Lucas 8:1-56
-
Koʼoleloʼob tu yáantoʼob Jesús (1-3)
-
U tsikbalil le máak ku paakʼaloʼ (4-8)
-
Suuk u comparartik baʼax ku kaʼansik (9, 10)
-
Ku tsolik u tsikbalil le máax ku paakʼaloʼ (11-15)
-
Maʼatech u piʼixil junpʼéel lámpara (16-18)
-
U maama yéetel u yíitsʼinoʼob Jesús (19-21)
-
Ku jetsʼik junpʼéel kʼaʼamkach iikʼ (22-25)
-
Ku yokol demonioʼob tiʼ kʼéekʼenoʼob (26-39)
-
U hija Jairo; maʼach u nookʼ Jesús (40-56)
8 Maʼ sen úuch tiʼ leloʼ Jesúseʼ káaj u bin kajalkaaj yéetel tiʼ mejen kajtaliloʼob táan u tsikbaltik le baʼaloʼob maʼalobtak ken u beet* u Reino Diosoʼ.+ Le 12 apóstoloʼob xanoʼ táan kaʼach u binoʼob tu yéetel.
2 Láakʼintaʼab xan tumen jujuntúul koʼoleloʼob tsʼaʼakoʼob yéetel jóoʼsaʼab demonio tiʼob. Ichiloʼobeʼ tiaʼan María le ku yaʼalaʼal Magdalena tiʼoʼ, tiʼ letiʼeʼ jóoʼsaʼab siete demonioʼob.
3 Tiaʼan xan Juana+ u yatan Cuza, le máax ku meyaj tu yotoch Herodesoʼ, bey xan Susana yéetel yaʼab uláakʼ koʼoleloʼob. Le koʼoleloʼobaʼ meyajnajtiʼob baʼaxoʼob yaantiʼob utiaʼal u tsʼáaikoʼob baʼax kʼaʼabéet tiʼ Jesús yéetel tiʼ u apóstoloʼob.+
4 Ka túun tsʼoʼok u muchʼkuba yaʼabkach máakoʼob tu yiknal bey xan le máaxoʼob ku binoʼob tu yéetel kajalkaajoʼ tu tsikbaltajtiʼob lelaʼ:*+
5 «Juntúul máakeʼ jóokʼ paakʼal. Le táan u bin u paakʼaloʼ jujunpʼéel semillaʼobeʼ lúuboʼob teʼ bejoʼ ka pepeʼchaʼataʼaboʼob yéetel luʼukʼoʼob tumen le chʼíichʼoʼoboʼ.+
6 Uláakʼ semillaʼobeʼ lúuboʼob yóoʼ cháaltun, ka tsʼoʼok u jóokʼloʼobeʼ tijoʼob tumen maʼ chʼuul tuʼux yanoʼobiʼ.+
7 Uláakʼ semillaʼobeʼ lúuboʼob ich kʼiʼixoʼob, le ka jóokʼoʼobeʼ múul nuukchajoʼob yéetel le kʼiʼixoʼoboʼ, le oʼolal peʼechʼoʼob tumen le kʼiʼixoʼoboʼ.+
8 Uláakʼ semillaʼobeʼ lúuboʼob yóokʼol maʼalob luʼum, ka tsʼoʼok u jóokʼloʼobeʼ cada junpʼéeleʼ tu tsʼáaj 100 u pʼéelel u yich».+ Ka tsʼoʼok u yaʼalik le baʼaloʼobaʼ Jesúseʼ tu kʼaʼam aʼalaj: «Le máax yaan u xikineʼ u yuʼub baʼax kin waʼalik».+
9 Chéen baʼaleʼ u discípuloʼobeʼ tu kʼáatoʼobtiʼ baʼax u kʼáat u yaʼal le baʼax tu tsikbaltoʼ.+
10 Letiʼeʼ tu yaʼalaj: «Tiʼ teʼexeʼ Dioseʼ ku tsʼáaik a wojéelteʼex le baʼaloʼob taʼakaʼanoʼob* yaan yil yéetel u Reinooʼ, chéen baʼaleʼ le u maasil máakoʼoboʼ maʼ tu naʼatkoʼob le baʼaxoʼob kin tsikbaltikoʼ,*+ tumen kex táan u paakatoʼobeʼ maʼ tu yilkoʼob mix baʼal, yéetel kex táan u yuʼubikoʼob baʼax ku yaʼalaʼaleʼ maʼ tu naʼatkoʼob baʼax u kʼáat u yaʼale.+
11 Lelaʼ letiʼe baʼax u kʼáat u yaʼal le baʼax tin tsikbaltaʼ: le semillaoʼ u tʼaan Dios.+
12 Le semillaʼob lúuboʼob tu jáal le bejoʼ letiʼe máaxoʼob ku chʼenxikintikoʼob u tʼaan Diosoʼ, chéen baʼaleʼ ku taal le Kʼaasilbaʼaloʼ* ku luʼsik u tʼaan Dios tu puksiʼikʼaloʼob utiaʼal maʼ u creerkoʼob yéetel utiaʼal maʼ u salvarkubaʼob.+
13 Le semillaʼob lúuboʼob yóoʼ cháaltunoʼ letiʼe máaxoʼob ku yuʼubikoʼob u tʼaan Dios yéetel ku kʼamkoʼob yéetel kiʼimak óolaloʼ. Chéen baʼaleʼ tumen minaʼan u mootsoʼobeʼ chéen ichil junpʼíit kʼiinoʼob ku creerkoʼob, le kéen probartaʼakoʼobeʼ* ku náachtaloʼob.+
14 Le semillaʼob xan lúuboʼob ich kʼiʼixoʼ letiʼe máaxoʼob ku yuʼubikoʼob u tʼaan Diosoʼ chéen baʼaleʼ ku chaʼik u peʼechʼloʼob tumen le chiʼichnakiloʼoboʼ, le ayikʼaliloʼoboʼ+ yéetel tumen le náaysaj óoloʼob yaan tiʼ le kuxtalaʼ.+ Bey túunoʼ maʼ tu páajtal u kʼantal u yichoʼob.+
15 Chéen baʼaleʼ le semillaʼob lúuboʼob tiʼ maʼalob luʼumoʼ letiʼe máaxoʼob uts u puksiʼikʼaloʼob ku yuʼubikoʼob u tʼaan Diosoʼ, le kéen tsʼoʼokkeʼ ku pʼatkoʼob ichil u puksiʼikʼaloʼob,+ yéetel kex jeʼel baʼalak ka úuchkeʼ maʼ tu xuʼulul u yichankiloʼob.+
16 Mix máak ku tʼabik junpʼéel lámpara* ku tsʼoʼokoleʼ ku makik yéetel junpʼéel kuum wa ku tsʼáaik yáanal junpʼéel cama, baʼaxeʼ ku tsʼáaik kaʼanal, beyoʼ le máaxoʼob kun ookloʼob teʼ najoʼ yaan u yilkoʼob le sáasiloʼ.+
17 Tuláakal baʼal taʼakaʼaneʼ yaan u chíikpajal, tuláakal baʼal jach taʼakaʼan tubeeleʼ yaan u yojéeltaʼal yéetel yaan u chíikbesaʼal.+
18 Le oʼolaleʼ jach chʼenxikinteʼex tubeel baʼax ku yaʼalaʼalteʼex, tumen le máax yaantiʼeʼ yaan u tsʼaʼabal u maasil tiʼ,+ chéen baʼaleʼ le máax minaʼantiʼeʼ tak le bukaʼaj ku tuklik yaantiʼoʼ yaan u luʼsaʼaltiʼ».+
19 U maama túun yéetel u yíitsʼinoʼob+ Jesúseʼ taaloʼob teʼ tuʼux yanoʼ, chéen baʼaleʼ maʼ páajchaj u náatsʼloʼob tu yiknaliʼ tumen jach yaʼab máakoʼob yaniʼ.+
20 Ka túun aʼalaʼabtiʼ: «A maama yéetel a wíitsʼinoʼobeʼ tiʼ waʼalakbaloʼob táankabeʼ, u kʼáat u yilechoʼob».
21 Letiʼeʼ tu núukajtiʼob: «In maama yéetel in wíitsʼinoʼobeʼ letiʼe jeʼeloʼobaʼ, tumen ku yuʼubikoʼob u tʼaan Dios yéetel ku beetkoʼob baʼax ku yaʼalik».+
22 Junpʼéel kʼiin túuneʼ Jesúseʼ naʼak tiʼ junpʼéel barco yéetel u discípuloʼobeʼ ka tu yaʼalajtiʼob: «Koʼoneʼex tuláakʼ u tséel le jaʼoʼ». Ka túun jóokʼ u binbaloʼob.+
23 Chéen baʼaleʼ le táan u binoʼoboʼ Jesúseʼ weeni. Ka túun káaj junpʼéel kʼaʼamkach iikʼ yóokʼol le jaʼoʼ, ka joʼopʼ u yokol jaʼ teʼ barcooʼ yéetel jach taʼaytak kaʼach u búululoʼob.+
24 Ka túun náatsʼoʼob tu yiknaleʼ ka joʼopʼ u yajsikoʼob táan u yaʼalikoʼobtiʼ: «¡J-Kaʼansaj, j-Kaʼansaj, táan k-búulul!». Le ka túun aajeʼ tu kʼeyaj le iikʼ yéetel le jaʼ ku woʼoltikubaoʼ ka túun jéetsʼoʼob, ka pʼáat jejetsʼkil tuláakal.+
25 Ka túun tu yaʼalajtiʼob: «¿Baʼaxten maʼ ta creerkeʼex jeʼel k-áantaʼal tumen Dioseʼ?». Chéen baʼaleʼ letiʼobeʼ tumen jach saajkoʼob yéetel jakʼaʼan u yóoloʼobeʼ káaj u yaʼalikoʼob tu baatsiloʼob: «¿Jach máax le máakaʼ? Tumen letiʼeʼ ku yaʼalik tiʼ le iikʼ yéetel tiʼ le jaʼ baʼax u kʼáat ka u beetoʼoboʼ, letiʼob túuneʼ ku yuʼubikoʼob u tʼaan».+
26 Ka tsʼoʼokeʼ kʼuchoʼob tu luʼum le gerasenoʼoboʼ,+ lelaʼ tiʼ yaan kaʼach aktáan tiʼ Galileaeʼ.
27 Le ka éem Jesús teʼ barcooʼ tu yilaj juntúul u kajnáalil le kaaj okaʼan juntúul demonio tiʼoʼ. Le máakaʼ jach úuch pʼáatak maʼatech u búukintik nookʼ yéetel maʼ kajaʼan tiʼ junpʼéel najiʼ baʼaxeʼ tiʼ junpʼéel cementerio.+
28 Le ka tu yilaj Jesúseʼ awatnaji yéetel xolaj tu táan, ka tu kʼaʼam aʼalaj: «¿Baʼax yaan in wil ta wéetel, Jesús, u Paal le Maas Nojoch Diosoʼ? Kin kʼáat óoltiktech maʼ a castigarken».*+
29 (Le demoniooʼ úuch káajak u yokol tiʼ le máakoʼ,* le oʼolal Jesúseʼ táan kaʼach u yaʼaliktiʼ ka jóokʼok. Le máakoʼ yaʼab u téenel tsʼoʼok u kʼaʼaxal u kʼaboʼob+ bey xan u yookoʼob yéetel cadena, yéetel ku kanáantaʼal kaʼach utiaʼal maʼ u púutsʼul, chéen baʼaleʼ ku tʼokik le cadenaoʼ, yéetel ku beetaʼal u bin tumen le demonio teʼ tuʼuxoʼob mix máak yanoʼ).
30 Jesúseʼ tu kʼáatajtiʼ: «¿Bix a kʼaabaʼ?». Letiʼeʼ tu yaʼalaj: «In kʼaabaʼeʼ Legión».* Leloʼ bey tu yaʼaliloʼ tumen yaʼab demonioʼob okaʼan kaʼach tiʼ le máakoʼ.
31 Letiʼobeʼ tu sen kʼáatoʼobtiʼ maʼ u túuxtaʼaloʼob tiʼ junpʼéel taamkach jool.+
32 Naatsʼ teʼ tuʼux yanoʼoboʼ yaan yaʼabkach kʼéekʼenoʼob+ táan u janaloʼob teʼ montañaoʼ. Le demonioʼob túunoʼ tu kʼáat óoltoʼob tiʼ Jesús ka chaʼabak u yookloʼob tiʼ le kʼéekʼenoʼoboʼ, Jesús túuneʼ tu chaʼajtiʼob.+
33 Le demonioʼoboʼ jóokʼoʼob tiʼ le máakoʼ ka ookoʼob tiʼ le kʼéekʼenoʼoboʼ; le yaʼabkach kʼéekʼenoʼob túunoʼ tu pulubaʼob ichil le jaʼ desde teʼ sen kaʼanal lugar tuʼux yanoʼoboʼ ka búuloʼob.
34 Le máaxoʼob kanáantik le kʼéekʼenoʼoboʼ le ka tu yiloʼob le baʼax úuchoʼ púutsʼoʼobeʼ ka bin u yaʼaloʼob teʼ kaajoʼ bey xan teʼ mejen kajtaliloʼoboʼ.
35 Le máakoʼob túunoʼ jóokʼ u yiloʼob le baʼax tsʼoʼok u yúuchloʼ, ka taaloʼob yiknal Jesús. Le ka kʼuchoʼobeʼ tu yiloʼobeʼ le máak okaʼan kaʼach demonioʼob tiʼoʼ u búukintmaj u nookʼ, tu yóol yaan yéetel tiʼ kulukbal yiknal Jesúseʼ, ka túun jach sajakchajoʼob.
36 Le máaxoʼob il le baʼax úuchoʼ tu tsikbaltoʼob tiʼ le máakoʼob bix úuchik u tsʼaʼakal le máak chukaʼan kaʼach tumen demoniooʼ.
37 Yaʼab túun tiʼ le máaxoʼob kajaʼanoʼob teʼeloʼ tumen jach sajakchajoʼobeʼ tu yaʼaloʼob tiʼ Jesús ka lukʼuk tu yiknaloʼob. Letiʼ túuneʼ naʼak teʼ barcooʼ ka joʼopʼ u náachtal tiʼ letiʼob.
38 Pero le máak chukaʼan kaʼach tumen le demonioʼoboʼ tu sen kʼáataj tiʼ Jesús ka u chaʼa u bin tu yéetel. Chéen baʼaleʼ Jesúseʼ maʼ tu chaʼajtiʼiʼ, baʼaxeʼ tu yaʼalajtiʼ:+
39 «Suunen ta wotoch, yéetel maʼ u xuʼulul a tsikbaltik le baʼaxoʼob tu beetaj Dios ta woʼolaloʼ». Le máak túunoʼ bineʼ ka joʼopʼ u tsikbaltik ichil tuláakal le kaaj le baʼaxoʼob tu beetaj Jesús tu yoʼolaloʼ.
40 Le ka suunaj Jesús tuláakʼ u tséel le jaʼoʼ jach maʼalob úuchik u kʼaʼamal tumen yaʼabkach máakoʼob, tumen letiʼobeʼ táan kaʼach u jach páaʼtkoʼob u kʼuchul.+
41 Teʼ súutuk jeʼeloʼ taal Jairo, letiʼeʼ juntúul u nojchil le sinagogaoʼ, le ka kʼucheʼ tu xóolkʼabtuba tu táan Jesúseʼ ka joʼopʼ u sen kʼáatiktiʼ ka xiʼik tu yotoch.+
42 Bey tu beetiloʼ tumen u juntúuliliʼ hijaeʼ táan kaʼach u kíimil, le chan x-chʼúupaloʼ yaan kaʼach 12 años tiʼ.
Le táan u bin Jesúsoʼ táan kaʼach u peʼepechʼaʼal tumen le máakoʼoboʼ.
43 Ichiloʼobeʼ tiaʼan kaʼach juntúul koʼolel tsʼoʼok 12 años káajak u sen máan kʼiʼikʼ tiʼ,+ yéetel maʼ páatak u tsʼaʼakal tumen mix máakiʼ.+
44 Le koʼolelaʼ náatsʼ paachil tiʼ Jesúseʼ ka tu machaj u flecoil u nookʼ,+ le koʼolel túunaʼ tu séebaʼanil xuʼul u sen máan kʼiʼikʼ tiʼ.
45 Jesús túuneʼ tu yaʼalaj: «¿Máax machen?». Tuláakal le máakoʼoboʼ tu yaʼaloʼob maʼ letiʼob machiʼ, le oʼolal Pedroeʼ tu yaʼalaj: «J-Kaʼansaj, baʼpachtaʼanech tumen yaʼabkach máakoʼob yéetel táan u sen peʼepechʼkechoʼob».+
46 Chéen baʼaleʼ Jesúseʼ tu yaʼalaj: «Yaan máax machen, tumen in wojel yaan poder+ tsʼoʼok u jóokʼol tiʼ teen».
47 Le koʼolel túunoʼ ka tu yilaj tsʼoʼok u yojéeltaʼal le baʼax tu beetoʼ taaleʼ ka xolaj tu táan Jesús táan u kikilankil, ka tu tsikbaltaj tu táan tuláakal le máakoʼob baʼax oʼolal tu machoʼ, bey xan bix úuchik u yutstal tu séebaʼanil.
48 Le oʼolal Jesúseʼ tu yaʼalajtiʼ: «Hija, tu yoʼolal a fejeʼ tsʼoʼok a wutstal, xeen, xuʼuluk a chiʼichnaktal».+
49 Le táan u tʼaan Jesúsoʼ taal juntúul máak ku meyaj tu yotoch le u nojchil le sinagogaoʼ ka tu yaʼalaj: «A hijaeʼ tsʼoʼok u kíimil. Aʼal tiʼ le j-Kaʼansaj maʼ tsaaj ka taalakoʼ».+
50 Ka tu yuʼubaj Jesús lelaʼ tu yaʼalaj tiʼ Jairo: «Maʼ a chʼaʼik saajkil, chéen eʼes yaan a fe, a hijaeʼ yaan u salvarkuba».+
51 Ka kʼuch teʼ najoʼ chéen tu chaʼaj u yokol Pedro, Juan, Santiago bey xan u taata yéetel u maama le chan x-chʼúupaloʼ.
52 Le u maasil máakoʼoboʼ táan kaʼach u yokʼoloʼob yéetel u loxik u tseemoʼob tumen jach yaachajaʼan u yóoloʼob úuchik u kíimil le chan x-chʼúupaloʼ. Jesús túuneʼ tu yaʼalaj: «Xuʼuluk a wokʼoleʼex,+ tumen maʼ kimeniʼ, chéen táan u wenel».+
53 Yoʼolal lelaʼ káaj u cheʼejtaʼal tumen le máakoʼoboʼ, tumen u yojloʼob kimen le chan x-chʼúupaloʼ.
54 Jesús túuneʼ tu machaj u kʼab le chan x-chʼúupaloʼ ka tu kʼaʼam aʼalaj: «Chan x-chʼúupal, ¡líiʼkech!».+
55 Letiʼ túuneʼ kuxlaj*+ tu kaʼatéeneʼ ka líikʼ tu séebaʼanil,+ Jesús túuneʼ tu yaʼalaj ka tsʼaʼabak baʼal u jaant le chan x-chʼúupaloʼ.
56 U taataʼobeʼ jach jaʼakʼ u yóoloʼob, chéen baʼaleʼ Jesúseʼ tu yaʼalajtiʼob maʼ u tsikbaltikoʼob tiʼ mix máak le baʼax tsʼoʼok u yúuchloʼ.+
Notas
^ Wa «u maʼalob péektsilil».
^ Wa «tu yaʼalajtiʼob le kettʼaanaʼ».
^ Wa «baʼaloʼob santoʼob taʼakaʼanoʼob».
^ Wa «le ejemplos kin tsʼáaikoʼ».
^ Ich griegoeʼ ku yaʼalaʼal kaʼach «Diablo».
^ Wa «le kéen túuntaʼak u yóoloʼobeʼ».
^ Ilawil página 2568.
^ Wa «maʼ a beetik in muʼyaj».
^ Uláakʼ bix u traducirtaʼaleʼ «tsʼoʼok u máan kʼiin u mach le máakoʼ».
^ Le tʼaan legiónoʼ ku meyaj kaʼach utiaʼal u xoʼokol u soldadoiloʼob Roma. Tiʼ junpʼéel legióneʼ ku tuklaʼal kaʼacheʼ yaan 4,000 wa tak 6,000 soldadoʼobiʼ.
^ Wa «suunaj u muukʼil u kuxtal».
