Hebreos 1:1-14
1 Desde úuchjeakileʼ Dioseʼ yaʼab u téenel tu tʼanaj k-úuchben láakʼtsiloʼob, tu tʼanoʼob yéetel u chiʼ le profetaʼoboʼ bey xan uláakʼ jejeláas bixi.+
2 Teʼ tu tsʼook kʼiinoʼob xanaʼ letiʼeʼ tsʼoʼok u tʼankoʼon yéetel u chiʼ u Paal,+ le máax tu yéeyaj utiaʼal u pʼatik tuláakal baʼal tiʼoʼ,+ le máax oʼolal beetaʼab xan tuláakal le baʼaloʼob yanoʼoboʼ.+
3 Le Paaloʼ letiʼ eʼesik bix u kiʼichkelmil Dios,+ letiʼ chíikbesik tubeel bix Dios.+ Letiʼeʼ yéetel le tʼaan jach yaan u muukʼoʼ ku kanáantik maʼ u saʼatal mix baʼal. Le Paaloʼ ka tsʼoʼok u pʼoʼikoʼon tiʼ k-kʼebanoʼobeʼ+ kulaj tu x-noʼoj kʼab le Nojoch Dios yaan teʼ kaʼanoʼ.+
4 Le oʼolal tsʼoʼok u kʼuchul u beetuba maas nojoch ke le ángeloʼoboʼ+ yéetel tsʼoʼok tak u tsʼaʼabal junpʼéel u kʼaabaʼ maas kiʼichkelem ke le u tiaʼaloʼoboʼ.+
5 Tumen ¿máakalmáak tiʼ le ángeloʼob tsʼoʼok u yaʼalaʼaltiʼ tumen Dios lelaʼ?: «Techeʼ in hijoech, bejlaʼeʼ tsʼoʼok in kʼuchul in beetinba a taata».+ ¿Tu yoʼolal máakalmáak tiʼ le ángeloʼob tsʼoʼok u yaʼalaʼal lelaʼ?: «Teneʼ yaan in kʼuchul in beetinba u taata yéetel letiʼeʼ yaan u kʼuchul u beetuba in hijo».+
6 Dioseʼ le kéen u túuxt tu kaʼatéen u Yáax Paal+ way luʼumeʼ yaan u yaʼalik: «Tuláakal u ángeloʼob Dioseʼ xolakoʼob tu táan».
7 Tu yoʼolal le ángeloʼoboʼ ku yaʼalik: «A ángeloʼobeʼ bey de iikʼ a beetmiloʼobeʼ, le máaxoʼob meyajtikechoʼ*+ beyoʼob u tóochʼbal kʼáakʼeʼ».+
8 Chéen baʼaleʼ tu yoʼolal u Paaleʼ ku yaʼalik: «Dios tsʼáaiktech autoridad*+ utiaʼal mantatsʼ, le xóolteʼ ikil a gobernaroʼ ku meyaj utiaʼal a beetik justicia.
9 Ta yaabiltaj le justiciaoʼ ka ta pʼektaj baʼax kʼaas. Le oʼolal Dioseʼ tu yalaj aceite ta pool utiaʼal u yéeyikech,+ tu beetaj u maas kiʼimaktal a wóol tiʼ u maasil reyoʼoboʼ».+
10 U tʼaan Dioseʼ ku yaʼalik xan: «Tu káajbaleʼ, Kiʼichkelem Yuum, teech beet u cimientoil le luʼumoʼ, tsʼoʼoleʼ yéetel a kʼaboʼob xan ta beetaj le kaʼanoʼ.
11 Le baʼaloʼobaʼ yaan u xuʼulultiʼob, pero techeʼ mix bikʼin u xuʼulultech, yaan u xuʼupuloʼob jeʼex u xuʼupul* junpʼéel nookʼeʼ,
12 yéetel yaan a pakikoʼob jeʼex u paʼakal junpʼéel chowak nookʼeʼ, wa jeʼex u paʼakal junpʼéel nookʼ ku búukintaʼaleʼ. Le baʼaloʼobaʼ yaan u kʼeʼexloʼob jeʼex u kʼeʼexel junpʼéel nookʼeʼ, pero techeʼ maʼ kan kʼexpajal, mix bikʼin u xuʼulultech».+
13 ¿Máakalmáak tiʼ le ángeloʼob tsʼoʼok u yaʼalaʼaltiʼ tumen Dios lelaʼ?: «Kulen tin x-noʼoj kʼab utiaʼal ka a páaʼt in tsʼáaik a enemigoʼob bey junpʼéel kʼáancheʼ utiaʼal a tsʼáaik a wookoʼobeʼ».+
14 U jaajileʼ tuláakal le ángeloʼoboʼ beetaʼanoʼob utiaʼal u meyajtikoʼob Dios+ yéetel túuxtaʼanoʼob utiaʼal u yáantoʼob le máaxoʼob kun salvarbiloʼoboʼ.
Notas
^ Wa «le máaxoʼob ku meyajoʼob utiaʼal u yutsil u maasiloʼ».
^ Ich griegoeʼ ku yaʼalaʼal kaʼach «Dioseʼ a trono».
^ Wa «u laʼabaloʼob jeʼex u laʼabal».
