Jueces 17:1-13
-
U imagenoʼob yéetel u sacerdote Miqueas (1-13)
17 Teʼ montañaʼob yaan Efraínoʼ+ tiʼ kajaʼan kaʼach juntúul máak ku kʼaabaʼtik Miqueasiʼ.
2 Junpʼéel kʼiineʼ tu yaʼalaj tiʼ u maama: «¿Kʼajaʼantech le 1,100 u pʼéelel baʼaloʼob de plata chʼaʼabtech le oʼolal ta maldecirtaj le máax chʼaʼamil yéetel tin wuʼuyaj a waʼalikoʼ? U jaajileʼ teen chʼaʼamil le baʼaloʼob de plataoʼ, tiaʼanoʼob tin wiknaleʼ». Ka tu yuʼubaj u maamaeʼ tu yaʼalaj: «Ka bendecirtaʼak in hijo tumen Jéeoba».
3 Letiʼ túuneʼ tu sutaj tiʼ u maama le 1,100 u pʼéelel baʼaloʼob de plataoʼ, chéen baʼaleʼ u maamaeʼ tu yaʼalajtiʼ: «Teneʼ yaan in santificartik le plata tiʼ Jéeobaoʼ, in kʼáat ka meyajnaktech utiaʼal u beetaʼal junpʼéel póolbil imagen yéetel junpʼéel imagen de metal.+ Beyoʼ yaan a tiaʼalintik le plataoʼ».
4 Le ka tsʼoʼok u sutik Miqueas le plata tiʼ u maamaoʼ, u maamaeʼ tu chʼaʼaj 200 u pʼéelel baʼaloʼob de plataeʼ ka tu tsʼáaj tiʼ juntúul máax ku meyajtik plata. Le máak túunoʼ tu beetaj junpʼéel póolbil imagen yéetel junpʼéel imagen de metal, ka tsʼoʼokeʼ bisaʼab le imagenoʼob tu yotoch Miqueasoʼ.
5 Tiʼ Miqueaseʼ yaan kaʼach junpʼéel naj tuʼux yaan u diosoʼob. Letiʼeʼ tu beetaj junpʼéel efod*+ bey xan imagenoʼobeʼ*+ ka tu tsʼáaj juntúul u hijo u beet u sacerdoteil.+
6 Teʼ kʼiinoʼob jeʼeloʼ minaʼan kaʼach juntúul rey tu luʼumil Israel,+ cada juntúuleʼ ku beetik kaʼach le baʼax maʼalob u yilkeʼ.*+
7 Teʼ kʼiinoʼob xanoʼ yaan kaʼach juntúul táankelem xiʼipal ku taal tiʼ u paalal Judá, letiʼeʼ tiʼ kajaʼan kaʼach tu kaajil Belén+ tu luʼumil Judáeʼ. Letiʼeʼ levita+ yéetel tsʼoʼok u chan máan kʼiin kajlak teʼeloʼ.
8 Le xiʼipal túunaʼ lukʼ tu kaajil Belén tu luʼumil Judá utiaʼal u bin u kaxt tuʼux u kajtal. Le táan u binoʼ kʼuch tu yotoch Miqueas,+ tu montañailoʼob Efraín.
9 Miqueas túuneʼ tu yaʼalaj tiʼ le xiʼipaloʼ: «¿Tuʼux a taal?». Le xiʼipaloʼ tu yaʼalaj: «Teneʼ levitaen, tiʼ in taal tu kaajil Belén tu luʼumil Judáeʼ. Táan in kaxtik tuʼux in kajtal».
10 Miqueas túuneʼ tu yaʼalaj tiʼ le xiʼipaloʼ: «Pʼáaten tin wiknal utiaʼal a kʼuchul a beetaba in papá* yéetel in sacerdote. Teen túuneʼ cada añoeʼ yaan in tsʼáaiktech diez u pʼéelel baʼaloʼob de plata, junpʼéel muda nookʼ bey xan a woʼoch». Le levita túunoʼ ook teʼ najoʼ.
11 Le levitaoʼ tu yóotaj pʼáatal yéetel Miqueas, ka tsʼoʼokeʼ le xiʼipaloʼ pʼáat bey juntúul u paaleʼ.
12 Miqueas xaneʼ tu tsʼáaj le levita u beet u sacerdoteiloʼ.+ Le xiʼipaloʼ tiʼ kajaʼan kaʼach tu yotoch Miqueaseʼ.
13 Ka tsʼoʼokeʼ Miqueaseʼ tu yaʼalaj: «Beoraaʼ jach in wojel yaan u yeʼesikten u yutsil Jéeoba, tumen le levitaoʼ tsʼoʼok u kʼuchul u beetuba in sacerdote».
Notas
^ Lelaʼ bey junpʼéel mandileʼ.
^ Wa «imagenoʼob de terafim». Ilawil «Terafim», página 2582.
^ Wa «le baʼax ku tuklik maʼalobeʼ».
^ Wa «consejero».
