Ezequiel 42:1-20
42 Letiʼ túuneʼ tu bisen teʼ nojoch táankaboʼ, tu tojil xaman.+ Le ka tsʼoʼokeʼ tu bisen teʼ lugar tuʼux yaan le cuartoʼob tuʼux ku yúuchul janaloʼ, le yaan tu tséel le espacio+ yéetel tu xamanil le nojoch naj yaan tséelikoʼ.+
2 Le lugaraʼ tiaʼan tu tojil le entrada yaan xamanoʼ, u chowakileʼ 100 codos* yéetel 50 codos u kóochil.
3 Le lugaraʼ tiaʼan entre le chan táankab ku pʼisik 20 codos u kóochil+ yéetel le piso de tuunich yaan teʼ nojoch táankaboʼ. Óoxpʼéel piso yaantiʼ yéetel yaan u pasilloiloʼob, aktáan yaniloʼob kaʼach tiʼ uláakʼ pasilloʼob.
4 Aktáan tiʼ le cuartoʼob tuʼux ku yúuchul janaloʼ yaan kaʼach junpʼéel pasillo+ de 10 codos u kóochil yéetel 100 codos u chowakil,* u jooliloʼobeʼ tiaʼanoʼob kaʼach tu tojil xamaneʼ.
5 Tu yoʼolal le pasillo yaantiʼoboʼ le cuartoʼob yanoʼob teʼ piso yaan maas kaʼanaloʼ maas mejentakoʼob tiʼ le yanoʼob maas kabaloʼ bey xan tiʼ le yanoʼob chúumukoʼ.
6 Kex óoxpʼéel piso yaantiʼobeʼ minaʼan u columnailoʼob jeʼex le yanoʼob teʼ táankaboʼoboʼ. Le oʼolal le piso yaan maas kaʼanaloʼ maas chichan tiʼ le piso yaan chúumukoʼ bey xan tiʼ le piso yaan maas kabaloʼ.
7 Naatsʼ tiʼ le cuartoʼob tuʼux ku yúuchul janal yanoʼob tu jáalik le nojoch táankaboʼ yaan kaʼach junpʼéel pakʼ de tuunich 50 codos u chowakil, lelaʼ tiaʼan kaʼach aktáan tiʼ le uláakʼ cuartoʼob tuʼux ku yúuchul janaloʼ.
8 Tumen le cuartoʼob tuʼux ku yúuchul janal yanoʼob tu jáalik le nojoch táankaboʼ 50 codos u chowakiloʼob, chéen baʼaleʼ le yanoʼob tu tojil le templooʼ 100 codos u chowakiloʼob.
9 Tu tojil lakʼineʼ yaan kaʼach junpʼéel jool utiaʼal u yokol máak teʼ cuartoʼob tuʼux ku yúuchul janaloʼ, teʼeloʼ jeʼel u páajtal u yokol máak wa ku taal desde teʼ nojoch táankaboʼ.
10 Noojoleʼ yaan xan kaʼach cuartoʼob tuʼux ku yúuchul janal. Tu lakʼinil le cuartoʼobaʼ tiaʼan kaʼach junpʼéel pakʼ de tuunichiʼ, lelaʼ tiaʼan tu tséel le táankaboʼ. Le cuartoʼoboʼ tiaʼanoʼob kaʼach naatsʼ tiʼ le espaciooʼ bey xan tiʼ le nojoch najoʼ.+
11 Aktáan tiʼ le cuartoʼoboʼ yaan xan junpʼéel pasillo jeʼel bix le yaan aktáan tiʼ le cuartoʼob tuʼux ku yúuchul janal yaan xamanoʼ,+ igual u chowakiloʼob, u kóochiloʼob, u jooliloʼob bey xan bix beetaʼaniloʼob. U jooliloʼobeʼ
12 bey jeʼex u jooliloʼob le cuartoʼob tuʼux ku yúuchul janal yaan noojoloʼ. Yaan kaʼach junpʼéel jool tuʼux ku káajal le pasillooʼ, lelaʼ tiaʼan kaʼach aktáan tiʼ le pakʼ de tuunich yaan lakʼinoʼ, teʼeloʼ jeʼel u páajtal kaʼach u yokol máakeʼ.+
13 Le ka tsʼoʼokeʼ letiʼeʼ tu yaʼalajten: «Le cuartoʼob tuʼux ku yúuchul janal yaan xaman bey xan noojoloʼ santoʼob, le cuartoʼobaʼ tiaʼanoʼob tu tséel le espaciooʼ.+ Teʼ cuartoʼoboʼ le sacerdoteʼob ku náatsʼloʼob yiknal Jéeobaoʼ tiʼ ku jaantikoʼob le ofrendaʼob maas jach santoʼoboʼ.+ Tumen santo le lugar jeʼeloʼ tiʼ ku tsʼáaikoʼob le ofrendaʼob maas jach santoʼoboʼ, u ofrendail janal,* le ofrenda yoʼolal le kʼebanoʼ bey xan le ofrenda yoʼolal le culpaoʼ.+
14 Le kéen okok le sacerdoteʼob teʼ lugar santooʼ maʼ unaj u jóokʼloʼob teʼ nojoch táankab yéetel le nookʼ u takmoʼob utiaʼal u beetik u meyajoʼoboʼ+ tumen santo. Unaj u kʼexik u nookʼoʼob antes u jóokʼloʼob teʼ tuʼux ku máan u maasil máakoʼoboʼ».
15 Le ka tsʼoʼok u pʼisik tuláakal le templooʼ tu bisen teʼ entrada yaan lakʼinoʼ ka tu jóoʼsen paachil,+ letiʼ túuneʼ tu pʼisaj tuláakal le jaats jeʼeloʼ.
16 Letiʼeʼ tu pʼisaj le tséel yaan lakʼin yéetel le cheʼ ku meyaj utiaʼal u yúuchul pʼiisoʼ.* Desde tiʼ junpʼéel punta tak tuláakʼ puntaeʼ 500 cheʼob u chowakil.
17 Letiʼeʼ tu pʼisaj le tséel yaan xaman yéetel le u cheʼil pʼiisoʼ, u chowakileʼ 500 cheʼob.
18 Letiʼeʼ tu pʼisaj le tséel yaan noojol yéetel le u cheʼil pʼiisoʼ, u chowakileʼ 500 cheʼob.
19 Letiʼ túuneʼ tu sutuba tu tojil chikʼin. Letiʼeʼ tu pʼisaj 500 cheʼob yéetel le u cheʼil pʼiisoʼ.
20 Letiʼeʼ tu pʼisaj u kantséelil le templooʼ. Tu baʼpacheʼ yaan kaʼach junpʼéel pakʼ+ de 500 cheʼob u chowakil yéetel 500 cheʼob u kóochil.+ Le pakʼoʼ ku jatsik le luʼum santo tiʼ le luʼum maʼ santooʼ.+
Notas
^ Teʼelaʼ táan u tʼaan tiʼ codo largo.
^ Le Septuaginta griegaoʼ ku yaʼalik: «100 codos u chowakil». Le tsʼíib ich hebreooʼ ku yaʼalik «junpʼéel bej de junpʼéel codo». Ilawil «Codo», página 2559.
^ Ilawil «Ofrendail janal», página 2574.
^ Ilawil «U cheʼil pʼiis», página 2689.
