Tukulte: Brianeʼ ku sajaktal ken u yil u náatsʼal tu yiknal kaʼatúul u yéet xookoʼob. Teʼ semanaaʼ tsʼoʼok kaʼatéen u yaʼalaʼaltiʼ ka u tsʼuʼutsʼ chamal. Beoraaʼ u yóoxtéen kun aʼalbiltiʼaʼ.

Juntúuleʼ ku yaʼaliktiʼ:

Ku yoksik u kʼab ichil u bolsa utiaʼal u jóoʼsik le chamaloʼ yéetel ku tichʼik tiʼ Brian.

Brianeʼ ku yilik le chamal u chʼaʼamoʼ, le oʼolal ku maas sajaktal.

Wa teech Brianeʼ, ¿baʼax jeʼel a beetkeʼ?

A tuklikeʼ, ¿maʼalob wa le baʼax ku beetik u yéet xookoʼob Brianoʼ? ¿Chéen wa tu juunaloʼob ku chʼaʼtuklik baʼax ku beetkoʼob? Maʼ xaaneʼ maʼatech. Maʼ xaaneʼ chéen táan u beetkoʼob le baʼaxoʼob ku yilkoʼob u beetaʼal tumen u maasiloʼ. U kʼáatoʼob lúubul utsil tiʼ u maasil, le oʼolal ku beetkoʼob baʼax ku yaʼalaʼaltiʼob.

Wa ka úuchuktech beyoʼ, ¿yaan wa a beetik baʼax ku yaʼalaʼaltech wa teech kan chʼaʼtuklik baʼax ken a beete?

1. PREPARARTABA

   Le Bibliaoʼ ku yaʼalik: «Máak ku tuukuleʼ ku yilik u taal u chuun yajeʼ ku jechik; j-maʼ tuukuleʼ ku bin tu paach[,] ku tsʼoʼokoleʼ ku muʼyajtik» (Proverbios 22:3).

   U suukileʼ chíikaʼan u yilik máak baʼax kun úuchul. Koʼox aʼalikeʼ le táan u bin a xíimbaloʼ ka wilik yaan junmúuchʼ paalaloʼob táan u tsʼuʼutsʼkoʼob chamal. Teʼ súutukiloʼob beyoʼ maas maʼalob ka tséelkech yaanal bejil.

2. TUKULTE

   Le Bibliaoʼ ku yaʼalik: «Maʼ u xuʼulul u yantalteʼex junpʼéel maʼalob conciencia» (1 Pedro 3:16).

   Tukulte: «¿Bix jeʼel in wuʼuyikinba wa kin beetik le baʼaxoʼob ku beetik u maasiloʼ?». Wa ka beetkeʼ, maʼ xaaneʼ yaan a kʼaʼamal tumen u maasil. Chéen baʼaleʼ, ¿bix ken a wuʼuyilaba ken máanak kʼiin? ¿A kʼáat a xul a beetik baʼax ku yaʼalik Dios chéen utiaʼal a beetik baʼax ku yaʼalik a wéet xookoʼob? (Éxodo 23:2).

3. CHʼAʼTUKULT BAʼAX KEN A BEETE

   Le Bibliaoʼ ku yaʼalik: «Tumen jeʼel baʼaxak ka u pakʼ máakeʼ le xan ken u joche» (Galaciailoʼob 6:7).

   Le baʼaxoʼob k-chʼaʼtuklik k-beetkoʼ toʼon ken k-kʼamik u yutsil wa u kʼaasil. Le Bibliaoʼ ku tʼaan tiʼ José, Job yéetel Jesús, letiʼobeʼ maʼalob le baʼaxoʼob tu chʼaʼtuklaj u beetkoʼoboʼ. Tsʼoʼoleʼ ku tʼaan xan tiʼ Caín, Esaú yéetel Judas, letiʼobeʼ maʼ maʼalob baʼax tu chʼaʼtuklaj u beetkoʼobiʼ. Kux túun teech, ¿baʼax ken a chʼaʼtukult a beetik?

Le Bibliaoʼ ku yaʼalik: «Le máax chúukaʼan u yóol tiʼ baʼaloʼob mejentakeʼ chúukaʼan u yóol xan tiʼ nukuch baʼaloʼob» (Luc. 16:10). Máans ta tuukul bix jeʼel u bintech yoʼolal baʼaxoʼob ku yaʼalaʼaltech ka a beeteʼ yéetel aʼal baʼaxten maʼ ta beetik.

Maʼ a chiʼichnaktal, maʼ tsaaj ka a tsol yaʼab baʼaloʼob tiʼ a wéet xookoʼobiʼ. Yaan kʼiineʼ chéen kʼaʼabéet a waʼaliktiʼob maʼ ta beetik baʼax ku yaʼalikoʼob. Aʼaltiʼob:

• «Maʼ ken in beete».

• «Teneʼ maʼatech in beetik baʼaloʼob beyoʼ».

• «In waʼalmajteʼex bix in wilik le baʼaloʼob beyoʼ».

Baʼax kʼaʼabéeteʼ u yaʼalik máak tu séebaʼanil yéetel tu jaajil u yóol baʼax ku tuklik. Wa ka beetkeʼ yaan a wilkeʼ maʼ kun xáantal ken u xul u yaʼalikoʼobtech a wéet xookoʼob ka beet wa baʼax tu yéeteloʼob.

Maʼ xaaneʼ a wéet xookoʼobeʼ ku yaʼalikoʼobtech: «¿Baʼax yaantech beyaʼ? ¿Saajkech?». Lelaʼ bey suukil u yaʼalal utiaʼal u túulchʼintaʼal máak u beet wa baʼax. ¿Baʼax unaj a beetik wa ka aʼalaʼaktech beyoʼ? Jeʼel u páajtal a beetik kaʼapʼéel baʼaleʼ:

• Seguert baʼax ku yaʼalikoʼob. Jeʼel u páajtal a waʼalikeʼ: «Jaaj a tʼaan, teneʼ maʼ tin beetik». Tsʼoʼoleʼ ka tsolik baʼaxten.

• Tsʼáa u naʼatoʼob maʼ maʼalob baʼax ku beetkoʼobiʼ. Tsol baʼaxten maʼ ta beetik, tsʼoʼoleʼ ka waʼalik: «Juntúul máax maʼalob u tuukuleʼ maʼ tu tsʼuʼutsʼ chamal».

Wa maʼ tu xuʼulul u yaʼalikoʼobtech baʼaleʼ, lukʼkechiʼ. Kʼaʼajaktecheʼ, wa maas ka xáantal tu yiknaloʼobeʼ, maas jeʼel a beetik le baʼax ku yaʼalikoʼobtechoʼ. Ken lukʼkech yiknaloʼobeʼ ka weʼesik teech yéeyik baʼax ken a beete.

U jaajileʼ deporsi yaan u yantal máax túulchʼintik máak u beet wa baʼax kʼaas. Chéen baʼaleʼ jeʼel u páajtal a yéeyik baʼax ken a beeteʼ, a waʼalik baʼax ka tuklik yéetel a lukʼul yiknaloʼob. Chéen teech jeʼel a yéeyik baʼax ken a beeteʼ (Josué 24:15).