Job 9:1-35
9 Job túuneʼ tu yaʼalaj:
2 «In wojel jach tu jaajil beyoʼ,pero juntúul kʼeban máakeʼ, ¿bix jeʼel u ganartik junpʼéel juicio tu contra Dioseʼ?+
3 Wa yaan máax taak u bin juicio tu yéeteleʼ,+kex ka beetaʼaktiʼ mil kʼáatchiʼob tumen Dioseʼ mix junpʼéel ken u núukiʼ.
4 Dioseʼ jach yaan u naʼat* yéetel jach táaj yaan u poder,+¿máax jeʼel u líikʼil tu contra sin ke u yúuchul mix baʼal tiʼeʼ?+
5 Letiʼeʼ ku péeksik montañaʼob sin ke u yojéeltaʼal tumen mix máak,le kéen pʼuʼujukeʼ ku beetik u níikloʼob.
6 Letiʼeʼ ku tíitik le luʼumoʼ, ku luʼsik tu lugar,ku beetik u péek le columnaʼob tuʼux etsʼekbaloʼ.+
7 Ku yaʼalik tiʼ le Kʼiin maʼ u juul u sáasiloʼ,yéetel ku pixik le estrellaʼob utiaʼal maʼ u juuloʼoboʼ.+
8 Tu juunal ku jayik le kaʼanoʼ,+yéetel ku pepeʼchaʼatik u nukuch olasil le kʼáaʼnáaboʼ.+
9 Letiʼ beet le múuchʼ estrellaʼob ku kʼaabaʼtik Ash,* Kesil* yéetel Kimá,*+bey xan tuláakal le u múumuchʼal estrellaʼob yanoʼob noojoloʼ.*
10 Ku beetik nukuch baʼaloʼob maʼ tu páajtal u naʼatik máak,+kiʼichkelem baʼaloʼob maʼ tu páajtal u xoʼokloʼob.+
11 Letiʼeʼ ku máan tin tséel, pero maʼ tu páajtal in wilik.
Ku máan tin táan, pero mix tin wojéeltik.
12 Le kéen u tok wa baʼaxeʼ, ¿máax jeʼel u beetik frente tiʼeʼ?
¿Máax jeʼel u yaʼaliktiʼ: ‹¿Baʼax ka beetik?›?+
13 Le kéen pʼuʼujuk Dioseʼ+tak le máaxoʼob áantik Raab*+ kun chintaloʼob tu táanoʼ.
14 ¿Kux túun teen? ¿Maʼ wa maas unaj in kanáantikbaʼax ken in waʼal kéen yanaken tu táaniʼ?
15 Le oʼolaleʼ kex wa yaan razón teneʼ, maʼ kin tʼaan.+
Chéen jeʼel u páajtal in kʼáatik tiʼ in juez ka u chʼaʼten óotsilileʼ.
16 Wa ka in kʼáat wa baʼax tiʼeʼ, ¿jeʼel wa u núukikeʼ?
In waʼalikeʼ maʼ ken u yuʼube.
17 Letiʼeʼ ku pechʼken yéetel le baʼaxoʼob ku beetik u yúuchultenoʼ, beyoʼob junpʼéel kʼaʼamkach iikʼeʼ,ku beetik in maas muʼyaj kex minaʼan baʼax oʼolal.+
18 Maʼ tu chaʼik in chʼaʼik in wiikʼ,ku beetik u maas antalten problemas.
19 Wa yoʼolal podereʼ, letiʼeʼ maas yaan u poder.+
Wa yoʼolal justiciaeʼ, letiʼeʼ ku yaʼalik: ‹¿Máax jeʼel u atrever u tak in pooleʼ?›.*
20 Kex wa yaan razón teneʼ, in chiʼ kun culparken.
Kex chúukaʼan in wóol in beet baʼax maʼalobeʼ, letiʼeʼ yaan u yaʼalik yaan baʼax kʼaas kin beetik.
21 Kex chúukaʼan in wóol in beet baʼax maʼalobeʼ maʼ in wojel baʼax kun úuchulteniʼ,le oʼolal in pʼekmaj le kuxtal yaantenaʼ.
22 Le oʼolal kin waʼalik:
‹Letiʼeʼ ku xuʼulsik le máaxoʼob utsoʼob* paʼteʼ yéetel le máaxoʼob kʼasaʼanoʼoboʼ›.
23 Wa de repente ka taalak junpʼéel nojoch loob ka u kíims yaʼab máakoʼobeʼ,letiʼeʼ yaan u cheʼejtik baʼax ku yúuchul tiʼ le máax mix baʼal kʼaas u beetmoʼ.
24 Letiʼeʼ u kʼubmaj le luʼum tiʼ le kʼasaʼan máakoʼoboʼ+yéetel ku pixik u yich le juezoʼoboʼ.
Wa maʼ letiʼ beetkeʼ, ¿máax túun beetik?
25 Bejlaʼeʼ u kʼiiniloʼob in kuxtaleʼ maas chich u binoʼob ke juntúul máak chich u yáalkab,+mix baʼal ku páajtal in disfrutartik.
26 Ku kʼáatmáanoʼob jeʼex le mejen barcoʼob de caña chich u binoʼoboʼ,beyoʼob xan jeʼex le águilaʼob chich u yéemloʼob tu tojil le baʼax taak u chukikoʼoboʼ.
27 Wa kin waʼalik: ‹¡Yaan in pʼatik beyoʼ! Maʼ ken in quejartinba,baʼaxeʼ yaan in weʼesik kiʼimak in wóol›,
28 kex beyoʼ le baʼaxoʼob kin muʼyajtikoʼ yaan u beetkoʼob in sajaktal,+in wojel letiʼeʼ yaan u yaʼalik yaan baʼax kʼaas in beetmaj.
29 Yaan u yaʼalik kʼasaʼan máaken,le oʼolaleʼ, ¿baʼax u biilal kin kíimskinba in weʼes mix baʼal kʼaas in beetmaj?+
30 Kex ka ichkíilnaken yéetel jaʼ jach limpio*yéetel ka in pʼoʼ in kʼab yéetel u jaʼil lejíaeʼ,+
31 letiʼeʼ yaan u tʼubiken ichil junpʼéel jool tuʼux yaan luukʼ,kéen tsʼoʼokkeʼ tak in nookʼ kun pʼektiken.
32 Dioseʼ maʼ in wéet máakil utiaʼal ka in núuk baʼax ku yaʼalikiʼ,yéetel ka in bis tu táan jueziʼ.+
33 Ichil kaʼatúuloʼoneʼ mix máak jeʼel u waʼatal u yaʼal máax culpable yéetel máax inocenteeʼ.
Mix máak jeʼel u páajtal u juzgarkoʼoneʼ.*
34 Wa ka xuʼuluk u jatsʼiken,yéetel ka xuʼuluk u jaʼasik in wóoleʼ,+
35 maʼ kin sajaktal tʼaan tu yéetel,tumen teneʼ wa saajkeneʼ maʼ tin tʼaan.
Notas
^ Ich hebreoeʼ ku yaʼalaʼal kaʼach «jach yaan u naʼat u puksiʼikʼal».
^ Maʼ xaaneʼ letiʼe constelación wa le múuchʼ estrellaʼob ku kʼaabaʼtik Osa Mayoroʼ.
^ Maʼ xaaneʼ letiʼe constelación wa le múuchʼ estrellaʼob ku kʼaabaʼtik Oriónoʼ.
^ Maʼ xaaneʼ letiʼe estrellaʼob ku kʼaabaʼtik Pléyades yaan ichil le constelación wa le múuchʼ estrellaʼob ku kʼaabaʼtik Taurooʼ.
^ Wa «sur».
^ Maʼ xaaneʼ juntúul nojoch baʼalcheʼ kajaʼan kʼáaʼnáab.
^ Ich hebreoeʼ ku yaʼalaʼal kaʼach «u beet in tʼaʼanleʼ».
^ Wa «le máaxoʼob ku beetkoʼob baʼax maʼalob».
^ Ich hebreoeʼ ku yaʼalaʼal kaʼach «u jaʼil nieve».
^ Ich hebreoeʼ ku yaʼalaʼal kaʼach «u tsʼáaik u kʼab t-óokʼoleʼ».
