beetik u maas taaktal u kanikoʼob u maasil tiʼ le Bibliaoʼ. Baʼaleʼ, baʼax k-ilik ken k-kaʼans uláakʼ máakoʼobeʼ maʼ chéen ka u kʼaj óoltoʼob baʼax ku yaʼalik le Bibliaoʼ wa le baʼaxoʼob ken u taas u Reino Diosoʼ. Baʼaxeʼ k-ilik ka naʼataʼak baʼaxten chéen Jéeoba unaj u gobernar. ¿Jeʼel wa u yóotik u chʼaʼob «u cheʼil u mukʼyaj[oʼob]» yéetel u muʼyajoʼob yoʼolal le Reino jeʼex u páaʼtaʼal tiʼ utúul jaajil cristianoeʼ? (Marcos 8:34, NM.) ¿Jeʼel wa u yóotkoʼob u tsʼáaubaʼob tu tséel u gobernación Dios utiaʼal u yeʼeskoʼob Satanaseʼ chéen tuus ku beetik? (Proverbios 27:11.) ¡Jach túun jatsʼuts le meyaj yantoʼonaʼ! Maʼ chéen jeʼel u páajtal k-eʼesik chéen Jéeoba unaj u gobernareʼ, baʼaxeʼ jeʼel xan u páajtal k-áantik uláakʼ máakoʼob u beetoʼob beyoʼ (1 Timoteo 4:16).
Le kʼiin tuʼux «bíin tuláakalchajak Jajal Dios tiʼ tuláakal[oʼ]»
17, 18. ¿Baʼax kʼiinil jeʼel u páajtal k-páaʼtik ilik wa k-eʼesik chéen Jéeoba unaj u gobernareʼ?
17 Unaj k-eʼesik mantatsʼ yéetel k-kuxtal bey xan yéetel k-kʼaʼaytaj chéen Jéeoba unaj gobernar. Beyoʼ jeʼel k-páaʼtik u kʼuchul u kʼiinil u kʼubik «Jesús le [reino] tiʼ Jajal Dios[oʼ]». ¿Baʼax kʼiin ken úuchuk? Apóstol Pabloeʼ ku yaʼalik: «Le ken xuʼulsaʼak tumen Cristo tuláakal Yuumtsiloʼob, jalaʼachiloʼob yéetel páajtaliloʼob [...]. Tumen Cristoeʼ yaan u [reinar] tak ken tsʼaʼabak le máaxoʼob pʼekmaileʼ yáanal u yook tumen Jajal Dios; [...] tak Cristo máax u paal Jajal Dioseʼ yaan u yantal yáanal u páajtalil Jajal Dios, máax tsʼáa tuláakal baʼal yáanal u yook letiʼ. Beyoʼ bíin tuláakalchajak Jajal Dios tiʼ tuláakal» (1 Corintoiloʼob 15:24, 25, 28).
18 Le kʼiin tuʼux bíin «tuláakalchajak Jajal Dios tiʼ tuláakal[oʼ]» upʼéel kʼiin tuʼux jach yaan u yantal kiʼimak óolal. Tumen le Reino yaan u béeykuntik tuláakal le baʼax u kʼáat Diosoʼ. Tuláakal le máaxoʼob ku tsʼáaikubaʼob tu contra u gobernación Diosoʼ yaan u xuʼulsaʼaloʼob, yéetel yaan u yantal jeetsʼelil. Tuláakal baʼax u beetmaj Jéeobaeʼ, yaan u kʼayikoʼob le baʼax tu tsʼíibtaj le salmista tu yoʼolaloʼ: «Tsʼaʼex tiʼ Yuumtsileʼ le tsiikil ku najmatikoʼ [...]. Aʼaleʼex tiʼ le máaxoʼob ku [adorarkoʼob] beetbil diosoʼoboʼ: “Le Yuumtsiloʼ letiʼ rey”» (Salmo 96:8, 10, LSM).
¿A wojel wa u núukil?
• ¿Bix tu yeʼesil Jesús utiaʼal letiʼeʼ maas kʼaʼanan u yeʼesik chéen Jéeoba unaj u gobernar?
• ¿Baʼax tu béeykuntaj Jesús yéetel u kʼaʼaytaj bey xan úuchik u kíimil?
• ¿Bix jeʼel u páajtal k-eʼesik chéen Jéeoba unaj u gobernar jeʼex tu beetil Jesuseʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 11]
TU YEʼESOʼOB CHÉEN JÉEOBA UNAJ U GOBERNAR
Jeʼex u yojloʼob yaʼab sukuʼunoʼob kajaʼanoʼob Corea yéetel tiʼ uláakʼ luʼumiloʼobeʼ, ken k-aktáant chʼaʼapachtajiloʼobeʼ, kʼaʼabéet k-naʼatik tubeel baʼaxten k-muʼyaj.
Utúul sukuʼun oksaʼab cárcel tumen u gobiernoi le Unión Sovieticaoʼ, tu yaʼalaj: «Le baʼax tu yáantoʼon utiaʼal u chúukpajal k-óoloʼ letiʼe k-naʼatik tubeel le baʼax tu yaʼalaj Satanás tu jardinil Edenoʼ [...]: le derecho yaan tiʼ Jéeoba utiaʼal u gobernaroʼ. Toʼoneʼ k-ojel kaʼacheʼ, jeʼel u páajtal k-eʼesik chéen Jéeoba unaj u gobernareʼ. [...] [Leloʼ] tu beetaj u muʼukʼantal k-fe yéetel tu yáantoʼon utiaʼal u chúukpajal k-óol».
Uláakʼ utúul sukuʼuneʼ tu yaʼalaj baʼax áantoʼob utiaʼal u chúukpajal u yóoloʼob le ka kʼalaʼaboʼob tiʼ upʼéel kúuchil tuʼux jach beetaʼab u meyajoʼob. Letiʼeʼ tu yaʼalaj: «Jéeobaeʼ mix utéen tu pʼatoʼon. Kex yaʼab talamiloʼob k-máansik kaʼacheʼ, jach muʼukʼaʼan yanik k-fe. Utiaʼal k-paklan líiʼsik k-óoleʼ k-kʼaʼajsik táan k-eʼesik chéen Jéeoba unaj u gobernar».
[U tsolajil le oochel teʼ táan juʼun 8]
Le ka túuntaʼab u yóol Jesús tumen Satanaseʼ, ¿bix tu yeʼesil chéen Jéeoba unaj u gobernar?
[U tsolajil le oochel teʼ táan juʼun 10]
¿Baʼax tu béeykuntaj Jesús úuchik u kíimil?