Ezequiel 36:1-38
36 «U paal máak, profetizarnen tu yoʼolal u montañailoʼob Israel, unaj a waʼalik: ‹U montañaileʼex Israel, uʼuyeʼex baʼax ku yaʼalik Jéeoba.
2 Jéeoba, le máax yaan tuláakal autoridad tiʼoʼ, ku yaʼalik: «Le máax pʼekmileʼexoʼ tsʼoʼok u yaʼalik ta contraʼex: ‹¡Maʼalob tiʼob beyoʼ! ¡Tsʼoʼok k-tiaʼalintik tak le kaʼanal lugaroʼob úuchbentakoʼoboʼ!›»›.+
3 Le oʼolal profetizarneneʼ ka a waʼal lelaʼ: ‹Jéeoba, le máax yaan tuláakal autoridad tiʼoʼ, ku yaʼalik: «Le enemigoʼoboʼ tsʼoʼok u beetikteʼex loob yéetel tsʼoʼok u atacarkeʼex jejeláas tuʼuxoʼob utiaʼal ka pʼáatkeʼex tu kʼab le kaajoʼob baʼpachtmileʼexoʼ, yéetel le máakoʼoboʼ maʼ tu xuʼulul u tʼaanoʼob yéetel u yaʼalikoʼob baʼaloʼob maʼ jaajtak ta contraʼexiʼ,+
4 le oʼolaleʼ u montañaileʼex Israel, ¡uʼuyeʼex baʼax ku yaʼalik Jéeoba, le máax yaan tuláakal autoridad tiʼoʼ! Jéeoba, le máax yaan tuláakal autoridad tiʼoʼ, ku yaʼalik tiʼ le montañaʼoboʼ, tiʼ le puʼukoʼoboʼ, tiʼ le ríoʼoboʼ, tiʼ le táax luʼumoʼoboʼ, tiʼ le jutul pakʼoʼoboʼ+ yéetel tiʼ le kaajoʼob xúumpʼattaʼanoʼoboʼ, le tsʼoʼok u chʼaʼabal tuláakal baʼaloʼob yaantiʼob yéetel ku yaʼalaʼaltiʼob baʼal tumen le kaajoʼob baʼpachtmiloʼoboʼ.+
5 Jéeoba, le máax yaan tuláakal autoridad tiʼoʼ, ku yaʼalik tiʼ letiʼob: ‹Tumen jach pʼujaʼaneneʼ+ yaan in tʼaan tu contra le máaxoʼob pʼaatloʼob teʼ kaajoʼoboʼ bey xan tu contra tuláakal Edom. Letiʼobeʼ jach kiʼimak u yóoloʼob yéetel ku burlarkubaʼob+ le kéen u yaʼaloʼob u tiaʼaloʼob le luʼum yaantenoʼ, bey u yaʼalikoʼob chéen utiaʼal u chʼaʼikoʼob le tuʼux yaan suʼukoʼ yéetel utiaʼal u láaj chʼaʼikoʼob le baʼaloʼob yaan teʼ luʼumoʼ›»›.+
6 Le oʼolaleʼ profetizarnen tu yoʼolal u luʼumil Israel. Unaj a waʼalik tiʼ le montañaʼoboʼ, tiʼ le puʼukoʼoboʼ, tiʼ le ríoʼoboʼ yéetel tiʼ le táax luʼumoʼoboʼ: ‹Jéeoba, le máax yaan tuláakal autoridad tiʼoʼ, ku yaʼalik: «¡Uʼuy a wuʼuyeʼex! Teʼexeʼ tsʼoʼok a taasaʼaleʼex mix baʼalil tumen le kaajoʼoboʼ. Le oʼolal ichil in pʼujaʼanil yéetel in kʼuuxileʼ yaan in waʼalik baʼax kun úuchultiʼob»›.+
7 Le oʼolaleʼ Jéeoba, le máax yaan tuláakal autoridad tiʼoʼ, ku yaʼalik: ‹Teneʼ kin líiʼsik in kʼab yéetel kin jurarkeʼ le kaajoʼob yanoʼob ta baʼpacheʼexoʼ yaan u suʼlaktaloʼob.+
8 Chéen baʼaleʼ u montañaileʼex Israel, tiʼ teʼexeʼ yaan u yantal cheʼob kun antal yaʼab u kʼaboʼob yéetel yaʼab u yichoʼob utiaʼal u jaantaʼal tumen in kaajal Israel,+ tumen letiʼobeʼ maʼ kun xáantal ken suunakoʼob.
9 U montañaileʼex Israel, teneʼ tiaʼanen ta wéeteleʼexeʼ, teneʼ yaan in beetik a cuentaileʼex, yaan a meyajtaʼaleʼex yéetel yaan u paʼakʼal semilla ta wóokʼoleʼex.
10 Yaan in yaʼabkuntik a kajnáalileʼex —tuláakal u kaajil Israel, jach tuláakal—, le kaajoʼoboʼ yaan u yantal u kajnáaliloʼob+ yéetel le pakʼoʼob juutloʼoboʼ yaan u jel líiʼsaʼaloʼob.+
11 Teneʼ yaan in yaʼabkuntik a kajnáalileʼex bey xan a walakʼ baʼalcheʼex.+ Letiʼobeʼ yaan u yantal u mejniloʼob yéetel yaan u yaʼabtaloʼob. Yaan in beetik u kaʼa antal a kajnáalileʼex jeʼex úuchjeakileʼ,+ yéetel yaan in beetik u binteʼex maas utsil ke úuchjeakil.+ Teʼex túuneʼ yaan a wojéeltikeʼexeʼ teneʼ Jéeobaen.+
12 Yaan in beetik u xíimbal in kaajal Israel ta wóokʼoleʼex. Letiʼob túuneʼ yaan u tiaʼalintkeʼex. Teʼexeʼ yaan a pʼáatleʼex bey u herenciaʼobeʼ.+ Letiʼobeʼ mix bikʼin ken u chaʼob u pʼáatal minaʼan a paalaleʼex tu kaʼatéen›».+
13 «Jéeoba, le máax yaan tuláakal autoridad tiʼoʼ, ku yaʼalik: ‹Tumen yaan máakoʼob aʼalikoʼobtech: «Techeʼ beyech junpʼéel luʼum ku jaantik máakoʼob yéetel ku pʼatik minaʼan u paalal u kaajiloʼobeʼ»›.
14 ‹Le oʼolaleʼ yaan u xuʼulul a jaantik máakoʼob, yéetel a kaajiloʼobeʼ maʼ ken a kaʼa pʼatoʼob x-maʼ paalalil›, leloʼ bey u yaʼalik Jéeoba, le máax yaan tuláakal autoridad tiʼoʼ.
15 ‹Maʼ ken in chaʼa u seguer u yaʼalaʼaltech baʼal tumen le kaajoʼoboʼ, maʼ ken in beet a muʼyajtik u yaʼalaʼaltech baʼal tumen le máakoʼoboʼ,+ yéetel techeʼ maʼ ken a xuʼuls a kaajiloʼob tu kaʼatéen›, leloʼ bey u yaʼalik Jéeoba, le máax yaan tuláakal autoridad tiʼoʼ».
16 Jéeobaeʼ tu kaʼa tʼaneneʼ ka tu yaʼalajten:
17 «U paal máak, le tiaʼan kaʼach u kaajil Israel tu luʼumoʼ, letiʼobeʼ tu kʼaskúuntoʼob le luʼum tu yoʼolal le baʼaloʼob kʼaastak tu beetoʼoboʼ bey xan tu yoʼolal bix u kuxtaloʼob.+ Tu yoʼolal le baʼaloʼob tu beetoʼoboʼ pʼáatoʼob maʼ limpio yaniloʼob tin táan jeʼex juntúul koʼolel tu kʼiiniloʼob u menstruacióneʼ.+
18 Teen túuneʼ tin láalaj in pʼujaʼanil tu yóokʼoloʼob tu yoʼolal le kʼiʼikʼ tu wekoʼoboʼ yéetel tumen tu kʼaskúuntoʼob le luʼum+ yéetel u x-lalaʼ* imagenoʼoboʼ.+
19 Tu yoʼolal leloʼ teneʼ tin kʼiʼitbesoʼob ichil le kaajoʼoboʼ yéetel tin beetaj u binoʼob tiʼ táanxel luʼumiloʼob.+ Tin juzgartoʼob tu yoʼolal bix u kuxtaloʼob yéetel tu yoʼolal baʼaxoʼob ku beetkoʼob.
20 Chéen baʼaleʼ le ka kʼuchoʼob teʼ luʼumoʼoboʼ joʼopʼ u yaʼalaʼaltiʼob tumen le máakoʼoboʼ: ‹Letiʼobeʼ u kaajal Jéeoba, chéen baʼaleʼ yanchaj u jóokʼloʼob teʼ luʼum tsʼaʼabtiʼob tumen letiʼoʼ›. Bey úuchik u yaʼalaʼal baʼal tiʼ in santo kʼaabaʼoʼ.+
21 Le oʼolal teneʼ yaan baʼax ken in beet tu yoʼolal in santo kʼaabaʼ pʼaʼat kʼaasil tumen u kaajil Israel ichil le kaajoʼob tuʼux binoʼoboʼ».+
22 «Le oʼolaleʼ aʼal tiʼ u kaajil Israel: ‹Jéeoba, le máax yaan tuláakal autoridad tiʼoʼ, ku yaʼalik: «U kaajil Israel, le baʼax ken in beetoʼ maʼ ken in beet ta woʼolaleʼex, baʼaxeʼ tu yoʼolal in santo kʼaabaʼ ta pʼateʼex kʼaasil ichil le kaajoʼob tuʼux bineʼexoʼ»›.+
23 Jéeoba, le máax yaan tuláakal autoridad tiʼoʼ, ku yaʼalik: ‹Teneʼ jach tu jaajil yaan in santificartik le in kiʼichkelem kʼaabaʼ+ pʼaʼat kʼaasil ichil le kaajoʼoboʼ, le kʼaabaʼ ta pʼateʼex kʼaasil ichil le kaajoʼoboʼ. Le kéen u yiloʼob bix in santificarkinba ichileʼexeʼ, letiʼobeʼ yaan u yojéeltikoʼob máax Jéeoba.+
24 Yaan in jóoʼskeʼex ichil le kaajoʼoboʼ, yaan in kaʼa muchʼkíintikeʼex tiʼ tuláakal le luʼumoʼoboʼ yéetel yaan in biskeʼex ta luʼumeʼex.+
25 Yaan in wiʼiwitsʼik jaʼ ta wóokʼoleʼex yéetel yaan a pʼáatleʼex limpioil.+ Yaan in luʼsik tuláakal le baʼaloʼob éekʼkuntikeʼexoʼ+ bey xan tuláakal a x-lalaʼ imageneʼexoʼ.+
26 Yaan in tsʼáaikteʼex junpʼéel túumben puksiʼikʼal+ yéetel junpʼéel túumben tuukul.+ Yaan in luʼsikteʼex le puksiʼikʼal chich bey tuunich yaanteʼexoʼ+ yéetel yaan in tsʼáaikteʼex junpʼéel puksiʼikʼal de bakʼ.*
27 Yaan u meyajten in poder utiaʼal in kʼexik a tuukuleʼex yéetel yaan in beetik a kuxtaleʼex jeʼex uts tin tʼaaneʼ.+ Teʼex túuneʼ yaan a beetkeʼex yéetel yaan a tsʼoʼokbeskeʼex le baʼaxoʼob kin waʼalikoʼ.
28 Bey túunoʼ yaan a kuxtaleʼex teʼ luʼum tin tsʼáaj tiʼ a úuchben láakʼtsileʼexoʼ. Teʼexeʼ yaan a beetkabaʼex in kaajal yéetel teneʼ yaan in beetkinba a Dioseʼex›.+
29 ‹Teneʼ yaan in luʼsik tuláakal le baʼaloʼob éekʼkuntikeʼexoʼ. Yaan in waʼalik tiʼ le neekʼ ka yaʼabchajak u yichoʼ, yéetel maʼ ken in túuxt wiʼijil ta wóokʼoleʼex.+
30 Teneʼ yaan in beetik u yaʼabtal u yich le cheʼoboʼ bey xan u yich le luʼumoʼ, yaan in beetik utiaʼal maʼ a kaʼa suʼlaktaleʼex ichil le kaajoʼob ikil a máanskeʼex wiʼijiloʼ.+
31 Teʼ kʼiinoʼob jeʼeloʼ yaan a kʼaʼajsikeʼex le baʼaloʼob maʼ maʼalobtak ka beetkeʼex kaʼachoʼ bey xan a kʼaakʼas kuxtaleʼex. Teʼex túuneʼ yaan a sen suʼlaktaleʼex tu yoʼolal a kʼebaneʼex yéetel tu yoʼolal le baʼaloʼob sen kʼaastak ka beetkeʼex kaʼachoʼ.+
32 Chéen baʼaleʼ u kaajil Israel, uʼuy a wuʼuyeʼex lelaʼ: maʼ ta woʼolaleʼex kin beetkiʼ+ —ku yaʼalik Jéeoba, le máax yaan tuláakal autoridad tiʼoʼ— baʼax in kʼáateʼ ka a máanseʼex suʼtsilil, yéetel ka a wuʼuyeʼex mix baʼal a biilaleʼex tu yoʼolal le baʼaloʼob ka beetkeʼexoʼ›.
33 Jéeoba, le máax yaan tuláakal autoridad tiʼoʼ, ku yaʼalik: ‹Le kʼiin ken in limpiokíinteʼex tiʼ tuláakal le baʼaloʼob kʼaastak a beetmeʼexoʼ yaan in beetik u kaʼa kajtal máakoʼob teʼ kaajoʼoboʼ+ yéetel yaan in beetik u jel líiʼsaʼal le jutul pakʼoʼoboʼ.+
34 Le luʼum kʼaskúuntaʼab utiaʼal u yilaʼal tumen tuláakal máax ku máanoʼ yaan u kaʼa úuchul paakʼaliʼ.
35 Le máakoʼob túunoʼ yaan u yaʼalikoʼob: «Le luʼum kʼaas yanil kaʼachoʼ tsʼoʼok u pʼáatal bey u jardínil Edéneʼ.+ Le kaajoʼob juutul u pakʼiloʼob, le tuʼux mix máak kajaʼan yéetel kʼaskúuntaʼanoʼoboʼ, beoraaʼ tsʼoʼok u jel líiʼsaʼaloʼob yéetel yaan u kajnáaliloʼob».+
36 Le kaajoʼob kun pʼáatloʼob ta baʼpacheʼexoʼ yaan u yojéeltikoʼobeʼ teen Jéeoba, teen jel líiʼs le baʼax juutul kaʼachoʼ, yéetel tsʼoʼok in jel pakʼik le luʼum tuʼux mix baʼal yaan kaʼachoʼ. Teen Jéeoba, teen aʼale yéetel teen beete›.+
37 Jéeoba, le máax yaan tuláakal autoridad tiʼoʼ, ku yaʼalik: ‹Teneʼ yaan xan in chaʼik u kʼáatikten u kaajil Israel ka in yaʼabkunt u kajnáaliloʼob jeʼex yaʼabkach tamanoʼobeʼ, yéetel yaan in beetik.
38 Jeʼex junmúuchʼ tamanoʼob santoʼobeʼ, jeʼex le yaʼabkach tamanoʼob yanoʼob Jerusalén* tu kʼiiniloʼob le fiestaʼoboʼ,+ bey u yaʼabil le máakoʼob kun chupik le kaajoʼob chéen u jutul pakʼiloʼob pʼaatal kaʼachoʼ.+ Letiʼob túuneʼ yaan u yojéeltikoʼob máax Jéeoba›».
Notas
^ Ich hebreoeʼ le tʼaanaʼ yaan yil yéetel u «taʼ baʼalcheʼ», yéetel ku meyaj utiaʼal u yúuchul tʼaan tiʼ baʼaloʼob pʼektaʼanoʼob.
^ Junpʼéel puksiʼikʼal ku chaʼik u nuʼuktaʼal tumen Dios.
^ Uláakʼ bix u traducirtaʼaleʼ «Jeʼex le tamanoʼob yanoʼob Jerusalén junpáaykuntaʼanoʼob utiaʼal kʼubbil bey ofrendaʼobeʼ».
